Penjo Moa Kuom Josombwa

Ere kaka onego wakaw kwan mar ripod tijwa mar higa ka higa?

Higa ka higa, wabedo gi siso mar neno ripod tijwa migoyo e Kitabu cha Mwaka kata e Tijwa mar Pinyruoth ma Februar. Wamor ahinya neno kaka oganda Jehova osechopo tij lando kendo puonjo wach Pinyruoth e piny mangima. Kata kamano, mondo mi ripodno okonywa ahinya, dwarore ni wang’e maler gimomiyo oket kwan man kanyo kendo kawogi e yo mowinjore. Non ane ranyisi matin.

Higa mar Tij Nyasaye. Higani chakore e dwe mar Septemba nyaka e Agost higa maluwo. Bug Kitabu cha Mwaka jating’o ripod tijwa mar higa mokalo. Kuom ranyisi, Kitabu cha Mwaka—2011 oting’o ripod tijwa mar 2010, ma ne ochakore e Septemba 1, 2009, nyaka Agost 31, 2010.

Kwan mamalo mar jolendo koda jolendo duto. “Jolendo” oriwo Joneno mag Jehova mosebatisi koda mago mapok obatisi to oseketi kaka jolendo mag Pinyruoth. “Kwan mamalo mar jolendo” en kwan mamalo mogik mar dwe ma jolendo mang’eny ne ochiwoe ripodegi, maloyo dweche mamoko e higa mar tijwa, kendo kwanno nyalo riwo nyaka ripode modeko ma ne ok oor e dwe motelo ne mano. Mano nyiso ni inyalo kwan jolendo moko nyadiriyo. Kata kamano, kwan ma malono ok oting’o kwan jolendo ma ne otiyo tij lendo to wigi ne owil chiwo ripot. Mano nyiso gimomiyo dwarore ahinya ni jalendo ka jalendo ochiw ripode chon e dwe ka dwe. “Jolendo duto” ochung’ne kar romb jolendo mopogore opogore ma nochiwo ripodegi mag lendo dwe ka dwe.

Seche duto. Kaluwore gi Kitabu cha Mwaka—2011, Joneno mag Jehova notiyo gi seche mokalo bilion 1.6 e tij lendo. Kata kamano, kwanno ok riw seche duto mwatiyogo e luwo weche mag lamo, nimar ok oriw seche mwatiyogo pile e tije kaka timo limbe mag kwath, dhi e chokruoge, koda e timo puonjruok marwa wawegi mar Muma kendo paro matut kuom gik mwapuonjore.

Pesa motigo. E higa mar tijwa mar 2010, Joneno mag Jehova notiyo gi pesa mokalo dola milion 155 e rito jopainia makende, jomisonari kod jorit malworo e migepegi mag lendo. Kata kamano, kwanno ok riw pesa duto ma watiyogo e goyo buge malero Muma; kendo bende ok oriw pesa mitiyogo e rito ji mokalo 20,000 ma chiwore tiyo e Bethel mag piny mangima.

Jocham makate kendo madho divai e Rapar. Mae en kwan mar jogo ma osebatisi ma chamo makate kendo madho divai e Rapar e piny mangima. Be inyalo wach ni kwanno ochung’ne kwan sie mar jogo duto mowal manie piny? Ok dwawach kamano. Nitie gik moko manyalo miyo jomoko opar e yo maok kare ni gin gi luong mar polo, gigo gin kaka din ma ne giluwo chon, kata tuoche mag parruok. Omiyo, onge kaka wanyalo ng’eyo kwan sie mar jogo mowal manie piny; to bende ok ochuno ni wang’egi. Bura Maduong’ ok ndik piny kwan mar jogo duto machamo makate kendo madho divai, nimar ok giketo chenro mar ng’eyo jogo duto mowal e piny mangima. *

Gima wang’eyo en ni nitie moko kuom jo mowal ma gin “jotich Nyasachwa” ma biro bedoe e piny e kinde ma masira maduong’ biro chakore. (Fwe. 7:1-3) Nyaka chop kindeno, Jokristo mowal biro dhi nyime telo e tich maduong’ ahinya ma inyiso e ripod tijwa higa ka higa—tich maduong’ie moloyo mar lendo kod puonjo.

[Weche moler piny]