Un Joot ma Jokristo​—“Ikreuru”

“Ikreuru, nikech sa ma ok upar e ma Wuod dhano biroe.”​—LUKA 12:40.

1, 2. Ang’o momiyo onego wakaw gi pek wach ma Yesu nowacho ni “ikreuru”?

“KA WUOD dhano nobi e duong’ne maler,” kendo pogo “jogi kod jogi,” ang’o mabiro timore ne in koda joodi? (Math. 25:31, 32) Nikech mano biro timore e sa maok wapar, mano kaka en gima dwarore ahinya ni wawinj siem ma Yesu miyowa ni, “ikreuru”!​—Luka 12:40.

² Sula motelo nonyiso kaka dwarore ni ng’ato ka ng’ato ochop ting’ne e yo mowinjore, mondo omi okony joot duto siko ka gineno kendo rito winjruokgi gi Nyasaye. We wanon ane yore mamoko mwanyalo konyogo joodwa siko gi winjruok maber gi Nyasaye.

Beduru gi Wang’ “Mangima”

3, 4. (a) Joot ma Jokristo onego oritre kuom gik mage? (b) Tiend bedo gi wang’ “mangima” en ang’o?

³ Mondo gibed moikore ne biro mar Kristo, joot nyaka tang’ mondo kik galgi gi gik maok otudore gi lamo madier. Omiyo, dwarore ni giritre ne gik ma kamago. To nikech chuny mar manyo mwandu en  obadho mosemako joot mang’eny, ne ane gima Yesu nowacho e wi keto wang’wa obed “mangima.” (Som Mathayo 6:22, 23.) Mana kaka taya nyalo menyo yorwa ka miyo wawuotho maok wapodhi, gigo ma waneno gi wang’wa mar ranyisi, tiende ni ‘wang’ chunywa,’ nyalo miyowa ler ka mano konyowa timo gik moko maok wachwanyre.​—Efe. 1:18.

⁴ Mondo wang’ masie onen maler, nyaka ochomre tir gi gino mong’iyo. Mano e kaka wang’ mar chuny bende chalo. E yor ranyisi, tiend bedo gi wang’ mangima en, chomo pachwa kuom gimoro achiel. Kar dak kwaketo pachwa mana kuom manyo mwandu ka wadich gi rito joodwa e yor ringruok, dwarore ni wachom wang’wa kuom weche motudore gi lamowa. (Math. 6:33) Mano nyiso ni gik ringruok ma wan-go onego oromwa, kendo waket tij Nyasaye okaw thuolo mokwongo e ngimawa.​—Hib. 13:5.

5. Ere kaka nyako moro ma rawera nonyiso ni nochomo ‘wang’e’ e tiyo ne Nyasaye?

⁵ Gin ber mage manyalo bedoe ka otieg nyithindo mondo obedi gi wang’ mangima! Non ane ranyisi mar nyako moro ma rawera e piny Ethiopia. Ne otimo maber ahinya e skul, mi kane otieko skul, ne omiye thuolo mar dhi nyime gi somo mamalo michulone. Kata kamano, nikech nochomo wang’e kuom tiyo ne Jehova, notamore thuolono. Mapiyo bang’ mano, ne oluongne tich moro ma ne idhi chule dola 4,200 mar Amerka dwe ka dwe, ma en pesa mang’eny ahinya kopor gi chudo ma thoth ji yudo e pinygi. Kata kamano, nyakono ne ochomo ‘wang’e’ e tij painia. Ne otimo yierono en owuon maok ochuno ni odhi openj jonyuolne kabe onego oyie tijno. Ere kaka jonyuolne ne owinjo bang’ ng’eyo gima nyargi notimo? Ne gimor ahinya kode mi gipuoye sidang’!

6, 7. Onego ‘wanen’ ka waritore ne gik mage?

⁶ Weche Yesu mondiki e Mathayo 6:22, 23 oting’o bende siem e wi ich lach. Yesu ne onyiso pogruok e kind wang’ “mangima” gi wang’ ‘marach.’ ‘Wang’ marach’ en wang’ motimo nyiego, tiende ni manyiso owruok gi gombo kata wuoro. (Math. 6:23) Jehova neno nade owruok gi gombo kata wuoro? Muma wacho ni: “Terruok, gi tim ma ok ler duto, kata gombo, kik bedie kata hulre e kindu.”​—Efe. 5:3.

⁷ Kata obedo ni yot neno kido mar ich lach kuom jomoko, ok yot mondo wafwenye kuomwa wawegi. Omiyo, ber mondo wawinj puonj ma Yesu nochiwo ni: “Nenuru; ritreuru ni gombo duto.” (Luka 12:15) Timo kamano dwaro ni wanonre wawegi mondo wang’e ni to waketo chunywa kuom gik mage. Joot ma Jokristo onego opar matut kuom thuolo kod pesa ma gitiyogo e weche mag manyo mor kod yueyo, koda choko mwandu mag ringruok.

8. Ere kaka wanyalo bedo gi wang’ ‘maneno’ kuom wach ng’iewo gik moko?

⁸ Kapok ing’iewo gimoro dwarore ni ipar matut ok mana kabe in gi pesa moromo kata ok kamano. Non bende gik moko kaka: ‘Be abiro yudo thuolo mar tiyo gi gino pile kendo rite? Ng’eyo tiyo kod gino biro kawo thuolo kata ndalo marom nade?’ Un rowere, kik oyie weche duto ma jo ohala lando ka gidwaro ni mondo ung’iew gik moko, mi mano mi ubed gi paro maok owinjore mar dwaro ng’iewo lewni gi gik moko ma nengogi tek nono. Beduru gi chuny mar ritruok. Bende, paruru matut kuom kaka ng’iewo kata bedo gi gimoro nyalo, kata ok nyal konyo joodu ikore ne biro mar Wuod dhano. Bed gi yie kuom singo mar Jehova niya: “Ok anajwang’i ngang’, kendo ok anaweyi ngang’.”​—Hib. 13:5.

 Lawuru Gigo Mabiro Gero Winjruok Maru gi Jehova

9. Lawo gigo mabiro gero yie mar joot nyalo konyogi nade?

⁹ Yo machielo ma joot duto nyalo tegogo yie margi kendo rito winjruokgi gi Nyasaye, en keto chenro mar lawo gigo mabiro gero yie margi. Timo kamano nyalo konyo joot neno dongruok ma gitimo e miyo Jehova oyie kodgi, kendo konyogi nono gik ma gitimo monego okaw thuolo mokwongo e ngimagi.​—Som Jo Filipi 1:10.

10, 11. Kaka joot, gin chenro mage munyalo keto mondo uchopi, to gin chenro mage mag kinde mabiro ma in iwuon idwaro keto?

¹⁰ Kata mana keto chenro ma ng’ato ka ng’ato kuom joot nyalo chopo, en gima nyalo kelo ber mang’eny. Kuom ranyisi, kaw ane chenro mar somo ndiko mar odiechieng’ pile ka pile. Paro ma joot chiwo nyalo konyo jalo ma wi ot neno yie ma joode nigo. Keto chenro mar somo Muma kanyachiel kaka joot miyo nyithindo thuolo maber mar timo dongruok e somo, kaachiel gi medo lony margi mar winjo tiend weche manie Muma. (Zab. 1:1, 2) Bende, donge ber ka watemo medo ber mag lamo magwa? Bedo gi kido mopogore opogore mag nyak mar roho e okang’ momedore, bende nyalo bedo chenro maber mwanyalo lawo. (Gal. 5:22, 23) To nade manyo yore mag kecho jogo mwaromogo e tij lendo? Temo mondo watim kamano kaka joot, nyalo konyo nyithindo obed joma nyiso ng’wono, kendo miyo gibed gi gombo mar tiyo kaka jopainia mapile kata jomisonari.

¹¹ Donge ber ka unono moko kuom chenro ma in koda joodu unyalo keto mondo uchopi? Be joodu nyalo keto chenro  mar tiyo gi seche momedore e tij lendo? Be unyalo timo kinda mar loyo luoro korka lendo mar simo, e ndara, kata kuonde ohala? To nade dhi lendo kuonde ma jolendo mag Pinyruoth dwaroree moloyo? Be achiel kuom joodu nyalo puonjore dhok manyien mondo omi oland wach maber ne joma oa e pinje mamoko?

12. Jogo ma gin wiye udi nyalo timo ang’o e konyo joodgi dongo e winjruokgi gi Nyasaye?

¹² Kaka wi ot, fweny yore ma joodi nyalo timogo dongruok e winjruokgi gi Jehova. Kae to iket chenro manyalo miyo utim dongruokgo. Chenro muketo kaka joot onego obed munyalo chopo kaluwore gi chal maru koda nyalou. (Nge. 13:12) En adier ni timo kinda mondo uchop chenrou en gima kawo kinde. Omiyo, kawuru kinde mutiyogo e neno televison, kae uti gi kindeno e luwo yore mag lamo. (Efe. 5:15, 16) Tiuru matek mondo uchop chenro museketo kaka joot. (Gal. 6:9) Joot matemo chopo chenro makonyo e gero winjruokgi gi Jehova, biro miyo dongruok margi ‘onenre ni ji.’​—1 Tim. 4:15.

Timuru Lamo mar Joot Maok Ubaru

13. En lokruok mane ma ne otim ne chenro mag chokruoge kanyakla, to penjo mage monego wapar kuomgi?

¹³ Chenro manyalo konyo ahinya joot e ‘ikruok’ ne biro mar Wuod dhano, en lokruok ma ne otim e chokruogewa mag juma ka juma, chakre Januar 1, 2009. Omiyo, tinde ok warom e odiechieng’ machielo ne chokruok ma chon ne waluongo ni Puonjruok-Buk mar Kanyakla, nimar ne oriw chokruogno gi Skul mar Tij Nyasaye kod Chokruok mar Tijwa. Ne otim lokruokno mondo joot ma Jokristo oyud thuolo mar gero yiegi kuom chano mondo gibed gi odiechieng’ ma giyango juma ka juma mondo gitim lamo mar joot. Nikech koro kinde osekalo nyaka ne tim lokruokno, wanyalo penjore wawegi kama: ‘Be atiyo gi thuolo ma ne okelno e timo Lamo mar Joot kata puonjruok ma mara awuon? Be asebedo ka atiyo maber gi thuolo ma ne omiyo olos chenrono?’

14. (a) Gimaduong’ momiyo watimo Lamo mar Joot kata puonjruok ma marwa wawegi en ang’o? (b) Ang’o momiyo keto tenge odiechieng’ mar puonjruok dwarore ahinya?

¹⁴ Gimaduong’ momiyo owinjore wamakre gi chenro mar Lamo mar Joot kata puonjruok ma marwa wawegi en ni mondo wasud machiegni gi Nyasaye. (Jak. 4:8) Sama waketo thuolo mar puonjruok Muma maok wabare kendo medo ng’eyo Jachwech, mano tego winjruokwa kode. Kaka wamedo sudo machiegni gi Jehova e kaka wabiro yudo jip mar here ‘gi iwa, gi chunywa, gi riekowa, kendo gi tekowa duto.’ (Mari. 12:30) Kuom adier, wadwaro winjo Nyasaye kendo bedo joma luwo timne. (Efe. 5:1) Kuom mano, timo Lamo mar Joot maok wabare en gima dwarore ahinya e konyo joot duto ‘oikre’ sama warito “masira maduong’” ma ne okor. (Math. 24:21) Timo kamano dwarore ahinya mondo omi wabi watony.

15. Lamo mar Joot nyalo mulo nade kaka joot timo ng’ato ne nyawadgi?

¹⁵ Nitie gimachielo ma chenro mar Lamo mar Joot chopo bende​—okonyo jokanyo mag joot omed bedo gi winjruok machiegni ng’ato gi nyawadgi. Bedo gi kinde kanyachiel mar wuoyo e wi wach Nyasaye juma ka juma, mulo ahinya kaka joot timo ng’ato ne nyawadgi. Mano kaka dichwo gi dhako mokendore bedo moil sama giduto giyudo wach moro maber e puonjruokgi mar Muma! (Som Eklesiastes 4:12.) Jonyuol kod nyithindo matimo lamo margi kanyachiel nyalo yudo ka yotnegi riwore e hera, ma e “ratego ma tueyo.”​—Kol. 3:14.

16. Hul ane kaka nyiminewa moko adek yudo konyruok kuom bedo gi odhiambo ma giketo mar puonjruok Muma.

 ¹⁶ Non ane kaka nyiminewa moko adek oseyudo konyruok kuom chenro mar keto tenge odhiambo moro mar timo puonjruok Muma. Kata obedo ni ok gin wede, mond liete adekgo makoro hikgi ogwaro odak e taon achiel, kendo gisebedo osiepe kuom higini mang’eny. Nikech ne gigombo mar bedo gi tudruok machiegni korka wach Nyasaye maok mana mar osiep margi kende, ne giketo tenge odhiambo mar romo mondo gipuonjre Muma. Ne gichako timo kamano ka gitiyo gi bug “Kutoa Ushahidi Kamili” Kuhusu Ufalme wa Mungu. Achiel kuomgi wacho kama: “Wamor gi thuolono ahinya kendo kinde mang’eny puonjruokwa jakalo sa achiel. Wajatemo paro chal ma owete ne nitiere e kinde Jokristo mokwongo, kendo wuoyo kuom kaka dine wanyalo timo e bwo chal ma kamago. Kae to watemo tiyo gi puonj mwayudo e tij lendo. Mano osemiyo tijwa mar lando wach Pinyruoth kod timo ji jopuonjre omed bedo mamorowa, kendo makelo nyak moloyo chon.” E wi tegogi e wach Nyasaye, chenrono osekonyogi sudo machiegni kaka osiepe ng’ato gi nyawadgi. Giwacho kama: “Wageno ahinya chenroni.”

17. Gin ang’o makonyo e miyo Lamo mar Joot odhi maber?

¹⁷ Nade in? Ere kaka chenro mar keto tenge odiechieng’ mar lamo mar joot kata puonjruok ma mari iwuon osekonyi? Ka otime e yor baruok, chenrono ok bi konyo kaka dwarore. Ng’ato ka ng’ato kuom joot onego obed moikore e sa moket ne puonjruok. Ok onego owe mondo gik matindo tindo ochoch chenrono. E wi mano, onego oyier weche mibiro puonjruok mabiro konyo joot duto. Ang’o minyalo timo mondo puonjruok ma kamano obed mamoro joot? Ti gi yore matiyo maber e puonjo, kendo ne ni utime e yo manyiso luor kod kuwe.​—Jak. 3:18. *

“Wanenuru” Kendo ‘Waikreuru’

18, 19. Ere kaka ng’eyo ni biro mar Wuod dhano okayo machiegni onego omul ngimani koda mar joodi?

¹⁸ Gik maricho mamedo timore e piny e ndalowa nyiso maonge kiawa ni chakre higa 1914, piny ma Satan oteloeni koro ochomo e gikone. Har–Magedon koro okayo machiegni. Kinde okayo ma Wuod dhano biro kelo kum mag Jehova e wi joma ok oluoro Nyasaye. (Zab. 37:10; Nge. 2:21, 22) Donge ng’eyo mano onego omul kaka in koda joodu utiyo gi ngimau?

¹⁹ Be iluwo puonj moting’o siem ma Yesu nochiwo ni ibedi gi wang’ “mangima”? Kata obedo ni jopiny masani lawo mwandu, huma, kata loch, be joodi lawo gik magero winjruokgi gi Jehova? Be chenro mar Lamo mar Joot kata timo puonjruok ma mari iwuon tiyonu maber? Be puonjruokno konyou kuom gik madwarore? Mana kaka osewuoye e sula motelo, be ichopo ting’ni kaka oler ei Ndiko ne dichwo, dhako, kata nyathi, ka ikonyo joot duto siko ka ‘gineno’? (1 Thes. 5:6) Ka en kamano, to ibiro bedo ‘moikore,’ ne biro mar Wuod dhano.

[Weche moler piny]

Ang’o Misepuonjori?

• Ler ane kaka joot ma Jokristo nyalo ‘ikore’ kuom . . .

bedo gi wang’ “mangima.”

keto kendo luwo chenro matego winjruokgi gi Jehova.

timo Lamo mar Joot maok gibare.

[Penjo mag Puonjruok]

[Picha manie ite mar 13]

Wang’ “mangima” biro miyo wakwed gik piny manyalo galowa