Winjruok En Kido Mifwenyogo Lamo Madier

‘Anaketgi kaachiel kaka kweth mobet e dier legegi.’​—MIKA 2:12.

1. Ere kaka gik mochwe nyiso rieko mar Nyasaye?

JANDIK-ZABURI nowacho ayanga niya: ‘A Jehova tije magi ng’eny ahinya! Isechweyogi duto gi rieko. Mwanduni opong’o piny.’ (Zab. 104:24) Rieko mar Nyasaye nenore kuom kaka ngima mar tara gi tara mag kit yien, le, kute me piny, duto konyore moro gi nyawadgi. Bende, ei dendi, nitiere fuoni matindo gi madongo machalo masinde, matiyo kanyachiel e miyo ibed ng’at ma ngimane long’o.

2. Kaka onyisi e ite mar 13, ang’o momiyo nyaka bed ni winjruok ma ne nie kind Jokristo ne chalo hono?

² Jehova nochweyo oganda dhano e yo mamiyo gikonyore ng’ato gi nyawadgi. Oganda dhano nigi chal, kido, koda lony mopogore opogore. E wi mano, nomiyo dhano ariyo mokwongo nyalo mar nyiso kido kaka mag Nyasaye, ma ne dhi miyo gibed e achiel kendo gikonyre ng’ato gi nyawadgi. (Chak. 1:27; 2:18) Kata kamano, nyaka a chon, oganda dhano maok nie winjruok gi Nyasaye podi ok obedo gi nyalo ngang’ mar timo gik moko e achiel. (1 Joh. 5:19) Kuom mano, bedo ni kanyakla mar Jokristo mokwongo ne nigi jo mopogore opogore, kaka Jo-Efeso ma ne wasumbini, mond Jo-Grik ma ne nigi huma, Jo-Yahudi mosomo, koda joma chon ne lamo kido, onge kiawa ni winjruok ma ne gin-go ne chalo hono.​—Tich 13:1; 17:4; 1 Thes. 1:9; 1 Tim. 6:1.

3. Muma wacho ang’o kuom winjruok mar Jokristo, to wabiro nono ang’o e puonjruokni?

³ Lamo madier miyo ji bedo e achiel mana kaka fuoni mag dendwa tiyo kaachiel. (Som 1 Jo Korintho 12:12, 13.) Moko kuom gik mwabiro nono e sulani gin kaka: Ere kaka lamo madier miyo ji bedo gi winjruok? Ang’o momiyo Jehova kende e ng’ama nyalo miyo ji tara gi tara moa e ogendini duto obed gi winjruok? Jehova konyowa loyo gik mage manyalo ketho winjruokwa? To kodok korka wach winjruok, ere kaka din madier mar Jokristo opogore gi joma luongore aluonga ni Jokristo?

Ere Kaka Lamo Madier Miyo Ji Bedo gi Winjruok?

4. Ere kaka lamo madier miyo ji bedo gi winjruok?

⁴ Jogo manie lamo madier ong’eyo ni nikech Jehova ema nochweyo gik moko duto, en gi ratiro mar bedo Jaloch e wi gik moko duto. (Fwe. 4:11) Omiyo, kata obedo ni Jokristo madier odak ei ogendini mang’eny mopogore opogore, giduto giluwo chike machalre ma Nyasaye omiyogi kendo gidak kaluwore gi puonj machalre manie Muma. Jogo duto malamo Jehova gadier luonge e yo mowinjore ni, “Wuonwa.” (Isa. 64:8; Math. 6:9) Kuom mano, giduto gin owete kodok korka wach Nyasaye kendo gibedo gi winjruok ma jandik-zaburi wuoyoe kama: “Neuru kaka ber kendo long’o nadi ka owete odak kaachiel e lalrwokgi!”​—Zab. 133:1.

5. En kido mane makonyo e miyo winjruok obedie e kind Jokristo madier?

⁵ Kata obedo ni Jokristo madier orem nikech richo, gilemo kaachiel e winjruok nimar gisepuonjore herruok ng’ato gi nyawadgi. Jehova puonjogi hera kendo onge ng’a machielo manyalo puonjogi kamano. (Som  1 Johana 4:7, 8.) Wachne luwo niya: “Beduru gi miwafu, ng’wono, paro mamuol, muolo, kod horuok. Ng’wonreuru, kendo weyoreuru richo ng’ato gi ng’ato, ka ng’ato ni gi wach kod wadgi. Kaka Ruoth noweyonu richou, un bende onego utim kamano. To moloyo magi duto, beduru gi hera; en e ratego ma tueyo kendo chopo wechego duto.” (Kol. 3:12-14) Ratego matueyono—hera—e kido sie mifwenyogo Jokristo madier. Kokalo kuom gik miseneno in iwuon, donge iseneno ni winjruok ma kamano en achiel kuom kido mifwenyogo lamo madier?​—Joh. 13:35.

6. Ere kaka geno mar Pinyruoth konyowa bedo gi winjruok?

⁶ Jokristo madier bende nigi winjruok nikech ging’eyo ni Pinyruodh Nyasaye kende ema biro kelo ne dhano ber. Ging’eyo ni kinde okayo ma Pinyruodh Nyasaye biro kawo kar sirkande dhano, kendo miyo oganda dhano maluwo chik obed gi kuwe madier kendo masiko. (Isa. 11:4-9; Dan. 2:44) Omiyo, Jokristo luwo weche ma Yesu nowacho e wi jolupne niya: “Ok gin mag piny, kaka an ok an mar piny.” (Joh. 17:16) Jokristo madier ok riw lwedo kon moro amora e ywaruok mag pinyni; omiyo gin gibedo gi winjruok achiel kata mana e kinde ma jogo manie alworagi kedo e lweny.

Kamoro Achiel Kende mar Puonj

7, 8. Puonj ma a e Muma jiwo winjruokwa e yo mane?

⁷ Jokristo mokwongo ne nigi winjruok e kindgi nikech giduto ne giyudo jip moa kamoro achiel. Ne ging’eyo ni Yesu ne puonjo kendo tayo kanyakla kokalo kuom bura maduong’, ma noting’o joote koda jodongo ma ne ni Jerusalem. Ne gin chwo ma ne tiyo gi Wach Nyasaye e ng’ado paro kendo ne gitiyo gi jorit malworo e kowo wechego ne kanyakla e pinje mang’eny. Kowuoyo e wi moko kuom jorit ma kamago, Muma wacho niya: “Ka ne giwuotho e mier, ne gichiwonigi chik ma joote gi jodongo man Jerusalem nochiko mondo gimaki.”​—Tich 15:6, 19-22; 16:4.

⁸ Kamano bende ndalogi, Bura Maduong’ moting’o Jokristo mowal kuom roho konyo ahinya e miyo winjruok obedie ei kanyakla mar piny mangima. Bura Maduong’ goyo buge e dhok mang’eny mondo gichiw godo puonj majiwo owete. Puonj ma gichiwogo wuok ei Wach Nyasaye. Kuom mano, weche mipuonjo ok a kuom dhano, to gia kuom Jehova.​—Isa. 54:13.

9. Ere kaka tich ma Nyasaye omiyowa konyowa e bedo gi winjruok?

⁹ Jorit ma Jokristo bende jiwo winjruok kokalo kuom tayo tij lendo. Winjruok machiegni mariwo jogo matiyo kanyachiel e tij Nyasaye otegno ahinya maloyo winjruok manie kind joma gik piny ema riwo. Ne ochak kanyakla mar Jokristo, ok ni mondo obed kar yudo kata mako osiepe, to mondo omi Jehova duong’ kendo e chopo tije—tij lando  wach maber, timo ji jopuonjre, kendo gero kanyakla. (Rumi 1:11, 12; 1 Thes. 5:11; Hib. 10:24, 25) Omiyo, jaote Paulo ne nyalo wacho kuom Jokristo kama: ‘Uchung’ matek gi chuny achiel kod paro achiel, kukedo kaachiel ne yie mar wach maber.’​—Fili. 1:27.

10. Moko kuom yore ma miyo wabedo gi winjruok kaka jo Nyasaye, gin mage?

¹⁰ Kuom adier, kaka jo Jehova, wan gi winjruok nikech wayie gi loch Jehova, wahero owetewa, wan gi geno kuom Pinyruodh Nyasaye, kendo wamiyo jogo ma Nyasaye tiyogo e tayowa luor. Nikech warem, Jehova konyowa loyo kido mago manyalo ketho winjruokwa.​—Rumi 12:2.

Loyo Sunga kod Nyiego

11. Ang’o momiyo sunga kelo pogruok, to ere kaka Jehova konyowa loye?

¹¹ Sunga pogo ji. Ng’ama jasunga nenore owuon ni ober moloyo jomoko, kendo kinde mang’eny ohero pakore. To kinde mang’eny, tim ma kamano geng’o winjruok; jogo machiko itgi ne jasunga nyalo bedo gi nyiego. Jakobo wachonwa ayanga niya: “Pakruok duto ma kama rach.” (Jak. 4:16) Duoko jomoko piny ok en gima nyiso hera. Ber ng’eyo ni Jehova keto ranyisi mar bolruok nimar okonyo dhano morem kaka wan. Daudi nondiko kama: “Bolruokni [Nyasaye] ema miyo ayudo duong’.” (2 Sam. 22:36, New World Translation) Wach Nyasaye konyowa loyo sunga kopuonjowa paro e yo makare kendo mowinjore. Kotelne gi roho mar Nyasaye, Paulo nopenjo kama: “En ng’ano ma miyoi bedo maduong’? Kata en ang’o ma in go ma ok nomiyi? To ka nomiyi, marang’o ipakori ka ng’ato ma ne ok omi?”​—1 Kor. 4:7.

12, 13. (a) Ang’o momiyo yot bedo gi nyiego? (b) Bedo gi paro kaka mar Jehova kuom owetewa konyo nade?

¹² Nyiego bende en gima chielo ma geng’o winjruok. Nikech richo monyuolwago, waduto wan gi chuny mar ‘timo nyiego,’ kendo kata mana jogo mosebedo Jokristo kuom ndalo mogwaro nyalo bedo gi nyiego nikech chal mag jomoko, mwandugi, migepe, kata nyalogi. (Jak. 4:5) Kuom ranyisi, owadwa ma nigi joot nyalo bedo gi nyiego kuom migepe ma jal matiyo ne Nyasaye kuom thuolone duto nigo, maok ofwenyo ni jalo bende nyalo bedo gi nyiego kode nikech en gi joot kod nyithindo. Ere kaka wanyalo geng’o nyiego ma kamano kik keth winjruokwa?

¹³ Mondo kik wabed gi nyiego, ng’e ni Muma poro jogo mowal e kanyakla mar Jokristo gi fuoni mag dend dhano. (Som 1 Jo Korintho 12:14-18.) Kuom ranyisi, kata obedo ni wang’i tiyo tich manenore ayanga moloyo chunyi, donge giduto gin fuoni madwarore kuomi? Kamano bende, Jehova mor gi jokanyo duto mag kanyakla kata obedo ni kuom kinde, nitie moko matimo migepe manenore ayanga moloyo jomamoko. Omiyo, weuru wabed gi paro kaka mar Jehova kuom owetewa. Kar bedo gi nyiego kuom jomoko, wanyalo konyogi kendo nyiso ni wadewogi. Kuom timo kamano, wakonyo e miyo pogruok mantie e kind Jokristo madier kod dinde maluongore ni Jokristo onenre.

Dinde Maluongore ni Jokristo Opong’ gi Ywaruok

14, 15. Ere kaka Jokristo ma nong’anjo nobiro mobedo gi ywuaruok?

¹⁴ Winjruok manie kind Jokristo madier opogore ahinya gi ywaruok manie dinde maluongore  ni Jokristo. Ka nochopo higini mag 300, Jokristo ma nong’anjo moweyo yie madier, nosenya ahinya mochopo kama jaloch mar Rumi nochako chikogi, kokonyo e miyo dinde maluongore ni Jokristo omed nya. Bang’e, ywaruok nopogo pinjeruodhi mathoth mi giwere gi loch Rumi mi gichako kanise mag Sirkandegi giwegi.

¹⁵ Thoth pinjeruodhigo nokedo e kindgi giwegi kuom higini mogwaro ma noluwo. E higini mag 1600 kod 1700, e piny Amerka, France, kod Ingresa ji ne jiwo ahinya chuny mar chiwruok ne Pinygi, kendo mano nomiyo chuny ma kamano obedo kaka din. E higini mag 1800 kod 1900, chuny ma kamano nochako bedo kuom thoth oganda dhano. Gikone, dinde Jokristo nopogore opogore mobedo kanise mogwaro, ma thothgi ok kwed chuny mar hero pinygi maloyo machielo. Jokanisa ose koda dhi e lweny mondo giked gi jokanisgi mawuok e piny machielo. E kindegi, dinde maluongore ni Jokristo nigi pogruok korka puonjgi koda wach hero pinygi maloyo machielo.

16. Moko kuom gik mapogo jogo manie dinde maluongore ni Jokristo gin mage?

¹⁶ E higini mag 1900, moko kuom thoth kanise mag Jokristo nochako riwruok moro ka gitemo mondo gibed gi winjruok. Kata kamano, bang’ temo kuom higini pieche, mana kanise manok kende ema oseriwore mobedo achiel, kendo jokanisa podi nigi pogruok korka penjo mamulo puonj kaka—gik moko nosieko kendgi maok ochwegi, golo ich, nindruok e kind chwo gi chwo, koda keto mon obed jodolo. E dinde moko mag Jokristo, jotend din temo kelo ji moa e kanise mopogore opogore kaachiel, ka gitemo nyiso ni puonj ma ne pogogi chon koro sani ok en gima duong’ ahinya. Kata kamano, nyiso ni pogruok mantie kuom puonjgo ok en gima duong’ ahinya, weyo ji ka nigi yie mayomyom, kendo kuom adier mano ok kel winjruok ne dinde ma nigi pogruokgo.

Ji Loyo Hera ma Giherogo Pinygi

17. Ere kaka nokor ni lamo madier ne dhi kelo winjruok “e ndalo mag giko”?

¹⁷ Kata obedo ni sani oganda dhano nigi ywaruok ahinya maloyo kinde moro amora, winjruok en kido mapod ifwenyogo jolemo madier. Mika janabi mar Nyasaye nowacho kama: ‘Anaketgi kaachiel kaka kweth mobet e dier legegi.’ (Mika 2:12) Mika nokoro kaka lamo madier ne dhi ng’awore e wi kit lamo mamoko, gibed mag nyiseche mamoko, kata ma ji lamo Pinygi kaka nyasaye. Nondiko niya: “E ndalo mag giko nobedi ni nochung’ got mar od Jehova e wi gode, mi nobedi koting’ore moloyo gode duto; mi ogendini nonyulree. Kendo ogendini duto nowuothi ng’ato ka ng’ato koluoro nying nyasache, to wan wanawuothi kwaluoro nying Jehova Nyasachwa.”​—Mika 4:1, 5.

18. Lamo madier osekonyowa timo lokruok mage?

¹⁸ Mika bende nolero kaka lamo madier ne dhi kelo  winjruok e kind joma chon ne gin wasigu. ‘Ji moa e ogendini mang’eny nodhi ka giwacho, “Biuruwa, waidh god Jehova, kendo ka od Nyasach Jakobo; mi enopuonjwa yorene, kendo wanawuothi e ndechene.” Mi ginithedh ligenginigi gidok kweye, kendo tongegi gidok rabetini. Oganda ok anoting’ ligangla kuom oganda moro, kendo ok ginipuonjre lweny kendo.’ (Mika 4:2, 3) Jogo maweyo kit lamo ma dhano osiekogo kata mag ogendini kae to gibiro e lamo mar Jehova bedo gi winjruok e piny mangima. Nyasaye chikogi e yore mag hera.

19. Winjruok manie kind tara gi tara mag joma nie lamo madier en gima nyiso ang’o maler?

¹⁹ Winjruok manie kind Jokristo madier e piny mangima en gima kende, kendo onyiso maler ni Jehova dhi nyime chiko joge kokalo kuom roho mare maler. Ji achiel achiel moa e ogendini duto irwako e winjruok e okang’ maloyo kinde moro amora mosekalo e ngima dhano. Mani timore e yor chopo weche manie Fweny 7:9, 14, kendo ginyiso ni kinde okayo machiegni ma malaike mag Nyasaye biro gonyo “yamo” mabiro ketho chenro masani mar piny marachni. (Som Fweny 7:1-4, 9, 10, 14.) Donge bedo e winjruok mar owete mar piny mangima en gweth makende? Ere kaka ng’ato ka ng’ato kuomwa nyalo konyo e miyo winjruokno obedie? Mano e gima ibiro non e sula maluwo.

Inyalo Dwoko Nade?

• Ere kaka lamo madier miyo ji bedo e winjruok?

• Ere kaka wanyalo geng’o kido mar nyiego kik keth winjruokwa?

• Ang’o momiyo hera ma ji oherogo pinygi ok kel pogruok e kind jolemo madier?

[Penjo mag Puonjruok]

[Picha manie ite mar 13]

Jokristo mokwongo ne gin joma oa e ogendini koda chal mopogore opogore?

[Picha manie ite mar 15]

Ere kaka ijiwo winjruok sama ikonyo e tije mag Od Romo?