Penjo Moa Kuom Josombwa

Be inyalo ng’e kwan sie mar weche ma ne okor e wi Mesia mayudore e Ndiko mag Dho-Hibrania?

Nono matut Ndiko mag Dho-Hibrania konyowa fwenyo weche mokor mathoth ma ne ochopo kuom Yesu Kristo. Wechego nokoro gik motudore gi nyuol koda kinde ma Mesia ne dhi fwenyoree, migepene, kaka ne idhi timne, koda gik ma ne odhi chopo e chenro mar Jehova Nyasaye. Wechegi duto konyowa ng’eyo ni Yesu e Mesia. Kata kamano, dwarore ni wabed motang’ sama watemo nono kwan duto mag weche ma ne okor e wi Mesia, mayudore e Ndiko mag Dho-Hibrania.

Ji ok nigi winjruok achiel kuom weche mokor e wi Mesia. E buge mar The Life and Times of Jesus the Messiah, Alfred Edersheim nowacho ni ndiko mag jopuonj miluongo ni jorabi nigi kuonde 456 manyiso weche mokor e wi Mesia e Ndiko mag Dho-Hibrania, kata obedo ni thothgi ok hul wach Mesia achiel kachiel. Ka onon matut wechego man kuonde 456, mano miyo wapenjore kabe moko kuomgi ne gin weche mokor e wi Yesu Kristo. Kuom ranyisi, Edersheim nowacho ni, Jo-Yahudi ne kwano Chakruok 8:11 kaka achiel kuom weche mokor e wi Mesia. Ne gineno ni “it yadh zeituni ma akuru ne okelo, ne owuok e Got mar Mesia.” Edersheim bende wuoyo kuom Wuok 12:42. Kolero kaka Jo-Yahudi ne winjo ndikono e yo maok kare, nondiko kama: “Mana kaka Musa ne owuok e thim, bende Mesia ne dhi wuok Rumi.” Josomo mang’eny manono Muma kaachiel gi jomamoko yudo ka teknegi tudo ndiko ariyogo, koda weche moler maok karego kuom Yesu Kristo.

Kata kapo ni wanono mana weche mokor ma ne ochopo adier kuom Yesu Kristo, ok yot ng’eyo kwan-gi sie. Wakaw ane Isaiah sula 53 kaka ranyisi, sulano oting’o gik mogwaro motudore gi weche mokor e wi Mesia. Isaiah 53:2-7 koro kama: “Oonge kido maber kata chia . . . Ji ne chaye kendo ne gikwere . . . Oseting’o tuwochewa . . . Nochwowe nikech richowa . . . [nobedo] kaka nyarombo mitero kar yeng’o.” Be onego wakaw wechego duto manie Isaiah sula 53 kaka weche mokor e wi Mesia mawuoyo kuom gimoro achiel, koso moro ka moro ochung’ kar kende?

Non ane bende Isaiah 11:1, mawacho kama: “Thuok moro nochuogre kuom yadh Yese, kendo mbandu moa e tiende nonyag olembe.” E kwan matindo 10, wayudo wechego konwo e yo machalre. Be onego wakwan ndiko ariyogo kaka weche makoro gik moko ariyo mopogore koso gimoro achiel? Yo ma ng’ato nenogo Isaiah sula 53 kod Isaiah sula 11 nyalo miyo wane kar kwan duto mag weche mokor e wi Mesia, e yo mopogore opogore.

Kuom mano, ok onego waparre ahinya e wi kwan duto mag weche mokor e wi Mesia mayudore e Ndiko mag Dho-Hibrania. Riwruok mar oganda Jehova osenyiso weche mogwaro ma ne okor e wi Yesu koda kaka ne gichopo. * Wechego nyalo konyo kendo jiwowa sama watimo puonjruok marwa wawegi koda mar joot, kendo konyowa e tijwa mar lendo. E wi mano, weche mang’eny mokor e wi Mesia, kata gibed adi, gimiyo wabedo gadier chuth ni Yesu e Kristo, tiende ni Mesia.

[Weche moler piny]