Roho Maler Miyowa Teko mar Kedo gi Tembe kod Gik Manyoso Chuny

‘Unuyud teko ka roho maler obiro kuomu.’—TICH 1:8.

1, 2. En kony mane ma Yesu nosingo ne jopuonjrene, to ang’o momiyo ne dhi dwarore ni giyud konyno?

YESU nong’eyo ni jopuonjrene ne ok nyal mako weche duto ma nochikogi ka gitiyo mana gi teko margi giwegi. Keto e paro alwora malach ma ne dhi dwarore ni mondo gilendie, teko mar joma ne dhi kwedogi, koda nyawo ma ne gin-go kaka dhano, nenore maler ni ne dwarore giyud teko maloyo mar dhano. Omiyo, mapiyo nono kapok noidho e polo, Yesu nosingo ne jopuonjrene niya: ‘Unuyud teko ka roho maler obiro kuomu, kendo unudok jonenona e Jerusalem, gi Judea duto, gi Samaria, kendo nyaka tung’ piny.’—Tich 1:8.

² Singono nochako chopo e Pentekost mar higa 33 E Ndalowa, kane roho maler omiyo jolup Yesu Kristo teko mar pong’o Jerusalem gi tijgi mar lendo. Onge akwede moro amora ma ne nyalo chungo tijno. (Tich 4:20) Ne dhi dwarore mapiyo ni jolup Yesu mochung’ motegno, moriwo nyaka wan, oyud tekono ma Nyasaye chiwo “ndalo duto nyaka giko mar ndalo.”—Math. 28:20.

3. (a) Ler ane pogruok mantie e kind roho maler kod teko. (b) Teko ma Jehova chiwo nyalo konyowa timo ang’o?

³ Yesu nosingo ne jopuonjrene ni ne gidhi ‘yudo teko ka roho maler obiro kuomgi.’ “Teko” kod ‘roho,’ gin weche ariyo ma tiendgi opogore. Roho mar Nyasaye tiyo kuom ji kata kuom gik moko e miyo dwaro mar Nyasaye otimre. Kata kamano, inyalo wach ni teko to en “nyalo mar timo gimoro kata miyo gimoro otimre.” Teko ma kamano nyalo bet abeta kuom ng’ato kata kuom gimoro nyaka chop kama idware ni otim gimoro. Omiyo, inyalo wach ni roho maler chalo gi sitima mamedo betri mach, to teko kende en kaka mach mokan akana e betri. Teko ma Jehova miyo jotichne kokalo kuom roho maler, miyo ng’ato ka ng’ato kuomwa obed gi nyalo mar chopo singowa mar chiwruok kaka Jokristo, kendo ka dwarore, tekono nyalo konyowa kwedo gik maricho mikelo kuomwa.—Som Mika 3:8; Jo Kolosai 1:29.

4. Ang’o mwabiro nono e sulani, to nikech ang’o?

⁴ Ere kaka teko ma roho maler miyowa nenore? Gin ang’o kata tije mage mwanyalo timo kichikowa kode? Kaka watemo tiyo ne Nyasaye kwachung’ motegno, waromo gi pek mogwaro mikelo kuomwa gi Satan, piny marach moteloeni, kata nyawo magwa wawegi mag ringruok. Dwarore ni walo pek ma kamago mondo omi wanan kaka Jokristo, wati tij lendo maok wabare, kendo warit winjruokwa majaber gi Jehova. We wanon ane kaka roho maler konyowa kedo gi tembe, olo mag ringruok, koda gik manyoso chuny.

 Roho Maler Miyowa Teko mar Kedo gi Tembe

5. Ere kaka lamo nyalo miyo wayud teko?

⁵ Yesu nopuonjo jolupne mondo olem niya: ‘Kik iterwa kar tem, to ireswa kuom ng’a marachno.’ (Math. 6:13) Jehova ok bi jwang’o jotichne moluore ma kwaye kamano. E kinde moro machielo, Yesu nowacho ni, ‘Wuoro me polo nochiw roho maler ne joma kwaye.’ (Luka 11:13) Mano kaka en gima jiwowa ni Jehova singo ni obiro miyowa tekono makonyowa e luwo tim makare! En adier ni mano ok nyis ni Jehova biro geng’owa kik wayud tem. (1 Kor. 10:13) Kata kamano, sama waromo gi tembe, mago e kinde monego walemie motegno moloyo.—Math. 26:42.

6. Kane Satan teme, Yesu notiyo gang’o e chiwo dwoko?

⁶ Kane Jachien teme, Yesu nochiwo dwoko moa e ndiko mag Nyasaye. Nenore maler ni Wach Nyasaye ne ni e pach Yesu ka nodwoko ni: “Nondiki niya . . . Kendo nondiki niya . . . Aye, Satan; nikech nondiki niya, ‘Ruoth Nyasachi ema nilam, kendo en kende ema nitine.’” Hera ma noherogo Jehova kod Wachne nojiwo Yesu e kwedo gik ma Jatemno nokelo e nyime. (Math. 4:1-10) Bang’ ka Yesu nosekwedo tembego nyadinwoya, Satan ne oweye.

7. Ere kaka Muma konyowa e kwedo tembe?

⁷ Ka Yesu notiyo gi Ndiko e kwedo tembe mag Jachien, donge wan onego watim kamano moloyo! Kuom adier, mondo wabed gi nyalo mar kwedo Jachien kod joma otiyogo e kwedowa, dwarore ni wang’e maber chike koda puonj Nyasaye kendo wamakre kodgi chuth. Puonjruok Ndiko kendo ng’eyo rieko koda wach makare mar Nyasaye, osejiwo ji mang’eny ochako dak kaluwore gi chike koda puonj manie Muma. Kuom adier, ‘wach Nyasaye’ nigi teko mar keto bura kendo nono “paro kod dwaro manie chuny ng’ato.” (Hib. 4:12) Kaka ng’ato medo somo kendo paro matut kuom Ndiko, e kaka omedo yudo ‘rieko e luwo wach madier mar Jehova.’ (Dan. 9:13) Nikech en kamano, onego wapar matut e wi Ndiko mafwenyonwa abidha kuonde ma wawegi waremie.

8. Wanyalo yudo roho maler e yore mage?

⁸ Yesu nokwedo tembe, ok nikech nong’eyo mana Ndiko kende, to bende ne ‘opong’ gi roho maler.’ (Luka 4:1) Mondo omi wabed gi teko koda nyalo ma kamano, dwarore ni wasud machiegni gi Jehova kokalo kuom tiyo gi chenro duto moseketo mar konyowa pong’ gi rohone. (Jak. 4:7, 8) Moko kuom chenrogo gin kaka puonjruok Muma, lamo, kod bedo kanyachiel gi Jokristo wetewa. Nitie ji mang’eny moseyudo ber mar makruok chuth gi chenro mag Jokristo, ma en gima konyogi keto pachgi kuom weche mag chuny.

9, 10. (a) Gin tembe mage monya e alworau? (b) Ere kaka paro matut kod lamo nyalo miyi teko mar kedo gi tembe kata mana e kinde miwinjo ka iol?

⁹ Gin tembe kaka mage monego ikwed? Be isebedoe e bwo tem mar timo ngera mag kisera gi ng’at maok en jal mikendorigo? Kapok idonjo e kend, be isebedoe e bwo tem mar timo osiep gi ng’at maok en Janeno? Sama ineno televison kata tiyo gi Intanet, yot mondo Jakristo obed e bwo tem mapoya mar ng’iyo gimoro maok ler. Kapo ni mano osetimoreni, en okang’ mane ma ne ikawo? Ber paro matut kuom kaka okang’ achiel maok nyis rieko nyalo teri e okang’ machielo, mi bang’e idonj e richo maduong’. (Jak. 1:14, 15) Par kuom lit ma richo mwatimo kelo ne Jehova, kanyakla, koda ne joodu. Mopogore gi mano, wanyalo bedo gi chuny maler ka wasiko ka wamakore gi chike koda puonj mag Nyasaye. (Som Zaburi 119:37; Ngeche 22:3.) Kinde moro amora ma in e bwo tem ma kamago, ng’ad mar lamo kikwayo teko mar kwedogi.

¹⁰ Nitie gimachielo monego wang’e kuom tembe ma Jachien ne okelo ne Yesu. Satan nobiro ir Yesu bang’ ka nosebedo kotweyo chiemo kuom odiechienge 40 e thim. Onge kiawa ni Jachien ne paro ni mano ema ne en “kinde mowinjore” mar temo Yesu. (Luka 4:13, New World Translation) Satan hinyo manyo kinde mowinjore mar temo chung’wa motegno wan bende. Kuom mano, dwarore ni waritre wawegi mondo wasiki ka wategno e winjruokwa gi Nyasaye. Kinde mang’eny, Satan monjo ng’ato sama ofwenyo ni jalo nigi nyawo moro mamiyo yot goye piny. Omiyo, sa moro amora ma wawinjo ka waol kata chunywa onyosore, onego wang’ad mar sayo Jehova oritwa kendo omiwa roho maler.—2 Kor. 12:8-10.

Roho Maler Miyowa Teko mar Kedo gi Olo kod Gik Manyoso Chuny

11, 12. (a) Ang’o momiyo ji mang’eny winjo ka chunygi onyosore? (b) En ang’o manyalo miyowa teko mar kedo gi gik manyoso chuny?

¹¹ Kaka dhano morem, wabedo gi chuny monyosore kinde ka kinde. Mano nyalo timorenwa to moloyo e ndalogi, nimar wadak e kinde mag chandruok ahinya. Wadak e kinde minyalo wach ni tekie moloyo, nyaka a oganda dhano chak betie. (2 Tim. 3:1-5) Kaka Har-Magedon kayo machiegni,  chandruok mag yuto, parruok, koda mamoko medore. Omiyo, ok kawwa gi wuoro ni jomoko yudo ka chopo ting’gi mar rito joodgi medo bedo matek moloyo. Giwinjo ka giol, ginyosore, mi chop kata kama giwinjo ni ok ginyal chuth. Ka kamano e kaka weche chal kuomi, ere kaka inyalo kedo gi chandruogego?

¹² Ng’e ni Yesu nosingo ne jopuonjrene ni ne odhi miyogi jakony, tiende ni, roho maler mar Nyasaye. (Som Johana 14:16, 17.) Mano e teko maduong’ie moloyo teko moro amora. Kokalo kuom rohono, Jehova nyalo “tiyo ahinya moloyo” e miyowa teko kod chuny mar nano madwarore e kedo gi tem moro amora. (Efe. 3:20) Jaote Paulo nowacho ni ka wageno kuom rohono, to wanayud “tekono maduong’ ahinya,” kata mana kapo ni “idiyowa koni gi koni.” (2 Kor. 4:7, 8) Jehova ok singnwa ni obiro tieko chandruok, kata kamano osingo ni kokalo kuom rohone, obiro miyowa teko mar kedo.—Fili. 4:13.

13. (a) Ere kaka rawera moro oseyudo teko mar kedo gi chal moro marach? (b) Be ing’eyo ranyisi mag jomoko machalo kode?

¹³ Non ane ranyisi mar Stephanie, japainia mapile ma jahigini 19. Kane en jahigini 12, nobedo gi tuwo mar stroke kendo noyud bende ka gimoro dongo e obwongone. Chakre kanyo, osetimne yeng’o diriyo, thieth mar radiation, kendo tuwo mar stroke osegoye nyadiriyo kendo, kendo mano oseweye gi midekre mamiyo ong’ol gi koracham kendo wang’e ok nen maber. Chuno ni Stephanie oti gi tekone mana kuom gigo madwarore moloyo, kaka chokruoge Jokristo kod tij lendo. Kata kamano, podi ofwenyo teko ma Jehova konyego mondo omi onan e yore mang’eny. Bugewa malero Muma, moting’o weche manyiso gik mosetimore e ngima Jokristo wetewa, osejiwe e kinde mowinjo ka chunye onyosore. Owete gi nyimine osejiwe kuom orone barupe kata jiwe kapok chokruoge ochakore kata bang’e. Jogo mopuonjo Muma bende osenyiso ni gihero weche ma Stephanie puonjogi, kuom dhi e ode mondo gitim puonjruok mar Muma kuno. E magi duto, Stephanie dwoko ne Jehova erokamano maduong’. Ndiko mohero ahinya en Zaburi 41:3, moneno ni osechopo e ngimane owuon.

14. Ang’o ma nyaka kik watim kapo ni wan gi chuny monyosore, to nikech ang’o?

¹⁴ Sama waol kata wanie bwo pek moro, ok onego wapar ngang’ ni yo mar kedo gi pekno, en dok chien e chopo ting’wa kaka Jokristo. Mano dibed gimarach moloyo. Nikech ang’o? En nikech ting’go ma gin kaka puonjruok Muma mwatimo kendwa wawegi kata gi joodwa, tij lendo, kod dhi e chokruoge, e yore ma roho maler nyalo miyowago teko kendo. Tije Jokristo duogo chuny kinde duto. (Som Mathayo 11:28, 29.) Donge kinde mang’eny owete gi nyimine chopo e chokruok ka giol, to ka sa ochopo mar dok pacho, to giyudo ka gin gi teko kendo!

15. (a) Be Jehova singo ni obiro miyo ngima Jakristo obed mana mayot? Ler ane kitiyo gi Ndiko. (b) En ang’o ma Nyasaye singonwa, to mano miyo wapenjore ang’o?

¹⁵ En adier ni mano ok nyis ni koro bedo japuonjre Kristo en ting’ maonge gi pek moro. Bedo Jakristo mochung’ motegno en gima dwaro kinda. (Math. 16:24-26; Luka 13:24) Kata kamano, kokalo kuom roho maler, Jehova nyalo miyo ng’ama ool teko. Janabi Isaya nondiko ni: “Jo marito kuom Jehova tekogi noduogi: giniidh malo gi buombe kaka ongoye; giniring to ok gininyosre; giniwuothi to ok giniol.” (Isa. 40:29-31) Nikech en kamano, ber ka wapenjore niya, En ang’o ma kuom adier nyalo miyo wapar ni ting’wa mag Jokristo kelonwa pek ahinya?

16. Ang’o mwanyalo timo mondo wang’ad oko moko kuom gik manyalo olowa kata nyoso chunywa?

¹⁶ Wach Jehova jiwowa ni wabed “gadier kuom weche madwarore moloyo.” (Fili. 1:10, NW ) Ka oporo ngima Jakristo gi ng’wech mabor, jaote Paulo nojiwo kotelne gi roho niya: “Wan bende waweuru ting’ duto, . . . kendo waringuru kwanano ni ng’wech moketi e nyimwa.” (Hib. 12:1)  Gima notemo puonjo en ni nyaka wawere gi ting’ manono mabiro miyo waol. Nyalo bedo ni jomoko kuomwa temo rwako gik mang’eny e ngimagi modich. Omiyo, kapo ni kinde mang’eny iwinjo ka iol kendo in gi parruok, ber ka inono kaka isebedo kichopo ting’ni korka tij yuto, kinde mitiyogo e luwo yore mag yweyo kod manyo mor, koda okang’ miluwogo weche tuke gi yore mamoko mag mor. Paro e yo malong’o onego okonywa fwenyo kuonde mwaremie kendo miyo wang’ad oko gik maok ochuno.

17. Ang’o momiyo jomoko nyalo winjo ka chunygi onyosore, kata kamano Jehova singo ang’o kuom wachno?

¹⁷ Bende nyalo bedo ni jomoko kuomwa bende winjo ka chunygi onyosore nikech giko mar piny marachni pok otimore mapiyo kaka ne gigeno. (Nge. 13:12) Kata kamano, ng’ato ang’ata mawinjo kamano, nyalo yudo jip e weche mayudore e Habakkuk 2:3: “Fweny pod en mar ndalo moketi, to gikone okayo machiegini, kendo ok noriasre: kata odeko, rite arita; nikech nobi adieri, ok noriwri.” Jehova singonwa ni giko mar piny marachni biro chopo e sa sie moseketo!

18. (a) Gin singo mage mamiyo ibedo gi teko? (b) Ere kaka sula maluwo biro konyowa?

¹⁸ Kuom adier, jotich Jehova duto rito gi siso kinde mago ma olo kod nyosruok mar chuny norum, kinde ma ji duto nobed gi ngima kaka mar ‘rowere.’ (Ayub 33:25) Kata mana gie sani, wanyalo bedo gi teko maduogo chunywa kokalo kuom roho maler, sama watimo tije mag Jokristo. (2 Kor. 4:16; Efe. 3:16) Kik iwe olo omoni yudo gweth mochwere. Tem ka tem—kata bed mana ni ikele gi olo kata nyosruok mar chuny—biro kadho, kata ka ok gie sano, to e piny manyien mar Nyasaye. E sula maluwo, wabiro nono kaka roho maler miyo Jokristo teko mar nano e bwo sand, konyogi kwedo tembe maricho mag mbese, kendo nano e bwo chandruoge mopogore opogore.

 Inyalo Dwoko Nade?

• Ere kaka somo Muma miyo wabedo gi teko?

• Ere kaka lamo kod paro matut miyo wabedo gi teko?

• Ere kaka inyalo golo oko moko kuom gik manyalo nyoso chunyi?

[Penjo mag Puonjruok]

[Picha e ite mar 24]

Chokruoge mag Jokristo nyalo miyowa teko