‘Wakel Gir Chiwo mar Jehova’

KA NG’ATO otimoni tim moro manyiso ng’wono inyalo dwokone erokamano e yo mane? Non ane kaka jotend oganda lweny mar Jo-Israel ne onyiso erokamano bang’ kedo e lweny gi Jo-Midian. Ne gikedo e lwenyno bang’ richo Jo-Israel ma notudore gi wach Baal-Peor. Nyasaye ne okonyo joge mi gilocho, kendo gik ma ne gipeyo ne opog ne jolweny 12,000 koda ne Jo-Israel mamoko. Kaluwore gi kaka Jehova ne osechiko, jolweny ne ochiwo moko kuom pokgi ne jodolo, to Jo-Israel mamoko bende ne ochiwo pokgi kamano ne Jo-Lawi.—Kwan 31:1-5, 25-30.

Kata kamano, jotend oganda lweny ne dwaro golo chiwo momedore. Ne giluwo ne Musa niya: “Wan jotichni wasekwano kar romb ji ma jolweny man e luetwa, onge kata achiel moremnwa.” Ne ging’ado mar golo dhahabu koda gik mamoko kaka gir chiwo ne Jehova. Kar romb gik mothedh mag dhahabu  ma ne gichiwo duto ne okalo kilo 227.—Kwan 31:49-54.

E kindegi, ji mang’eny chunygi jiwogi nyiso erokamano kuom gik ma Jehova osetimonegi. E wi mano, joma bedo gi chuny mar nyiso erokamano ok gin mana jotich Nyasaye mochiworene kende. Kuom ranyisi, non ane dereba moro mar bas ma ne tero welo ma ne odhi e chokruok moriwo pinje e taon miluongo ni Bologna, e piny Italy e higa 2009. Nikech ne en dereba ma riembo maber kendo mamuol, jogo ma ne nie bas nondikone kad mar nyiso erokamano kendo miye mich matin mar pesa kaachiel gi bug Ang’o ma Muma Puonjo Kuom Adier? Derebano nowachonegi niya: “Ayie kawo kad kod buk, kata kamano adwokonu pesa nikech adwaro gole kaka chiwo mondo udhi nyime gi tich mutimo. Kata obedo ni ok an achiel kuom Joneno mag Jehova, adwaro golo chiwoni nikech aseneno ni utimo gik moko nikech hera.”

Yo achiel minyalo nyisogo chuny mar erokamano kuom gik ma Jehova osetimoni en kuom golo chiwo ne tij piny mangima mar Joneno mag Jehova. (Math. 24:14) Moko kuom yore ma jomoko yiero tiyogo e golo chiwo onyis e sanduk motudore gi wachni.

[Sanduk manie ite mar 20]

MOKO KUOM YORE MA JOMOKO YIERO TIYOGO E GOLO CHIWO

CHIWO NE TIJ PINY MANGIMA

Ji mang’eny keto tenge pesa moko ma gibiro keto e sanduge mag chiwo mondiki ni, “Tij Piny Mangima.”

Dwe ka dwe, kanyakla oro pesago ne ofis mar Joneno mag Jehova matayo tij lendo e pinygi. Chiwo mag pesa bende inyalo or achiel kachiel ne Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-​2483, kata orogi ne ofis mar Joneno mag Jehova matayo tij lendo e pinyu. (Yore mag chiwo moler pinyka bende inyalo tigo e oro chiwo ne ofis mar Joneno mag Jehova manie pinyu.) Chek mag bengi mioro kitiyo gi adres moket malo kanyo onego oor kinyiso ni pesago dhi ne “Watchtower.” Gik mamoko ma nengogi tek inyalo gol kaka chiwo bende. Barua machuok manyiso ni gik ma kamago ochiwgi kaka mich onego oor kanyachiel gi chiwogo.

CHIWO MIBIRO DWOK KENDO

Ng’ato nyalo miyo Watch Tower Bible and Tract Society of Pennsylvania pesa mondo otigo e tij piny mangima. Kata kamano, kapo ni okwa pesago to ibiro dwoknegi. Mondo iyud weche momedore kuom chenroni, inyalo ndiko ne ofis miluongo ni Treasurer’s Office, kitiyo gi adres moket malo kanyo kata goyo simo kitiyo gi namba maluwogi (718) 560-​7500.

CHIWO MOCHAN

E wi golo pesa kaka mich, nitie yore mamoko minyalo gologo chiwo mondo okony tij Pinyruoth mitimo e piny mangima. Magi gin kaka:

Insuarans: Inyalo ti gi nying Watch Tower Bible and Tract Society of Pennsylvania kaka riwruok mabiro yudo chudo moa kuom chenro mar insuarans mar ngima kata penson bang’ ritaya.

Akaunt mag Bengi: Akaunt mag bengi, kalatese manyiso pesa mokan, kata akaunt ma ng’ato oyawo mokanoe pesa mobiro tiyogo bang’ ka oseritaya, inyalo nyis ni omi Watch Tower Bible and Tract Society of Pennsylvania, bang’ tho ng’ato, kaluwore gi chenro mar bengi manie pinyu.

Stok kod Bond: Stok kod bond inyalo chiw ne Watch Tower Bible and Tract Society of Pennsylvania kaka mich, kata inyalo ket nying Watch Tower Bible and Tract Society of Pennsylvania kaka riwruok mabiro yudo chudo kuomgi kapo ni weggi otho.

Ute gi Puothe: Ute koda puothe minyalo ng’iew inyalo chiw kaka mich, to kapo ni en ot kata puodho ma wuon-go pod odakie, onyalo dhi nyime gi dak kanyo nyaka chieng’ thone. Tudri gi ofis mar Joneno mag Jehova manie pinyu kapok ing’ado mar golo ute kata puothe kaka chiwo.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata ng’at ma jagol chiwono oyiero, ibiro mi chudo moro higa ka higa e ngimane duto. Kae to osur ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi Watch Tower Bible and Tract Society of Pennsylvania kokalo kuom wil mondik kaluwore gi chik sirkal, kata ndiko nying Watch Tower Bible and Tract Society of Pennsylvania kaka riwruok mabiro yudo chudo kuom chenrono. Chiwo mimiyo riwruok mar din nyalo konyo korka wach osuru.

Kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. E konyo jogo magombo chiwo kony ne tij piny ngima ma Joneno mag Jehova timo kokalo kuom chiwo mochan, osego brosua e dho Ingresa kod Spain miluongo ni Charitable Planning to Benefit Kingdom Service Worldwide. Ne ogo brosuano mondo okony e lero yore mopogore opogore ma mich migolo kaka chiwo inyalo chiw gie sani kata bang’ ka ng’ato osetho. Bang’ somo brosuano kendo tudore gi joma olony gi chik sirkal kor weche osur, ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osur mang’eny nikech timo kamano. Inyalo kwayo ofis mar Charitable Planning Office brosuano achiel kachiel.

Mondo iyud weche momedore inyalo tudori gi ofis miluongo ni Charitable Planning Office, kata inyalo tudori gi ofis mar Joneno mag Jehova matayo tij lendo e pinyu.