Bedo Modich e Riwruok mar Oganda Jehova

Kaka Iwachonwa gi Vernon Zubko

NE ADONGO machiegni gi kama iluongo ni Stenen, e gweng’ moro mar Saskatchewan, e piny Kanada. Fred kod Adella, magin jonyuolwa, ne tiyo matek e puonjowa wach Jehova kod pidhowa, an kod nyamera maduong’ Aurellia, kaachiel gi nyithindwa matindo, Alvin, Allegra, kod Daryl. Nyaka chil kawuono, wadwoko erokamano ahinya ne jonyuolwa kuom puonjowa adiera.

Wuonwa ma ne en Jakristo mowal kuom roho, ne en jalendo ma jachir. Notiyo matek mondo eka opidh joode, to bende notimo matek ji duto ong’eye kaka Janeno. Kinde duto nowuoyo e wi adiera. Podi aparo nyaka sani kinda kod chir ma ne en-go. Kinde mang’eny ne ojawachona ni, “Kibedo modich e riwruok mar oganda Jehova, to chandruok mang’eny ok bi nwang’i.”

Ne wajotimo tij lendo e dho ndara e Stenen koda alwora mage. Mano ne ok yotna kinde duto. Taon ka taon ne nigi jotheko ma mage, ma ne biro kuomwa joma tindo kae to gijarowa. Chieng’ moro kane ajahigini aboro, noyudo achung’ kan moro ka ating’o gasede mag Ohinga mar Jarito kod Amkeni!, kae to grup moro mar rowere nobiro molwora. Ne gigolo oguta manyien e wiya, mi ging’awe e siro moro e batha. Berne en ni owadwa moro ma ne wan-go noneno gima ne otimore. Nosudo kuma ne wantie mopenjo kama, “Vern, be nitie gima rach?” Mapiyo yawuowigo noringo molal. Kata obedo ni gima ne otimoreno ne rach, ne apuonjora ni sa lendo mar dho ndara, ng’ato onego osik ka sudo to ok chung’ kamoro achiel ka siro. Tiegruok ma kamano e kinde ma ne adongo bende nomiya chir madwarore e lendo mar ot ka ot.

Ne obatisa kaachiel gi Alvin e Mei higa 1951. Ne ajahigini 13. Podi aparo kaka Owadwa Jack Nathan, ma ne ogolo twak mar batiso, nojiwowa ni kik wawe dwe okal ngang’ maok wawuoyo e wi Jehova. * E odwa, kinde duto tij painia ne ikawo kaka tich maber moloyo duto. Omiyo, e higa 1958, bang’ tieko skul, ne adar mi adhi Winnipeg, Manitoba, mondo ati kuno kaka japainia. Kata obedo ni Wuonwa ne mor mondo ati kode e ohand joodwa mar loso magogo, en kaachiel kod Minwa ne gijiwa ahinya mondo ati ne Nyasaye kuom thuolona duto kendo ne giyie mondo adhi Winnipeg.

Dak ka Manyien Kendo gi Ng’ama Nyien

E higa 1959, ofis mar Bethel nokwayo ng’ato ang’ata ma ne nyalo mondo odar odhi Quebec, kama jolendo ne dwaroree ahinya. Ne adhi timo tij painia kama iluongo ni Montreal. Mano ne en lokruok maduong’ ndi e  ngimana! Nimar koro nachako puonjora wacho dho Faransa, kendo temo dak e kit ngima mopogore. Jarit mar alworawa nowachona ni, “Kik iwach ngang’ ni, ‘Ma e kaka ne wajotimo thurwa.’” Mano ne en siem moting’o puonj maber.—1 Kor. 9:22, 23.

Kane adhi Quebec, ne aonge jal machielo ma ne atiyogo kaka japainia. Kata kamano, nyaminwa moro ma rawera miluongo ni Shirley Turcotte, ma noyudo aseromogo motelo e Winnipeg, nobiro mobedo jabatha mosiko kane wakendore kode e Februar higa 1961. En bende noa e ot ma ji noheroe Jehova. Kata obedo ni gie kindeno ne ok afwenyo chuth kaka ne odhi bedona ng’at mogen, ne otega kendo jiwa e okang’ miwuoro e higini ma ne dhi luwo.

Timo Limbe Gaspé

Higini ariyo bang’ kend, ne oketwa kaka jopainia makende e Rimouski, Quebec. Bang’ dweche ma noluwo, ofis mar Bethel nokwayowa mondo wadhi walendi e gwenge duto mag Misori kata gul mar Gaspé, e Kanada. Migawo marwa ne en timo kaka nyalore e pidho kodhi mang’eny mag adier. (Ekl. 11:6) Ne waketo e mtokwa gasede mokalo 1,000 kod buge chiegni 400, kaachiel gi chiemo kod lewini, mi wadhi e wuodh lendo ma ne dhi kawo dwe mangima. Ne walendo e yo mochanore maber e gwenge matindo mag Gaspé. Stesen mar redio ma kanyo ne olando ne ji ni Joneno biro, kendo nyisogi ni kik gikaw bugewa. Kata kamano, thoth jokanyo ne ok owinjo tiend wachno maber mi giparo ni milomeno ne lando ni gikaw bugewa, omiyo ne gitimo kamano.

E higinigo, ratiro mar lendo ne en gima nyien kuonde moko e Quebec, omiyo neno ka polise tamo ng’ato ne ok en gima wendo. Mano ne otimore e taon moro kama ne wamiyoe ji bugewa chiegni e ot ka ot. Polis moro nochikowa ni wadhi kode e stesen margi, mi ne wayie. Ne afwenyo ni okil mar taondno ne osechiwo chik ma geng’owa dhi nyime gi lendo. To nikech jatend polise ne onge chieng’no, ne amiyo okilno barua mondik maber moa Bethel man Toronto, manyiso ratiro ma wan-go mar lendo. Bang’ somo baruano, okilno nowacho mapiyo niya: “Neuru, ok adwar wach. Jadolo mar kanisa ma ka, ema ne owachona ni ageng’u.” Nikech ne wadwaro ni jo gweng’no ong’e ni tijwa en tich ma chik osiro, ne wadok mapiyo e alwora kama ne ogeng’wa gi polise, mi wadhi nyime gi lendo.

Kinyne gokinyi, kane wadok mondo wane jatend polise, ne ok omor winjo ni ne ogeng’wa. Ne en gi mirima ahinya sama ne owuoyo gi okilno e simo! Jatend poliseno nowachonwa ni ka waromo gi chandruok moro amora, onego wagone simo en owuon kendo obiro neno gima onego otim. Kata obedo ni ne wan welo kendo ne ok walony ahinya e dho Faransa, ji ne ng’won kodwa kendo ne girwakowa. Kata kamano, ne wapenjore kama, ‘Be nochop kama gining’e adiera?’ Ne wayudo dwokowa higini mang’eny bang’e, kane wadok kuno e tij gero Ute Romo e alwora duto mar Gaspé. Ne wafwenyo ni thoth joma ne walendonegi, sani gin owetewa. Kuom adier, Jehova ema miyo kodhi dongo.—1 Kor. 3:6, 7.

Wayudo Gikeni

Nyarwa ma Lisa ne onyuol e higa 1970. Gikeni ma Jehova nomiyowano, ne omedonwa mor ahinya e ngimawa. Shirley kaachiel gi Lisa ne tiyo koda e gedo mathoth mag Ute Romo. Bang’ Lisa tieko skul, nowachonwa kama: “Nikech ne agolou e tiyo ne Nyasaye kuom thuolou duto kuom kinde, abiro temo chulo kuom bedo japainia.” Higini mokalo 20 bang’e, Lisa podi en japainia, to gie sani kaachiel gi Sylvain chwore. Giduto gisebedo gi thuolo mar konyo e tije gedo e pinje mamoko. Gima wadwaro timo kaka joot en keto ngimawa obed mayot mondo omi wabed thuolo ne tij Jehova. Wiya pok owil ngang’ gi  weche ma Lisa nowacho kane ochako tij painia. Kuom adier, wechene ne ojiwa dok e tiyo ne Nyasaye kuom thuolona duto e higa 2001, kendo asebedo painia nyaka a kanyo. Tij painia pod dhi nyime puonja geno kuom Jehova e gik moko duto matimo, dak e ngima mayot, kendo mogundho gi mor.

Timo Tije Gedo Dwaro Kido mag Hera kod Chung’ Motegno

Jehova osepuonja ni ka wabedo thuolo mar mondo oti kodwa e yo moro amora modwaro, wabiro yudo gweth mang’eny. Tiyo kaka jakanyo mar Komiti Mochung’ne Tije Gedo e Alwora, kendo konyo e gedo mopogore opogore e Quebec mangima koda kuonde mamoko kanyachiel gi owete koda nyiminena, en tich makende ahinya.

Kata obedo ni moko kuom joma chiwore e tij gedo ok nyal golo twege e yo mong’ith ahinya, kodok korka tij gero Ute Romo girieny kaka sulwe. Owete mwagenogi keto chunygi duto kuom tich, kendo lony margi nenore ayanga. Nikech mano, gikone gigero ute mabeyo mitiyogo e lamo Jehova.

Ji osepenja ni, “Gin kido mage madwarore moloyo kuom joma chiwore e tij gero Ute Romo?” Kuom gima aseneno, mokwongo tiktik ng’ato nyaka her Jehova kod Wuode kaachiel gi riwruok mar owete. (1 Kor. 16:14) Mar ariyo, en bedo ng’at mamakore chuth gi migawo kendo bedo gi chuny mar chung’ motegno. Sama gik moko ok dhi kaka wadwaro—ma en gima biro timore—ng’at mamakore chuth gi migawone biro dhi nyime riwo lwedo chenro mar riwruok mar oganda Jehova. Bedone ng’at ma chung’ motegno biro jiwe mondo ochiwre ne tije gedo mabiro bedoe bang’e.

Wadwoko ne Jehova Erokamano

Kata obedo ni wuonwa ne otho e higa 1985, wiya pok owil gi jip ma ne omiya ni abed modich e riwruok mar oganda Jehova. Mana kaka jomamoko moseyudo migawo margi e bad-riwruok mar oganda Jehova e polo, onge kiawa ni en bende odich kuno. (Fwe. 14:13) Minwa sani en jahigini 97. Nikech tuwo mar abach, sani oonge gi nyalo mar wuoyo kaka chon; kata kamano pod olony gi Muma. Ohinyo tiyo gi weche manie Ndiko e barupege, kendo jiwowa ni wadhi nyime tiyo ne Jehova kwachung’ motegno. Mano kaka wamor ahinya waduto kaka nyithindgi, kuom bedo gi jonyuol ma johera kamano!

To an bende adwoko ne Jehova erokamano kuom miya Shirley, jaoda mageno. Jaoda siko kaparo e chunye wach ma min mare nowachone niya, “Vern biro bedo modich ahinya e adiera, omiyo biro dwarore ni ipuonjri weyo mondo jomoko bende oyud kony kuome.” Kane wakendore higini 49 mokalo, ne wang’ado ni ne wadhi doko moti kanyachiel ka watiyo ne Jehova, to kapo ni waduto watony e giko mar pinyni, wabiro doko joma tindo kanyachiel kendo dhi nyime tiyone nyaka chieng’. Ee, wasebedo ‘kwatiyo matek pile e tich Ruoth.’ (1 Kor. 15:58) Jehova to osetimo korka kore kuom ritowa gadier, kendo oseneno ni ok wachando gimoro amora maber.

[Weche moler piny]

[Picha manie ite mar 31]

“Gima wadwaro timo kaka joot en keto ngimawa obed mayot mondo omi wabed thuolo ne tij Jehova”