Weruru ne Jehova!
Weruru ne Jehova!
“Anawer pak ni Nyasacha, ka pod antie.”—ZAB. 146:2.
1. Ang’o ma nomiyo Daudi ondiko wendene?
KINDE ma ne pod orawera, Daudi ne tiyo gi seche mang’eny e pewe machiegni gi Bethlehem kokwayo rombe wuon mare. Sama norito rombe, Daudi ne nyalo neno chwech mabeyo miwuoro mag Jehova: polo mopong’ gi sulwe, “gibuya me thim,” kod “winy me polo.” Gik ma noneno ne ojiwe ahinya, mi omiyo oloso wende mamulo chuny mondo opakgo Jal ma ne oloso gik mabeyogo. Wende mang’eny ma Daudi nondiko yudore e bug Zaburi. *—Som Zaburi 8:3, 4, 7-9.
2. (a) Thum nyalo konyo ng’ato nade? Chiw ane ranyisi. (b) Ang’o mwanyalo puonjore kuom winjruok ma Daudi ne nigo e kinde gi Jehova kaluwore gi Zaburi 34:7, 8 kod Zaburi 139:2-8?
2 Nyalo bedo ni mano e kinde ma Daudi nomedoe lony mare e wer gi goyo thum. Nobedo jago thum molony sidang’, mi mano nomiyo okete kaka jago thum ne Ruoth Saulo. (Nge. 22:29) Thum ma Daudi ne goyo ne miyo ruoth ma chunye ne chandore bedo gi chuny mokuwe, mana kaka thum maber timo ne ji e kindegi bende. Sa asaya ma Daudi ne goyo thum, ‘chuny Saulo ne duogo, moyud kuwe.’ (1 Sam. 16:23) Ne en jathum ma noluoro Nyasaye, omiyo wende ma ne owero kendo ndiko, podi konyo ahinya nyaka sani. Par ane wach maluwoni! Sani, higini mokalo 3,000 bang’ nyuol Daudi, ji tara gi tara ma wuok e kit ngima mopogore opogore e piny mangima, hinyo somo zaburi mag Daudi mondo giyud hoch kod geno.—2 Weche 7:6; som Zaburi 34:7, 8; 139:2-8; Amos 6:5.
Thum Nigi Kare Mowinjore e Lamo Madier
3, 4. Ne oket chenro mage mag wero kendo goyo thumbe ne Nyasaye e kinde mag Daudi?
3 Daudi ne nigi lony makende, kendo ne otiyo gi lonyno e yo maberie moloyo—e pako Jehova. Bang’ bedo ruodh Israel, Daudi noloso chenro mondo tije mag tabernakel oriw bende wende gi thumbe mamit. Jo-Lawi madirom 4,000, ne omi migawo mar bedo ‘jopak Jehova,’ to 288 ‘ne opuonj wer ne Jehova, jo molony duto.’—1 Weche 23:3, 5; 25:7.
4 Daudi owuon ema nondiko thoth wende ma Jo-Lawi ne goyo ne thum, kendo wero. Nyaka bed ni zaburi mag Daudi ne omulo ahinya chuny Ja-Israel moro amora ma ne nyalo betie sama ne iwerogi. Bang’e, e kinde ma ne itero sandug hekalu e Jerusalem, “Daudi nowacho ni jodongo mag Jo-Lawi mondo giyier owetegi ma jower, kod kit thumbe, nyigwerini gi thumbe gi olenge, mayuak mamit ka giting’o dwondgi gi mor.”—1 Weche 15:16.
5, 6. (a) Ang’o momiyo ne okaw thum kaka gimaduong’ ahinya e kinde Daudi? (b) Ere kaka wanyalo ng’eyo ni thum ne nigi kare madwarore e lamo, e kinde Jo-Israel machon?
5 Ang’o momiyo ne okaw thum kaka gimaduong’ ahinya e kinde Daudi? Be ne en mana nikech ruoth owuon ne en jathum? Ooyo, ne nitie wach machielo momiyo, kendo wachno ne ofwenyore bang’e e kinde ma Ruoth Hezekia nochako ochiero kendo tije mag hekalu. E 2 Weche mag Ndalo 29:25, wasomo kama: ‘Hezekia noketo Jo-Lawi e od Jehova gi nyigwerini, gi nyidwonge, kendo gi thumbe, kaka chik Daudi obet, gi mar Gad jakor mar ruoth, gi Nathan janabi, nimar chik noa kuom Jehova gi dho jonabi mage.’
6 Ee, kokalo kuom jonabi mage, Jehova nochiko mondo joma lame opake gi wer. Jower ma ne wuok e anyuola mar jodolo ne ogony kuom tiyo tije moko ma ne dwarore ni otim gi Jo-Lawi, mondo omi gibed gi thuolo moromo mar loso wende, kendo nyalo bedo ni mano noriwo koda ikruok ne werogi.—1 Weche 9:33.
7, 8. Kodok korka wero wende Pinyruoth, ang’o madwarore ahinya maok mana lony mar ng’ato?
7 Dibed ni inyalo wacho kama, “Kodok korka wer, kuom adier an dine ok okwana kuom jogo ma ne olony e wer gi goyo thum e tabernakel!” Kata kamano, nitie Jo-Lawi moko ma ne ok gin jower kata jothum molony. Kaluwore gi 1 Weche mag Ndalo 25:8, ne nitie bende jogo ma ne gin ‘jopuonjre.’ Ber ng’eyo bende ni dhoudi mamoko mag Israel ne nyalo bedo gi jothum kod jower molony ahinya, kata kamano, Jehova noyiero mana Jo-Lawi korka migawo mar thum e hekalu. Wanyalo bedo gadier ni kata bed ni ne ‘gilony’ kata ne gin ‘jopuonjre,’ Jo-Lawi duto ma noluoro Nyasaye noketo chunygi duto e migawono.
8 Daudi nohero thum gi wer kendo ne olony e tijno. Kata kamano, be lony monyuolgo ng’ato kende ema Nyasaye ng’iyo? E Zaburi 33:3, (New World Translation) Daudi nondiko kama: “Timuru kar nyalou duto e goyo gige thum mag tonde, kuting’o dwondu malo gi mor.” Puonj mwayudo kanyo nenore maler: Gimaduong’ en ‘timo kar nyalowa duto’ e pako Jehova.
Kaka ne Itiyo gi Thum Bang’ Ndalo Daudi
9. Ler ane gik ma ne inyalo neno kendo winjo kapo ni ne inyalo betie sama ne iwalo hekalu e kinde loch Suleman.
9 E kinde loch Suleman, thum ne otigo ahinya e lamo maler. E sama ne iwalo hekalu, ne nitie jogo thumbe mopogore opogore, kaachiel gi ji 120 ma ne goyo tunge. (Som 2 Weche mag Ndalo 5:12.) Muma wachonwa ni, ‘jogo tunge [ma duto ne gin jodolo] kod jower nobet kaachiel, kendo dwondgi nowinji kaachiel ka gipako kendo goyo erokamano ne Jehova. Ne gipake ni “ber to ober, miwafune osiko mochwere.”’ Mapiyo bang’ jowergo ting’o dwondgi malo e yor mor, “eka bor polo nopong’o ot,” manyiso ni Jehova norwako pakno. Mano kaka nyaka bed ni winjo ywak mar tungego duto kaachiel gi jower gana gi gana kariwo dwondgi, ne en gima lich miwuoro!—2 Weche 5:13.
10, 11. Ang’o manyiso ni Jokristo mokwongo ne tiyo gi thum kod wer e lamo?
10 Thum bende ne itiyogo e lamo e kinde Jokristo mokwongo. En adier ni Jokristo mokwongo ne ok tim romogi e tabernakel kata e hekalu, to ne giromo e udi mag ji. Nikech sand koda weche mamoko, kuonde ma ne giromoe ne ok beyo ahinya. Kata mano, pod Jokristogo ne pako Nyasaye gi wer.
11 Jaote Paulo nojiwo Jokristo wetene ma ne ni Kolosai kama: “Jiwreuru ng’ato gi ng’ato . . . weruru mamit e chunyu, kendo gouru erokamano ni Ruoth, kuwero zaburi, gi wende pak, gi wende mag chuny.” (Kol. 3:16) Bang’ kane osewit Paulo gi Sila e od twech, ne gichako “lemo kendo wer ni Nyasaye,” kata obedo ni ne gionge gi bug wer ma ne ginyalo luwo. (Tich 16:25) Kapo ni in ema ne owiti e od twech, gin adi kuom wendewa mag Pinyruoth ma ne inyalo paro kendo wero ka ok iti gi bug wer?
12. Wanyalo nyiso nade ni wakawo wendewa mag Pinyruoth kaka gimaduong’?
12 To nikech thum nigi kare mowinjore e lamo, nyalo bedo maber ka wapenjore kama: ‘Be akawo wer gi thum kaka gimaduong’ e lamo? Be atimo kar nyalona duto mondo omi achop chon e chokruoge mag kanyakla, alwora, koda distrikt, mondo awer wer michakogo kanyachiel gi owetena koda nyiminena, to be awer gi chunya duto? Be ajiwo nyithinda mondo kik gine wende miwero e kind chokruok mar Skul mar Tij Nyasaye kod Chokruok mar Tijwa, kata miwero e kind twak mar ji duto kod Puonjruok mar Ohinga mar Jarito, kaka thuolo mar weyo kombegi ka ok ochuno, mana ni mondo gidhi giriere matin?’ Wer bende en gima duong’ e lamowa. Ee, kata bed ni wan jo “molony” kata ‘jopuonjre,’ waduto wanyalo riwo dwondwa e pako Jehova, kendo onego watim kamano.—Pim gi 2 Jo Korintho 8:12.
Nikech Kinde Lokore, Chal Marwa Bende Lokore
13, 14. En ber mane manyalo bedoe ka wawer gi chunywa duto sa chokruoge mag kanyakla? Chiw ane ranyisi.
13 Higini mokalo 100 mosekalo, Zion’s Watch Tower nolero achiel kuom gigo momiyo wero wendewa mag Pinyruoth dwarore ahinya. Nowacho kama: “Wero adiera en yo maber mar miyo adierano ochop e paro koda e chuny oganda Nyasaye.” Ng’eny weche mayudore e wendewa gin weche mogol e Ndiko, omiyo, puonjruok weche manie moko kuom wendego nyalo bedo yo maber ahinya mar miyo adiera odonj e chunywa. Kinde mang’eny, welo ma eka ohango biro e chokruogewa osejiw ahinya gi yo ma jo kanyakla wergo gi chunygi duto.
14 E midhiambo moro achiel e higa 1869, kane C. T. Russell duogo e ode bang’ tich, nowinjo dwond jower kawuok e ot moro. Gie kindeno, noyudo oseng’ado ni ok obi yudo adiera e wi Nyasaye. Omiyo noseng’ado mar keto chunye duto e ohande, koparo e chunye ni mano ne dhi miyo okony ji e yor ringruok kata obedo ni ok ne onyal konyogi ng’eyo Nyasaye. Owadwa Russell nodonjo ei odno kendo noyudo ka ji ni e chokruok mar lamo. Ne obet piny kendo chiko ite. Bang’e nondiko ni kokalo kuom kony mar Nyasaye, weche ma ne owinjogo ‘noromo e jiwo yiene ma ne oyudo osedok chien e wi Muma.’ Par ane ni wer ema ne okwongo rwako Owadwa Russell e chokruok.
15. En lokruok mane ma osemiyo otim lokruok moko e bug wer?
15 Kaka kinde kalo, wamedo yudo lokruok moko mabeyo e wi puonj mag Ndiko. Ngeche 4:18 wacho kama: “Yor jo makare chal ka ler ka piny oyawore, momedore ameda nyaka wang’ chieng’ orieny maler.” Ler mamedore chuno ni nyaka tim lokruok moko e yo ma ‘wawerogo adiera.’ Kuom higini 25 mokalo, Joneno mag Jehova e pinje mang’eny osebedo katiyo gi bug wer ma wiye wacho ni Mwimbieni Yehova Sifa. * Nyaka ne go bugno, ler mar adiera osemedo rieny e wi puonj moko, kendo weche moko ma otigo ei bugno tinde ok tigo. Omiyo, nenore maler ni kaluwore gi puonj mag ndiko, osechuno ni otim lokruok moko e bug wer.
16. Bugwa manyien mar wer biro konyowa nade luwo puonj ma Paulo chiwo e Jo Efeso 5:19?
16 Lokruok kaka mano kaachiel gi weche mamoko, ema nomiyo Bura Maduong’ opwodho ni mondo ogo bug wer manyien ma wiye en, Mwimbieni Yehova. Kwan wende mayudore e bugwa manyien mar wer odwok chien nyaka 135. To nikech koro wende ok ng’eny ahinya monego wapuonjre, nyalo bedo mayot mondo wapuonjre weche mag wende moko manyien kendo parogi. Timo kamano luwore gi puonj ma Paulo chiwo e Jo Efeso 5:19.—Som.
Inyalo Nyiso ni Ikawo Wendego gi Pek
17. Gin paro mage mabiro konyowa loyo luoro mwanyalo bedogo sama wawer e kanyakla?
17 Be onego wawe luoro mar wichkuot mondo omonwa wer e chokruogewa mag Jokristo? Ng’i ane wachno kama: Sama wawuoyo, donge en adier ni ‘wachwanyore pile’? (Jak. 3:2) Kata kamano, ok waseweyo mano omonwa pako Jehova e lendo mar ot ka ot. Kare en ang’o monego omonwa pako Nyasaye gi wer, kata kapo ni ok wan gi nyalo mar wer maber? Jehova ma ema “nochweyo dho dhano,” mor ahinya sama owinjo ka watiyo gi dhowa e pake.—Wuok 4:11.
18. Chiw ane paro moko manyalo konyo ng’ato puonjore weche manie wendewa.
18 CD miluongo ni Mwimbieni Yehova—Muziki wa Kuimbwa yudore e dhok mogwaro. Giting’o wende miwero gi jower matiyo gi gige thum mopogore opogore e wero wende manyien-go. Yo ma ochan-go thum kod wendego mit ahinya. Winj wendego kinde ka kinde; timo kamano biro miyo imak weche wendewa moko manyien. Weche manie ng’eny wendego ondiki e yo ma ka ng’ato wero lain achiel, to ogombo ng’eyo weche maluwo. Omiyo, sama iwinjo wendego e CD, donge inyalo temo wer kanyachiel gi jowergo? Ka ipuonjri luwo kaka thum dhi kendo mako maber weche manie wendego ka in pacho, onge kiawa ni ibiro werogi gi chir e Od Romo.
19. Iko thumbe mag wende Pinyruoth oriwo tije kaka mage?
19 Yot mondo kik wakaw gi pek thum migoyo sama wan e chokruoge mag alwora, koda mag distrikt. Ikogi en gima kawo tich mang’eny ahinya. Bang’ yiero wer gi thum monego otug, ichanogi maber kae to itugogi gi jogo thum 64 mag Watchtower orchestra. Bang’ mano, jogo thumgo tiyo gi seche mang’eny e yiero wende monego gimed tugo, eka gikone gimako thumbego gi masin e studio man Patterson, New York. Apar kuom owete gi nyiminego odak oko mar piny Amerka. Giduto gikawo tij iko thumbe mabeyo mwatiyogo e chenro mag lamo, kaka thuolo makende ahinya. Wanyalo nyiso chuny mar erokamano kuom chiwruokgi mar hera. Sama jakom mar chokruoge mag alwora koda distrikt ogwelowa mondo wabed e kombewa, weuru watim kamano maok odeko, kendo chiko itwa ne thum ma oiknwa e yor hera.
20. En ang’o ma ing’ado mar timo?
20 Jehova rwako wendewa mag pak. Omor kodgi ahinya. Wanyalo miyo chunye obed mamor kuom wer gi chunywa duto sa asaya ma wachokore mondo walame. Ee, kata bed ni walony e wer, kata wan jopuonjre, weuru mondo ‘wawer ne Jehova’!—Zab. 104:33.
[Weche moler piny]
^ par. 1 Ber ng’eyo ni higini 1,000 bang’ tho Daudi, malaike moko nolando nyuol Mesia ne jokwath, ma ne rito rombegi oko e pap machiegni gi Bethlehem.—Luka 2:4, 8, 13, 14.
^ par. 15 Bugno noting’o wende 225 kendo ne giyudore e dhok mokalo 100.
Ineno Nade?
• Gin ranyisi mage mag Muma manyiso ni thum nigi kare mowinjore e lamowa?
• En tudruok mane ma inyalo neno e kind luwo chik Yesu mayudore e Mathayo 22:37 kod wero wende mag Pinyruoth gi chunywa duto?
• Gin yore mage mwanyalo nyisogo ni wakawo wendewa mag Pinyruoth gi pek?
[Penjo mag Puonjruok]
[Picha manie ite mar 23]
Be ijiwo nyithindi mondo kik giwuog oko sa wer ka ok ochuno?
[Picha manie ite mar 24]
Be ipuonjri weche mag wendewa manyien sama in pacho?