Be Kuom Adier Imor gi Wach Nyasaye?

LORRAINE wacho kama: “Kane achako somo Muma pile, ne ayudo ka en tich matek maok miya mor. Winjo tiende ne tekna, omiyo kinde mang’eny ne ajayudo mana ka pacha dhi kuma chielo.”

Jomoko bende wacho ni kane gichako somo Muma ne giyudo ka timo kamano ok morgi. Kata kamano, ne gitimo sinani nikech ne ging’eyo ni somo Ndiko Maler en gima owinjore. Marc wacho ni: “Yot weyo mondo gik mamoko omonwa somo Muma kod timo puonjruok ma marwa wawegi. Ne ochuna lamo kendo timo kinda ahinya mondo omi somo Muma maok abara, obed timna mapile.”

En ang’o minyalo timo mondo imed kawo gi pek Wach Nyasaye, ma en Muma? En ang’o minyalo timo mondo some omori? Non ane paro maluwogi.

Chenro Koda Yore Minyalo Tiyogo

Chak somo mar Muma gi lamo kendo ik pachi. Kwa Jehova mondo okonyi bedo gi gombo mar puonjruok Wachne. Saye mondo oyaw pachi kod chunyi mondo riekone omed donjoni moloyo. (Zab. 119:34) Ka ok watimo kamano, puonjruok mar Muma nyalo bedo mwatimo atima maok waketoe chunywa, kendo gombo mar dhi nyime nyalo lal. Lynn wacho kama: “Seche moko ajasomo piyo ahinya mamiyo weche moko mabeyo kala. Kinde mang’eny, ok awinj ahinya thuond weche. Kata kamano, ajalamo ka akwayo kido mar ritruok, kendo kidono konya e rito pacha kik dhi e weche mamoko.”

Kaw mapek gigo mipuonjori. Ng’e ni winjo tiend adiera manie Muma kendo tiyo kodgi rito ngimani. Kuom mano, tem matek mondo imany weche manyalo konyi, kendo iti kodgi. Chris wacho kama: “Ahinyo manyo weche makonya ng’eyo chuny kata paro maricho ma an-go. En gima duogo chuny neno kaka Muma kod thoth bugewa oting’o weche makonya an awuon, kata obedo ni joma ondikogi pok ne oromo koda.”

Ket chenro minyalo chopo. Tem puonjri wach moro manyien e wi joma iwuoyo kuomgi ei Muma. Inyalo yudo weche moko mabeyo kuomgi kinono buk miluongo ni Insight on the Scriptures kata e bug Fahirisi. Kaka imedo ng’eyo chwo gi mon miwuoyo kuomgi ei Muma kendo ng’eyo ni ne gin joma nigi kido koda paro mag dhano kaka wan, mano biro konyi ahinya.

Many yore manyien mag goyo mbaka kilero Ndiko. (Tich 17:2, 3) Sophia jatimo puonjruok mare ka en gi chuny ma kamano. Owacho niya: “Dwarona en ng’eyo kendo bedo gi yore manyien manyalo goyogo mbaka kalero weche e tija mar lendo koda e kinde mamoko, mondo omi aland adiera mag Muma e yo maber moloyo. Ohinga mar Jarito konyo ahinya e timo mano.”​—2 Tim. 2:15.

Tem paro ni in e chal kaka mag sigendini misomo ei Muma. Jo Hibrania 4:12 wacho ni: ‘Wach Nyasaye ngima.’ Sama isomo Ndiko, we mondo wach Nyasaye obed mangima e pachi, kuom paro gigo ma dibed ni joma iwuoyo kuomgi ei Muma ne neno. Tem winjo gigo ma ne giwinjo kendo paro kaka ne  giparo. Tud gik ma ne gikaloe kod gik moko manyalo bedo ni timore e ngimani iwuon. Puonjri kuom kaka ne gitimo e bwo chal ma ne giromogo. Mano biro medo ng’eyo ma in-go kendo ibiro mako sigendini manie Muma e yo maber.

Ket tenge kinde mar timo nonro kuom Ndiko matek, mondo ing’e kaka oler tiendgi eka ibed molony kodgi maber. Bed gi kinde malach e thuolo ka thuolo mar puonjruok. Inyalo chopo kamoro madwaro ni itim nonro momedore. Non tiend weche maok ilonygo, non weche moler piny, kendo non bende ndiko mamoko ei Muma motudore gi wachno. Kaka imedo ng’eyo kendo tiyo gi weche misomo, e kaka ibiro medo mor mari kuom Wach Nyasaye. Biro chopo kama iwacho kaka jandik-zaburi niya: “Asekawo gik minyiso kaka gikeni nyaka chieng’; nimar gimiyo chunya yil ahinya.”​—Zab. 119:111.

Kik isom gik moko kirikni. Ket thuolo moromo maber mar timo puonjruok ma mari iwuon. Ket tenge bende kinde mar timo ikruok ne chokruoge mag kanyakla. Raquel wacho ni: “Kinde mang’eny, ajawinjo ka an gi parruok ma mona keto pacha kamoro achiel. Omiyo, ajayudo ni timo puonjruok mar kinde machuok berna. Timo kamano miyo puonjruokna konya moloyo.” Chris wacho ayanga ni: “Sama apuonjra ka arikni, chunya ja chanda nikech amako mana weche manok ahinya. Kinde mang’eny, weche ma apuonjora ok chop e chunya.” Kuom mano, bed gi kinde moromo mar puonjruok.

Nyag gombo momedore mar dwaro ng’eyo wach Nyasaye. Jaote Petro nowacho niya: “Kaka nyithindo mayom, dwaruru chak maliw mar chuny, mondo udong godo nyaka uchop e warruok.” (1 Pet. 2:2) Ok ochuno ni nyithindo onyag gombo mar chak. Gombono inyuologigo. Kata kamano, Ndiko nyiso ni wan to nyaka wanyag gombo mar ng’eyo wach Nyasaye. Ka isomo pile ka pile, mana ite achiel kende ei Muma, mapiyo nono ibiro bedo gi gombono. Gima kar chakruok ne nenore kaka gima tek, biro bedo gima moro chuny.

Par matut kuom weche misomo ei Ndiko. Paro matut kuom weche misomo bende konyo ahinya. Mano biro konyi neno tudruok mantie e kind thuond weche misenono. Kae to mapiyo ibiro bedo gi rieko mogundho, ma en kaka mwandu majaber ahinya.​—Zab. 19:14; Nge. 3:3.

 Thuolo Motigo Maber

Makruok gi chenro maber mar puonjruok en gima dwaro kinda, kata kamano gweth mabedoe ng’eny. Ibiro medo lony mari e wi Ndiko. (Hib. 5:12-14) Nyalo mar pogo weche koda rieko moa e Ndiko ma Nyasaye okudho gi muche, en gima kelo mor, ilo, kod kuwe. Rieko mayudore ei Wach Nyasaye en “yath mar ngima” ne jogo ma yude kendo tiyo kode.​—Nge. 3:13-18.

Puonjruok Wach Nyasaye e yo matut nyalo miyo ng’ato obed gi chuny mong’eyo kit weche kaka obet. (Nge. 15:14) Mano biro konyi chiwo puonj kata siem motenore chuth ei Muma. Ka iweyo mondo gik misomo e Ndiko koda ei buge mag “jatichno mogen, kendo mariek” ema mondo ota paro koda weche ming’ado, ibiro yudo mor kod ber ma Wach ma Jehova okudho gi muche kelo. (Math. 24:45) Mano biro miyo ibed gi geno koda paro maber, kendo bedo ng’ama Wach Jehova chiko weche ma a e dhoge koda timbege. E wi mano, gik moko duto motudore gi winjruokni gi Nyasaye biro dhi maber.​—Zab. 1:2, 3.

Chuny mopong’ gi hera kuom Nyasaye biro miyo iland ne jomoko wach yie ma in-go. Mani bende nyalo jiwi ahinya. Sophia jatemo mondo opar kendo oti gi Ndiko mopogore opogore e ywayo pach weg udi, mondo tije mar lendo kaka Jakristo oyud nyak maber kendo makelo mor. Owacho niya: “Neno kaka ji rwako weche moa e Muma en gima kelo ilo.”

Kata kamano, ber maduong’ moloyo mwayudo kuom bedo mamor gi Wach Nyasaye en bedo gi winjruok machiegni gi Jehova. Puonjruok mar Muma miyo ing’eyo chikene kendo miyo ikawo gi pek herane, gigo mochiwonwa mogundho, koda buchene makare. Onge gimachielo mwanyalo lawo manyalo kelonwa ber maloyo mano. Ket chunyi duto kuom puonjruok Wach Nyasaye. Kuom adier, thuolo mwatimogo kamano en thuolo motigo maber.​—Zab. 19:7-11.

[Sanduk/Piche manie ite mar 5]

SOMO WACH NYASAYE: CHENRO KODA YORE MINYALO TIYOGO

▪ Chak somo mar Muma gi lamo kendo ik pachi.

▪ Kaw mapek gigo mipuonjori.

▪ Ket chenro minyalo chopo.

▪ Many yore manyien mag goyo mbaka kilero Ndiko.

▪ Tem paro ni in e chal kaka mag sigendini misomo ei Muma.

▪ Ket tenge kinde mar timo nonro kuom Ndiko matek mondo ing’e kaka oler tiendgi eka ibed molony kodgi maber.

▪ Kik isom gik moko kirikni.

▪ Nyag gombo momedore mar dwaro ng’eyo wach Nyasaye.

▪ Par matut kuom weche misomo ei Ndiko.

[Picha manie ite mar 4]

Sama isomo sigana moro ei Muma tem paro ni in e chal ma kamano