“Okonya Miyo Wach Ochop e Chuny Ji”

E KINDE mokalo, Porto Alegre, ma en taon man milambo mar Brazil, ne otimie chokruok moro maduong’ mar piny mangima, ma ne nono gigo machando oganda dhano. Gana mang’eny mag ji nobiro e chokruogno ka giwuok e pinje 135. Ka nochopo seche mag yweyo, grup moro mar Joneno moa e kanyakla moro man Porto Alegre ne odhi lendo ne welo ma ne obiro e chokruogno, ka ginyisogi wach Pinyruoth manie Muma. Ne gitiyo gi dhok mane e wuoyo kodgi?

Painia miluongo ni Elizabete, wacho kama: “Ne watiyo gi buk matin mar Good News for People of All Nations.” Ne omedo wacho kama: “Ng’eny welogo ne pok owinjoga wach maber mar Pinyruoth, kata kamano ne girwako wach ma ne walando. Ne wawuoyo gi ji mowuok e pinje mag Bolivia, China, Faransa, India, Israel, kod Nigeria. Ne wan gi buge malero Muma e dhok ma welo moko ne wacho, kendo ne gimor ahinya kawo bugego.”

E piny Mexico, painia miluongo ni Raúl, bende jatiyo gi bugni, kendo oseyudo nyak maber. Kinde moro matin mosekalo, ne odhi ir jaduong’ moro ma jahigini 80 ma Ja-Arabu, ma noyudo olalo chiege e tho. Bang’ ka jaduong’no ne osesomo wach Pinyruoth mayudore ei bugno e dho Arabu, pi wang’e nochako chwer gi mor. Nikech ang’o? Somo e dhogi owuon wach ma Nyasaye okoro ni tho biro bedo maonge mayudore e Fweny 21:3, 4, ne omulo chunye ahinya. E kinde moro machielo, kane Raúl timo tij lendo e yo maok ochan, ne oromo gi dichwo moro ma ne wacho dho Portugal. Dichwono bende noyudo olalo wuode e tho. Raúl nomiye bugno mosomo kama ondikie weche gi dho Portugal. Bang’ somogi, dichwono nonyiso gombo mar puonjruok weche momedore kuom Muma, kendo ne oyie mondo opuonjruok kode Muma.

Raúl osetiyo gi buk mar Good News for People of All Nations e lendo ne jogo mawacho dho Armenia, China, Faransa, India, Ingresa, Jerman, Korea, Mixe, Persia, Russia, kod Zapotec. Owacho kama: “Aseneno gimomiyo dwarore ahinya ni ati gi bugni sama alendo. Okonya miyo wach ochop e chuny ji kata obedo ni ok anyal wacho dhok ma gitiyogo.”

Sani kaka joma omedore dhi e wuodhe kendo dak e pinje mamoko, wan gi thuolo mang’eny mar romo gi jogo mawacho dhok machielo. Ka watiyo gi bug Good News for People of All Nations, wabiro bedo gi nyalo mar landonegi wach Pinyruoth. Be ijating’o bugno?

[Piche manie ite mar 32]

Raúl, koting’o buk makonye chopo e chuny ji