Penjo Moa Kuom Josombwa

Ang’o momiyo Yesu ne nyalo wacho ne dhako ma ne ong’ere kaka jaricho ni, owene richone?​—Luka 7:37, 48.

Kane oyudo Yesu obet piny chiemo e od ja Farisai moro miluongo ni Simon, dhako moro ‘nochung’ ka dieng’eye but tiend Yesu.’ Ne obudo tiend Yesu kotiyo gi pi wang’e mi otiyo gi yie wiye e yweyogi. Bang’e ne onyodho tiendene, mowirogi gi mo mang’we ng’ar. Weche mondik e Injili nyiso ni dhakono ne ong’ere e dalano kaka ‘dhako ma jaricho.’ En adier ni dhano duto gin joricho, kata kamano kinde mang’eny Ndiko tiyo gi wachno kiwuoyo kuom ng’at ma richone okalo tong’ kata mong’ere gi tim mar richo. Nyalo bedo ni dhakono ne en dhako mandhaga kata jachode. Par ane ni ng’at ma kamano ema Yesu nowachone ni: “Richoni oweni.” (Luka 7:36-38, 48) Tiend gima Yesu ne wacho en ang’o? Bedo ni e kindeno misango mar rawar ne pok ochiw, ere kaka ne inyalo wene dhakono richo?

Bang’ ka dhakono ne oselwoko mowiro tiend Yesu, to kapok Yesu oweyone richone, Yesu notiyo gi ngero e lero ne Simon wuon ot, puonj moro maduong’. Koporo richo gi gowi maduong’ ahinya maok dichul, Yesu nowacho ne Simon kama: “Ng’at moro ma jaholo ne ni gi jogope ariyo: achiel ne ni gi gowi mar dinari piero apar abich, to machielo ne ni gi gowi mar piero abich. Ka ne gionge gi ma digichul, noweyogi giduto. Kuom jogo, ere ng’a ma dihere moloyo?” Simon nodwoko ni, “Agalo ka ng’at cha ma nowene mang’eny.” Yesu nodwoko ni: “Ing’ado bura kare.” (Luka 7:41-43) Waduto wan gi ting’ mar winjo Nyasaye, omiyo kinde moro amora mwatimo richo, warem e chulo Nyasaye gima owinjore kode. Timo kamano miyo gowi ma wan-go medore. Kata kamano, Jehova chalo gi jaholo moikore weyonwa gopewa. Mano emomiyo Yesu nojiwo jolupne mondo olam Nyasaye ka gikwaye ni: “Iwenwa gopewa, kaka wan bende waseweyo ni jogopewa.” (Math. 6:12) Luka 11:4 luongo gopego ni ketho, tiende ni richo.

E kinde mokalo, Nyasaye noseweyo ne ji richogi e bwo chal mage? Kaluwore gi buchene makare, tho ema chulo kar richo. Omiyo, Adam nochulo kar richone gi ngimane. Kata kamano, e bwo Chik ma Nyasaye nomiyo oganda mar Jo-Israel, ne inyalo wene ng’ato richo ka jalo ochiwo ne Jehova misango mar le. Jaote Paulo nowacho kama: “E bwo Chik, chiegni gik moko duto ipwodho gi remo, kendo ka remo ok ochuer, golo richo onge.” (Hib. 9:22) Jo-Yahudi ne ok ong’eyo yo moro amora machielo ma ne nyalo miyo Nyasaye owe ne ng’ato richone. Omiyo ok kawwa gi wuoro ni e ndalo Yesu, joma ne owinjo gima nowacho ne dhakono, ne ok oyie kode. Joma ne obedo kode e mesa nowuoyo kendgi giwegi niya: “Ng’atni en ng’a, ma weyo richo?” (Luka 7:49) Kuom mano, ere kaka ne inyalo wene dhako mopong’ gi richo kamano?

Weche ma ne okwong kor ei Muma bang’ ka dhano ariyo mokwongo noseng’anjo, wuoyo kuom dwach Jehova mar kelo ‘kodhi’ ma Satan kod “kothe” ne dhi ketho ofunj tiende. (Chak. 3:15) Ne oketh ofunj tiend Yesu kane jowasik Nyasaye onege. (Gal. 3:13, 16) Remb Yesu ma ne ochwer tiyo kaka rawar mar gonyo dhano a e richo kod tho. To nikech onge gima nyalo mono Jehova chopo dwarone, kane owach awacha weche mondiki e Chakruok 3:15 ni i, e wang’ Nyasaye ne chalo ka gima rawarno ne osechul. Koro nonyalo weyo richo ne jogo maketo yie kuom singo mage.

 Kane ndalo mag Jokristo podi, nitie jomoko ma Jehova nokwano kaka joma kare. Moko kuomgi gin kaka Enok, Noa, Ibrahim, Rahab, kod Ayub. Kokalo kuom yie, ne gin gi geno ni singo mag Nyasaye ne dhi chopo. Jakobo nondiko niya: “Ibrahim noyie Nyasaye, kendo yiene nokwanne ka wach makare.” Kowuoyo kuom Rahab, Jakobo nowacho kama: “Kamano bende Rahab ma ohodho ok ne oket kare kuom tim koso?”​—Jak. 2:21-25.

Daudi ruodh Israel machon, notimo richo mogwaro, kata kamano ne en gi yie motegno kuom Nyasaye madier kendo nonyiso kido mar loko chunye gadier, e moro ka moro kuom richogo. E wi mano, Ndiko wacho kama: “Kuom rembe [Yesu], Nyasaye nokete mondo obed misango kuom yie, mondo tich makare mar Nyasaye onen, nimar kuom ng’wonone Nyasaye noweyo richo ma notim chon; kendo mondo tichne makare onen e ndalogi ni en owuon en kare, kendo ni oketo ji duto kare ma yie kuom Yesu.” (Rumi 3:25, 26) Kokalo kuom misango mar rawar ma ne idhi chiw e kinde mabiro, Jehova ne nigi ratiro mar weyo ne Daudi richone, maok oketho chikene motudore gi buchene makare.

Nenore ni chal mar dhako ma nowiro tiend Yesu gi mo ne ni kamano bende. Noyudo osedak e ngima mar anjawo, kata kamano koro noseloko chunye moweyo richone. Nofwenyo ni ne dwarore ni oware kuom richo, kendo nonyiso gi timne ni kuom adier ne oyie gi jal ma Jehova ne dhi tiyogo e chiwo rawarno. Kata obedo ni misangono ne idhi chiw bang’e, ne en gima ne dhi timore adier chuth mamiyo ne inyalo ti kode kuom ji kaka dhakono. Omiyo Yesu nowachone niya: “Richoni oweni.”

Mana kaka weche manie siganani nyiso, Yesu ne ok bwon joricho. Ne otimonegi maber. E wi mano, Jehova oikore mar weyo richo ne jogo ma loko chunygi. Mano kaka ng’eyo wachno jiwo chunywa kaka dhano morem!

[Picha manie ite mar 7]

Ne okwan-gi kaka joma kare