Un Joot ma Jokristo​—‘Nenuru’

“Wanenuru, kwaritore maber.”​—1 THES. 5:6.

1, 2. Mondo joot osiki ka neno en ang’o madwarore?

KOWUOYO kuom “ndalo maduong’ kendo malik mar Jehova,” jaote Paulo nondiko ne Jokristo man Thessalonika kama: “Owetewa, ok un e mudho, mondo Chieng’no opou kaka jakuo. Un duto un nyithind ler, kendo nyithind odiechieng’. Ok wan mag otieno, kata mag mudho.” Paulo nomedo niya: “Omiyo, kik wanindi kaka jo mamoko, to mondo wanenuru, kwaritore maber.”​—Joel 2:31; 1 Thes. 5:4-6.

² Siem ma Paulo nochiwo ne Jo-Thessalonika owinjore ahinya gi Jokristo modak e ‘ndalo giko.’ (Dan. 12:4) Kaka giko mar piny marachni kayo machiegni, e kaka Satan timo kar nyalone mondo olok jolemo madier kuom tiyo ne Nyasaye. Omiyo, en gima nyiso rieko ka warwako e chunywa jip ma Paulo nochiwo ni wasiki ka waneno, kwaritore e winjruokwa gi Jehova. Mondo joot ma Jokristo osiki kaneno, dwarore ahinya ni ng’ato ka ng’ato kuomgi ochop ting’ ma Jehova omiye kaka oler ei Ndiko. Kuom mano, en ting’ mane ma joma chwo, mon, koda nyithindo nigo e konyo joodgi mondo osiki ‘kaneno’?

Un Chwo​—Luwuru Ranyisi mar “Jakwath Maber”

3. Kaluwore gi 1 Timotheo 5:8, ting’ mag dichwo oriwo ang’o?

³ Muma wacho niya: “Wi dhako en dichwo.” (1 Kor. 11:3) Dichwo ma en wi ot nigi ting’ mage? Ndiko nyiso achiel kuom ting’ mag ng’at ma e wi ot kowacho niya: “Ka ng’ato ok rit wedene, to moloyo ka ok orito joode, ng’atno osekwero yie, kendo orach moloyo ng’at ma ok oyie.” (1 Tim. 5:8) Kuom adier, dichwo onego ochiw ne joode gige ringruok. Kata kamano, mondo okony joode siko ka gineno kendo ritore e winjruokgi gi Jehova, onego otim moloyo mana manyo pesa mar pidhogi. Dwarore ni oger joode e weche mag chuny, mondo okonygi tego winjruokgi gi Nyasaye. (Nge. 24:3, 4) Ere kaka onyalo timo kamano?

4. En ang’o manyalo konyo dichwo gero joode e winjruok margi gi Jehova?

⁴ Nikech “dichwo en wi dhako, kaka Kristo bende en wi kanisa,” dichwo ma osekendo onego onon kendo oluw ranyisi ma Yesu oketo ne kanyakla. (Efe. 5:23) Non ane kaka Yesu ne olero winjruok ma ne ni e kinde gi jolupne. (Som Johana 10:14, 15.) En ang’o mabiro konyo dichwo gero winjruok mar joode gi Jehova? En ma: Puonjruok gik ma Yesu nowacho kendo timo kaka “jakwath maber,” ‘koluwo ndache.’​—1 Pet. 2:21.

5. Jakwath Maber nigi ng’eyo maromo nade e wi kanyakla?

⁵ E yor ranyisi, winjruok manie kind jakwath kod rombene otenore kuom ng’eyo koda genruok manie kindgi. Jakwath ong’eyo duto e wi rombene, to rombe bende ong’eyo jakwath kendo gigene. Ging’eyo dwonde kendo giwinje. Yesu nowacho e wi rombene niya: “Ang’eyo maga awuon, to maga awuon bende ong’eya.” Yesu ok ong’eyo kanyakla mana gie wiyewiye. E dho Grik, wach molok ni ‘ng’eyo’ en wach manyiso “ng’eyo ng’ato maber e yo matut.” Ee, Jakwath Maber ong’eyo rombene e yo maber kendo matut.  Ong’eyo dwaro mar rombo ka rombo, nyawo maggi, koda teko maggi. Onge gimoro amora e wi rombene makalo wang’ Jaketnwa ranyisi. Kendo rombe ong’eyo jakwath malong’o chuth kendo gigeno yo motiyogo e telonegi.

6. Ere kaka chwo nyalo luwo ranyisi mar Jakwath Maber?

⁶ Mondo oti gi migawone mar wich koluwo ranyisi mar Kristo, dichwo nyaka puonjre nenore owuon kaka jakwath kendo neno jogo moket e bwoye kaka rombe. Onego otim matek mondo ong’e joode maber. Be dichwo nyalo bedo gi ng’eyo ma kamano? Ee, ka obedo ng’ama wuoyo maber gi joode duto, ochiko ite ne weche machando chunygi, otayo joode e weche mamulo joot, kendo otimo matek mondo ong’ad paro maber kuom weche kaka lamo mar joot, dhiyo e chokruoge, e tij lendo, bedo gi kinde mag yueyo koda manyo mor. Sama dichwo ma Jakristo ong’eyo maber gima Wach Nyasaye wacho kendo ong’eyo joode duto malong’o, mondo omi oketnegi ranyisi maber kendo ng’ado paro mariek, joode biro geno yo motayogigo, kendo obiro bedo mamor neno joode ka riwore kanyachiel e lamo madier.

7, 8. Ere kaka dichwo nyalo luwo ranyisi mar Jakwath Maber kuom nyiso hera ne jogo manie bwo rit mare?

⁷ Jakwath maber bende ohero rombene. Sama wapuonjore weche manie Injili e wi ngima Yesu koda tije ne Nyasaye, chunywa pong’ gi mor kuom hera ma Yesu nonyiso jopuonjrene. Ne oherogi nyaka ‘oweyo ngimane nikech rombene.’ Chwo onego oluw ranyisi mar Yesu kuom nyiso jogo manie bwogi hera. Kar tiyo gi telo mare e yo makwiny kata mager kuom chiege, dichwo madwaro ni Nyasaye oyie kode onego odhi nyime hero chiege “kaka Kristo bende nohero kanisa.” (Efe. 5:25) Onego owuo kode e yo mang’won kendo manyiso ni odewe, nikech owinjore omiye duong’.​—1 Pet. 3:7.

⁸ E tiego nyithindo, jalo ma en wi ot onego omakre matek gi puonj koda chike Nyasaye. Kata kamano, wiye kik wil gi nyiso nyithinde hera. Kapo ni dwarore ni oriegi, onego otim kamano e yor hera. Nyithindo moko nyalo kawo kinde malach e timo lokruok madwarore. Nikech mano, wuoro onego omed bedo gi kido mar horuok mos. Sama chwo luwo ranyisi mar Yesu maok giwe, gimiyo pacho bedo kama joot duto yudoe ritruok kod kuwe. Joodgi yudo ritruok kod kuwe e winjruokgi gi Jehova, kaka ma jandik-zaburi nowero.​​—⁠Som Zaburi 23:1-6.

9. Mana kaka Noa, chwo ma Jokristo nigi ting’ mane, to ang’o mabiro konyogi e timo kamano?

⁹ Jaduong’ Noa ne odak e kinde mag giko piny ma ndalone. Kata kamano, Jehova ne ‘orite gi ji abiriyo moko ka nokelo pi motak e piny jo maricho.’ (2 Pet. 2:5) Noa ne nigi ting’ mar konyo joode tony e Ataro mar pi. Jokristo ma gin wiye udi bende nigi migawo ma kamano e ndalogi mag giko. (Math. 24:37) Mano kaka en gima dwarore ahinya ni gipuonjre kuom “jakwath maber” kendo timo matek mondo giluw ranyisi mare!

Un Mon​—‘Bidhuru Uteu’

10. Dhako mawinjo chwore onego otim ang’o?

¹⁰ Jaote Paulo nondiko kama: “Mon, winjuru chwou, kaka uwinjo Ruoth.” (Efe. 5:22) Ndikono ok nyis ni migawo mar dhako e ngima joot onge gi duong’. Kapok ne ochweyo Hawa, dhako mokwongo, Nyasaye madier nowacho niya: “Ok ber mondo dhano obed kende; analosne jakony mowinjorene.” (Chak. 2:18) Kuom adier, migawo mar bedo ‘jakony mowinjore’​—ma en tich mar riwo chwore lwedo sama chwore rito ting’ mage mag joot, en migawo ma nigi duong’ ahinya.

11. Ere kaka dhako maketo ranyisi maber ‘bidho ode’?

¹¹ Dhako maketo ranyisi maber tiyo matek mondo okel ne joode ber. (Som Ngeche  14:1.) Mopogore gi dhako mofuwo maok nyis luor ne chenro mar wich, dhako mariek nyiso luor matut ne chenrono. Kar nyiso chuny ma onya e piny mar tamruok bedo e bwo chik, oyie winjo chwore. (Efe. 2:2) Dhako mofuwo wuoyo awuoya marach kuom chwore, to dhako mariek timo matek mondo omi nyithinde koda joma moko omed nyiso chwore luor. Dhako ma kamano bedo motang’ mondo kik oduok chien luor ma joode nigo kuom chwore, ka ong’ur ang’ura seche te kata mino kode wach. Bende dwarore ni dhako ong’e kungo kata tiyo gi pesa e yo maber. Dhako mofuwo ketho mwandu ma joode oyudo bang’ tiyo matek. Dhako mariwo chwore lwedo to ok ni kamano. Obedo e winjruok gi chwore korka weche motudore gi wach tiyo gi pesa. Yorene mag timo gik moko nyiso rieko gi chuny mar kungo. Ok ochun chwore mondo oti kuom seche momedore ahinya.

12. Dhako nyalo timo ang’o e konyo joode mondo osiki ‘kaneno’?

¹² Dhako maketo ranyisi maber konyo joode mondo osiki ‘kaneno’ kuom konyo chwore e puonjo nyithindgi e wi Jehova. (Nge. 1:8) Oriwo lwedo chenro mar Lamo mar Joot. E wi mano, oriwo chwore lwedo sama chwore rieyo kendo puonjo nyithindgi. Mano kaka dhako ma kama opogore ahinya gi dhako maok riw chwore lwedo, ma nyithinde hinyore e yor ringruok koda e winjruokgi gi Jehova!

13. Ang’o momiyo dwarore ahinya ni dhako oriw chwore lwedo e tije motimo ne Nyasaye?

¹³ Ere kaka dhako mariwo chwore lwedo winjo koneno kaka chwore odich gi tije mag kanyakla mar Jokristo? Obedo mamor ndi! Kata bed ni chwore en jakony-tich, jaduong’-kanyakla, kata achiel kuom jokanyo mag Komiti Matudore gi Osiptende, kata mar Komiti Mochung’ne Tije Gedo, omor gi migawo ma chwore nigo. Kuom adier, riwo chwore lwedo chuth gi weche mawuok e dhoge koda e timbene, biro dwaro ni oikre mar weyo luwo dwache kata gombone moko. Kata kamano, ong’eyo ni migepe ma chwore timo ne kanyakla koda ne riwruok mar oganda Nyasaye, konyo joode duto siko ka gineno e winjruokgi gi Jehova.

14. (a) Ang’o manyalo miyo obed matek ne dhako riwo chwore lwedo, to ere kaka onyalo loyo pek ma kamano? (b) Ere kaka dhako nyalo miyo ngima joode duto obed maber?

¹⁴ Keto ranyisi maber korka riwo chwore lwedo nyalo bedo matek ne dhako, sama chwore ong’ado paro moro maok oyiego. Kata mana e kinde ma kamago, onyiso “chuny modimbore, mokuwe” kendo oriwe lwedo e neno ni paro mong’adono odhi maber. (1 Pet. 3:4) Dhako maber temo luwo  ranyisi mabeyo mag mon machon ma ne oluoro Nyasaye, kaka Sara, Ruth, Abigail, kod Mariam min Yesu. (1 Pet. 3:5, 6) Oluwo bende ranyisi mag mon ma hikgi ogwaro ma kindegi, ma gin mon “maler e ngimagi.” (Tito 2:3, 4) Kuom nyiso luor kod hera ne chwore, dhako maketo ranyisi maber konyo ahinya e miyo kend margi odhi maber, kendo miyo ngima mar joode duto obed maber. Ode bedo kar hoch koda ritruok. E wang’ dichwo mohero Nyasaye, dhako ma riwe lwedo en kaka mwandu maduong’ ahinya!​—Nge. 18:22.

Un Nyithindo​—‘Ng’iuru Gik Maok Ne’ gi Wang’

15. Ere kaka nyithindo nyalo chopo ting’ margi mondo gimi joodgi osiki ‘kaneno’?

¹⁵ Ere kaka un nyithindo unyalo chopo ting’u e konyo jonyuolu mondo joodu osiki ‘kaneno’ e winjruok gi Jehova? Non ane pok kata mich ma Jehova oseketo e nyimu. Nyalo bedo ni a tin u, jonyuolu osebedo ka nyisou pichni manyiso kaka ngima biro chalo e Paradis. Kaka ne umedo dongo, nyalo bedo ni ne gitiyo gi Muma koda buge mag Jokristo mondo gikonyu temo paro kaka ngima ma nyaka chieng’ biro bedo e piny manyien. Keto pachu kuom wach tiyo ne Jehova kendo chano ngimani maber, biro konyou siko ‘kuneno.’

16, 17. Nyithindo nyalo timo ang’o mondo giring ng’wech mar ngima maber?

¹⁶ Mak kendo iti gi weche ma ne jaote Paulo ondiko e 1 Jo Korintho 9:24. (Som.) Ring ng’wech mar ngima kiketo pachi duto kuom yudo pok. Dag e ngima mabiro miyo iyud pok mar ngima ma nyaka chieng’. Ji mang’eny oseweyo lawruok gi mwandu ogal pachgi kuom keto wang’gi kuom pokno. Mano kaka en gima nyiso fuwo! Keto ngimawa mana kuom wach manyo mwandu ok kel mor madier. Gik ma pesa nyalo ng’iewo kadho. Kata kamano, un to keturu wang’u kuom “gik ma ok nen.” Nikech ang’o? En nikech “gik ma ok nen ochwere.”​—2 Kor. 4:18.

¹⁷ “Gik ma ok nen” oriwo gweth mag Pinyruoth. Dag e yo mabiro konyi yudogi. Mor madier bedoe mana kuom tiyo gi ngimani e tij Jehova. Tiyo ne Nyasaye madier miyowa thuolo mag keto chenro mwanyalo chopo gie sani koda mago mwanyalo chopo bang’ kinde. * Keto chenro minyalo chopo biro konyi keto pachi kuom tiyo ne Nyasaye mondo ibi iyud pokno ma en ngima ma nyaka chieng’.​—1 Joh. 2:17.

18, 19. Ere kaka ng’ama rawera nyalo ng’eyo kabe okawo adiera gi pek?

¹⁸ Un nyithindo, okang’ mokwongo ma unyalo kawo e ng’wech mar ngima, en gero winjruok ma maru uwegi gi Jehova. Be isekawo okang’ ma kamano? Penjri ane kama: ‘Be an ng’at mohero Nyasaye, koso atimo tije mag Nyasaye mana nikech jonyuolna? Be atemo nyago kido mabiro konya bedo ng’at ma Nyasaye oyiego? Be atimo matek mondo kik abara e weche motudore gi lamo madier kaka, lemo pile, puonjruok, dhi e chokruoge, koda dhi e tij lendo? Be asudo ir Nyasaye kuom bedo gi winjruok machiegni kode?’​—Jak. 4:8.

¹⁹ Par matut kuom ranyisi mar Musa.  Kata obedo ni Musa ne odak e kit ngima mar piny maok margi, ne oyiero ni mondo ong’eye kaka jalo malamo Jehova kar mondo oluonge ni wuod nyar Farao. (Som Jo Hibrania 11:24-27.) Un nyithindo ma Jokristo, dwarore ni ung’ad mar tiyo ne Jehova kuchung’ motegno. Kuom timo kamano, ubiro yudo mor madier, ngima maber moloyo gie sani, koda bedo gi geno mar ‘yudo ngima ma en ngima maradier.’​—1 Tim. 6:19.

20. E ng’wech mar ngima, gin jomage mayudo pok?

²⁰ E tuke machon, mana jang’wech achiel kende ema ne yudo pok. Mano opogore gi ng’wech mar ngima. Dwaro mar Nyasaye en “mondo ji duto okwo, kendo ging’e adiera chuth.” (1 Tim. 2:3, 4) Ji mang’eny ma ne oteloni oseringo maber, to mang’eny pod ringo kanyachiel kodi. (Hib. 12:1, 2) Jogo duto moringo nyaka giko, biro yudo pok. Omiyo ng’ad mar ringo mondo iyud pok!

21. En wach mane mibiro non e sula maluwo?

²¹ “Ndalo maduong’ kendo malich mar Jehova” nyaka to chopi. (Mal. 4:5) Odiechieng’no ok onego opo joot ma Jokristo. En gima dwarore ahinya ni joot duto ochop ting’gi kaka oler ei Ndiko. Ang’o kendo munyalo timo mondo usiki kuneno kendo tego winjruok maru gi Nyasaye? Sula maluwo biro lero weche adek manyalo konyo joot duto obed gi winjruok maber gi Nyasaye.

[Weche moler piny]

Ang’o Misepuonjori?

• Ang’o momiyo dwarore ni joot ma Jokristo osiki ‘kaneno’?

• Ere kaka dichwo nyalo luwo ranyisi mar Jakwath Maber?

• Dhako maketo ranyisi maber nyalo timo ang’o e riwo chwore lwedo?

• Ere kaka nyithindo nyalo konyo e miyo joodgi onen ka giritore e winjruokgi gi Nyasaye?

[Penjo mag Puonjruok]

[Picha manie ite mar 9]

Dhako mariwo chwore lwedo en kaka mwandu maduong’ ahinya e wang’ dichwo mohero Nyasaye