Penjo Moa Kuom Josombwa

En ang’o monego atim, sama an gi penjo moro e wi gimoro ma asomo ei Muma, kata sama adwaro paro manyalo konya e wi chandruok moro ma an-go e ngimana?

Ngeche 2:1-5 jiwo ng’ato ka ng’ato kuomwa mondo osik ‘kodwaro’ rieko kendo bedo joma weche donjonegi, kwatimo kamano gi kinda mana ka gima wamanyo “mwandu mopand.” Mano nyiso ni onego watim kinda ahinya e timo nonro mondo wayud dwoko e wi penjo ma wan-go mag Muma, koda kaka wanyalo loyo chandruoge ma wan-go. Wanyalo timo kamano nade?

Bug Faidika na Elimu ya Shule ya Huduma ya Kitheokrasi, ite mag 33 nyaka 38, wuoyo kuom “Kaka Inyalo Timo Nonro” ka itiyo gi buge mochiw gi “jatichno mogen, kendo mariek.” (Math. 24:45) Ite mar 36 lero kaka ng’ato nyalo konyore gi Fahirisi, kendo e iye ochanie wi wach kaachiel gi ndiko. Mano konyo ng’ato manyo wi wach kata ndiko moro mar Muma, kendo e bwogi, ochanie buge ma ng’ato nyalo dhiye. Tim sinani e manyo dwoko mar penjo moro kata paro midwaro. Ng’e ni, sama itimo kamano, imanyo “mwandu mopand,” to timo kamano jakawo kinde.

En adier ni nitie weche koda ndiko moko ma bugewa pok owuoyo kuomgi. To kata bed ni bugewa osewuoyo kuom moko kuom ndikogo mag Muma, nyalo bedo ni penjo ma in-go ok osenon e yo matut. Bende, nitie weche moko ei Muma mamedo kelo penjo nikech Ndiko ok oting’o weche moko duto madwarore e lero tiendgi. Omiyo, ok wanyal yudo dwoko moriere e wi penjo duto mwanyalo bedogo. Ka en kamano, ok onego wachuog paro magwa wawegi e wi penjo moro ma dwoko mare ok nyal yudore, nimar timo kamano biro miyo wadonj mana e ‘mbaka maok mi ji ng’eyo chenro mar Nyasaye man kuom yie.’ (1 Tim. 1:4; 2 Tim. 2:23; Tito 3:9) Ofis matin mar Joneno mag Jehova kata maduong’ mar piny mangima ok nyal nono kendo chiwo dwoko e wi penjo duto ma bugewa pok owuoyo e wigi. Wanyalo bedo gadier ni Muma chiwo weche moromo madwarore e tayowa e ngima, to bende ok oelo weche moko mondo omi wabed gi thuolo mar nyiso yie motegno kuom Wuon-go, ma en Nyasaye.—Ne ite mag 185 nyaka 187 e bug Mkaribie Yehova.

To nade ka isetimo duto minyalo e timo nonro kuom wach moro machandi e ngimani to podi ok iyudo paro manyalo konyi? Bed thuolo mar dhi ir Jakristo wadu motegno e yie, onyalo bedo achiel kuom jodongo mag kanyaklau. Gin gi lony e wi Muma kaachiel gi weche mag ngima Jokristo. Kony ma gibiro chiwo e yo mowinjore, nyalo konyi ahinya kapo ni idwaro paro e wi chandruok moro, nimar gin ging’eyi moloyo kendo gin machiegni kodi. Kendo kik wiyi wil lamo Jehova kinyise ratiro wach machando chunyi, kendo kwaye mondo ochik paroni kokalo kuom roho mare maler, ‘nimar Jehova chiwo rieko kendo omiyo ji weche donjonegi.’—Nge. 2:6; Luka 11:13.