Be Isedonjo e Yueyo mar Nyasaye?

“Wach Nyasaye ongima, kendo otiyo.”​—HIB. 4:12.

1. En yo mane mwanyalo donjogo e yueyo mar Nyasaye ndalogi, to ang’o momiyo timo mano nyalo bedo matek?

E SULA motelo, ne waneno ni wanyalo donjo e yueyo mar Nyasaye kuom winjo dwonde kendo timo kaluwore gi dwaro mage. Mano nyalo bedo gima yot wacho moloyo timo. Kuom ranyisi, ka wafwenyo ni Jehova ok oyie gi gimoro ma wahero, chunywa nyalo dwaro ng’anjo. Bedo kamano nyiso ni dwarore watim dongruok kuom wach bedo joma “oikore winjo wach.” (Jak. 3:17) E sulani, wabiro nono chal moko manyalo ketowa e bwo tem mar nyiso kabe waikore mar timo kaluwore gi dwaro mar Nyasaye gi chunywa duto.

2, 3. Gin kinda mage ma nyaka wamed timo mondo mi wasiki joma beyo e wang’ Jehova?

² Be in gi chuny moikore rwako puonj moting’o siem manie Muma? Ndiko wachonwa ni dwaro mar Nyasaye en choko “gik mabeyo manie ogendini duto.” (Hag. 2:7, New World Translation) En adier ni thothwa ok ne wan joma beyo ka eka ne wachako puonjore adiera. Kata kamano, herawa kuom Nyasaye koda Wuode mohero, ne ojiwowa timo lokruok madongo e pachwa koda e timbewa mondo mi wabed joma Nyasaye oyiego chuth. Gikone, bang’ lamo matut kod timo kinda, odiechieng’ makendeno nochopo mi wachiwore ne batiso mar Jokristo.​—Som Jo Kolosai 1:9, 10.

 ³ Kata kamano, lweny ma wan-go mar kedo gi nyawo ma ne onyuolwago, ok norumo kane obatiswa. Lwenyno dhi nyime, kendo obiro dhi nyime nyaka chieng’ wabed dhano makare chuth. Kata kamano, isingonwa ni ka wadhi nyime kedo matek, kendo ng’ado mar temo ahinya mondo wamed bedo joma beyo e wang’ Nyasaye, Jehova biro gwedho kindawa.

Sama Puonj Moting’o Siem Dwarore

4. Wanyalo yudo siem mag Ndiko e yore adek mage?

⁴ Kapok wachako nono kaka wanyalo loyo kuonde mwaremie, nyaka wakwong wang’e remgo mondi. Twak moro e Od Romo kata paro moro makende e bugewa nyalo elo kido moro marach ahinya kuomwa. Mopogore gi mano, ka ok wawinjo tiend puonj michiwo e twak, kata ka ok watiyo gi puonj mar siem mondiki, Jehova nyalo tiyo gi Jakristo wadwa mondo oelnwa kama waremieno.​—Som Jo Galatia 6:1.

5. Hul ane moko kuom yore manyalo monowa rwako siem, kendo ler ane gimomiyo jokwath ma Jokristo nyaka dhi nyime timo kinda mar konyowa.

⁵ Rwako siem moa kuom dhano morem ok en gima yot, kata bed mana ni siemno ochiw e yor rieko koda hera machalo nade. To ema pod Jo Galatia 6:1 nyiso ni Jehova chiko jogo mawuotho kuom roho mondo ‘oduogwa,’ ka gitimo kamano “gi chuny mamuol.” Ka warwako puonj moting’o siemgo, to wabiro medo bedo joma beyo moloyo e wang’ Nyasaye. Gimiwuoro en ni sama wawuoyo gi Nyasaye e lamo, wajoyie ayanga ni warem. Kata kamano, sama ng’ato owachnwa ayanga kamoro ma waremie, chuny ma wan-go en temo kwer, neno ni mano ok gimaduong’, neno ni jachiw siemno nigi paro maok kare, kata temo kwedo yo ma omiwago siemno. (2 Ruo. 5:11) To kapo ni siemno mulo wach moro mwageno ahinya​—timbe ng’ato moro e odwa, rwakruokwa gi bidhruokwa, rito ler, kata yo moro mar mor mwahero to Jehova osin-go​—wanyalo yudo ni watamre rwako siemno! Kata kamano, bang’ tero mos, kinde mang’eny wayie ni siemno ne owinjorego.

6. Ere kaka wach Nyasaye elo “dwaro manie chuny ng’ato”?

⁶ Ndiko matayo sulani paronwa ni wach Nyasaye ‘tiyo.’ Ee, wach Nyasaye nigi teko mar loko ngima ji. En gi teko mar konyowa timo lokruok madwarore bang’ batisowa, mana kaka notimo kane pok obatiswa. E barupe ne Jo-Hibrania, Paulo bende ndiko ni wach Nyasaye “opowo modonjo nyaka ka ma opogo ngima kod chuny, fuoni gi ondhundho bende, kendo oketo bura ni paro kod dwaro manie chuny ng’ato.” (Hib. 4:12) Tiende ni ka waseng’eyo maber dwaro mar Nyasaye kuomwa, okang’ mwakawo kaluwore gi dwarono nyiso kaka wachalo ei chunywa ma iye. Be seche moko nitie pogruok e kind kaka wanenore gi oko koda kaka wachalo adier ei chunywa? (Som Mathayo 23:27, 28.) Non ane kaka in inyalo timo e bwo chal maluwogi.

Dhi Kanyachiel gi Riwruok mar Oganda Jehova

7, 8. (a) Ang’o ma dibed ni ne miyo Jokristo moko ma Jo-Yahudi omok ahinya e weche moko mag Chik Musa? (b) Gik ma ne gitimo ne nyiso ang’o kuomgi e wi wach dwaro mar Jehova e ndalono?

⁷ Thothwa nyalo nwoyo e pachwa weche manie Ngeche 4:18: “Yor jo makare chal ka ler ka piny oyawore, momedore ameda nyaka wang’ chieng’ orieny maler.” Tiend mano en ni timbewa koda ng’eyo ma wan-go kuom dwaro mag Nyasaye biro dhi nyime ka medore bang’ kinde.

⁸ Mana kaka ne wapuonjore e sula motelo, bang’ tho Yesu, ne obedo matek ne ng’eny Jokristo ma Jo-Yahudi were gi Chik Musa. (Tich 21:20) Kata obedo ni Paulo nonyiso e yo molony gimomiyo Jokristo koro ok ne nie  bwo Chik, jomoko pod notamore rwako paro ma ne ochiwo kotelne gi roho mar Nyasaye. (Kol. 2:13-15) Nyalo bedo ni ne giparo ni ka gidhi nyime mako weche moko mag Chik, ne ok dhi sandgi. Kata bed ni ne gitimo kamano nikech ang’o, Paulo nondiko ne Jokristo ma Jo-Hibrania mowachonegi maler ni, ne ok gidhi donjo e yueyo mar Nyasaye ka gitamore timo gik moko kaluwore gi dwarone mar kindeno. * (Hib. 4:1, 2, 6; som Jo Hibrania 4:11.) Mondo Jehova oyie kodgi, ne nyaka ging’e ni koro Jehova ne tayo joge e yo mopogore.

9. En paro mane monego wabedgo sama otim lokruok moko e wi puonj mag Ndiko moko?

⁹ E ndalogi, nitie lokruok moko mosetim mondo omed lero puonj moko mag Muma e yo maber moloyo. Mano ok en gima onego ochandwa; en gima onego oteg genowa kuom kweth mar jatichno mogen kendo mariek. Sama jokanyo mawuoyo e lo “jatichno” ofwenyo ni dwarore otim lokruok e wi adiera moro, ok giluor timo mano. Kweth mar jatichno oikore ahinya timo gik moko kaluwore gi dwaro mar Nyasaye modhi nyime elonwa, kar weyo timo kamano nikech ji biro wuoyo kuomgi marach nikech lokruok ma gitimono. Ere kaka in ijatimo sama onyiswa lokruok moro mosetim e wi Ndiko?​—Som Luka 5:39.

10, 11. Gin puonj mage mwanyalo yudo kuom kaka jomoko notimo kane okel yore manyien mag lando wach maber?

¹⁰ We wanon ane ranyisi machielo. E giko higini mag 1800 kod chak higini mag 1900, moko kuom Jopuonjre Muma ma ne gin jogol-twak mang’ula ahinya, ne neno ni ber chopo migawo mar lendo kokalo kuom golo twege moik maber ne jowinjo. Ne gihero ahinya golo twege, kendo moko kuomgi ne mor gi pak ma ne a kuom jowinjo. Kata kamano, bang’e ne onenore maler ni Jehova dwaro ni joge otim tij lendo ka gitiyo gi yore mopogore opogore, moriwo nyaka lendo mar ot ka ot. Jogol-twak moko molony ahinya, ne otamore kata mana temo tiyo gi yo moro amora manyien. Ne ginenore gi oko kaka joma ochiwore ahinya e tiyo ne Ruoth. Kata kamano, ka koro ne onyisgi kaka onego otim tij lendo kaluwore gi dwaro mar Nyasaye, chunygi koda pachgi madier ne onenore ayanga. Ere kaka Jehova ne onenogi? Ne ok ogwedhogi. Kendo ne giweyo riwruok mar oganda Jehova.​—Math. 10:1-6; Tich 5:42; 20:20.

¹¹ Mano ok nyis ni lendo e lela ne en gima yot ne joma ne odong’ kochung’ motegno gi riwruok mar oganda Jehova. Thothgi ne oyudo pek kuom tijno, to moloyo e kar chakruokne. Kata kamano, ne giwinjo dwond Nyasaye. Bang’ kinde, ne giloyo luoro ma ne gin-go, kendo Jehova ne ogwedhogi ahinya. Ere kaka in itimo sama owachnwa ni watim tij lendo kwatiyo gi yo moro ma in to ok mori ahinya? Be iikori temo tiyo gi yo moro manyien?

Sama Ng’at Mihero Oweyo Jehova

12, 13. (a) Gimomiyo Jehova dwaro ni ogol oko joricho motamore loko chunygi en ang’o? (b) Jonyuol moko ma Jokristo bedo e bwo tem mane, to ang’o ma hinyo miyo temno bedo matek ahinya?

¹² En adier ni waduto wayie gi puonj manyiso ni nyaka wabed maler e ringruok, e timbewa, koda e wechewa mag lamo mondo mi wamor Nyasaye. (Som Tito 2:14.) Kata kamano, nitiere kinde ma wechego nyalo miyo wabed e bwo tem ahinya korka makruokwa chuth gi dwaro mar Nyasaye. Kuom ranyisi, wawach ni wuod jonyuol moko ma gin Jokristo ma keto ranyisi maber, oweyo adiera. Nikech ohero “mor mar richo ma rumo bang’ ndalo matin” kar hero winjruokne maber gi Jehova koda jonyuolne moluoro Nyasaye, rawerano  igolo oko mar kanyakla.​—Hib. 11:25.

¹³ Mano kelo kuyo ahinya ne jonyuolne! En adier ni ging’eyo gima Muma wacho e wi joma osegol oko mar kanyakla, ni ‘kik uwuothi kod ng’at ang’ata miluongo ni owadu ka en ng’at ma terore, kata jagombo, kata ng’ama lamo nyiseche manono, kata jayenyo, kata jamer, kata jamecho; kik uchiem ngang’ kod ng’at ma kama.’ (1 Kor. 5:11, 13) Ging’eyo bende ni ‘ng’at ang’ata’ miwuoyoe e ndikono oriwo koda joot ma gidakgo e ot achiel. Kata kamano, gihero wuodgi ahinya! Yot mondo gichak parore niya: ‘Ere kaka wanyalo konyo wuodwa duogo ir Jehova ka ok wariwore kode chuth? Donge wanyalo konye moloyo, ka wasiko watudore kode?’ *

14, 15. En yiero mane maduong’ ma jonyuol ma nyithindgi ogol oko mar kanyakla nyaka tim?

¹⁴ Wabende wawinjo malit ne jonyuolgo. Wuodgi ne nigi yiero monyalo timo, to noyiero luwo kit ngima maok owinjore gi Jokristo kar mondo odhi nyime bedo gi winjruok machiegni gi jonyuolne koda Jokristo mamoko wetene. Jonyuolne to ne onge gima nyalo timo kuom wachno. Omiyo, ok kawwa gi wuoro ni giwinjo matek!

¹⁵ Kata kamano, en ang’o ma jonyuolgo biro timo? Be gibiro luwo weche ma Jehova chiko ayanga? Koso gibiro dhi nyime bedo gi tudruok mapile gi wuodgi mosegol okono, ka giwacho ni “waloso mana wechewa moko mochuno mag joot”? Sama gitimo yiero, wigi ok onego owil ngang’ keto e paro kaka Jehova neno gima gitimono. Dwarone en ni mondo orit riwruok mar ogandane obed maler, to kanyalore, mondo ochiew pach jokethogo. Ere kaka jonyuol ma Jokristo nyalo riwo lwedo dwaro mar Nyasaye kuom wachno?

16, 17. En puonj mane mwayudo ka waparo matut kuom ranyisi mar Harun?

¹⁶ Harun owadgi Musa ne obedo e chal moro matek kuom wach yawuote moko ariyo. Par ane kaka nyaka bed ni Harun nowinjo lit kane yawuote miluongo ni Nadab gi Abihu nochiwo mach mawendo e nyim Jehova, mi Jehova ne onegogi. En adier ni tho mar yawuowigo nomiyo koro ne ok ginyal tudore gi jonyuolgi. Kata kamano, nitie weche mamoko momedore. Jehova nochiko Harun gi yawuote ma ne ochung’ motegno niya: “Kik ugol gi moumo wiu, kata kik uyiech lepu [e yor ywak]; mondo kik utho, kendo mondo kik [Jehova] okechi gi oganda duto.” (Lawi 10:1-6) Puonj mwayudo kanyo nenore maler. Hera mwaherogo Jehova nyaka bed motegno moloyo hera mwaherogo joodwa moseketho ne Jehova.

¹⁷ Ndalogi, Jehova ok neg gikanyono jogo maketho chikene. Onyisogi hera kuom  miyogi thuolo mar loko chunygi gia e yoregi maok kare. Kata kamano, Jehova nyalo winjo nade kapo ni jonyuol jal moketho to otamore loko chunye, siko katimo gik manyiso ni gichayo Jehova kuom bedo gi tudruok maok ochuno gi wuodgi kata nyargi ma osegol oko mar kanyakla?

18, 19. Joot ma riwo lwedo chike Jehova kuom wach jogo mosegol oko mar kanyakla, nyalo yudo gweth mage?

¹⁸ Thoth joma chon ne ogol oko mar kanyakla sani wacho ayanga ni, chung’ motegno mar osiepegi koda joodgi ne okonyo e miyo pachgi ochiew. E barua ma ne gindiko ka gikwayogo mondo oduok dhako moro ma rawera, jodongo nonyiso ni nyakono noseloko kit ngimane, kendo ni achiel kuom gik ma ne okonye en “nikech owadgi ma odgi ne ochiwo luor ne chenro mar golo joketho oko mar kanyakla.” Dhakono nowacho ni, “makruok ma owadgino ne omakorego motegno gi weche michiko ei Ndiko ne okonye bedo gi chuny mar duogo.”

¹⁹ Onego wang’ad nade kuom wachni? Ni onego wakwed kido ma thoro bedo e chunywa morem, mar ng’anjo ne puonj koda siem mag Ndiko. Nyaka wabed gadier chuth ni kinde duto yo ma Nyasaye nyisowa ni wati godo e loyo chandruogewa, e yo maber moloyo.

‘Wach Nyasaye Ngima’

20. Weche manie Jo Hibrania 4:12 inyalo tigo e yore ariyo mage? (Ne weche moler piny.)

²⁰ Kane Paulo ondiko ni ‘wach Nyasaye ngima,’ ne ok owuo sie e wi Wach Nyasaye mondiki, ma en Muma. * Weche molworo ndikono nyiso ni ne owuoyo e wi wach ma Nyasaye nosingo. Gima Paulo ne wacho en ni, Nyasaye ok tim singo kae to wiye wil gi singono. Jehova nonyiso mano kokalo kuom janabi Isaya kama: “Wachna  . . . ok enoduog ira nono, to . . . nonwang’ hawi kuom tich ma naore mondo otim.” (Isa. 55:11) Omiyo, onge tiende bedo gi parruok ahinya sama gik moko ok dhinwa mapiyo kaka dwaher. Jehova dhi nyime “tiyo” mondo omi dwarone ochopi e gikone e yo maber chuth.​—Joh. 5:17.

21. Ang’o momiyo Jo Hibrania 4:12 nyalo jiwo jokanyo makoro oti mag “oganda mang’ongo” mosebedo kochung’ motegno?

²¹ Joma osechung’ motegno makoro hikgi ogwaro manie kweth mar “oganda mang’ongo,” osetiyo ne Jehova kuom higini pieche. (Fwe. 7:9) Thothgi ne ok ogeno mar bedo moti e chenro mar piny marachni. Kata kamano, chunygi podi ok onyosore. (Zab. 92:14) Ging’eyo ni wach ma Nyasaye osingo ok en wach motho​—ongima, kendo Jehova timo gik madwarore mondo omi ochope. Nikech Nyasaye dwaro ahinya chopo dwarone, wamiyo chunye mor ka waketo wach dwarone obed motelo e pachwa. E kinde mar odiechieng’ mar abiriyoni, Jehova osebedo ka yueyo, kong’eyo maber ni dwarone biro chopo, kendo ni, ka gin kaka oganda, joge biro riwo lwedo dwaroneno. To nade in? Be in iwuon isedonjo e yueyo mar Nyasaye?

[Weche moler piny]

Kik Wiyi Wil gi Gimomiyo

• Ang’o madwarore mondo mi wadonji e yueyo mar Nyasaye ndalogi?

• En tudruok mane mantie e kind dwaro mar Nyasaye kod bedowa moikore rwako puonj moting’o siem moa e Ndiko?

• Luwo chik mar Ndiko nyalo bedo matek kuom weche mage, to ang’o momiyo dwarore ni wawinj dwond Nyasaye?

• Jo Hibrania 4:⁠12 inyalo tigo e yore ariyo mage?

[Penjo mag Puonjruok]

[Picha manie ite mar 31]

Jonyuolgo nigi kuyo ahinya!