“Jarit Maber Miwuoro Kendo Osiep Ji Ahinya”

JOHN (JACK) BARR, mosebedo ka en jakanyo mar Bura Maduong’ mar Joneno mag Jehova, nyocha otieko wuodhe me pinyka okinyi mar Ngeso, Desemba 4, 2010. Ne en gi higini 97. Iwacho ni ne en “jarit maber miwuoro kendo osiep ji ahinya.”

Owadwa Jack Barr ne onyuol kama iluongo ni Aberdeen, e piny Scotland, kendo en ema ne otin kuom nyithindo adek. Jonyuolne ne gin Jokristo mowal. Kinde mang’eny, Owadwa Barr ne jawuoyo gi mor ahinya kuom ngima mar odgi kane pod otin; chunye ne opong’ gi erokamano ahinya ne wuon mare koda min mare nikech ranyisigi maber ma ne giketone.

Kane ochopo e hike mag rawera, Jack ne ochako yudo ka tekne ahinya wuoyo gi joma ne ok ong’eyo. Kata kamano, ne otiyo matek mi oloyo luorono, kendo e odhiambo moro mar Jumapil e higa mar 1927, kane en gi higini 14, ne onyiso wuon mare ni ne oikore dhi kode e lendo mar ot ka ot. Mano ema nobedo chakruok mar tije ne Jehova mar higini mang’eny. Kochakore chieng’no nyaka e thone, Owadwa Barr osebedo ka en jaland wach maber ma jakinda.

Masira moro mapoya ma ne chiegni ahinya nego min mare, ne omiyo Jack oparo matut ahinya kuom tiend gimomiyo dhano ngima, kendo e higa mar 1929 ne ochiwore ne Jehova, mi onyiso ayanga chiwruokneno e batiso e higa mar 1934. Kae to e higa mar 1939, ne obedo jakanyo mar Bethel man London, e piny Ingresa. Higano ema nochakoe tiyo ne Nyasaye kuom thuolone duto kuom higini 71.

E Oktoba 29, 1960, Owadwa Barr ne odonjo e chenro ma ne okawo kaka “winjruok machiegni ahinya kendo makende” kane okendo Mildred Willett, ma ne en painia ma jakinda kendo misonari kuom higini mang’eny. Owadwa koda Nyaminwa Barr ne ong’ere kaka joma ne keto ranyisi maber e kend margi, kendo ne gisiko kamano nyaka nochopo kama Mildred otieko wuodhe me pinyka e Oktoba higa 2004. Owadwa kod Nyaminwa Barr ne somo Muma kanyachiel pile, kuom odiechienge duto mag ngimagi mar kend.

Kuom jogo ma ne ong’eyo Barr, ka giwinjo kihulo nying’ Jack Barr, to mano paronegi ng’at ma ne miyo jomoko puonj mabeyo​—ng’ama kinde duto ne ok okal tong’ e gik motimo, ng’ama ng’won, kendo michiko chuth gi Ndiko. Ne en ng’at matiyo matek kendo ne en jarit ma jahera, madewo ji, bende ne en osiep ma makore gi ji. Paro ma ne ochiwo, twegene, koda lamo mage, ne nyiso kaka ne ogurore matut e adiera koda winjruok machiegni ma ne en-go gi Jehova.

Kata obedo ni wabiro kuyo nikech tho mar Owadwa Barr mwahero, wamor kanyachiel kode nikech oseyudo mich mar ngima maok nyal kethore​—ma en thuolo ma ne ogeno ahinya yudo kendo ne osiko kowuoyo kuome. Mano e gima berie moloyo ma ne odwaro ahinya.​—1 Kor. 15:53, 54. *

[Weche moler piny]