Roho Maler Miyowa Teko mar Loyo Chandruok Moro Amora

“Anyalo timo gik moko duto kuom en ma miya teko.”—FILI. 4:13.

1. Ang’o momiyo oganda Jehova yudo chandruoge mang’eny?

KINDE mang’eny, oganda Jehova oseyudo chandruoge mopogore opogore. Moko kuom chandruogego biro nikech nyawo magwa wawegi kata nikech piny marach mwadakieni. To moko bironwa nikech sigu mantie e kind jogo matiyo ne Nyasaye kod jogo maok tine. (Chak. 3:15) Nyaka a chakruok mar dhano, Nyasaye osekonyo jotichne mochung’ motegno e nano kuom sand mikelonegi nikech yie margi, gisekwedo tembe maricho mag mbese, kendo gisenano kuom masiche mamoko. Rohone maler nyalo miyowa teko mar timo kamano wabende.

Roho Maler Konyowa Nano e Bwo Sand Mikelo Nikech Din

2. Sand mar din biro nikech ang’o, to onyalo biro e yore mage?

² Sand mikelo nikech din en sand mitimo kikelogo lit kuom ji nikech yie kod puonj ma giluwo. Sandno ikelo ni mondo eka otiek puonj ma kamago, ogeng’ puonjgo kik nya, kata miyo joma luwogi owe luwo puonjgo. Sand nyalo biro e yore mopogore opogore, moko e yore manenore ayanga to moko e yore mopondo. Muma nyiso ni yore ma Satan monjogo ng’ato chalo gi mag sibuor gi thuond u.—Som Zaburi 91:13.

3. Gin yore mage mag sand machalo gi mag sibuor gi thuond u?

³ Kaka sibuor mager, kinde mang’eny Satan  osemonjo ji ayanga kotiyo gi gero, twech mar jela, kata marfuk. (Zab. 94:20) Bug Kitabu cha Mwaka machiwo weche e wi tij Joneno mag Jehova e ndalogi, oting’o weche mang’eny mosetimore manyiso yorenego. Oganda ma achach, ma moko kuomgi otelne gi jotend din kata josiasa maricho, osetimo marach ne oganda Nyasaye kuonde mang’eny. Monjogi e yo machalo gi mag sibuor kamano, oselwaro jomoko manok. Mana kaka thuond u, Jachien bende monjo ji e yo mopondo mondo omi oketh pach ji kendo wuondogi mondo gitim dwache. Omonjowa kamano mondo omi onyoswa kata ketho yiewa. Kata kamano, kokalo kuom roho maler mar Nyasaye, wanyalo nano e bwo sand ma kamago.

4, 5. En yo mane maber moloyo mar ikruok ne sand, to nikech ang’o? Chiw ane ranyisi.

⁴ Temo paro yore mopogore opogore ma sand nyalo bironwago, ok e yo maber moloyo mar ikruok ne sand. Adier en ni ok wanyal ng’eyo kit sand manyalo bironwa, kuom mano parruok ahinya kuom gik ma seche moko ok nyal timore ngang’ ok bi konyowa. Kata kamano, nitie gima wanyalo timo. Thoth jogo mosenano e bwo sand osebedo gi nyalo mar timo kamano, bang’ paro matut e wi jotich Jehova mosechung’ motegno ma sigandgi ondiki ei Ndiko, kaachiel gi paro kuom puonj koda ranyisi mar Yesu. Timo kamano osemiyo gimedo hero Jehova moloyo. Kae to herano osekonyogi kwedo tem moro amora mobironegi.

⁵ Non ane ranyisi mar nyiminewa moko ariyo e piny Malawi. Kane ji temo chunogi ng’iewo kad mag buche siasa, oganda moro mar ji ne ogoyogi, olonyo lepgi, kendo wacho ni ne gidhi nindo kodgi gi thuon. Jogo ne riambonegi ni kata mana jood Bethel osekawo kadgo. Ere kaka nyiminewago nodwoko? “Wan watiyo mana ne Jehova Nyasaye. Omiyo, ka owete manie Bethel oseng’iewo kad, mano yiero margi. Wan ok wabi ng’iewo kadgo kata ka unegowa!” Bang’ chung’ motegno gi chir kamano, ne ogony nyiminewago.

6, 7. Ere kaka Jehova miyo jotichne teko mondo giked gi sand?

⁶ Jaote Paulo nonyiso ni Jokristo ma Thessalonika norwako adiera e bwo “sand maduong’,” kendo ‘gi mor mar roho maler.’ (1 Thes. 1:6) Kuom adier, Jokristo mang’eny e ndalogi koda e ndalo machon, mosekedo kendo loyo sand wacho ni, e kinde ma sand ne gerie moloyo, mago e kinde ma ne giwinjoe ka gin gi kuwe ma iye, ma en achiel kuom nyak mar roho maler mar Nyasaye. (Gal. 5:22) Kae to kuwe ma kamano nokonyogi rito chunygi koda parogi. Ee, Jehova tiyo gi roho mare maler e miyo jotichne teko mar nano e bwo sand kendo ng’ado paro manyiso rieko sama chandruok oyudogi. *

⁷ Jogo ma rangowa osewuoro kaka oganda Nyasaye chung’ motegno e yie kata mana e bwo sand mager. Chalo ka gima Joneno opong’ gi teko mokalo mar dhano, kendo kuom adier en kamano. Jaote Petro singonwa ni: ‘Ka gichayou nikech nying Kristo, un gi gweth; nikech roho mar duong’ gi teko, ee, roho mar Nyasaye, obedo kuomu.’ (1 Pet. 4:14) Bedo ni isandowa nikech makruokwa gi chike makare en gima nyiso ni Nyasaye oyie kodwa. (Math. 5:10-12; Joh. 15:20) Mano kaka ng’eyo ni wan gi gweth mar Jehova kelonwa mor sidang’!

Roho Maler Konyowa Kwedo Tembe mag Mbese

8. (a) Ang’o ma nokonyo Joshua gi Kaleb loyo tem mar mbese? (b) En ang’o mwanyalo puonjore kuom ranyisi mar Joshua gi Kaleb?

⁸ Yo mopondo mikwedogo Jokristo ma nyaka ginanie en tembe maricho mag  mbese. Kata kamano, nikech roho mar Jehova nigi teko maduong’ moloyo chuny mar pinyni, wanyalo loyo jogo ma jarowa, makeyo miriambo e wiwa, kata matemo chunowa ni mondo waluw kit ngimagi. Kuom ranyisi, en ang’o ma nokonyo Joshua gi Kaleb kwedo paro ma jowetegi apar ne nigo kane oorgi nono piny Kanaan? Ne giluwo kaka ne itayogi gi roho maler, omiyo ne gibedo gi ‘chuny’ kata paro mopogore.—Som Kwan 13:30; 14:6-10, 24.

9. Ang’o momiyo Jokristo nyaka ikre bedo mopogore gi oganda?

⁹ Kamano bende roho maler nomiyo joote Yesu teko mar winjo Nyasaye, moloyo winjo jogo ma thoth ji ne kawo kaka jopuonj mag din madier. (Tich 4:21, 31; 5:29, 32) Thoth ji ohero luwo aluwa dwach oganda ni eka mondo kik gichwany jomoko. Kata kamano, Jokristo madier to kinde mang’eny chung’ motegno korka gima giseng’eyo ni nikare. Kokalo kuom teko ma roho mar Nyasaye chiwo, ok giluor bedo mopogore. (2 Tim. 1:7) We wanon ane wach moro maok onego waluwie ngang’ paro mag mbese.

10. En pek mane ma Jokristo moko nyalo romogo?

¹⁰ Rowere moko nyalo yudo pek e wi gima onego gitim bang’ ng’eyo ni osiepgi moro odonjo e tim ma Ndiko okwero. Ginyalo paro ni dhi nyiso jodongo mondo ochiw kony ne osiepgino nyalo miyo osiep manie kindgi kethre; omiyo gitamore wuoyo e wi wachno ka giparo ni koro gimakore chuth gi osiepgi. Jal mokethono nyalo kata chuno osiepene mondo opand wach richoneno. En adier ni gima kamano ok yud mana rowere kende. Moko kuom jomadongo bende nyalo yudo ka teknegi dhi nyiso jodongo wach ketho mar osiepgi, kata achiel kuom joodgi. Kata kamano, ere kaka Jokristo madier onego otim e bwo tembe ma kamago?

11, 12. En okang’ mane monego ikaw ka ng’ato ei kanyakla jiwi ni kik iel richone, to nikech ang’o?

¹¹ Par ane chal maluwoni. Wawach ni Alex owadwa ma rawera ofwenyo ni Steve ma en osiepne e kanyakla, osebedo ka ng’iyo ponografi. Alex wacho ne Steve ni timneno chando chunye ahinya. Kata kamano, Steve ok dew wechenego. Ka Alex temo jiwo osiepne mondo odhi owuo gi jodongo kuom wachno, Steve dwoko kawacho ni ka gin osiepe madier to Alex ok bi fule ir jodongo. Be Alex onego oluor ni osiep margi biro rumo? Onyalo penjore kabe jodongo biro yie kode kapo ni Steve okwero wechego. Kata kamano, ber ng’eyo ni kata ka Alex oling’ aling’a gi wachno, mano ok bi konyo. Kuom adier, ling’ kamano nyalo miyo Steve oketh winjruokne gi Jehova. Ber ka Alex ong’eyo ni “luoro mar dhano omiye ruako wino e ng’ute; to ng’a moketore kuom Jehova nodag mang’won.” (Nge. 29:25) Ang’o kendo ma  Alex nyalo timo? Onyalo dhi ir Steve kendo mondo owuo kode ayanga kuom kethoneno, kotimo kamano e yor hera. Timo kamano biro dwaro chir. Kata kamano, nyalo bet ni gie kindeni, Steve biro yie wuoyo kuom wachno. Alex onego ojiw Steve kendo, mondo odhi ir jodongo, konyise ni ka ok otimo kamano kuom kinde maok odeko, to Alex wuon biro dhi ir jodongo.—Lawi 5:1.

¹² Kapo ni wach ma kamano omaki e kindi gi osiepni, osiepni ok bi mor gi okang’ mikawo gie sechego. Kata kamano, bang’ kinde obiro fwenyo ni ne itimo kamano nikech ne idwaro konye. Kapo ni jal mokethono oyie kendo orwako kony momiye, obiro siko komor ahinya kuom chir kod chung’ mari motegno. To mopogore gi mano, kapo ni osiko gi mirima kodi, be kuom adier mano en osiep monego ibedgo? Timo gima moro Osiepwa maduong’ moloyo, ma en Jehova e gima owinjore watim kinde duto. Ka wakete obed mokwongo, jomamoko mohere biro miyowa luor nikech makruokwa kode kendo gibiro bedonwa osiepe madier. Ok onego wami Jachien thuolo ngang’ ei kanyakla mar Jokristo. Ka dipo ni watimo kamano, kuom adier wabiro miyo roho maler mar Jehova chuny lit. Kata kamano, watimo kaka rohono chikowa ka warito ler mar kanyakla mar Jokristo.—Efe. 4:27, 30.

Roho Maler Miyowa Teko mar Nano e Bwo Chandruoge Duto

13. Oganda Jehova romo gi chandruoge kaka mage, to ang’o momiyo gik ma kamago onya ahinya?

¹³ Chandruok nyalo biro e yore mopogore opogore—chandruoge mag yuto, lalo tich, masira maok nyal geng’, tho mar ng’atwa mwahero, tuoche, gi moko ma kamago. Nikech wadak e “kinde mag chandruok,” wang’eyo ni chieng’ moro nyaka to wanaked gi chandruok moro. (2 Tim. 3:1) Ka mano otimore, dwarore ni kik waluor kata bedo gi kibaji ahinya. Roho maler nyalo miyowa teko mar nano e bwo chandruok moro amora.

14. Ang’o ma nomiyo Ayub teko mar nano e bwo chandruoge ma ne oyudo?

¹⁴ Ayub noyudo chandruoge mang’eny moluwore. Nolalo mwandune, nyithindo, osiepe, nobedo matuwo, kendo chiege ne ok obedo gi geno kuom Jehova. (Ayub 1:13-19; 2:7-9) Kata kamano, Elihu nobedo jahoch madier ne Ayub. Wach ma nowacho kaachiel gi wach maduong’ ma Jehova owuon nowacho ne Ayub ne en ni: “Chung’ thi, ket chunyi kuom paro honini ma Nyasaye otimo.” (Ayub 37:14) Ang’o ma nokonyo Ayub nano e bwo chandruoge ma noyudo? To ang’o manyalo konyowa nano e chandruogewa? En kuom nono kendo paro matut kuom yore mopogore opogore ma Jehova nyisogo roho mare maler kod tekone. (Ayub 38:1-41; 42:1, 2) Wanyalo paro kinde ma ne waneno kaka Nyasaye ne okonyowa wan wawegi e ngimawa. Kendo podi odewowa.

15. Ang’o ma nomiyo jaote Paulo teko mar nano e bwo tembe?

¹⁵ Jaote Paulo nonano e bwo chandruoge madongo nikech yie ma ne en-go.  (2 Kor. 11:23-28) Ere kaka nosiko koritore e paro e bwo chal matek kamano? En kokalo kuom wuoyo gi Jehova e lamo. E kinde mar sand ma nenore ni gikone ne omiyo onege, Paulo nondiko niya: “Ruoth ne ochung’ koda kotega, ni mondo ayal wachne chuth, kendo ogendini duto owinj wachno. Kanyo noresa e dho sibuor.” (2 Tim. 4:17) Mano emomiyo kaluwore gi gik ma ne oyude en owuon, Paulo ne nyalo singo ne Jokristo wetene ni “kik uparru e wach moro.”—Som Jo Filipi 4:6, 7, 13.

16, 17. Chiw ane ranyisi kuom kaka Jehova chiwo ne joge teko mar nano gi chandruoge ndalogi.

¹⁶ Japainia moro miluongo ni Roxana en achiel kuom joma oseneno kaka Jehova konyo joge. Kane okwayo wuon tich mondo omiye rusa mar odiechienge manok mondo odhi e chokruog-distrikt, jalo nowacho gi mirima ni kapo ni odhi, ne odhi riembe e tich. Kata kamano, Roxana ne odhi adhiya, kolamo ahinya ni mondo kik olal tijeno. Bang’ lamo nowinjo ka chunye okuwe. Kata kamano, mana kaka ne oyudo osenyise, Wuok Tich ma noluwo bang’ chokruogno, ne oriembe e tich. Roxana ne obedo gi parruok. Ne ok odwar lalo tijno nimar mano ema ne konye rito joode kata obedo ni chudo ne nok. Nochako olemo kendo, moparo ni Nyasaye ne osekonye korka weche chuny e chokruog-distrikt, omiyo onge kiawa ni ne odhi konye bende e yor ringruok. Ka noyudo owuotho kochomo pacho, Roxana noneno sain mondik ni, “Jotich Dwarore” molony e tiyo gi masinde mag tweng’o e faktori, mi notero nyinge en bende. Maneja nofwenyo ni Roxana ne onge gi lony, kata kamano nomiye amiya tich ma nigi chudo ma chiegni nyadiriyo moloyo chon. Roxana noneno ni lamo mage ne odwoki. Kata kamano, gweth maduong’ moloyo en ni ne oyudo thuolo mar lando wach maber ne jotich wetene. Abich kuomgi, moriwo nyaka maneja norwako adiera mi obatisgi.

¹⁷ Nitie kinde ma nyalo nenore ni lamowa ok yud dwoko—nyalo bedo ni ok gie sano kata e yo maok wagen. Ka en kamano, onge kiawa ni nitie gimomiyo. Jehova ong’eyo wachno, kata kamano wanyalo ng’eyo maber gimomiyo mana e kinde mabiro. Wanyalo bedo gadier kuom wach achiel—Nyasaye ok jwang’ joge momakore kode.—Hib. 6:10.

Ikonyowa Loyo Tembe

18, 19. (a) Ang’o momiyo wanyalo geno romo gi tembe? (b) Ere kaka inyalo loyo tembe?

¹⁸ Oganda Jehova ok wuor ahinya ni giromo gi tembe, gik manyoso chuny, sand, kata tembe mag mbese. Kuom adier, piny osin kodwa. (Joh. 15:17-19) Kata kamano, roho maler nyalo miyo walo tem moro amora mwanyalo romogo e tijwa ne Nyasaye. Jehova ok bi weyo mondo otemwa mokalo nyalo marwa. (1 Kor. 10:13) Ok obi jwang’owa ngang’. (Hib. 13:5) Winjo kendo luwo Wachne mokudh kuom muche ritowa kendo tegowa. E wi mano, roho mar Nyasaye nyalo jiwo Jokristo wetewa mondo okonywa e kinde ma mano dwarore ahinya.

¹⁹ Weuru waduto wadhi nyime kwayo mondo wayud roho maler, kokalo kuom lamo kod puonjruok Ndiko. Mad wadhi nyime ‘mondo otegwa chuth gi teko mar Nyasaye man gi duong’, wadhil kendo chunywa oket mos e weche duto.’—Kol. 1:11.

[Weche moler piny]

Inyalo Dwoko Nade?

• Ere kaka inyalo ikri ne sand?

• Ere kaka onego itim kapo ni ng’ato jiwi ni kik iel richone?

• Inyalo bedo gadier kuom wach mane sama iromo gi chandruok moro amora?

[Penjo mag Puonjruok]

[Picha manie ite mar 28]

Ang’o mwanyalo puonjore kuom Joshua gi Kaleb?

[Picha manie ite mar 29]

Ere kaka inyalo konyo nyawadu modonjo e richo?