Jehova En Ruoth Kendo Jalochwa!
Jehova En Ruoth Kendo Jalochwa!
“Asetimo Ruoth Nyasaye kar bwokna.”—ZAB. 73:28.
1. Kaluwore gi wechene manie 1 Jo Korintho 7:31, nenore ni Paulo ne wuoyo kuom ang’o?
“KIDO mar pinyni kadho.” Jaote Paulo ema nowacho wechego. (1 Kor. 7:31) Nenore ni Paulo ne poro pinyni gi kar tugo mar drama, ma jotugo tugoe kido mabeyo kata maricho, nyaka chop gikadhi kendo weyo thuolo ne jotugo mamoko.
2, 3. (a) En ranyisi mane mwanyalo tiyogo e lero wach piem gi loch mar Jehova? (b) Gin penjo mage mwabiro nono?
2 Sani, nitie wach moro maduong’ moloyo madhi nyime machalo kaka drama—to omaki in bende! Otudore ahinya gi wach nyiso ayanga ni Jehova Nyasaye ema nigi ratiro mar locho. Wanyalo chiwo ranyisi kuom wachno ka watiyo gi gima nyalo timore e piny moro. Wawach ni pinyno nigi sirkal moket e loch e yo mowinjore kaluwore gi chik, kendo orito piny e yo maber. Pinyno bende nigi riwruok moro marach malocho e yor mibadhi, mahundu, kod nek. Riwruogno piem gi sirkal makare manie loch, kendo mano keto jopinyno e bwo tem mar nyiso kabe gibiro makore chuth gi sirkandgi.
3 Gima chalo kamano timore e polo koda e piny mangima. “Jehova Nyasaye” ma e Jaloch, nigi sirkal ma ema nigi ratiro mar locho. (Zab. 71:5) Kata kamano, nitie riwruok moro marach madwaro locho e wi oganda dhano, kendo otelne gi ‘ng’at marachno.’ (1 Joh. 5:19) Riwruogno piem gi sirkal mowinjore mar Nyasaye, kendo mano miyo ji duto bedo e bwo tem mar nyiso kabe gibiro makore chuth gi loch Nyasaye. Ere kaka wachno nochakore? Ang’o momiyo Nyasaye oweyo chal ma kamano mondo odhi nyime? Ng’ato ka ng’ato kuomwa nyalo timo nade kuom wachno?
Weche Motudore gi Wach Piemno
4. Piem madhi nyime oriwo weche mage ariyo motudore?
4 Piem madhi nyimeno oriwo weche ariyo motudore: Loch Jehova koda kabe dhano nyalo makre chuth gi lojno kuom luwo tim makare. Kinde mang’eny, Ndiko luongo Jehova ni “Ruoth Nyasaye.” Kuom ranyisi, jandik-zaburi nonyiso geno duto ma ne en-go kuom Jehova kowero kama: “Asetimo Ruoth Nyasaye kar bwokna.” (Zab. 73:28) “Ruoth” kata bedo gi loch en gima nyiso teko kod loch. Jaloch en ng’ama nigi teko mamalo chuth. Nitie gik momiyo onego wane Jehova Nyasaye kaka Ng’a Mamalo Chuth.—Dan. 7:22.
5. Ang’o momiyo onego wariw loch Jehova lwedo?
5 Kaka Jachwech, Jehova Nyasaye e Jaloch mar piny kod gik moko duto. (Som Fweny 4:11.) Jehova bende en Jang’adnwa-Bura, Jachiw-Chik, kendo Ruoth, nimar en gi migepe mag ng’ado-bura, keto chike, kendo en gi teko duto e wi gik moko te man e sirkande. (Isa. 33:22) Bedo ni wangima nikech Nyasaye kendo ngimawa otenore kuome, onego wanene kaka Ruoth kendo Jalochwa. Gima biro miyo wariw lochne lwedo en ng’eyo kinde duto ni, “Jehova oseketo kom ruodhe e polo; kendo piny ruodhe olocho kuom duto.”—Zab. 103:19; Tich 4:24.
6. Luwo tim makare tiende ang’o?
6 Mondo omi wariw loch Jehova lwedo, nyaka wasiki ka waluwo tim makare e nyime. “Luwo tim makare” en gima nyiso ni ng’ato nigi timbe mabeyo, malong’o, kendo mowinjore chuth. Ng’at manyiso kidono en ng’ama onge bura kendo matir. Ayub ne en ng’at machalo kamano.—Ayub 1:1.
Kaka Wach Piemno Nochakore
7, 8. Ere kaka Satan nokwedo ratiro ma Jehova nigo mar locho?
7 Higini madirom 6,000 mosekalo, malaika moro nokwedo ratiro ma Jehova nigo mar locho. Gombo marach mar mondo olame ema nomiyo malaikano obedo jang’anjo. Nowuondo dhano ariyo mokwongo, Adam gi Hawa, mondo ong’anj ne loch Nyasaye, kendo notemo ketho nying’ Jehova kuom temo nyiso ni Jehova nowacho miriambo. (Som Chakruok 3:1-5.) Jang’anjono nobedo Jasigu maduong’, Satan (Jakwede), Jachien (Jaketh Nying’), thuol (jawuond), kendo thuol mang’ongo (jangemo).—Fwe. 12:9.
8 Satan ne oketore owuon kaka jaloch mapiem gi Jehova. Nikech monj ma ne omonjego, en ang’o ma Ruoth Jehova Jaloch, ne dhi timo? Be ne odhi ketho jong’anjo adekgo gikanyono, tiende ni Satan, Adam, kod Hawa? Kuom adier, ne en gi teko mar timo kamano, kendo ketho jogo dine onyiso ayanga jal ma nigi teko mamalo chuth. Kethogi bende dine onyiso ni Jehova nowacho adier e wi kum mibiro mi jogo moketho chikene. Ang’o momiyo Nyasaye ne ok okethogi gikanyono?
9. Satan noketo kiawa kuom weche mage?
9 Kuom riambo kendo golo Adam kod Hawa kuom Nyasaye, Satan noketo kiawa kabe Jehova nigi ratiro mar keto ne dhano chike monego giluw. E wi mano, kuom miyo dhano mokwongo ng’anjo ne Nyasaye, Satan bende noketo kiawa kabe malaike te koda dhano duto omakore chuth gi Nyasaye. Mana kaka nonenore kuom wach Ayub jal ma nomakore chuth gi loch Jehova, Satan ne wuoyo kanyiso ni nonyalo ywayo dhano duto oa kuom Nyasaye.—Ayub 2:1-5.
10. Kuom weyo kinde mondo okadhi, Nyasaye osechiwo thuolo mar ang’o?
10 Kuom weyo kinde mondo okadhi, Jehova osemiyo Satan thuolo mar nyiso kabe wechego gin adier. Bende, Nyasaye osemiyo dhano thuolo mar nyiso ni gimakore chuth gi lochne. Ang’o mosetimore bang’ higini gana mang’eny mosekadho? Satan oseguro riwruok maduong’ mapiem gi loch Nyasaye. Gikone, Jehova biro ketho riwruogno koda Jachien, konyisogo chuth ni Nyasaye ema nigi ratiro mar locho. Jehova Nyasaye ne nigi adier chuth ni gik moko ne dhi bedo maber, kendo nokoro wachno gie kinde ma ng’anjono notimore e Eden.—Chak. 3:15.
11. Dhano mang’eny osetimo nade korka loch Jehova?
11 Nitie ji mang’eny mosenyiso yie kendo chung’ motegno e luwo tim makare ka giriwo lwedo loch Jehova, kendo pwodho nyinge obed maler. Jogo gin kaka Abel, Enok, Noa, Ibrahim, Sara, Musa, Ruth, Daudi, Yesu, jopuonjre mokwongo mag Kristo, kod tara gi tara mag joma luwo tim makare e ndalogi. Joma kamago ma noriwo loch Nyasaye lwedo, konyo e nyiso ni Satan en jamiriambo, kendo gisemiyo nying’ Jehova obedo maler kuom ayany duto ma Jachien oseketo kuom nying’no kane osungore ni onyalo miyo dhano duto owe lamo Nyasaye.—Nge. 27:11.
Wang’eyo Maler Kaka Piemno Biro Gik
12. Ere kaka wanyalo bedo gadier ni Nyasaye ok bi weyo richo mondo odhi nyime mochwere?
12 Wanyalo bedo gadier ni kinde okayo ma Jehova biro nyiso ratiro ni en e Jaloch. Ok obi weyo mondo richo odhi nyime mochwere, kendo wang’eyo ni wadak e ndalo mag giko. Jehova noketho joricho e ndalo mag Ataro. Noketho Sodom gi Gomora koda Farao gi jolwenyne. Sisera kod jolwenyne, Sennakerib kod jolweny mag Assuria ne onge gi teko e nyim Ng’ama Malo Chutho. (Chak. 7:1, 23; 19:24, 25; Wuok 14:30, 31; Bura 4:15, 16; 2 Ruo. 19:35, 36) Omiyo, wanyalo bedo gadier ni Jehova Nyasaye ok bi weyo joma ok nyis luor ne nyinge kendo masando Jonenone, odhi nyime timo kamano maonge giko. Bende, sani waneno gik makonyowa fwenyo ranyis manyiso ni sani Yesu locho, koda mar giko mar ndalo.—Math. 24:3.
13. Ere kaka wanyalo tony kik kethwa kanyachiel gi wasik Jehova?
13 Mondo omi watony kik kethwa kanyachiel gi wasik Nyasaye, nyaka wanyis ni wariwo loch Jehova lwedo. Ere kaka wanyalo timo kamano? En kuom weyo maok wariw lwedo loch marach mar Satan, kendo neno ni ok wabed maluor e nyim joge motiyogo. (Isa. 52:11; Joh. 17:16; Tich 5:29) Mana ka watimo kamano, eka wanyalo nyiso ni wariwo loch mar Wuonwa me polo lwedo, kendo bedo gi geno ni wabiro tony e kinde ma Jehova biro pwodhoe nyinge obed maler, kendo nyiso ni en e Jaloch e wi gik moko duto.
14. Kuonde mopogore opogore ei Muma fwenyonwa weche mage?
14 Muma mangima oting’o weche malero wach loch Jehova kod wach chung’ motegno mar dhano e nyime. Sula adek mokwongo ei Muma, nyisowa wach chwech koda kaka dhano ne olwar e richo, to sula adek mogik nyisowa kaka dhano ibiro gony a e richo. Sula mamoko mag Muma chiwonwa weche manyiso okenge ma Ruoth Jehova Jaloch, osekawo mondo omi ochop dwarone ne dhano, piny, polo, koda gik moko duto. Bug Chakruok nyiso kaka Satan koda richo nodonjo e piny, to sula mago mogik ei bug Fweny leronwa kaka ibiro tiek richo, kaka ibiro keth Jachien koda kaka dwaro mar Nyasaye biro timore e piny kaka e polo. Kuom adier, Muma nyisowa kaka richo kod tho nobiro, kendo onyisowa kaka ibiro golgi e piny, mi kargi kaw gi mor kod ngima mochwere ne jogo maluwo tim makare.
15. Mondo wayud gweth e kinde ma wach piem mar loch biro chopo e gikone, ang’o ma nyaka watim?
15 Ndalo okayo ma kido mar pinyni biro kadho chuth. Piem ma dhi nyime kuom wach loch biro gik. Satan ok bi locho kendo, mi dwaro mar Nyasaye ema biro timre. Kata kamano, mondo wayud gweth mokor ei Wach Nyasaye, nyaka wariw loch Jehova lwedo gie sani. Ok wanyal chung’ diere. Mondo omi wawach ni: “Jehova osedokna,” nyaka wasiki korka kore.—Zab. 118:6, 7.
Wanyalo Siko Kwaluwo Tim Makare!
16. Ang’o momiyo wanyalo bedo gadier ni dhano nyalo siko e luwo tim makare e nyim Nyasaye?
16 Wanyalo riwo loch Jehova lwedo kendo siko kwaluwo tim makare, nimar jaote Paulo nondiko niya: “Onge temruok ma osenwang’ou ma ok mano ma yudo dhano. To Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.” (1 Kor. 10:13) Temruok ma Paulo wuoyoeno wuok kune, to ere kaka Nyasaye miyowa yo mar wuok?
17-19. (a) Jo-Israel ne olwar e tem mane ka gin e thim? (b) Ang’o momiyo siko kwaluwo tim makare e nyim Jehova en gima nyalorenwa?
17 Mana kaka ranyisi mar Jo-Israel kane gin e thim nyiso, “temruok” nyalo bironwa kokalo kuom gik manyalo miyo waketh chik Nyasaye. (Som 1 Jo Korintho 10:6-10.) Jo-Israel ne nyalo kwedo tem, kata kamano ne gigombo “gik maricho” e kinde ma Jehova notimo hono mar miyogi aluche maromogi kuom dwe achiel mangima. Kata obedo ni nyaka chop kanyo ji ne pok ochamo ring’o kuom kinde, Nyasaye nomiyogi manna moromogi chamo. Kata kamano, ne gidonjo e tem kane wuoro kod ich lach oloyogi sama ne gichoko aluchego.—Kwan 11:19, 20, 31-35.
18 Motelo ne mano, ka noyudo Nyasaye miyo Musa Chik e Got Sinai, Jo-Israel nochako timo lamo mar nyaroya kod luwo mor mag ringruok. Nikech jatelo ma dhano ma ne ginyalo neno ne onge, temno ne odhi nyime maok ogeng’. (Wuok 32:1, 6) Kane gichiegni donjo e Piny Manosingi, mond Jo-Moab noywayo gana mang’eny mag Jo-Israel, mi ne gidonjo e tim terruok kodgi. E kindeno, gana mang’eny mag Jo-Israel ne otho nikech richogi. (Kwan 25:1, 9) Nitie kinde ma Jo-Israel nolwar e tem mar ng’ur e yor ng’anjo, kendo kinde moro ne gichako wuoyo marach kuom Musa kaachiel gi Nyasaye wuon! (Kwan 21:5) Jo-Israel ne ong’ur kata mana bang’ kane oseketh Kora, Dathan, Abiram, kod jowetegi, ka giparo ni kum ma kamano ne ok owinjore. Mano nomiyo Nyasaye ooro tho monego Jo-Israel 14,700.—Kwan 16:41, 49.
19 Kuom tembe moa wachgo, onge kata achiel kuomgi ma ne nyalo tamo Jo-Israel kwedo. Ji nolwar e bwo tem nikech ne giweyo chung’ motegno e yie, kendo wigi ne owil gi kaka Jehova noritogi kod kaka yorene gin yore makare. Mana kaka e ndalo Jo-Israel, tembe mwaromogo gin gik mapile e ngima dhano. Ka waketo kinda madwarore e kwedo tembego kendo geno kuom Nyasaye mondo oritwa, wanyalo siko e luwo tim makare. Wanyalo bedo gadier kuom wachno nimar, “Nyasaye en Jadier” kendo ‘ok oyie mondo otemwa moloyo tekrewa.’ Jehova ok dijwang’wa ngang’ mi chop kama kaka dhano waonge gi teko mar timo dwarone.—Zab. 94:14.
20, 21. Sama wan e bwo tem, ere kaka Nyasaye ‘miyowa yo mar wuok’?
20 Jehova ‘miyowa yo mar wuok’ kuom tegowa mondo wakwed tembe. Kuom ranyisi, josand nyalo hinyowa e yor ringruok mondo omi wakwed yiewa. Tim ma kamano nyalo rwakowa e tem mar weyo yiewa ni eka mondo kik gowa, sandwa, kata negwa. Kata kamano, kaluwore gi weche manie 1 Jo Korintho 10:13, ma Paulo nondiko kotelne gi roho mar Nyasaye, wang’eyo ni gik makelonwa temgo gin mana makadho. Jehova ok bi weyo mondo gidhi nyime mi chop kama ok wanyal siko kwachung’ motegno e nyime. Nyasaye nyalo tego yiewa kendo miyowa teko madwarore mondo omi wachung’ motegno e luwo tim makare.
21 Jehova miyowa teko kokalo kuom roho mare maler. Rohono bende paronwa weche manie Ndiko, manyalo konyowa kwedo tembe. (Joh. 14:26) Omiyo, ok nyal wuondwa mondo waluw yo maok kare. Kuom ranyisi, wang’eyo weche ariyo motudore, tiende ni loch Jehova kod chung’ motegno mar dhano e luwo tim makare. Ng’eyo wachno osemiyo Nyasaye orito ji mang’eny, mi gichung’ motegno nyaka e tho. Kata kamano, tho ok ema ne obedo ne jogo yo mar wuok; Jehova ema nokonyogi nano nyaka giko maok gilwar e bwo tem. Wan bende onyalo timonwa kamano. Kuom adier, otiyo bende gi malaikene makare mondo okonywa, ‘koorogi mondo giti tich mar konyo joma biro yudo warruok.’ (Hib. 1:14) Mana kaka sula maluwo biro nyiso, mana joma chung’ motegno e luwo tim makare, ema nyalo geno yudo thuolo mar riwo lwedo loch Nyasaye nyaka chieng’. Wanyalo bedo achiel kuomgi ka wamakore gi Jehova kaka Ruodhwa kendo Jalochwa.
Inyalo Dwoko Nade?
• Ang’o momiyo onego wane Jehova kaka Ruoth kendo Jalochwa?
• Tiend siko kwaluwo tim makare e nyim Nyasaye en ang’o?
• Ere kaka wanyalo ng’eyo ni kinde okayo ma Jehova biro nyiso ratiro ma en-go mar bedo Jaloch?
• Kaluwore gi 1 Jo Korintho 10:13, ang’o momiyo siko kwaluwo tim makare en gima nyalore?
[Penjo mag Puonjruok]
[Picha manie ite mar 24]
Satan nowuondo Adam gi Hawa mondo ong’anj ne Jehova
[Picha manie ite mar 26]
Ng’ad mar riwo loch Jehova lwedo