‘Houru Jogo Duto Mayuak’
‘Houru Jogo Duto Mayuak’
“Jehova osewira gi mo . . . mondo aho jogo duto mayuagore.” —ISA. 61:1, 2.
1. Yesu notimo ang’o ne jogo mayuak, to ang’o momiyo notimo kamano?
YESU KRISTO nowacho niya: “Chiemba en timo dwaro mar Jal ma noora, kendo tieko tichne.” (Joh. 4:34) Sama ne ochopo migawone ma Nyasaye ne omiye, Yesu ne nyiso kido mabeyo miwuoro mag Wuon mare. Achiel kuom kidogo en hera maduong’ ma Jehova oherogo ji. (1 Joh. 4:7-10) Jaote Paulo nowuoyo kuom yo achiel ma Jehova nyisowago herano, kane oluongo Jehova ni, “Nyasach hoch duto.” (2 Kor. 1:3) Yesu nonyiso herano kane ochopo weche ma ne okor e bug Isaiah. (Som Isaiah 61:1, 2.) Kane en e sunagogi, Yesu nosomo weche mokorgo kendo nyiso kaka ne gichopo kuome owuon. (Luka 4:16-21) Kuom ndalo duto ma ne otiyo ne Nyasaye, Yesu nonyiso hera kuom hoyo jogo mayuak, kokelonegi jip kod kuwe e paro.
2, 3. Ang’o momiyo dwarore ni jolup Kristo oluw ranyisine kuom chiwo hoch?
2 Dwarore ni jolup Yesu duto oluw ranyisine kuom hoyo jogo mayuak. (1 Kor. 11:1) Paulo nowacho kama: “Horeuru ng’ato gi ng’ato, kendo tegreuru.” (1 Thes. 5:11) Dwarore ni wachiw hoch ne jomoko, to moloyo, nikech dhano sani nie “kinde mag chandruok.” (2 Tim. 3:1) E piny mangima, ng’eny jogo ma chunygi nikare romo gi jomoko matimo kata wachonegi gik makelo kuyo gi chuny lit.
3 Mana kaka weche ma ne okor ei Muma nyiso, e ndalo giko mar chenro marach mar pinyni, thoth ji gin “jo moherore giwegi, kendo jo mohero mwandu, jo ma wuorore, jong’ayi, kendo jojaro; jo ma ok winj jonywolgi, jo ma ok go erokamano, jo ma ok luor Nyasaye; jo ma ok ohero owetegi, jo ma jendeke, jojig wach, jo moowore, jo mager, jo ma ok ohero gik mabeyo; joandhoga, jorikni, josunga, kendo jo mohero mor mar piny moloyo hero Nyasaye.” Kido kaka mago sani koro onya moloyo kaka chon, nimar “ji maricho gi jo ma wuondore nomed bedo marach moloyo.”—2 Tim. 3:2-4, 13.
4. Gik matimore e piny osebedo nade e ndalowagi?
4 Mago gin gik maok onego okawwa gi wuoro nikech Wach Nyasaye nyiso maler ni ‘piny duto obedo e teko mar ng’a marachno.’ (1 Joh. 5:19) “Piny duto” oriwo riwruoge kaka mag siasa, din, kod ohala, kaachiel gi mago makeyo weche mag miriambo. Kuom adier, mano emomiyo iluongo Satan Jachien e yo mowinjore ni, “[jaloch] mar pinyni” kendo ni “nyasach pinyni.” (Joh. 14:30; 2 Kor. 4:4) Gik matimore e piny medo kethore moloyo nikech Satan sani nigi mirima maduong’, kong’eyo ni en mana gi ndalo matin kapok Jehova ogole. (Fwe. 12:12) Mano kaka en gima kelonwa hoch ng’eyo ni Nyasaye chiegni ahinya ketho Satan kod pinye marachni, kendo ni wach ma Satan ne odonjonego Jehova e wi ratiro mar loch, ibiro tieki!—Chak., sula 3; Ayub, sula 2.
Wach Maber Ilando e Piny Mangima
5. Ere kaka wach ma ne okor e wi tij lendo chopo e ndalo mag gikogi?
5 E kindegi ma ngima tekie ahinya moloyo, weche ma Yesu nokoro sani chopo. Nowacho kama: ‘Wach maberni mar pinyruoth nolandre e pinje duto, mondo obed ranyis ni ogendini duto; eka giko nobi.’ (Math. 24:14) Tij lando wach Pinyruodh Nyasaye mitimo e piny mangima, medo timore e okang’ malach ahinya. Sani, Joneno mag Jehova mokalo milion 7,500,000, man e kanyakla mokalo 107,000 e piny mangima, lando wach Pinyruodh Nyasaye, mana kaka Yesu bende ne olando kendo puonjo wachno. (Math. 4:17) Kokalo kuom tijwa mar lendono, wakelo hoch maduong’ ne jogo mayuak. Parie ni e higini ariyo mokalo machiegni, ji ma kwan-gi romo 570,601 ne obatisi mi gibedo Joneno mag Jehova!
6. Tij lendo timore e okang’ marom nade?
6 Mondo wamed ng’eyo okang’ mitimogo tij lendo, ber ng’eyo ni sani Joneno mag Jehova loko kendo goyo buge mag Muma e dhok mokalo 500. Mano en gima pok otimorega nyaka nene e ngima dhano! Bedoe mar bad-riwruok mar oganda Nyasaye me piny, tich motiyo, koda dongruok mosetimo, en gimiwuoro ahinya. Dine bed ni roho mare maler mar Nyasaye ok ta ogandane kendo chiwo kony, mago duto dine ok onyalre e piny ma Satan chiko. Nikech wach maber ilando e piny mangima, sani hoch moa e Ndiko ok chop mana ne Jokristo wetewa kende, to bende ne jogo mayuak, ma rwako wach Pinyruoth.
Chiwo Hoch ne Jokristo Wetewa
7. (a) Ang’o momiyo ok wanyal geno ni Jehova biro golo gigo duto makelonwa kuyo sani? (b) Ere kaka wanyalo ng’eyo ni nano e bwo sand koda masiche en gima nyalore?
7 E piny masani mopong’ gi richo kod chandruok, onge kiawa ni wabiro romo gi gik makelonwa kuyo. Ok wanyal geno ni Nyasaye biro golonwa gigo duto makelo kuyo, nyaka chop kinde ma obiro ketho chenro marach mar pinyni. Kata kamano, gie sani, e bwo sand ma ne okor, dwarore wanyis kabe wabiro siko kaka jogo mariwo lwedo loch mar Jehova e wi gik moko duto. (2 Tim. 3:12) Kata kamano, kokalo kuom kony kod hoch ma Wuonwa me polo chiwo, wanyalo bedo kaka Jokristo mowal ma nodak e Thessalonika machon, ma ne okalo e bwo sand gi masiche ka ginano, kendo gi yie.—Som 2 Jo Thessalonika 1:3-5.
8. Ndiko nyiso nade ni Jehova chiwo hoch ne joge?
8 Onge kiawa ni Jehova chiwo hoch madwarore ne jotichne. Kuom ranyisi, kane Jezebel chi ruoth dwaro nego janabi Elija, ne obedo maluor mi noringo, kendo janabino nowacho kata ni nodwaro tho. Kata kamano, kar kwero Elija, Jehova ne ohoye kendo miye chir mar dhi nyime gi tichne kaka janabi. (1 Ruo. 19:1-21) Gik ma ne otimore e kanyakla mokwongo mar Jokristo konyowa ng’eyo ni kuom adier, Jehova chiwo hoch ne joge. Kuom ranyisi, wasomo ni nitiere kinde ma ‘kanisa me piny Judea duto, gi Galili, gi Samaria, koro nokue, kendo ne dongo.’ E wi mano, ‘kanisa ne odhi nyime koluoro Ruoth kendo, kuom hoch mar roho maler, nomedore.’ (Tich 9:31) Mano kaka wamor ni wan bende wan gi ‘hoch mar roho maler’!
9. Ang’o momiyo puonjruok e wi Yesu nyalo miyowa hoch?
9 Kaka Jokristo, waseyudo hoch kuom ng’eyo Yesu Kristo kendo kuom luwo ndache. Yesu nowacho kama: “Biuru ira, un duto mujony kendo mugangoru mapek, to anamiu yueyo. Rwakuru lota kuomu, kendo puonjreuru kuoma, nikech amuol, kendo adembora e chuny, to unubed gi kuwe e chunyu. Nikech lota yom, kendo ting’na yot.” (Math. 11:28-30) Ng’eyo kaka Yesu ne timo ne ji e yo majiwogi, kendo luwo ranyisine maber, konyowa ahinya e dwoko chien kuyo manyalo bedo ni wan-go.
10, 11. Ei kanyakla, gin jomage manyalo chiwo hoch?
10 Jokristo wetewa bende nyalo hoyowa. Kuom ranyisi, non ane kaka jodong-kanyakla konyo jogo ma nigi kuyo. Jakobo nondiko kama: “Ng’ato kuomu tuo koso? Mondo oluong jodong kanisa, to gin mondo gilamne.” Mano biro konyo nade? “Lemo mar yie nores jatuo, mi Ruoth nomiye a malo; kendo ka nosetimo richo, nowene.” (Jak. 5:14, 15) Jomamoko ei kanyakla bende nyalo chiwo hoch.
11 Kinde mang’eny, mon yudo ka yotnegi nyiso mon wetegi chandruoge ma gin-go. To moloyo, nyiminewa madongo nyalo miyo nyimine matindo puonj mabeyo. Nyalo bedo ni mon ma Jokristo motegno kamano, osekalo e chal ma kamago e ngimagi giwegi. Kido ma gin-go mar kech kaka mine, nyalo konyo ahinya. (Som Tito 2:3-5.) En adier ni jodongo kod jomamoko nyalo, kendo onego ‘giduog chuny jo ma luor’ me kindwa. (1 Thes. 5:14, 15) Bende, ber ng’eyo ni Nyasaye hoyowa “e masiche duto, mondo, kuom hoch ma Nyasaye hoyowago, wan bende wanyal hoyo jogo ma neno masira moro.”—2 Kor. 1:4.
12. Ang’o momiyo dwarore ni wadhi e chokruoge mag Jokristo?
12 Yo achiel maduong’ mwayudogo hoch en kuom bedo e chokruoge Jokristo, kama ijiwowae gi weche mag Muma. Wasomo ni Juda kod Sila “ne gijiwo owete gi weche mang’eny, momiyogi teko.” (Tich 15:32) Kapok chokruok ochakore koda bang’e, wabedo gi mbaka majiwo e kind jokanyo mag kanyakla. Omiyo, kata kapo ni wan e chandruok moro, kik wapogore kar kendwa wawegi, nikech timo kamano ok bi konyo. (Nge. 18:1) Kar mano, ber luwo weche ma jaote Paulo nondiko niya: “Ng’ato ka ng’ato opar owadgi mondo wami hera gi timbe mabeyo omedre. Kik waweuru chokruokwa kaachiel, kaka jo moko timo, to wajiwreuru ng’ato gi ng’ato, moloyo to ka koro uneno ni Chieng’no sudo machiegni.”—Hib. 10:24, 25.
Yud Hoch Kuom Wach Nyasaye
13, 14. Nyis ane kaka Ndiko nyalo hoyowa.
13 Kata bed ni wan Jokristo mosebatisi kata ka eka wachako puonjore e wi Nyasaye koda dwaro mage, wanyalo yudo hoch maduong’ ei Wach Nyasaye ma en Muma. Paulo nondiko kama: “Weche duto, ma nondik chon, nondikgi mondo wapuonjrego, mondo kuom kinda, kendo kuom hoch mar ndikogo wabedie gi geno.” (Rumi 15:4) Ndiko Maler nyalo miyowa hoch kendo miyo wabed ‘molony, kendo moikore chuth ni tich mabeyo duto.’ (2 Tim. 3:16, 17) Kuom adier, ng’eyo adiera e wi dwaro mag Nyasaye kendo bedo gi geno madier kuom kinde mabiro, miyowa hoch maduong’. Kuom mano, weuru mondo wakonyre chuth gi Wach Nyasaye koda buge malero Muma manyalo miyowa hoch kendo konyowa e yore mang’eny.
14 Yesu noketonwa ranyisi maber kuom tiyo gi Ndiko e puonjo kendo hoyo jomoko. Kuom ranyisi, chieng’ moro bang’ chierne, ne ‘oelo Ndiko’ ne jopuonjrene moko ariyo. Sama ne owuoyo kodgi, chunygi nobedo mamor ahinya. (Luka 24:32) Koluwo ranyisi maber ahinya ma Yesu noketo, jaote Paulo ‘nogoyo gi ji mbaka kuom weche manie Ndiko.’ E Beria, jowinjone ‘norwako wach ka chunygi oikore chutho, ka ginono weche manie Ndiko pile.’ (Tich 17:2, 10, 11) Mano kaka dwarore ahinya ni wasom Muma pile, ka wayudo kony kuome koda e buge mag Jokristo, molos mondo omiwa hoch kod geno e kindegi mag chandruok!
Yore Mamoko mag Hoyo Jomoko
15, 16. Moko kuom gik mwanyalo timo e konyo kendo hoyo Jokristo wetewa gin mage?
15 Wanyalo konyo kendo hoyo Jokristo wetewa e yore mopogore opogore. Kuom ranyisi, wanyalo dhi e duka ne Jakristo wadwa moti kata matuwo. Wanyalo konyo jomoko e tijegi mag pacho, ka wanyisogo ni wadewogi. (Fili. 2:4) Bende wanyalo jiwo kido mabeyo ma jolemo wetewa nigo, kaka heragi, kindagi, chir, kod yie.
16 E yor hoyo joma oseti, wanyalo limogi, chiko itwa ne weche ma giwachonwa e wi gik ma giseneno, koda gweth ma nenre ayanga ma giseyudo e tij Jehova. Kuom adier, wan bende mano nyalo jiwowa kendo hoyowa! Wanyalo somo Muma kata buge malero Muma kaachiel gi jogo ma walimo. Wanyalo nono achiel kuom sula mag Puonjruok mitimo juma ka juma e Ohinga mar Jarito, kata weche mibiro non e Puonjruok Muma e Kanyakla e jumano. Wanyalo neno kodgi DVD mawuoyo e wi Ndiko. Bende, wanyalo somo kata wuoyo kuom weche mosene mayudore e bugewa.
17, 18. Kaka jotich Jehova momakore kode, ang’o momiyo wanyalo bedo gadier ni obiro konyowa kendo hoyowa?
17 Kapo ni wafwenyo ni ng’at moro ma walamo godo Jehova dwaro hoch, wanyalo hulo nyinge e lamo ma marwa wawegi. (Rumi 15:30; Kol. 4:12) Sama wan wawegi wanyagore gi chandruoge mag ngima kendo timo kinda mar hoyo jomoko, wanyalo bedo gi yie kod adier kaka jandik-zaburi ma nondiko niya: “Ket ting’ mari kuom Jehova, mi nopidhi; ok noyie jo matir oyiengini nyaka chieng’.” (Zab. 55:22) Kuom adier, kinde duto Jehova biro hoyo kendo konyowa kaka jotichne momakore kode.
18 Nyasaye nowacho ne joma ne lame e ndalo machon niya: “An, mana An, e en mahoyou.” (Isa. 51:12) Jehova biro timonwa kamano wan bende kendo obiro gwedho timbe koda wechewa mabeyo sama wahoyo jogo mayuagore. Kata bed ni genowa en mar dhi e polo kata dak e piny, ng’ato ka ng’ato kuomwa nyalo yudo hoch kuom weche ma Paulo nondiko ne Jokristo wetene ma ne owal kuom roho niya: “Ruodhwa Yesu Kristo owuon, gi Nyasaye Wuonwa, moseherowa kendo osemiyowa jip mochwere kod geno maber kuom ng’wono, ojiw chunyu, kendo otegu e tim mabeyo duto, gi weche mabeyo duto.”—2 Thes. 2:16, 17.
Be Iparo?
• Tijwa mar hoyo jogo mayuak timre e okang’ maromo nade?
• Moko kuom gik mwanyalo timo e hoyo jomoko gin mage?
• Ndiko nyiso nade ni Jehova hoyo joge?
[Penjo mag Puonjruok]
[Picha manie ite mar 28]
Be ihoyo jogo mayuak?
[Picha manie ite mar 30]
Jomatindo gi jomadongo, giduto ginyalo chiwo jip
