Her Tim Matir gi Chunyi Duto

“Isehero tim matir.”​—ZAB. 45:7.

1. Ang’o mabiro konyowa luwo “yore mag tim matir”?

KOKALO kuom Wachne kod rohone maler, Jehova tayowa “e yore mag tim matir.” (Zab. 23:3) Kata kamano, nikech onyuolwa e richo, wahinyo bayo yorno. Mondo wachak waduog e yor tim matir kinda maduong’ dwarore. Ang’o mabiro konyowa timo mano? Mana kaka Yesu, nyaka waher timo tim matir.​—Som Zaburi 45:7.

2. “Yore mag tim matir” gin mage?

² “Yore mag tim matir” gin mage? Yo en kama olos ma ji wuothoe. ‘Yorego’ gin chike koda puonj makare ma Jehova owuon ema oketo. E dho Hibrania kod Grik, “tim matir” en gima nyiso “tim makare,” manyiso ni ng’ato luwo chuth chike koda puonj mag timbe mabeyo. Nikech Jehova “e kar dak mar tim makare,” joma lame neno ni en ema owinjore ketonegi yore matir monego giluw.​—Yer. 50:7, New World Translation.

3. Ere kaka wanyalo medo puonjore wach makare mar Nyasaye?

³ Mana ka watemo matek gi chunywa duto luwo chike makare mag Nyasaye, eka wanyalo bedo joma oyiego chuth. (Rapar 32:4) Timo kamano chakore gi puonjruok duto mwanyalo e wi Jehova Nyasaye, kwatiyo gi Wachne ma en Muma. Kaka wamedo puonjore kuome kendo sudo machiegni kode odiechieng’ kodiechieng’, e kaka wabiro medo hero wechene makare. (Jak. 4:8) Bende nyaka waluw kaka Wach Nyasaye tayowa, sama wadwaro ng’ado paro e wi weche madongo e ngima.

Dwar Wach Makare mar Nyasaye

4. Dwaro wach makare mar Nyasaye oriwo timo ang’o?

⁴ Som Mathayo 6:33. Dwaro wach makare mar Nyasaye ok en mana tiyo gi thuolowa e lando wach maber mar Pinyruoth kende. Mondo omi Jehova oyie gi lamowa, timbewa mapile ka pile nyaka luwre gi chikene makare chuth. Jogo duto madwaro wach makare mar Jehova nyaka tim ang’o? Nyaka ‘girwak dhano manyien, mochwe e kido mar Nyasaye, kendo ma nyisore e tim makare kendo maler adier.’​—Efe. 4:24.

5. Ang’o mabiro konyowa loyo gigo manyoso chuny?

⁵ Kaka watemo dak kaluwore gi chike makare mag Nyasaye, nitie seche ma chunywa nyalo nyosore nikech nyawowa wawegi. Ang’o manyalo konyowa loyo nyosruok mar chuny, mi wapuonjre hero kendo luwo tim makare? (Nge. 24:10) Nyaka wadhi ir Jehova e lamo pile “gi chuny madier, kwayie chuth.” (Hib. 10:19-22) Kata bed ni wan Jokristo mowal, kata wan gi geno mar dak e piny, waketo yie kuom rawar mar misango Yesu Kristo koda kuom gik motimonwa kaka Jadolowa Maduong’. (Rumi 5:8; Hib. 4:14-16) Jaote Johana nondiko kama: ‘Remb Yesu pwodhowa kuom richo duto.’ (1 Joh. 1:6, 7) Muma wacho ni ‘kata richowa obet makwar ahinya, ginidok matar kaka theluji.’ Mano kaka Jehova osemiyowa mich makende kokalo kuom rawar mar misango Wuode mohero!​—Isa. 1:18.

 Non Gik Lweny Mitiyogo ne Nyasaye

6. Ang’o momiyo dwarore ahinya ni wanon chal mar gi lwenje mwatiyogo ne Nyasaye?

⁶ Kinde duto, dwarore ni warwakre gi “tim makare kaka irwako gi lwenje mag akor,” nimar en achiel kuom gik lweny mag Nyasaye mowinjore warwakorego. (Efe. 6:11, 14) Kata bed ni nyocha eka wachiwore ne Jehova, kata wasebedo kwatiyone kuom higini pieche, nono chal mar gik lwenje mwatiyogo ne Nyasaye en gima dwarore ahinya. Nikech ang’o? En nikech osewit Jachien kaachiel gi jochiendene e alwora mar piny. (Fwe. 12:7-12) Satan nigi mirima kendo ong’eyo ni ndalone nok. Kuom mano, osemedo kinda mare e monjo oganda Nyasaye. Be wang’eyo chuth ber mar rwakruok gi “tim makare kaka irwako gi lwenje mag akor”?

7. Ere kaka wabiro timo ka wang’eyo ber mar rwakruok gi “tim makare kaka irwako gi lwenje mag akor”?

⁷ Gir lweny mar akor geng’o adundo kata chuny e lweny masie. Nikech onyuolwa e richo, chunywa mar ranyisi hinyo wuondowa. (Yer. 17:9) Bedo ni chunywa hinyo chwalowa mondo watim gik maok kare, dwarore ahinya ni watiege e yo mowinjore. (Chak. 8:21) Ka wang’eyo ber mar rwakruok gi “tim makare kaka irwako gi lwenje mag akor,” ok wabi lonyogi kata matin mondo watim gik ma Nyasaye osin-go; kata siko kwaparo mar timo richo. Ok wabi ketho seche mang’eny e ng’iyo televison. Kar mano, wabiro temo matek mondo watim gik ma Jehova oyiego. Kata kapo ni wachwanyore mi wapodho matin nikech bedo gi paro moro maok kare, podi Jehova nyalo konyowa chung’ kendo.​—Som Ngeche 24:16.

8. Ang’o momiyo dwarore ni warwakre gi “yie kaka okumba”?

⁸ Achiel kuom gi lwenje mag Nyasaye monego wabedgo en rwakruok gi “yie kaka okumba.” Okumbano konyowa ‘nego aserini makakni mag ng’a marachno.’ (Efe. 6:16) Kae to yie kod hera matut mwaherogo Jehova, konyowa luwo tim makare kendo siko e yo madhi e ngima mochwere. Kaka wamedo puonjore hero Jehova, e kaka wabiro medo hero wechene makare. To nade mich mar chunywa ma ng’adonwa bura? Ere kaka okonyowa e kindawa mar hero tim makare?

Siki gi Chuny Maler Maonge Bura

9. Siko gi chuny maler maonge bura konyowa nade?

⁹ Sama ne ibatisowa, ne wakwayo Jehova mondo omiwa “chuny maler.” (1 Pet. 3:21) Nikech waketo yie kuom rawar, remb Yesu umo richowa, omiyo wabedo joma ler maonge bura e nyim Nyasaye. Kata kamano, mondo wadong’ maonge bura, dwarore ni wasiki gi chuny maler. Kapo ni seche moko chunywa ketonwa bura kata siemowa, onego wabed mamor nikech mano nyiso ni otiyo maber. Siem ma kamago nyiso ni chunywa pok otho kodok korka yore  makare mag Jehova. (1 Tim. 4:2) Kata kamano, nitie gik momedore ma mich mar chuny nyalo konyoe jogo madwaro hero tim makare.

10, 11. (a) Chiw ane ranyisi manyiso gimomiyo onego wawinj chunywa mosetieg gi Muma. (b) Ang’o momiyo hero tim makare nyalo kelonwa mor mogundho?

¹⁰ Sama watimo gima ok kare, chunywa nyalo ketonwa bura kata chandowa. Nitie rawera moro ma ne oweyo “yore mag tim matir.” Nobedo misumba mar ng’iyo ponografi kendo nochako madho njaga. Chunye ne ng’adone bura kane odhi e chokruoge kendo nonenore owuon kaka ng’ama wuondore sama nodhi e tij lendo, omiyo noweyo tijego mag Jokristo. Nowacho ni: “Kata kamano, ne ok afwenyo kaka chunya ne dhi chandore nikech gik ma ne atimo.” Nomedo wacho ni, “Timna mar fuwono ne odhi nyime kuom higini madirom ang’wen.” Kae to nochako paro matut e wi duogo e adiera. Kata obedo ni noparo ni Jehova ne ok dhi winjo lamone, podi nolemo kendo kwayo ng’wono. Kapok dakika apar ne orumo, min mare nodhi ire mojiwe mondo ochak dhi e chokruoge. Ne odhi e Od Romo monyiso achiel kuom jodongo mondo opuonjre kode. Bang’ kinde, ne obatise, kendo odwoko erokamano ne Jehova kuom reso ngimane.

¹¹ Donge wasenwang’o ni timo gik makare kelo mor kod ber mogundho? Kaka wapuonjore hero tim makare kendo luwogo chutho chutho, wabiro yudo mor momedore e timo gigo mamoro Wuonwa me polo. Kendo par ane niya! Ndalo biro ma chuny dhano duto nobed maler maok ketnegi bura ngang’; ginibed gi kido machalo gi mar Nyasaye e okang’ malong’o chuth. Kuom mano, weuru wabed gi kido mar hero tim makare e chunywa ma iye, mondo wami Jehova obed mamor.​—Nge. 23:15, 16.

12, 13. Ere kaka wanyalo tiego chunywa?

¹² Ang’o mwanyalo timo mondo omi watieg chunywa? Sama wapuonjore Ndiko kod bugewa malero Muma, ber ng’eyo ni “ng’ato makare oparo e chunye kaka doduok wach.” (Nge. 15:28) Non ane kaka timo kamano konyo sama penjo moko oneno e wi tijewa mag yuto. Kapo ni nitie tich moro ma Ndiko kwero achiel kachiel, thothwa biro luwo mapiyo paro machikowa ma a kuom kweth mar jatichno mogen kendo mariek. Kata kamano, sama penjo moro e wi tich ok nigi dwoko ma achiel kachiel, ber nono chike koda puonj manie Muma, kwatimo kamano e yor lamo. * Mano bende dwaro ni wapar kuom puonj koda chike madwaro ni kik wachwany chuny jomoko. (1 Kor. 10:31-33) To moloyo, onego wanon ahinya puonj koda chike motudore gi winjruokwa gi Nyasaye. Kapo ni waneno Jehova kaka ng’ato mantie adier, kuom adier wabiro penjore kama, ‘Be timo  gini biro chwanyo Jehova, ka miyo owinjo lit?’​—Zab. 78:40, 41.

¹³ Sama waiko weche midhi non e Puonjruok mar Ohinga mar Jarito kata e Puonjruok Muma e Kanyakla, ber ng’eyo ni dwarore ni wapar matut kuom wechego. Be wayudo ka wan gi tim mar kiewo akiewa dwoko mag penjogo piyopiyo kae to wadhi e paragraf machielo? Puonjruok e yo ma kamano ok bi konyo ahinya e miyo waher tim makare kata miyo wabed gi chuny motang’. Mondo wachop kama waheroe tim makare, dwarore ni wapuonjre gi kinda kendo paro matut kuom gik mwasomo ei Wach Nyasaye. Puonjruok hero tim makare en gima dwaro kinda ahinya!

Kech kod Riyo mar Wach Makare

14. Jehova Nyasaye kod Yesu Kristo dwaro ni wawinj nade e tijwa ne Nyasaye?

¹⁴ Jehova Nyasaye kod Yesu Kristo dwaro ni wabed mamor e tijwa ne Nyasaye. Ang’o mabiro miyo wabed gi mor? Ee, en hero tim makare! E Twak mar Got, Yesu nowacho niya: “Mano mor manadi ni jo ma kech gi riyo omako kuom dwaro wach makare, nikech giniyieng’.” (Math. 5:6) Wechego konyo nade jogo madwaro hero tim makare?

15, 16. Kech kod riyo mar wach Nyasaye inyalo tiek e yore mage?

¹⁵ Jaloch mar piny mwadakieni en ng’a marachno. (1 Joh. 5:19) Ka wasomo gasede mag weche manyien e piny moro amora, wayudo weche manyiso kaka timbe gero onya e okang’ mamalo ahinya. Timbe maricho ma dhano timo ne jowadgi en gima nyaka chand chuny ng’a makare. (Ekl. 8:9) Kaka joma ohero Jehova, wang’eyo ni en kende ema onyalo tieko ne jogo madwaro ng’eyo tim makare kech kod riyo mar wach Nyasaye. Joma ok oluoro Nyasaye ibiro gol oko machiegni, kendo joma ohero tim makare ok nochak ochandre nikech joma ketho chik koda timbegi maricho. (2 Pet. 2:7, 8) Donge mano nobed kinde maber ahinya!

¹⁶ Kaka jotich Jehova kendo jolup Yesu Kristo, wang’eyo ni jogo duto ma nigi kech kod riyo mar tim makare “giniyieng’.” Giniyieng’ chuth kokalo kuom chenro ma Nyasaye oseketo mar polo manyien gi piny manyien kama “wach makare odakie.” (2 Pet. 3:13) Omiyo, kik chunywa nyosre kata bwok ni sandruok kod gero osemiyo tim makare onge e piny ma Satan oteloeni. (Ekl. 5:8) Jehova, ma e Ng’a Mamalo Chutho, ong’eyo gik matimore, kendo ndalo okayo mobiro resoe jogo mohero tim makare.

Yud Ber Kuom Hero Wach Makare

17. Gweth moko mag hero tim makare gin mage?

¹⁷ Zaburi 146:8 jiwo wach moro maber ahinya e luwo yor tim makare. Jandik-zaburi nowero kama: “Jehova hero jo matir.” Par ane wachno! Jaloch e wi gik moko duto, oherowa nikech wahero tim matir! Nikech hera mar Jehova, wan gadier ni obiro konyowa yudo gi ringruok mochuno, sama waketo wach Pinyruoth obed motelo e ngimawa. (Som Zaburi 37:25; Ngeche 10:3.) Gikone, joma ohero tim makare ema nodag e piny duto. (Nge. 13:22) Kuom thoth oganda Nyasaye, mich margi mar luwo  tim makare nobed mor gi ilo kod ngima maonge giko e piny majaber mar paradis. Kata mana gie sani, jogo mohero tim makare mar Nyasaye yudo gweth mar bedo gi kuwe ma iye mamiyo gibedo gi winjruok e utegi koda e kanyaklagi.​—Fili. 4:6, 7.

18. Gin gik mage mabeyo mwanyalo timo sama warito odiechieng’no mar Jehova?

¹⁸ Sama warito biro mar odiechieng’no maduong’ mar Jehova, nyaka wadhi nyime dwaro timne makare. (Zef. 2:​2, 3) Kuom mano, weuru wanyis hera madier ne yore matir mag Jehova Nyasaye. Mano oriwo rwakruok gi “tim makare kaka irwako gi lwenje mag akor,” kwamakogo motegno mondo warit chunywa mar ranyisi. Bende dwarore ni wasiki gi chuny maler maonge bura​​—⁠mabiro kelonwa mor kendo miyo chuny Jehova obed mamor.​​—⁠Nge. 27:11.

19. En ang’o ma nyaka wang’ad mar timo, to ang’o mibiro non e sula maluwo?

¹⁹ “Wang’ Jehova ong’iyo piny duto koni gi koni, ni mondo tekone onyisre ni jogo ma chunygi lony kare e nyime.” (2 Weche 16:9) Mano kaka wechego hoyo chunywa sama watimo gik makare e bwo chandruoge, gero, kod richo mopong’o piny marachni! En adier ni yorewa makare nyalo miyo thoth oganda dhano maonge gi winjruok gi Nyasaye, owuor ahinya. Kata kamano, wakonyore wawegi e okang’ maduong’, sama wamakore gi tim makare mar Jehova. (Isa. 48:17; 1 Pet. 4:4) Omiyo, weuru wadhi nyime yudo mor kuom hero kendo luwo tim makare, kwatimo kamano gi chunywa duto. Kata kamano, timo kamano gi chunywa duto dwaro bende ni wasin gi richo. Sula maluwo biro nyisowa tiend mano.

[Weche moler piny]

Inyalo Dwoko Nade?

• Ang’o momiyo ng’eyo ber mar rawar dwarore mondo omi waher tim makare?

• Ang’o momiyo dwarore ni warwakre gi “tim makare kaka irwako gi lwenje mag akor”?

• Ere kaka wanyalo tiego mich mar chuny ma ng’adonwa bura?

[Penjo mag Puonjruok]

[Picha manie ite mar 26]

Chunywa mosetieg maber konyowa ng’eyo dwoko mag penjo e wi weche tich