Kaka Wanyalo Siko ka Wan Joratiro e Piny Mopong’ gi Mibadhi

MANA kaka muya ma wayueyo, timbe mag mibadhi yudore kamoro amora. Ji riambo, gijimbo nengo gik moko, gikwelo, ok gichul gope, kendo gisungore kuom weche ohala maok kare. Dak e alwora ma kamano, miyo kinde mang’eny waromo gi chal mopogore opogore maketowa e bwo tem kuom wach bedo joratiro. Ere kaka wanyalo siko kwatang’ mondo kik wadonj e timbe mag mibadhi? We wanon ane weche adek madongo mabiro konyowa timo kamano. Gigo gin luoro Jehova, bedo gi chuny maonge bura, koda bedo joma gik moko romo.

Bedo gi Luor Mowinjore Kuom Jehova

Janabi Isaya nondiko kama: ‘Jehova en Jang’adnwa-bura, Jehova en Jaketnwa-chik, Jehova en Ruodhwa.’ (Isa. 33:22) Ng’eyo duong’ mar Jehova miyo wamiye luor​​—⁠ma e gima jiwowa kwedo chuny mar mibadhi. Ngeche 16:6 wacho kama: “Luoro Jehova e momiyo ji weyo richogi.” Luoro ma kamano, ok en luoro mar kibaji ni obiro timonwa marach, to en luoro mowinjore mwabedogo kuom Nyasaye nikech ok wadwar miyo chuny Wuonwa me polo, ma dewowa ahinya, obed mosin.​​—⁠1 Pet. 3:⁠12.

Ranyisi moro mar gima ne otimore, nyiso kaka bedo gi luoro mowinjore kuom Nyasaye nyalo konyo. Ricardo kod chiege Fernanda, ne ogolo dola mia abiriyo e akaunt margi e bengi. * Fernanda ne oketo pesago e ofuko moro matin to ne ok okwanogi. Kane gidok e ot bang’ timo chudo moko, ne gibuok ni pesa moromre gi mago ma ne gigolo e akauntgi pod ne odong’ e ofuko mar Fernanda. Ne ging’ado ni, “Nyaka bed ni jachiw pesa e bengi nomiyowa pesa mokalo kwan ma ne wadwaro.” Mokwongo, ne gidwaro kano pesago nikech ne pod gin gi chudo mamoko mang’eny. Ricardo wacho kama: “Ne wakwayo Jehova e lamo mondo omiwa teko mar dwoko pesago. Gombo ma ne wan-go mar more kaluwore gi wechene manie Ngeche 27:⁠11, ne omiyo wayudo jing’o mar dwoko pesago.”

Bedo gi Chuny Mosetieg gi Muma

Wanyalo tiego chunywa kuom puonjruok Muma kendo timo matek tiyo gi gik mwapuonjore. Kwatimo mano, ‘wach Nyasaye, mangima kendo matiyo,’ ok bi chopo mana e pachwa kende, to nyaka ei chunywa bende. Mano biro jiwowa “wuotho makare e weche duto.”​​—⁠Hib. 4:⁠12; 13:18.

Non ane ranyisi mar João. Ne obedo gi gowi moro maduong’ maromre gi dola aluf abich kama. Kae to ne odar modhi e taon machielo maok ochulo gowino. Higini aboro bang’e, João ne opuonjre adiera, mi chunye makoro ne osetieg gi Muma nomiyo otudore gi ng’at ma ne en gi gope, mondo ochule! Nikech João nigi ting’ mar pidho chiege kod nyithindo ang’wen kuom yuto manok, ng’at ma ne oholeno noyie ni ochule mosmos dwe ka dwe.

Bedo Joma Gik Moko Romo

Jaote Paulo nondiko kama: “Ka ng’ato gire orome, bedo jadini kelo ohala maduong’. . . . Ka wan gi chiemo kod lewini, mago mondo  oromwa.” (1 Tim. 6:⁠6-8) Rwako puonj moting’o riekono e chunywa, biro konyowa bedo motang’ gi timbe mag ich lach, timo ohelni mag mibadhi kata ohelni mawuondo ji ni gibiro bedo jomwandu piyopiyo. (Nge. 28:20) Luwo puonj mar Paulo bende biro konyowa keto Pinyruodh Nyasaye obed motelo, ka wageno ni obiro chiwonwa gigo madwarore.​​—⁠Math. 6:⁠25-​34.

Kata kamano, nikech “wuond mar mwandu,” ok onego wapar ni ok wanyal donjo e obadho mar bedo gi ich lach kod owruok gi gombo. (Math. 13:22) Par ane wach Akan. Ne oneno kaka Jo-Israel ne okalo Aora Jordan e yor hono. Kata kamano, ich lach noloye, mi ne ok oritre kuom bedo gi gombo mar kwalo fedha kod dhahabu koda lewni ma nengogi tek kuom gik ma ne gipeyo e Jeriko. Timno ne okelone tho. (Josh. 7:⁠1, 20⁠-⁠26) Emomiyo higini mang’eny bang’e, Yesu nochiwo siem kowacho kama: “Nenuru; ritreuru ni gombo duto”!​​—⁠Luka 12:15.

Bed Jaratiro Kar Tich

We wanon ane chal moko manyalo ketowa e bwo tem kuom wach bedo joratiro e weche duto. Bedo jaratiro kar tich oriwo bedo joma ok ‘kwel’​​—⁠kata kapo ni jomoko ohero timo kamano. (Tito 2:⁠9, 10) Jurandir, matiyo e ofis moro mar sirkal, ne wacho adier kuom pesa ma ne otiyogo e wuodhene mag tich. Kata kamano, jotich wetene ne kwayo pesa mokalo mago ma ne gitiyogo. Ne gitimo kamano nikech jatendgi ne umo richo mag jogo. Jatelono nosiemo Jurandir kuom bedo jaratiro, mi ne oweyo ore e wuodhe mag tich. Kata kamano, bang’ kinde, ne onon chal mar pesa mag kambino, kendo ne opuo Jurandir kuom bedo jaratiro. Bende ne omiye telo moro kar tich.

Jal mondiko André tich, ne onyise ni mondo ojimb chudo mag gik mong’iew nyadiriyo. Owadwano ne okwayo Jehova e lamo mondo omiye chir mar makore gi puonj manie Muma. (Zab. 145:⁠18-​20) Bende ne otemo lero ne jal mondike tich gimomiyo ne ok onyal timo gima nochike​​—⁠kata kamano notamore winje. Omiyo, André nong’ado mar weyo tijno ma ne nigi chudo maber. Kata kamano, bang’ higa achiel kama, jal ma ne ondike tich chon noluongone tich kendo, kendo ne osingone ni kindeni ok gijimb chudo. Ne omi André telo mi obedo maneja.

Chul Gope

Jaote Paulo nojiwo Jokristo kama: “Kik ubed jogop ng’ato.” (Rumi 13:8) Seche  moko wanyalo tamore chulo gop ng’ato ka wawacho ni ng’atno nigi pesa mang’eny, kendo ok ochando pesago. Kata kamano, Muma siemowa kama: “Ng’at marach oholo, mi ok ochulo kendo.”​​—⁠Zab. 37:21.

Kata kamano, to nade kapo ni ‘wach oyudowa’ apoya, mi mano omonowa chulo gima ne waholo? (Ekl. 9:⁠11) Francisco ne oholo pesa madirom dola aluf abiriyo kuom Alfredo mondo ochulgo ot mong’iewo. Kata kamano, nikech chandruok moko mag ohala, Francisco ne ok nyal chulo gowino e tarik ma ne oket. Omiyo ne okawo okang’ mar dhi ir Alfredo mondo giwuo kuom wachno, mi Alfredo noyie ni mondo ochule mosmos.

Kik Imi Ji Obed gi Paro Maok Adier Kuomi

Par ane ranyisi marach mar Anania kod chiege Safira, ma ne nie kanyakla Jokristo mokwongo. Bang’ uso puothgi, ne gikelo ne joote mana moko kuom pesa ma ne giyudo, kae to giwacho ni mago e pesa duto ma ne giyudo bang’ uso puothgi. Ne gidwaro nyisore e nyim jomoko kaka jochiwo ahinya. Kata kamano, roho maler mar Nyasaye nokonyo jaote Petro elo miriambo margi, kendo Jehova ne onegogi.​​—⁠Tich 5:⁠1-​11.

Mopogre gi Anania kod Safira, jogo ma ne ondiko Muma ne wacho adier kuomgi giwegi. Musa ne ondiko weche madier kuom kaka mirima ne omake, mi mano nomiyo omone donjo e Piny Manosingi. (Kwan 20:⁠7⁠-⁠13) Kamano bende, Jona ne ok oumo nyawo mage, kapok ne olendo ne Jo-Nineve koda bang’e. Kar mano, ne ondikogi piny.​​—⁠Jona 1:⁠1-3; 4:⁠1-3.

Kuom adier, dwarore ni wabed gi chir mar wacho adiera, kata kapo ni weche ok bi dhinwa maber, mana kaka ranyisi mar Nathalia ma jahigini 14 manie skul nyiso. Ne onono kalatas mar penj mi ofwenyo ni achiel kuom dwoko ma japuonj ne oketone kare, kara ne ok nikare. Kata obedo ni ne ong’eyo ni nyiso japuonj wachno ne dhi dwoko maks mage chien ahinya, Nathalia notimo kamano. Nowacho kama: “Jonyuolna osebedo kajiwa ni mondo amor chuny Jehova, nyaka abed ng’ama jaratiro. Dine bed ni ok anyiso japuonj wachno, chunya dine ochanda.” Japuonj ne omor gi Nathalia kuom bedo jaratiro.

Bedo Jaratiro En Kido Mamiyo Jehova Duong’

Giselle, nyako ma jahigini 17, noyudo ofuko moro moting’o barupe moko gi dola 35. Ne otimo chenro kokalo kuom jotelo mag skul mondo oduok ofukono ne wuon-go. Dwe achiel bang’e, jatelo mar skul ne osomo ne joklas duto barua moro, mapuoyo Giselle kuom bedo jaratiro kendo puoyo joodgi kuom tiege maber koda konye luoro Nyasaye. ‘Tijene mabeyo’ ne omiyo Jehova duong’.​​—⁠Math. 5:⁠14-​16.

Bedo jaratiro en gima dwaro kinda e kind joma ‘oherore giwegi, mohero mwandu, joma wuorore, jong’ayi, joma ok luor Nyasaye.’ (2 Tim. 3:2) Kata kamano, bedo gi luor mowinjore kuom Jehova, bedo gi chuny mosetieg gi Muma, kendo bedo joma gik moko romo, konyowa siko ka wan joratiro e piny mopong’ gi mibadhi. Bende wabedo gi osiep machiegni gi Jehova, nimar ‘otir kendo ohero tim matir.’​​—⁠Zab. 11:7.

[Weche moler piny]

[Piche manie ite mar 7]

Bedo gi luor mowinjore kuom Jehova miyowa jing’o mar siko ka wan joratiro

[Picha manie ite mar 8]

Bedowa joratiro miyo Jehova duong’