Luwo Kristo, Jatelo Makare Chuth

KINDE mang’eny, jogo maluwo jotelo ma gin dhano romo gi gik manyoso chunygi. Kata kamano, jogo mabolore e bwo loch mar Kristo to opogore. Yesu nowacho niya: “Biuru ira, un duto mujony kendo mugangoru mapek, to anamiu yueyo. Rwakuru lota kuomu, kendo puonjreuru kuoma, nikech amuol, kendo adembora e chuny to unubed gi kuwe e chunyu.” (Math. 11:28, 29) Yo ma Yesu telogo duogo kendo jiwo chuny. Odewo ahinya jochan, kendo ogwelogi mondo gibi gibed e bwo lote mayom. Kata kamano, luwo Yesu kaka jatelo oriwo timo ang’o?

Jaote Petro nondiko kama: “Kristo bende noneno masira nikech un, koweyonu ranyis mondo uluw ndache.” (1 Pet. 2:21) Ang’o momiyo en gima dwarore ahinya ni waluw ndach Yesu? Wawach ni in e kind joma nyaka kadhi e pap moro mochikie mbom moko, to ng’at achiel kende e kindu ema ong’eyo kuonde monego oluw mondo kik unyon mbomgo. Donge ibiro luwo ndache machiegni, kata mana kama onyono? E yo machalo kamano, ngimawa mar kinde mabiro otenore kuom luwo machiegni ahinya ranyisi ma Yesu ne oketonwa. Timo kamano oriwo winjo chikene kendo luwogi, koda winjo kendo riwo lwedo jogo matayowa e loye.

Winj Kendo Luw

Kane Yesu chiegni tieko Twak mar Got, nowacho kama: “Ng’ato ka ng’ato ma winjo wechenagi, kendo timo, enochal gi ng’at mariek mogero ode e wi lwanda. Koth nochue, mi ohula nobiro, kendo yamo nokudho, mogoyo odno, to ok nopodho; nikech misene nokuny e wi lwanda.”​—Math. 7:24, 25.

Yesu nowacho ni ng’at ma winjo kendo luwo wechene en ng’at “mariek.” Be wanyiso ni wakawo ranyisi mar Kristo gi pek kod luor, kuom winjo kendo luwo chikene, koso wayiero mana moko kuom chikene mayotnwa luwo? Yesu nowacho niya: “Atimo malong’one [Nyasaye] ndalo duto.” (Joh. 8:29) Weuru mondo watim matek luwo ranyisino.

E kinde Jokristo mokwongo, joote noketo ranyisi maber mar bolruok e bwo telo mar Kristo. E kinde moro, Petro nowacho ne Yesu: “Ne! wan ne waweyo duto, mwaluwi.” (Mari. 10:28) Kuom adier, joote nokawo yo ma Yesu ne telonegigo kaka yo maber ahinya, mi mano nomiyo giikore weyo duto mondo giluwe.​—Math. 4:18-22.

Riw Lwedo Jogo Matiyo e Lo Kristo

Matin kapok ne otho, Yesu nowuoyo kuom yo machielo mwanyalo luwogo yo motelonwago. Nowacho kama: “Ng’a ma rwako ng’at ma aoro e ma rwaka.” (Joh. 13:20) En adier ni, Yesu nowuoyo kuom jogo mowal matiyo e loye kaka ‘owetene.’ (Math. 25:40) Kane ochier Yesu modok e polo, ne oket ‘owetene’ mondo oti e loye, kaka “joote Kristo” ma ioro mondo ogwel jomoko obi owinjre gi Jehova Nyasaye. (2 Kor. 5:18-20) Yie gi yo ma Kristo telonwago dwaro ni wabolore e bwo ‘owetene.’

 Ber nono kaka warwako puonj koda siem mag Ndiko michiwonwa e kinde mowinjore, kokalo kuom buge malero Muma. Kuom puonjruok Ndiko kendo dhiyo e chokruoge, iparonwa weche mag Kristo. (2 Pet. 3:1, 2) Wanyiso ni wamor ahinya gi chiemb chuny michiwonwa kuom puonjruok wechego pile. Kata kamano, onego watim nade kapo ni kinde moko inwoyo puonj kata siem moro? Kuom ranyisi, Wach Nyasaye siemo Jokristo ni gikend “mana kuom Ruoth.” (1 Kor. 7:39) Ohinga mar Jarito osebedo ka wuoyo kuom wachno kuom higini mokalo mia achiel. Kuom adier, owete Kristo nyiso kaka gidewo winjruokwa gi Jehova kuom goyo buge kuom wachno, koda mamoko manie Muma. Tiyo gi weche miparonwago en yo achiel mwanyalo nyisogo ni waluwo Yesu Kristo, Jatendwa makare chuth.

Ngeche 4:18 wacho kama: “Yor jo makare chal ka ler ka piny oyawore, momedore ameda nyaka wang’ chieng’ orieny maler.” Ee, yo ma Yesu telogo medore ameda, ok ochung’. Yo machielo mwanyisogo ni wariwo lwedo ‘owete’ Kristo, en bedo gi paro mowinjore kuom lokruok moro amora e wi adiera mag Ndiko mogo gi “jatichno mogen, kendo mariek.”​—Math. 24:45.

Bende, wanyiso ni wabolore ne ‘owete’ Kristo kuom winjo jogo moket kaka jorit ei kanyakla mar Jokristo. Jaote Paulo nowacho niya: “Winjuru jotendu, kendo migiuru duong’; nikech girito chunyu ma ok giyue.” (Hib. 13:17) Kuom ranyisi, jaduong’-kanyakla nyalo miyowa jip manyiso gimomiyo dwarore ahinya ni wabed gi Lamo mar Joot maok wabare, kata onyalo chiwonwa paro moro e wi weche moko motudore gi tijwa mar lendo. Jarit malworo nyalo miyowa puonj moro moting’o siem moa e Ndiko e wi wach moro mamulo kit ngimawa kaka Jokristo. Ka waikore tiyo gi puonj ma kamago, wanyiso ni waluwo Yesu kaka Jatendwa.

Gimalit en ni piny onge gi jatelo makare chuth. To mano kaka luwo yo ma Kristo telonwago duogo chuny! Omiyo, weuru mondo wawinj kendo waluw Jatendwa ka wariwo lwedo jogo motiyogo e kindewagi.

[Piche manie ite mar 27]

Be irwako puonj moting’o siem moa e Ndiko makwero ni kik iriwri e kend gi joma ok oyie?