Kampen Makende e Piny Bulgaria Nobedo gi Nyak Maber

“Keyo duong’ adier, to jotich ema nok. E momiyo kwauru Wuon keyo, mondo oor jotich odhi e keyone.”​—MATH. 9:37, 38.

MANO kaka weche ma Yesu nowachogo owinjore ndi gi chal manie piny Bulgaria, ma en piny manie Ulaya ma yo milambo! En piny ma jotich momedore dwarore ahinya mondo giland wach maber ne ji mokalo milion abiriyo. Bulgaria nigi jolendo 1,700, kata kamano ok ginyal tieko alworagi duto mar lendo. Nikech mano, Bura Maduong’ ne oyie mondo ogwel Joneno mawacho dho Bulgaria manie pinje mamoko mag Ulaya, mondo obi oriwgi lwedo e kampen makende ma ne dhi timore e higa 2009. Ne ochan mondo otim kampenno kuom jumbe abiriyo e kinde oro, nyaka tarik ma ne idhi timie Chokruog-Distrikt ma wiye ne en “Beduru ka Urito!,” ma ne otim Agost 14-16, 2009 e taon miluongo ni Sofia.

Owete Mang’eny Noriwo Lwedo

Owete man Bethel mar Sofia ne wuoro ni ji adi ma ne dhi riwo lwedo koa e pinje kaka France, Greek, Italy, Jerman, Poland, kod Spain. Timo kamano ne dhi dwaro ni gichul ting’gi duto mar wuoth, kendo tiyo gi kindegi mag rusa e timo tij lendo. Mano kaka ne en mor neno kwan mar joma ne orwako gwelno ka medore juma ka juma mi gichopo ji 292! Nikech ji mang’eny noriwo lwedo kamano, oro jolendo e taonde adek mopogore e Bulgaria, koro ne nyalore: Kazanlak, Sandanski, kod Silistra. Jorit-alwora ma Bulgaria nogwelo jopainia kod jolendo mag alworago mondo oriw kampenno lwedo. Gikone, ji 382 ne ochiwore molendo gi kinda e alwora ma wach maber ne ok hiny chopoe.

Ne okwa owete ma ne nie kanyakla man machiegni gi alworago mondo olos chenro mag kuonde dak. Ne gimanyo ute mipango kod otende ma nengogi ne yot. Owetego notiyo matek e konyo jolendogo e yudo kar dak koda neno ni giyudo gigo madwarore. E taonde adekgo duto, ne gichulo kuonde timo chokruoge. Ne otim chenro mondo owete ma ne obiro ema ota chokruoge mag kanyakla. Neno ka kuonde ma ne onge kata Janeno achiel, koro nigi jolendo 50 ma chokore mondo opak Jehova nokelo mor ahinya.

Joma ne obiro koa e pinje mamoko nikech kampenno ne onyiso kinda miwuoro ahinya. E kinde mar oro, liet me piny Bulgaria nyalo medore mi chop digri 40 (40°C). Kata kamano, onge gima ne nyalo dwoko kinda mar owete gi nyiminego chien. Taon mar Silistra, manie Aoch Danube kama ji 50,000 odakie, ne olendie ahinya kuom jumbe adek mokwongo. Nikech mano, owetego ne otimo kinda mochopo nyaka e gwenge ma nokiewo gi taondno, mi gichopo nyaka Tutrakan, ma en kilomita 55 yo imbo mar Silistra. Pile ne gichako tij lendo sa adek gi nus okinyi. Bang’ lanj, kinde mang’eny ne gilendo nyaka sa achiel gotieno kata bang’e. Kamano bende, nikech kinda maduong’ mar jolendogo, kampen ma ne otim Kazanlak kod Sandanski ne odhi nyaka e gwenge koda taonde ma ne okiewo kodgi.

 Kampenno Nochopo Ang’o?

Ne olend ne ji e okang’ maduong’ ahinya kuom jumbe abiriyogo. Mana kaka ne owachi e kinde joote, joma ne odak e taondego ne nyalo wacho ni, ‘Usepong’o dalawa gi puonju.’ (Tich 5:28) Joneno ma ne oriwo kampenno lwedo ne ochiwo gasede 50,000 kendo ne gichako puonjruok mar Muma gi ji 482. En gimaber ni, chakre Septemba 1, 2009, ne ochak kanyakla e taon mar Silistra, to e Kazanlak kod e Sandanski nitiere grube. En gima jiwo chuny neno jogo ma ne eka okwongo winjo wach maber e kinde ma ne itimo kampenno, katimo dongruok mabeyo.

E juma mokwongo mar kampenno, nyaminwa moro mawacho dho Bulgaria to en painia makende e piny Spain, ne olendo ne Karina, dhako ma ne uso gasede e dir yo e taon mar Silistra. Karina ne orwako wach mi ne obiro e chokruok. Ne oyie chako puonjruok mar Muma. Chwore en ng’ama ok oyie ni Nyasaye nitie, omiyo Karina ne okwayo ni otim kode puonjruok mar Muma e pap kamoro. Puonjruogno ne oriwo nyige ariyo bende. Daniela ma ema ne duong’, ne mor ahinya gi adiera manie Muma. Ne osomo bug Muma Puonjo e juma achiel, kendo mapiyo noweyo tiyo gi kido e lamo mana kaka Muma chiko. Kae to nochako nyiso osiepene adiera ma ne opuonjore. Mana jumbe adek bang’ chako dhi e chokruoge, nowacho ne nyaminwa ma ne puonjore kode niya: “Aneno ka an achiel kuomu. En ang’o monego atim mondo an bende achak timo tij lendo?” Daniela dhi nyime timo dongruok maber kaachiel gi min mare kod nyamin-gi matin.

E Kazanlak, owadwa moro ma Ja-Bulgaria miluongo ni Orlin, ma nobiro koa Italy ne wach kampenno, ne oyudo wuotho kadok kama odakie bang’ tij lendo. Ka en e yo, Orlin ne olendo ne rowere moko ariyo ma ne obet e benj e pap. Ne omiyogi bug Muma Puonjo kendo chano mar dok limogi kendo e odiechieng’ maluwo. E limbeno, Orlin nochako puonjruok mar Muma gi Svetomir, kendo ne gipuonjore e odiechieng’ manoluwo. Bang’ odiechienge ochiko, ne oyudo Orlin osepuonjore gi Svetomir nyadiboro. Svetomir nowacho kama: “Odiechienge ariyo kane pok aromo kodi, ne oyudo asekwayo Nyasaye e lamo mondo okonya ng’eye. Kendo ne asingora ni ka okonya, to ne adhi chiworane.” Bang’ ka Orlin nosedok Italy, owete modak e alworano ne odhi nyime puonjruok gi Svetomir, kendo sani orwako adiera e kit ngimane.

Gweth Mogundho ne Jogo ma Nochiwore

Ere kaka jogo ma nochiwore nowinjo e chunygi, bang’ tiyo gi rusagi kendo chulo ting’gi  giwegi mondo gidhi giland wach maber e piny machielo? Owadwa moro ma en jaduong’-kanyakla e piny Spain nondiko kama: “Kampenno ne okelo kanyachiel owete malendo ne joma wacho dho Bulgaria to odak e piny Spain. Kampenno ne okonyo ahinya owete ma ne oriwore e time.” Dichwo moro gi chiege ma gin joma ne oa Italy nondiko kama: “Mano ema ne en dwe maberie moloyo e ngimawa!” Ne gimedo wacho kama: “Kampenno ne oloko ngimawa! Koro wan joma opogore.” Ne gichako paro matut kuom kaka ne ginyalo dar chuth dhi e piny Bulgaria mondo gikony e tij lendo kama jolendo dwarore ahinya. Carina ma en nyaminwa mapok odonjo e kend matiyo kaka painia bende noriwo kampenno lwedo e taon mar Silistra. Bang’ kampenno noweyo tich Spain mi odar odhi Bulgaria mondo okony kanyakla ma eka ne oa chaki e taondno. Noyudo osekano pesa ma ne dhi konye dak e piny Bulgaria kuom higa achiel. Carina wacho kama kuom yiero ma notimo: “Amor ahinya ni Jehova omiya thuolo mar tiyone Bulgaria kae, kendo ageno ni ka nyalore to abiro dhi nyime dak kae kuom kinde mogwaro. An gi ji abich ma atimogo puonjruok mar Muma, kendo adek kuomgi biro e chokruok.”

Nyaminwa moro ma nyar Italy ne dwaro riwo kampenno lwedo, to nikech noyudo eka oa yudo tich moro manyien, ne pod ok onyal bet gi rusa. Kata kamano, ne okwayo mondo omiye rusa mar dwe achiel maok chule, kendo ne oikore kata mana mar weyo tijno kapo ni ne gidhi tame. Nohum nono kane jal ma ne ondike tich wachone kama: “Dhi adhiya, mak mana ni itimna gimoro achiel: Iorna barua mar postkad ka in Bulgaria.” Kuom adier, nyaminwano noneno ni Jehova nodwoko kwayo mage e lamo.

Nyaminwa moro ma rawera miluongo ni Stanislava, moa Bulgaria e taon mar Varna kama ne otiyoe tich michulee maber, nokawo rusa mondo oriw kampenno lwedo e taon mar Silistra. Kane oneno mor jopainia mang’eny ma ne obiro koa mabor mondo giland wach maber e pinygi, pi wang’e ne ochwer. Ne ochako paro kuom kaka ne otiyo gi ngimane, kolawore gi tije mag piny. Kane odok pacho bang’ jumbe ariyo, ne oweyo tije mi obedo painia mapile. Koro owinjo komor gadier, koparo Jachwechne ka pod en rawera.​—Ekl. 12:1.

Mano kaka bedo modich e tiyo ne Jehova en gweth. Onge gimaber minyalo timo maloyo tiyo gi thuoloni kod tekoni e tich maduong’ ahinya mar puonjo kendo lando wach maber. Be nitie yore ma in iwuon inyalo medogo okang’ mitiyogo e tij lendo ma en tich mareso ngima ji? E piny midakie, nyalo bedo ni nitie kuonde ma jolendo dwarore ahinya. Be inyalo dar dhi kuondego? Kata inyalo puonjori dhok machielo mondo ikony ji manie piny midakie ma nigi riyo mar ng’eyo adiera mar Muma. Bed gadier ni lokruok moro amora mibiro timo mondo imed okang’ mitiyogo e tij lendo, Jehova biro gwedhi e yo mogundho.​—Nge. 10:22.

[Sanduk/​Picha manie ite mar 32]

Odiechieng’ ma Wich Ok Diwilgo

Thoth joma ne obiro Bulgaria koa e pinje mamoko mag Ulaya mondo oriw kampen makendeno lwedo, ne ochano dhi e Chokruog-Distrikt ma wiye ne en “Beduru ka Urito!” ma ne idhi tim e taon mar Sofia. Owete gi nyimine ma kuno ne mor ahinya romo gi welo mang’eny moa e pinje mopogore opogore. Mano kaka ji 2,039 ma ne nie chokruogno noil ahinya kane Owadwa Geoffrey Jackson ma en achiel kuom jokanyo mag Bura Maduong’ nolando gocho mar New World Translation of the Holy Scriptures ka en oduto e dho Bulgaria! Jogo duto ma ne obiro e chokruok Tich Abich ne opwoyo aming’a gi ilo ka gipamo e nyiso mor ma ne gin-go. Thothgi pi wengegi nochwer nikech ilo ma ne gin-go. Mumano en loko makare ma wechege yot winjo tiendgi mabiro konyo Jo-Bulgaria ma chunygi nikare ng’eyo Jehova.

[Map manie ite mag 30, 31]

(Mondo ine weche momedore, ne bugno)

BULGARIA

SOFIA

Sandanski

Silistra

Kazanlak

[Piche manie ite mar 31]

Ne olend ne ji e okang’ maduong’ ahinya kuom jumbe abiriyogo