Kony Nyithindo Obed Molony gi Riwruok mar Oganda Jehova

NYITHINDO nigi gombo mar puonjruok. Par ane penjo manyalo bedo ni nyithindo mag Jo-Israel nopenjo e odhiambo mar Pasaka mokwongo kane gin e piny Misri, nyalo bedo ni ne gipenjo kama: ‘Ang’o momiyo oyang’ nyarombo?’ ‘Ang’o momiyo Baba keto remo e dhoot?’ ‘To wadhi kanye?’ Gima nyiso ni Jehova noyie gi penjo kaka mago nenore kuom weche ma noyudo osechiko wuone ma Jo-Israel. Jehova nowachonegi kama kuom Pasaka ma ne idhi itim bang’e: “Ka nyithindu nowachnu ni, Tiend timni to ang’o kuomu? Eka unuwachi, Ma e misango mar pasaka mar Jehova, ma nokadho kuom ut nyithind Israel e Misri, ka nogoyo Jo-Misri, ka nowaro utewa.” (Wuok 12:24-27) Bang’e, Jehova noparo ne jonyuol ma Jo-Israel ber mar dwoko penjo ma nyithindgi penjo e wi ‘buche gi chike’ mag Jehova.—Rapar 6:20-25.

Nenore maler ni Jehova ne dwaro mondo nyithindo oyud dwoko mag penjo ma  ne gin-go e wi lamo madier—ma gin dwoko ma ne nyalo miyo giher Jehova kaka Nyasachgi kendo Jawargi. E kindegi bende, Jehova dwaro ne nyithindo kamano. Yo achiel ma jonyuol nyalo puonjogo nyithindgi mondo oher Nyasaye kaachiel gi joge koa e chunygi, en konyogi bedo molony gi riwruok mar oganda Jehova, kendo ng’eyo kaka riwruogno nyalo konyogi. Omiyo, weuru wanon yore moko ma inyalo tigo e konyo nyithindo mondo obed molony gi riwruok mar oganda Nyasaye.

Kanyakla Maru

Dwarore ni nyithindo obed molony gi kanyakla maru ma ujodhie kaka joot. Mondo omi mano otimre, un kaka jonyuol onego uter nyithindu e chokruoge duto mag Jokristo. Ka utimo kamano, uluwo gima Jehova nochiko Jo-Israel mondo otim niya: ‘Chok ji, chwo gi mon gi jo matindo, mondo giwinji, kendo mondo gipuonjre, mondo giluor Jehova Nyasachu, kendo mondo girit ka gitimo weche duto mag chikni; kendo nyithindgi, ma pok ong’eyo, mondo giwinji, kendo mondo gipuonjre luoro Jehova Nyasachu.’—Rapar 31:12, 13.

A e tin-gi, nyithindo nyalo chako puonjore Wach Jehova. Jaote Paulo nowacho kuom Timotheo kama: “Nyaka ia e nyathi ning’eyo Ndiko Maler.” (2 Tim. 3:15) Kata mana nyithindo ma podi tindo ahinya nyalo chako mako gigo mwapuonjore e chokruoge mitimo e Od Romo, kendo ginyalo ng’eyo nyaka wende mag Pinyruoth. Ka gin e chokruogego, gipuonjore tiyo kendo chiwo luor ne Muma, kaachiel gi bugewa  malero Muma. E wi mano, chokruogewa bende biro konyogi neno kaka owete gi nyimine nyiso kido maduong’ mifwenyogo jolup madier mag Kristo—tiende ni hera madier. Yesu nowacho kama: “Chik manyien amiyou, mondo uherru ng’ato gi ng’ato; mana kaka yandi aherou, mondo un bende uherru kamano. Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.” (Joh. 13:34, 35) Hera gi mor kaachiel gi kuwe manie Od Romo biro moro nyithindo, kendo mano biro konyogi keto wach dhi e chokruoge mag Jokristo kaka gima onego gitim e ngimagi duto.

Ka ing’iyo chopo e Od Romo chon ka chokruoge pok ochakore, kendo dong’ chien matin e giko chokruok, mano biro miyo nyithindi thuolo mar loso osiepe ei kanyakla. Kar weyo mondo giriwore mana gi nyithindo wetegi, donge inyalo konyogi ng’eyo owete koda nyimine ma hikgi opogore opogore? Ka gilony gi jomadongo, nyithindi biro fwenyo ni jomadongo nigi weche mag rieko. Mana kaka Zekaria ma ne tiego ji “kuom fweny mar Nyasaye,” noketo ranyisi maber ne Uzzia ruodh Juda, jogo ma osetiyo ne Jehova ka gichung’ motegno kuom higini mang’eny nyalo bedo ranyisi maber ne rowere. (2 Weche 26:1, 4, 5) Sama un e Od Romo, bende inyalo lero ne nyithindi kaka onego oti gi kama oyang ne somo buge manie Od Romo, bod mar keto weche, koda gik mamoko.

Riwruok mar Piny Mangima

Dwarore ni nyithindo ong’e ni kanyakla maru en achiel kuom kanyakla mokalo 100,000 manie riwruok mar oganda Jehova e piny mangima. Lernegi weche motudore gi riwruogno, kaka otiyo, koda ting’ ma nyithindi nigo mar siro tij riwruogno. Nyisgi ber mar bedo gi chokruoge mag alwora, chokruoge mag distrikt, kod limbe mag jorit-alwora.—Ne sanduk mawacho ni, “Weche Munyalo Nono Sama Utimo Lamo mar Joot,” e ite mar 28.

Ka nyaloreni, gwel jorit malworo, jomisonari, jood Bethel, koda jomamoko matiyo ne Nyasaye kuom thuologi duto, olimu pacho. Kik ipar ni ok digiher bedo gi joma tindo. Giduto gitemo luwo ranyisi mar Yesu, nimar kinde duto norwako nyithindo kendo nowuoyo kodgi. (Mari. 10:13-16) Sama nyithindi winjo ka jotich Jehova kaka mago wuoyo kuom weche mabeyo ma giseneno e tichne, mano biro miyo nyithindi bende oket chenro mar tiyo ne Nyasaye kuom thuologi duto e kinde mabiro.

En ang’o kendo ma unyalo timo kaka joot mondo ukony nyithindu obed molony gi riwruok mar oganda Jehova? Magi gin moko kuom gik ma unyalo timo: Unyalo loso chenro mar nono bug Mashahidi wa Yehova—Wapiga-Mbiu wa Ufalme wa Mungu. Jiwuru kaka jotich Jehova osebedo ka nyiso kido mar chiwruok, bolruok, koda makruok motegno gi Nyasaye. Nyis kaka Jehova osetiyo gi jotichne e lando wach maber e piny mangima. Tiuru gi vidio mogo gi riwruok mar oganda Jehova mondo ipuonjgigo weche manyalo konyogi e wi gigo ma ne otimore chon koda matimore e kindegi. Ka in gi nyalo, limuru Bethel manie pinyu kata manie pinje mamoko. Limbe kaka mago nyalo konyo nyithindi neno kaka bad-riwruok mar oganda Jehova e piny, matiyo e bwo jatichno mogen, chiwo chiemb chuny kendo tayo owete e piny mangima, mana kaka e kinde Jokristo mokwongo.—Math. 24:45-47; Tich 15:22-31.

Ti gi Puonj Mowinjore gi Nyathi ka Nyathi

Sama ipuonjo nyithindi, ket e paro yo ma Yesu ne puonjogo jootene. Kinde moro nowachonegi kama: “Pod an gi weche mang’eny mowinjore awachnu, to ok unyal makogi koro.” (Joh. 16:12) Yesu  ne ok othung’o jopuonjrene gi puonj mang’eny dichiel. Kar mano, ne opuonjogi adiera madwarore mosmos, e yo ma ne miyo gimakogi maber. Kamano bende, kik ithung’ nyithindi gi puonj mang’eny dichiel. Kuom puonjogi weche matin tin pile, e wi riwruok mar oganda Jehova, mano biro miyo gibed gi siso mar puonjruok e wi kanyakla mar Jokristo. Kaka chal mar nyithindi medo lokore, inyalo nwoyonegi puonjgo kendo nyisogi weche mamoko momedore kuom gigo ma ne isepuonjogi.

Kanyakla mar Jokristo en chenro maduong’ ahinya makonyowa tego winjruokwa gi Nyasaye, kendo jo matindo ma nigi kinda e riwo tijege lwedo, bedo moikore moloyo e kwedo tembe mag piny Satan. (Rumi 12:2) Wageno ni ubiro yudo mor mogundho e konyo nyithindu mondo obed molony gi riwruok mar oganda Jehova. Kokalo kuom gwethge, mad gisik ka gimakore chuth gi riwruogno kaachiel gi Nyasachwa ma jahera mwatiyone.

[Sanduk/​Picha manie ite mar 28]

Weche Munyalo Nono Sama Utimo Lamo mar Joot

Magi gin moko kuom weche motudore gi riwruok mar oganda Jehova, ma unyalo nono sama utimo Lamo mar Joot.

▪ Nonuru sigand kanyaklau. Kaka ne ochakore koda kinde ma ne ochakoree? Gin Ute Romo mage mopogore opogore ma kanyaklau ne romoe? E wi sigand kanyaklau, donge unyalo gwelo ng’at mosebet e kanyaklau kuom kinde mang’eny mondo odwok penjo ma nyithindi nigo?

▪ Leruru gimomiyo itimo chokruoge mopogore opogore mag kanyakla koda chokruoge madongo, kendo kaka ginyalo konyo nyithindo.

▪ Nonuru gimomiyo riwruok mar oganda Jehova ne ochako skunde mopogore opogore. Wuoru kuom gik mabeyo mosenenore ma joma osedhi e skundego osebedo ka timo.

▪ Konyuru nyithindo mondo one ber mar chopo e okang’ mar bedo jolendo mapile mag wach maber. Nyisgiuru kaka tijgi mar lendo bende irwako e ripot mar piny mangima miketo e Kitabu cha Mwaka cha Mashahidi wa Yehova.

▪ Wuoru kuom migepe mopogore opogore mag tiyo ne Nyasaye kuom thuolo duto, ma rowere nyalo timo e riwruok mar oganda Jehova. Sula mar 10 e bug Tengenezo Linalofanya Mapenzi ya Yehova nyalo konyo kuom wachno.

▪ Konyuru nyithindo ong’e gimomiyo waluwo chenro moko moket ei kanyakla. Lernegi gimomiyo onego giluw kaka riwruok mar oganda Jehova chiko, kata mana e weche matindo, to ok luwo yoregi giwegi. Nyisgi kaka ginyalo konyo e miyo weche odhi maber ei kanyakla, ka waduto waluwo kaka jodongo chiko.

[Picha]

Loso osiep gi jogo mosetiyo ne Nyasaye kuom higini mang’eny biro konyo nyithindu

[Picha manie ite mar 26]

Mana kaka e Israel machon, jonyuol ndalogi onego otim matek chiwo dwoko ma nyithindgi penjogi e wi riwruok mar oganda Jehova