Nitie Gimomiyo Onego Ubed Mamor

KUOM chwech duto mag Jehova madongo gi matindo ahinya, waneno ka gik moko ochanore e yo maber ahinya. Mano ok kawwa gi wuoro nimar Jachwechgi “ok en Nyasach koko” kata ma gike ok ochanore. (1 Kor. 14:33) Chenro ma Nyasaye oketo mar lame bende en gima iwuoro. Non ane gima Jehova osetimo. Oseketo tara gi tara mag chwechne duto mariek e polo gi piny, magin malaika koda dhano, obedo e riwruok achiel, ka giriwore e lamo achiel maler, to giduto gin gi thuolo mar timo yiero mamargi giwegi. Mano gimiwuoro ahinya!

E Israel machon, dala mar Jerusalem ema ne ochung’ne bad-riwruok mar oganda Nyasaye me piny, nimar kanyo e kama hekalu mar Jehova ne nitie kendo ruodhe ne odakie. Ja-Israel moro ma ne nie twech Babulon nowacho kama kuom kaka chunye ne winjo e wi dala malerno: “Mondo lewa bende omoko e dand dhoga, ka dipo ok apari; ka dipo awe hero Yerusalem moloyo gik moko duto mamorgo.”​—Zab. 137:6.

Be mano e kaka chunyi winjo kuom riwruok mar oganda Nyasaye e kindewagi? Be riwruogno keloni mor ahinya moloyo gimoro amora? Be nyithindi ong’eyo sigand bad-riwruok mar oganda Nyasaye me piny, koda gima duong’ momiyo en tie? Be ging’eyo kendo gimor ni gin achiel kuom joma loso riwruok mar owete mag Joneno mag Jehova e piny mangima? (1 Pet. 2:17) Donge inyalo tiyo gi paro maluwogi e Lamo mar Joot maru, mondo omi imed konyo joodi ng’eyo kendo hero riwruok mar oganda Jehova?

Hul Weche mag “Ndalo Machon”

E Israel, joot ne chokore higa ka higa mondo gitim nyasi mar Pasaka. Sama ne ochak nyasino, Musa nochiko ji kowacho kama: “Ka wuodi nopenji e ndalo mabiro, kowacho, Ma to ang’o? iniwachne ni, Gi luedo matek Jehova nogolowa ae Misri, e od misumbini.” (Wuok 13:14) Gik ma Jehova notimo ne Jo-Israel ne ok onego obed gik mosekalo ma wich wilgo. En adier ni wuone mang’eny ne oluwo kaka Musa nochiko. Tienge mang’eny bang’e, Ja-Israel moro nolamo kama: “Wasewinjo gi itwa, A Nyasaye, kwerewa osehulonwa, tich kakobet ma nitiyo ndalo maggi, ndalo machon.”​—Zab. 44:1.

Kuom jal ma podi rawera, sigand Joneno mag Jehova mar higini 100 mosekalo kata mang’eny ne mano, nyalo nenorene kaka weche mag “ndalo machon.” Ere kaka inyalo konyo nyithindi ng’eyo wechego e yo maler? Jonyuol moko timo kamano ka gitiyo gi buge kaka, Mashahidi wa Yehova​—Wapiga-Mbiu wa Ufalme wa Mungu, Kitabu cha Mwaka, sigana mag ngima Jokristo migoyo e gasedewa, koda ripode moko moting’o sigand oganda Nyasaye, moriwo nyaka DVD marwa manyien mawuoyo e wi oganda Nyasaye ma ndalogi. Vidio manyiso sand ma owetewa noyudo e bwo loje machon mag Soviet Union koda Nazi e Jerman, puonjo joot mondo ogen kuom Jehova e kinde mag chandruok. Unyalo nono weche ma kamago sa puonjruok e Lamo mar Joot. Mano biro miyo nyithindi obed gi yie motegno kapo ni giromo gi gik matemo yiegi.

Kata kamano, twak mabor e wi sigana moro, nyalo olo pach jo matindo mapiyo. Omiyo, inyalo miyo nyithindi bende otimie gimoro kata chiwo paro. Kuom ranyisi, inyalo nyiso nyathini mondo oyier piny mamore, kendo otim nonro e wi sigand oganda Nyasaye e pinyno, kae to onyis joot mamoko weche moko ma osepuonjore e wi pinyno. Nyalo  bedo ni e kanyaklau, nitie Jokristo moko ma osetiyo ne Nyasaye ka gichung’ motegno kuom higini mang’eny, kendo unyalo gwelogi chieng’ moro achiel e lamo maru mar joot. Seche moko nyaru nyalo penjogi weche moko, kendo miyogi thuolo mar nyiso kaka ngimagi osebet e tij Nyasaye. Kata unyalo nyiso nyathiu mondo ogor piche moko manyiso dongruok ma osetim gi oganda Nyasaye, kaka ofis Bethel moro moseger, chokruok moro moriwo pinje, kata kaka ne itiyo gi masin mar phonograph e lendo mar ot ka ot.

Puonjri Kaka ‘Fuoni ka Fuoni Tiyo Tichne’

Jaote Paulo noporo kanyakla mar Jokristo gi ‘ringruok duto moriwore kendo otueyore kaachiel gi leche ma en go, kendo fuoni ka fuoni tiyo tichne.’ (Efe. 4:16) Ng’eyo kaka dend dhano tiyo medo jiwo hera koda luor ma wan-go kuom Jachwechwa. Kamano bende, sama wanono kaka kanyakla mar piny mangima tiyo, wawuoro ahinya ‘rieko mang’eny mar Nyasaye.’​—Efe. 3:10.

Jehova lero kaka riwruok mar oganda mare tiyo, moriwo nyaka bad-riwruogno me polo. Kuom ranyisi, owachonwa ni nochiwo fweny, mokwongo ne Yesu Kristo, kae to Yesu “nooro malaikane ir Johana jatichne. Johana nobedo janeno.” (Fwe. 1:1, 2) Ka Nyasaye elo kaka bad-riwruokne me polo tiyo, donge onyalo dwaro ni wang’e kaka ‘fuoni ka fuoni’ mar riwruok achielno tiyo e pinyka?

Kuom ranyisi, kapo ni jarit-alwora biro limo kanyaklau e kinde machiegni, donge unyalo nono kaka joot, migepe mag jorit malworo kaachiel gi ber ma giyudo? Ere kaka gikonyowa waduto ng’ato ka ng’ato? Penjo mamoko ma bende unyalo nono oriwo: Ang’o momiyo dwarore ni wachiw ripode mag tij lendo? Riwruok mar oganda Nyasaye yudo kanye pesa masiro tijene? Bura Maduong’ ochan e yo mane, to ere kaka ochiwonwa chiemb chuny?

Sama walony gi weche duto motudore gi chenro mar oganda Jehova, wayudo ber e yore adek: Wamedo bedo gi hera kuom jogo matiyo matek e lowa. (1 Thes. 5:12, 13) Mano jiwowa mondo wariw lwedo chenro duto mag tije Nyasaye. (Tich 16:4, 5) Mogik, geno ma wan-go kuom jogo matayo oganda Nyasaye medore, sama waneno kaka paro ma ging’ado koda chenro ma giluwo otenore kuom Ndiko.​—Hib. 13:7.

“Nonuru Maber Ohinga Mage”

“Wuothuru koni gi koni e Sayun, kendo lworeuru alwora; kwanuru ute moting’ore malo. Nonuru maber ohinga mage, keturu chunyu kuom paro ute madongo, mondo uhul mano ni tieng’ ma biro luwo.” (Zab. 48:12, 13) Jandik-zaburi nojiwo Jo-Israel mondo onon Jerusalem adimba. Tem ane paro mor ma joot mag Jo-Israel ne nigo bang’ dhi e dala malerno e nyasi mag higa ka higa kendo neno hekalu ma ne jaber sidang’? Nyaka bed ni timo kamano nojiwogi mondo ‘gihul mano ne tieng’ ma ne biro luwo.’

Par ane wach ruoth madhako mar Sheba, ma kane okwongo winjo wach loch maber mar Suleman kod riekone maduong’, ne obedo gi kiawa. Ang’o ma ne okonye bedo gadier kuom weche ma ne owinjo? Nowacho kama: “Ne ok ayie weche margi, nyaka nabiro, kendo aneno gi wang’a.” (2 Weche 9:6) Ee, gik ma waneno gi ‘wengewa’ wawegi nyalo mulo ahinya ngimawa.

Ere kaka inyalo konyo nyithindi mondo one gi ‘wengegi’ giwegi gik mabeyo ahinya madhi nyime e riwruok mar oganda Jehova? Kapo ni ofis mar Joneno mag Jehova ni machiegni kodu, tim kinda mondo ilim ofisno. Kuom ranyisi, Mandy gi Bethany, ne jodak kilomita 1,500 kama, mabor gi Bethel man pinygi. Kata kamano, jonyuolgi ne chano kinde ka kinde limbe mar dhi neno Bethel, to moloyo ne gitimo kamano e kinde ma ne nyirigo podi dongo. Gilero kama: “Kane pok walimo Bethel, ne waparo ni kanyo en kama weche oridore ahinya kendo en mana kar joma oti. To kata kamano, ne waromo gi rowere mang’eny ma  ne tiyo matek ne Jehova kendo ne gimor gi tijno! Ne waneno ni kare riwruok mar oganda Jehova ne lach ahinya moloyo mana kama tin ma ne wadakie, kendo limbe ka limbe ma ne watimo Bethel ne jiwowa sudo machiegni gi Jehova kendo tiyone.” Neno kaka riwruok mar oganda Nyasaye chalo e yo ma kamano, ne ojiwo Mandy gi Bethany chako tij painia, bende ne ogwelgi mondo giti e Bethel kuom kinde moko.

Wan gi yo moro machielo mar ‘neno’ riwruok mar oganda Jehova, kendo en yo ma ne ok yudre e Israel machon. E higini mokalo machiegni, oganda Nyasaye oseyudo vidio koda DVD, manyiso weche mopogore opogre e wi riwruok mar oganda Nyasaye kaka: Jehovah’s Witnesses​—Organized to Share the Good News, Our Whole Association of Brothers, To the Ends of the Earth, kod United by Divine Teaching. Sama in kaachiel gi joodi, uneno tich matek ma itimo gi jo Bethel, jogo makonyo kuonde ma masiche otimoree, jo misonari, koda owete ma iko chokruoge mag distrikt, mano biro miyo chunyu omed hero riwruok mar owete e piny mangima.

Kanyakla ka kanyakla mar oganda Nyasaye nigi kama duong’ mochopo e lando wach maber, kendo konyo Jokristo manie alworane. Kata kamano, kaw kinde gi joodi mondo upar kuom “oweteu duto manie piny.” Mano biro konyou kaachiel gi nyithindu mondo ‘uchung’ matek e yie,’ kung’eyo ni nitie gimomiyo onego ubed mamor.​—1 Pet. 5:9, New World Translation.

 [Sanduk/​Picha manie ite mar 18]

Riwruok mar Oganda Nyasaye En Gima Unyalo Puonjore

Wan gi gik mang’eny mwanyalo tiyogo mondo okonywa waduto puonjore weche mang’eny kuom sigand riwruok mar oganda Jehova koda kaka riwruogno tiyo. Penjo maluwogi nyalo konyou chako:

☞ Ere kaka chenro mar bedo gi jorit malworo ne ochakore e ndalogi?​—Mashahidi wa Yehova​—Wapiga-Mbiu wa Ufalme wa Mungu, ite mag 222-​227.

☞ En ang’o ma ne otimore e “Odiechieng Nyithindo” e Chokruok mar Theokrasi higa mar 1941?​—Mashahidi wa Yehova​—Wapiga-Mbiu wa Ufalme wa Mungu, ite mag 86, 88.

☞ Ere kaka Bura Maduong’ chopo e paro ma ging’ado?​—“Kutoa Ushahidi Kamili” Kuhusu Ufalme wa Mungu, ite mag 108-114.