Yud Gweth Kokalo Kuom Ruoth ma Roho mar Nyasaye Tayo!
Yud Gweth Kokalo Kuom Ruoth ma Roho mar Nyasaye Tayo!
‘Roho mar Jehova nobed kuome.’—ISA. 11:2.
1. Jomoko osewacho weche mage kuom chandruoge momako piny?
E HIGA mar 2006, jasomo moro miluongo ni Stephen Hawking nopenjo kama: “E piny mopong’ gi tungini mag siasa, weche dak, koda kethruok mar alwora ma ji odakie, ngima dhano biro chalo nade higini 100 mabiro?” Gaset miluongo ni New Statesman nowacho kama: ‘Pok watieko dhier chuth kata kelo kuwe e piny. Kar mano, nenore mana ni weche osemedo kethore moloyo. Ok en ni pok watemo kawo okang’. Wasetemo yore duto, kaka loch mar komunist gi kapitolist, Riwruok Matudo Pinje (League of Nations) kod bedo gi mbom mar nyuklia. Wasegoyo lwenje mang’eny ni eka wakel kuwe, kwatemo nyiso ni wang’eyo tieko lweny.’
2. Ere kaka Jehova biro nyiso e kinde machiegni ni en ema en gi ratiro mar locho e wi piny?
2 Weche ma kamago ok kaw jotich Jehova gi wuoro. Muma wachonwa ni ne ok ochwe dhano mondo obed gi loch e wigi giwegi. (Yer. 10:23) Jehova kende ema nigi ratiro mar bedo Jaloch. Omiyo, en ema en gi ratiro mar keto chike monego dhano oluw, kod nyisowa kaka onego wati gi ngimawa, kendo tayowa e timo kamano. E wi mano, ndalo okayo machiegni ma obiro tiyo gi tekone e tieko loje duto ma dhano osetemo keto mondo gilochi e wigi giwegi. Gie kindeno bende, obiro ketho jogo duto makwedo ratiro mare mar bedo Jaloch, kendo miyo dhano obedo wasumb richo, rem, kendo wasumb “nyasach pinyni,” ma en Satan Jachien.—2 Kor. 4:4.
3. Isaya nokoro wach mane e wi Mesia?
3 E piny manyien mar Paradis, Jehova biro locho e yor hera e wi dhano kokalo kuom Pinyruodh Mesia. (Dan. 7:13, 14) Ka okoro wach Ruodh Pinyruodhno, Isaya nondiko kama: “Thuok moro nochuogre kuom yadh Yese, kendo mbandu moa e tiende nonyag olembe: mi [roho mar] Jehova nobed kuome, [roho] makelo rieko, gi lony, [roho] mang’ado ni ji rieko, mamiyo ji teko, [roho] mamiyo puonjruok kod luoro Jehova.” (Isa. 11:1, 2) Gin yore mage ma roho maler mar Nyasaye osemiyogo ‘thuok moa kuom yadh Yese,’ tiende ni Yesu Kristo—obedo ng’ama owinjore locho e wi oganda dhano? Gin gweth mage ma nobedie nikech lochne? To ang’o ma nyaka watim mondo omi wayud gwethgo?
Nyasaye Ema Miye Owinjore Locho
4-6. Yesu nigi ng’eyo malong’o kuom weche mage mabiro miyo owinjore bedo Ruoth mang’won kendo mariek, Jadolo Maduong’, kod Jang’ad-Bura?
4 Jehova dwaro ni dhano manie bwo lochne ochop e okang’ ma gin joma kare chuth, kitayogi gi jal ma e Ruoth mariekie kendo ma jang’wono gadier, mabende en Jadolo Maduong’ kendo Jang’ad-Bura. Mano emomiyo Nyasaye noyiero Yesu Kristo, jal ma nokonyo kokalo kuom roho mare maler, mondo omi obed ng’ama owinjore chopo migepe madwarore ahinyago. Non ane moko kuom gigo mamiyo Yesu biro chopo migepe ma Nyasaye omiyego e yo malong’o chuth.
5 Yesu ong’eyo Nyasaye e okang’ maber chuth. Wuowi ma miderma osebedo kong’eyo Wuoro kuom ndalo mang’eny maloyo ng’ato ang’ata machielo, dibed ni kuom higini bilion mang’eny. Kuom kindego, Yesu nobedo gi ng’eyo matut e wi Jehova, kendo mano ne nyalo miyo wach kuome ni en e “kido mineno mar Nyasaye ma ok ne.” (Kol. 1:15) Yesu owuon nowacho niya: “Ng’a mosenena, oseneno Wuoro.”—Joh. 14:9.
6 Bang’ Jehova, Yesu ema nigi ng’eyo moloyo e wi chwech duto, moriwo nyaka dhano. E Jo Kolosai 1:16, 17 (The Bible in Luo, 1976) wasomo kama: “Nikech kuome ema ne Nyasaye ochueyoe gik moko duto manie polo kendo manie piny, ok mana gik mineno kende, to koda ka gik ma ok ne bende . . . Kristo ne nitie kane pok ochue gik moko duto, kendo en ema gik moko duto oriwore kuome.” Par ane wachno! Yesu, ma ne en “jatich molony” mar Nyasaye, ne nigi migawo e tije mamoko duto ma ne otudore gi chwech. Omiyo, ong’eyo malong’o gik moko duto e polo koda e piny gibed matindo koda madongo, nyaka ka obwongo mar dhano. Ee, mano emomiyo Muma poro Kristo gi rieko!—Nge. 8:12, 22, 30, 31.
7, 8. Ere kaka roho mar Nyasaye nokonyo Yesu e tije mar lendo?
7 Roho maler mar Nyasaye ema nowalo Yesu. Yesu nowacho kama: ‘Roho mar Ruoth ni kuoma, nikech osewira gi mo mondo ayal wach maber ni jo modhier; noora mondo ahul gony ni jo motue, kendo ahul yepo mar wang’ ni muofini, mondo agony ji misando, kendo ahul higa ma Ruoth oyiego.’ (Luka 4:18, 19) Kane obatis Yesu, nenore ni roho maler nomiyo oparo gik ma ne oyudo osepuonjore kane pok obedo dhano, kaachiel gi gik ma Nyasaye ne dwaro ni ochop e migawone e piny kaka Mesia.—Som Isaiah 42:1; Luka 3:21, 22; Johana 12:50.
8 Nikech roho maler ne miye teko kendo ne en gi del kod paro makare chuth, Yesu ne ok en mana dhano maduong’ie moloyo kuom jogo ma osedak e piny, to bende ne en Japuonj maduong’ moloyo. Kuom adier, jowinjone “nowuoro ngang’ kuom puonjne.” (Math. 7:28) Mokwongo, Yesu nong’eyo gigo sie makelo chandruok mag dhano—richo, rem mar dhano, kod kiya Nyasaye. Bende, ne en gi nyalo mar ng’eyo gadier gima nie chuny ji, kendo notimonegi kaka owinjore.—Math. 9:4; Joh. 1:47.
9. Ere kaka gik ma Yesu nokaloe e ngima e piny miyo ineno ni owinjore chuth kaka Jaloch?
9 Yesu ne odak e ngima mar dhano. Dak ma ne odakgo kaka dhano koda tudruok machiegni ma ne en-go gi dhano morem, nokonyo Yesu ahinya e miyo owinjre kaka Ruoth. Jaote Paulo nondiko niya: ‘Nyaka Yesu ne bed machalo gi “owetene” e weche duto, mondo odok jadolo maduong’ mang’won kendo maradier, ma tiyo e nyim Nyasaye, kotimo misango mag oganda. En owuon osekadho e tem mar neno masira, omiyo onyalo konyo jogo mitemo.’ (Hib. 2:17, 18) Nikech ne ‘otem Yesu koneno masira,’ onyalo kecho jogo manie e bwo tem. Ng’wono mar Yesu nonenore maler e kinde ma ne en e piny. Joma tuwo, jo mong’ol, jo misando—kata mana nyithindo—ne winjo ka gin thuolo mar dhi ire. (Mari. 5:22-24, 38-42; 10:14-16) Joma muol koda jogo ma ne nigi gombo mar ng’eyo Nyasaye, bende ne dhi ire. To josunga, joma wigi ne tek koda jogo ma ne onge gi “hera mar Nyasaye e igi,” ne ok winje, ne gisin kode, kendo kwede.—Joh. 5:40-42; 11:47-53.
10. Yesu nonyiso hera moherowago e yo mane maduong’?
10 Yesu nochiwo ngimane e lowa. Nyalo bedo ni gima duong’ moloyo manyiso ni Yesu owinjore kaka Jaloch en kaka ne oikore tho nikech wan. (Som Zaburi 40:6-10.) Kristo nowacho ni: “Onge ng’ato man gi hera maduong’ moloyo ma, ni ng’ato oweyo ngimane nikech osiepene.” (Joh. 15:13) Ee, mopogore gi joloch ma gin dhano morem, ma kinde mang’eny dak e ngima mamalo ka gitiyo gi pesa ma gigolo kuom joma nie bwogi, Yesu to nochiwo ngimane owuon ne oganda dhano.—Math. 20:28.
Omiye Teko mar Tiyo gi Rawar e Kelo Gweth
11. Ang’o momiyo wanyalo bedo gadier chuth kuom Yesu kaka Jawarwa?
11 Mano kaka en gima owinjore ni Yesu kaka Jadolo Maduong’, ema tayo e miyo dhano oyud gweth kuom misangone mar rawar! Kuom adier, e ndalo ma ne en e piny, Yesu nochiwo ranyisi mag gik mobiro timo kaka Jawar e kinde Lochne mar Higini Gana Achiel, ma gin gweth mwanyalo yudo kwachung’ motegno. Ne ochango jomatuwo gi jo mong’ol, nochiero jomotho, nopidho oganda ji mang’eny, kendo nokweyo yamo mager gi gik machalo kamago. (Math. 8:26; 14:14-21; Luka 7:14, 15) E wi mano, notimo gigo ok ni mondo osung godo lochne koda tekone, kar mano nodwaro nyiso ng’wono koda herane. Nowacho ne jadhoho moro ma nosaye mondo ochange niya: “Ayie.” (Mari. 1:40, 41) E kinde Lochne mar Higini Gana Achiel, Yesu biro nyiso ng’wono ma kamano e piny mangima.
12. Ere kaka Isaiah 11:9 biro chopo?
12 Kristo kod joloch wetene bende biro dhi nyime gi tij puonjo ji e wi Nyasaye, ma en tich ma Yesu nochako higini madirom 2,000 mosekalo. Omiyo, weche manie Isaiah 11:9 nochopi niya: “Ng’eyo Jehova nopong’ piny, kaka pige opong’o nam.” Onge kiawa ni puonjgo noriw koda chike manyiso kaka onego orit piny kaachiel gi chwech mang’eny manie iye, mana kaka ne ochik Adam mondo otim kar chakruok. E giko higini 1,000, biro yudo ka dwach Nyasaye mokwongo kaka onyis e Chakruok 1:28 osechopo, kendo mano biro yudo ka gweth duto mag misango mar rawar osetimore chuth.
Omiye Teko mar Ng’ado-Bura
13. Ere kaka Yesu nonyiso ni ohero tim makare?
13 Kristo ema ‘Nyasaye oseketo jang’ad-bura mag jo mangima gi jomotho.’ (Tich 10:42) Omiyo, mano kaka en gima hoyo chuny, ng’eyo ni Yesu ok nyal timo mibadhi ngang’, kendo ni tim makare kod adierane gin kaka okanda mar nungone! (Isa. 11:5) Ne osin gi tim wuoro, wuondruok, koda richo mamoko, kendo nokwedo joma ne ok winj lit mag jowetegi machandore. (Math. 23:1-8, 25-28; Mari. 3:5) E wi mago, Yesu nonyiso ni ok nyal wuonde gi gik manenore mana gi oko, “nimar en owuon nong’eyo mantie ei i dhano.”—Joh. 2:25.
14. En yo mane ma Yesu nyisogo sani ni ohero tim makare kod ng’ado-bura kare, to onego wapenjre ang’o?
14 Yesu pod dhi nyime nyiso ni ohero tim makare kod ng’ado bura kare, nimar en ema otayo tich maduong’ moloyo, mar lendo kod puonjo ji e okang’ maloyo kinde moro amora mosekalo. Onge dhano, sirkal mar dhano, kata jochiende, manyalo chungo tij lendono kik chopi chuth kaka Nyasaye owuon dwaro. Omiyo, wanyalo bedo gadier chuth ni bang’ Har-Magedon, bura makare mar Nyasaye ema biro betie. (Som Isaiah 11:4; Mathayo 16:27.) Penjri ane iwuon kama: ‘Be an gi paro kaka mar Yesu kuom joma alendoni? Be amiyo Jehova duto manyalo, kata kapo ni midekre kata weche mamoko mona timo mang’eny?’
15. En ng’eyo wach mane mabiro konyowa miyo Nyasaye duto kar nyalowa?
15 Gima biro konyowa tiyo ne Nyasaye gi chunywa duto en ng’eyo malong’o ni tij lendo en tije. En ema nochiko ni otime; otayo tijno kokalo kuom Wuode; kendo kokalo kuom roho mare maler, ochiwo teko ne jogo ma time. Be imor gi migawo makende ma in-go mar tiyo kaka jatich kaachiel gi Nyasaye, kanyachiel gi Wuode motayo gi rohone? Ka ok mana Jehova, en ng’ano ma dimi ji mokalo milion abiriyo otim tij lando wach Pinyruoth e pinje 236, to koni to gin ji ma thothgi ikawo kaka “jopoya gi jo makiya”?—Tich 4:13.
Yud Gweth Kokalo Kuom Kristo!
16. Chakruok 22:18 nyiso ang’o e wi gweth Nyasaye?
16 Jehova nowacho ne Ibrahim niya: “Kuom kothi dhoudi duto mag piny noyud hawi; niwira isewinjo dwonda.” (Chak. 22:18) Mano nyiso ni jogo makawo tijgi ne Nyasaye kaka gima duong’, nyalo geno yudo gadier gweth ma Mesia ma en Kodhi ma ne osingi, biro kelo. Kendo kindegi gidich e tijgi ne Nyasaye ka giketo gwethgo e pachgi.
17, 18. En singo mane ma Jehova notimo mwasomo e Rapar mar Chik 28:2, to ere kaka wechego tiyo kuomwa?
17 Kinde moro kowuoyo gi koth Ibrahim mar ringruok, tiende ni oganda Jo-Israel, Nyasaye nowacho niya: “Gwethgi eki duto [moler e singruok mar Chik] nobi kuomi, kendo noyudi, kobedo ni iwinjo dwond Jehova Nyasachi.” (Rapar 28:2) Kamano bende e kaka inyalo wach ne jotich Nyasaye ma ndalogi. Ka idwaro yudo gweth Jehova, dhi nyime ‘winjo’ dwonde. Eka gwethne nyaka “nobi kuomi, kendo noyudi.” Kata kamano, ‘winjo’ dwonde oriwo timo ang’o?
18 Kuom adier, winjo dwonde oriwo rwako ei chunywa gigo ma inyisowa ei Wach Nyasaye koda chiemb chuny mochiwonwa. (Math. 24:45) Tiend winjo bende en luwo kendo timo kaka Nyasaye koda Wuode chiko. Yesu nowacho kama: ‘Ok ni ji duto ma luonga ni, “Ruoth, Ruoth,” e ma nodonji e pinyruodh polo; to mana ng’atno matimo gima Wuora me polo dwaro.’ (Math. 7:21) Kendo tiend winjo Nyasaye en bedo moikore luwo chenro moseloso, ma en kanyakla mar Jokristo kaachiel gi jodongo moseketi, ma gin ji mosechiwo kaka “mich.”—Efe. 4:8.
19. Ere kaka wanyalo bedo joma biro yudo gweth?
19 Moko kuom jogo mochiwo kaka “mich” gin jokanyo mag Bura Maduong’, kendo gitimo gik moko e lo kanyakla mar Jokristo. (Tich 15:2, 6) Kuom adier, chuny ma wakawogo owete Kristo en gima ibiro non ahinya korka bura mibiro ng’adnwa e kinde mar masira maduong’ mabiro. (Math. 25:34-40) Omiyo, achiel kuom yore mwanyalo yudogo gweth en kuom riwo lwedo jogo mowal mag Nyasaye, ka wamakore kodgi chuth.
20. (a) Ting’ maduong’ mar jogo ma gin kaka “mich” en mane? (b) Ere kaka wanyalo nyiso ni wageno owetego?
20 Jogo ma gin kaka “mich” oriwo bende jokanyo mag Komiti mag Ofise, jorit malworo, kod jodong-kanyakla—kendo giduto roho maler ema oketogi e migepego. (Tich 20:28) Ting’ maduong’ mar owetegi en gero jo Nyasaye, nyaka wan “duto wachopi e bedo achiel e yie, kendo e ng’eyo Wuod Nyasaye, nyaka wabedi motegno chutho, moromo rapor mogik ma en Kristo.” (Efe. 4:13) En adier ni mana kaka waduto, gin bende girem. Kata kamano, wanyalo yudo gweth ka wabolore kuom yore ma gitayowago kaka jokwath.—Hib. 13:7, 17.
21. Ang’o momiyo dwarore ahinya ni waluw kendo wawinj Wuod Nyasaye?
21 Ndalo okayo ma Kristo biro ketho piny marach ma Satan oteloeni. E kinde ma mano biro timore, ngimawa biro bedo e lwet Yesu, nimar en ema osemiye ratiro mar tayo “oganda mang’ongo” ma ne okor wachne, kotayogi nyaka “e sokini mag pi ngima.” (Fwe. 7:9, 16, 17) Kuom mano, weuru watem kar nyalowa sani mondo wayie kendo wabolore e lwet Ruoth ma roho mar Jehova tayo.
Ang’o Misepuonjri Kuom . . .
[Penjo mag Puonjruok]
[Picha manie ite mar 17]
Ng’wono mar Yesu nonenore maler kane ochiero nyar Jairo
[Piche manie ite mar 18]
Yesu Kristo tayo tich maduong’ mar lendo madhi nyime maloyo kinde moro amora nyaka a nene