Siki Kiketo Pachi Kuom Gik ma Jehova Osetimoni

KINDE matin bang’ chier Yesu, jopuonjrene ariyo ne wuotho koa Jerusalem ka gichomo Emmau. Injili mar Luka wacho kama: “Ka noyudo gitwak kendgi, kendo giporo wach, Yesu owuon nosudo butgi, modhi kodgi. To wang’gi nogeng’ore mondo kik ging’eye.” Kae to Yesu nopenjogi niya: “‘Magi gin weche manadi muwacho kendu, kuwuotho?’ Ne gichung’ ka gimieno wang’gi.” Ang’o momiyo ne gimieno wang’gi ka gikuyo? Jopuonjrego ne paro ni gie kindeno Yesu ne onego obed ni osewaro Israel kuom loch mar Ogendini, to mano ne podi ok otimore. To kar mano, Yesu ne osenegi. Omiyo, mano emomiyo ne gikuyo.—Luka 24:15-21; Tich 1:6.

Yesu nochako twak gi jopuonjrego koleronegi weche. “Kochako kod Musa gi Jonabi duto, noelonigi weche man kuome owuon e Ndiko duto.” Kuom adier, nitie gik madongo mang’eny ma ne osetimore e ndalo ma Yesu ne tiyo ne Nyasaye e piny! Kaka jopuonjre nomedo chiko itgi ne weche ma Yesu lero, koro ne gibedo mamor kar bedo gi kuyo. Bang’e ka nochopo godhiambo, ne giwacho kama: “A ok chunywa mor koso, kowuoyo kodwa e yo, kendo koelonwa Ndiko?” (Luka 24:27, 32) En puonj mane mwayudo kuom gima ne otimore ne jopuonjrego mag Yesu?

Gigo Mwageno to Pok Otimore Miyo Wawinjo Nade?

Jopuonjre ariyo ma ne ni e yo ka dhi Emmau nokuyo nikech gik ma ne gigeno ne pok otimore. Kaka ne giwinjo chalo gi gima iwacho e Ngeche 13:12 niya: “Geno mak iyudo miyo chunyi ol.” Kamano bende, jomoko kuomwa mosetiyo ne Jehova kochung’ motegno kuom higini pieche, ne paro ni ‘masira maduong’no’ dikoro sani osetimore. (Math. 24:21; Fwe. 7:14) En adier ni gie sani, geno kaka mano ma pok otimore nyalo miyowa kuyo.

Kata kamano, ber ng’eyo ni jopuonjre ariyogo nochako obedo mamor kendo, bang’ ka Yesu nokonyogi keto pachgi kuom weche mokor ma ne osetimore—kata mana mago ma nosetimore e ndalo mar ngimagi giwegi. Wabende wanyalo siko gi mor marwa ma iye kendo kedo gi gik manyalo  nyoso chunywa, ka waketo pachwa kuom gik mosetimore. Michael ma en jaduong’-kanyakla molony, nowacho kama: “Kik iket pachi ahinya kuom gigo ma Jehova pok otimo. Kar mano, siki kiketo pachi kuom gigo mosetimo.” Mano en puonj majaber ndi!

Gik ma Jehova Osetimo

Non ane moko kuom gik madongo ma Jehova osetimo nyaka chop sani. Yesu nowacho ni: “Ng’at ma yie kuoma, tije matimo, en bende notim; kendo notim tije madongo moloyo magi.” (Joh. 14:12) Ndalogi, jotich Nyasaye timo tije madongo mag Jokristo, maloyo kinde moro amora mosekalo. Ji mokalo milion abiriyo kiyo biro mar masira maduong’no. Parie ni jotich Jehova mochung’ motegno sani lendo e pinje mang’eny e piny mangima, maloyo kinde moro amora mosekalo! Jehova osemiyo weche ma ne Yesu okoro e wi “tije madongo moloyo magi,” obedo adier.

Ang’o kendo ma Jehova osetimonwa? Osekonyo joma chunygi nikare mondo owuogi e piny marachni, mi gidonjo e paradis mar roho moseloso. (2 Kor. 12:1-4) Kaw kinde mar paro matut e wi moko kuom ber mwayudo e paradisno. Kuom ranyisi, tem ane ng’iyo kar kano buge ma mari iwuon kata manie Od Romo. Ng’i ane weche manie bug Watch Tower Publications Index, kata non ane kitiyo gi kompyuta weche manie Watchtower Library. Winj ane drama mar Muma mosemak e tep kata CD. Tem ane paro gik ma ne iwinjo kendo neno e chokruog-distrikt ma nyocha okalo. E wi mano, par ane mor mogundho ma wabedogo kuom bedo kanyachiel gi owete koda nyiminewa ma Jokristo. Mano kaka Jehova osebedo jachiwo mang’won komiyowa chiemb chuny koda owete ma johera—mano en paradis mar roho gadier!

Daudi jandik-zaburi nowacho kama: “A Jehova Nyasacha, honini misetimo ging’eny, gi wecheni bende miparo kuomwa.” (Zab. 40:5) Ee, siko kwaketo pachwa kuom gik mabeyo miwuoro ma Jehova osetimonwa koda kuom weche mabeyo moparo kuomwa, wabiro yudo teko momedore mar nano kwachung’ motegno e tiyo gi chunywa duto ne Jehova, Wuonwa me polo.—Math. 24:13.

[Picha manie ite mar 31]

Yesu nokonyo jopuonjrene keto pachgi kuom gik ma Jehova noyudo osetimonegi

[Piche manie ite mar 32]

Tem ane paro weche koda gik ma ne ineno e chokruog-distrikt ma nyocha okalo