Penjo Moa Kuom Josombwa

Yesu nowacho ne jowinjone kama: “Beduru malong’o, kaka Wuonu me polo long’o.” Ere kaka dhano nyalo bedo “malong’o” e kindegi?—Math. 5:48.

Gimaduong’ manyalo konyowa winjo tiend penjono en ng’eyo kaka Ndiko tiyo gi wach ni, “malong’o.” Ok gik moko duto ma Ndiko wacho ni ‘long’o’ ni kamano e okang’ mogik chuth. En adier ni Jehova long’o e okang’ mogik chuth kamano. Dhano kaachiel gi gik moko nyalo bedo malong’o mana e okang’ moro. E dho Hibrania kod dho Grik, wach moloki ni “malong’o” kinde mang’eny tiende en ‘gima oromo chuth,’ ‘gima otegno mogik chuth,’ kata ‘maonge both moro amora kuome,’ kaluwore gi rang’iny mamalo moseketi. Kinde mang’eny, wachno itiyogo kiwuoyo kuom gimalong’o mana e okang’ moro. Ranyisi achiel en kaka ng’ato nyalo wacho ni “kit yamo long’o.”

Ne ochwe Adam gi Hawa ka gin joma long’o chuth e yore duto, e tim, e winjruokgi gi Nyasaye, kendo ne gin gi del malong’o chuth maonge richo. Ne gilong’o chuth kaluwore gi rang’iny ma Jachwechgi ne oseketo. To nimar ne gitimo richo, ne ok gichopo e rang’iny ma ne oseketi, omiyo koro ne ok gilong’o kaachiel gi kothgi. Kuom mano, kokalo kuom Adam ema richo, bedo maok long’o, kaachiel gi tho, ne obiro ne dhano duto.—Rumi 5:12.

Kata kamano, mana kaka Yesu nowacho e Twak mar Got, kata mana dhano ma joricho nyalo bedo malong’o e okang’ moro. E twagno, nowacho kaka dhano nyalo bedo gi hera e okang’ malong’o chuth. Hera kaka mano en hera machalo gi ma Nyasaye nyiso dhano. Yesu nowacho kama: “Heruru wasiku, kendo lamuru ni jo ma sandou, mondo ubed nyithind Wuonu me polo; nikech omiyo wang’ chieng’ mare wuok ni jo maricho kod jo mabeyo, kendo oolo koth ni jo makare kod jo ma ok kare.” (Math. 5:44, 45) Kuom nyiso hera rang’iny ma kamano, jopuonjre Yesu ne dhi luwo ranyis malong’o chuth ma Nyasaye keto.

E kindegi, Joneno mag Jehova e piny mangima temo ahinya nyiso jomoko kit hera kaka mano. Gidwaro konyo ji mawuok e kit ngima, dhoudi, koda dinde mopogore opogore, mondo ong’e adiera mar Muma. E pinje 236, Joneno sani puonjore Muma gi ji mokalo 7,000,000.

Yesu nopenjo kama: “Kuhero jo ma oherou, ere pok munwang’o? Josol osuru ok tim kamano koso? To kumoso oweteu kende, ere gi muloyogo jo moko? Ogendini bende ok tim kamano koso?” (Math. 5:46, 47) Jokristo madier ok buon jomoko nikech kit somo margi kata kit piny ma giwuokie; kendo ok ginyis hera mana ne jogo mabende nyisogi hera. Kar mano, gikonyo jochan, joma tuwore, joma tindo koda joma oti. Kokalo kuom timo mago, Jokristo nyalo luwo hera mar Jehova kendo mano miyo gibedo malong’o e okang’ moro.

Be wanabed malong’o e okang’ ma ne Adam long’ogo? Ee, kokalo kuom keto yie e misango rawar mar Yesu, dhano moluoro Nyasaye biro bedo malong’o chuth e kinde Loch Kristo mar Higini Gana Achiel, ma en kinde ma ‘Wuod Nyasaye noketh tich Satan.’—1 Joh. 3:8.