Onge Kinde ma Odeko Chako Tiyo ne Nyasaye

E gweng’ mar Málaga, e milambo mar piny Spain, nitie miyo moro kod nyare, giduto iluongogi gi nying’ achiel ni Ana, ne obatisgi Desemba 19, 2009. Ne gin achiel kuom ji 2,352 ma ne okawo okang’ mar batiso e piny Spain e kinde mar higa 2009. Kata kamano, ne nitie wach moro makende kuom miyono kod nyare, mano ne en hikgi. Miyo ne nigi higini 107 to nyare hike ne 83!

Ang’o momiyo ne gichiwore ne Jehova mi obatisgi? E chak higini mag 1970, Janeno moro ma ne ode ni machiegni, ne jagwelo Ana jahigini 83 e chokruok mar Puonjruok Buk mar Kanyakla, ma ne itimo e od Janenono. Ana ne jadhi kinde ka kinde. Kata kamano, Ana ne ok odhi nyime timo dongruok, nikech tich ma ne otiyo.

Chiegni higini apar bang’e, nyithind Ana moko ne ochako puonjore Muma kendo bang’ kinde moko, ne gibedo jotich Jehova. Achiel kuom nyithinde miluongo ni, Mari Carmen, ne okonyo min mare chiero hero ma ne en-go kuom adiera mar Muma, kendo ne okonye rwako puonjruok mar Muma. Bang’ mano, Ana ma jahigini 107 ma en dan Mari Carmen, bende ne ochako rwako puonj mag Muma. Gikone, ji apar kuom joodno ne okawo okang’ mar batiso.

E odiechieng’ ma ne ibatisogi, Ana ariyogo, ma gin miyo gi nyare, ne mor ahinya. Ana jahigini 107, wacho kama: “Jehova osetimona maber ahinya, nimar oseweyona thuolo mondo ang’eye.” Nyare to medo wacho kama: “Kapok Paradis ochopo, adwaro tiyo ne Jehova, katimo dwarone kendo lando wach maber gi nyalona duto.”

Gima osemiyo mond liete ariyogo mor mogundho en dhi e chokruoge mag Jokristo. Jaduong’-kanyakla margi wacho kama: “Ok gibare kata chokruok achiel. Kinde duto giikore mar chiwo paro e Puonjruok mar Ohinga mar Jarito.”

Ranyisi ma giketo mar chung’ motegno paronwa chi liel miluongo ni Anna ma “ne ok oa e Hekalu, to nolamo Nyasaye otieno gi odiechieng’, koriyo kech, kendo kosaye.” Mano ne omiyo obedo gi thuolo mar neno Yesu kane podi en nyathi matin. (Luka 2:36-38) Anna ne nigi higini 84, to ne ok oti ahinya ma mone tiyo ne Jehova, kendo mano ok osemono mon ariyogo mabende iluongo ni Ana.

Be in gi wedeni moikore winjo wach mawuok e Muma? Kata, be iseromo gi ng’at moti moikore winji sama idhi e ode? Joma kamago nyalo bedo kaka Ana ariyo ma osewuo kuomgi malo, onge kinde ma odeko chako tiyo ne Nyasaye madier Jehova.

[Weche manie ite mar 25]

“Jehova osetimona maber ahinya”

[Weche manie ite mar 25]

“Kapok Paradis ochopo, adwaro tiyo ne Jehova”