Waduto Wamoruru Kaachiel!

MOR gi ilo gin gik mamedo bedo matek ne ji yudo. Kuom ji mang’eny, bedo gi kinde mabeyo mag goyo mbaka majiwo jomoko chalo ka gima ok nyalrenegi chuth. Ngima mandalogi, to moloyo e taonde madongo, miyo ji dwaro timo gik moko ka gin kendgi, ka gipogore gi jowetegi.

Profesa miluongo ni Alberto Oliverio wacho niya, “Ngima ma ng’ato dak mana kende en gima pile, kendo onge kiawa ni kuonde ma udi ng’enyie jiwo ngima ma kamano. Kinde mang’eny, mano miyo ok wadew ngima jomoko, kaka jatich wadwa, jirandwa, kata jaduka machiegni kodwa.” Pile ngima mar bedo kendwa wawegi jakelo tuwo mar parruok.

Kata kamano, chal mar Jokristo wetewa to opogore, koda chuny ma gin-go. Jaote Paulo nondiko kama: “Moruru pile.” (1 Thes. 5:16) Nitie gik mang’eny monego omi wabed moil kendo mamor kaachiel. Walamo Jehova, Nyasaye Mamalo Chuth; wang’eyo tiend  adiera manie Muma; wageno yudo warruok koda ngima mochwere; kendo wanyalo konyo joma moko yudo gweth ma kamago.—Zab. 106:4, 5; Yer. 15:16; Rumi 12:12.

Bedo moil kendo mamor kaachiel gi jomoko gin kido mifwenyogo Jakristo madier. Omiyo ok kawwa gi wuoro ni Paulo nondiko ne Jo-Filipi niya: “Amor. Kamano un bende beduru mamor; kendo waduto wamoruru kaachiel.” (Fili. 2:17, 18) Kae, Paulo wacho ni beduru mamor, kendo moruru kaachiel ng’ato gi nyawadgi.

En adier ni, Jokristo onego obed motang’ mondo kik gidonj e tim mar hero bedo kendgi. Ng’at maok ohero riwore gi ji ok nyal bedo mamor kaachiel gi Jokristo wetene. Omiyo, ere kaka wanyalo luwo jip mar Paulo ni, ‘wamoruru kuom Ruoth’ gi owetewa?—Fili. 3:1.

Wamoruru Kaachiel gi Jokristo Wetewa

Kane Paulo ondiko barupe ne Jo-Filipi, nyalo bedo ni ne en e twech Rumi, nikech tije mar lendo. (Fili. 1:7; 4:22) Kata kamano, bedo e twech ne ok omiyo olalo ilone mar lendo. Mopogore gi mano, ne omor tiyo ne Jehova gi tekone duto kendo mondo oole kaka ‘gimiolo e wi misango.’ (Fili. 2:17) Chuny ma Paulo ne nigo nyiso ni mor ok otenore kuom chal ma ng’ato nitiere. Kata obedo ni ne en e twech, nowacho niya: “Kendo nabed mamor.”—Fili. 1:18.

Paulo ema ne ochako kanyakla mar Filipi, omiyo ne en gi hera makende ne owete ma kuno. Ne ong’eyo ni ndiko ne Jokristo wetene e wi mor ma ne oyudo kuom tiyo ne Jehova ne dhi jiwogi gin bende. Omiyo, nondiko kama: “Owetena, adwaro mondo ung’e ni gik ma notimorena osemiyo Wach Maber omedo landore, nikech askeche ruoth duto, kod jo moko duto, ong’eyo ratiro ni an e tuech nikech aluwo Kristo.” (Fili. 1:12, 13) Yo achiel ma Paulo ne onyisogo ni ne oil kendo mor kaachiel gi owetene, ne en kuom oronegi weche majiwo chuny. Nyaka bed ni Jo-Filipi bende ne omor kaachiel gi Paulo. Kata kamano, timo kamano ne dwaro ni kik gibed gi chuny monyosre nikech gik ma ne timore ne Paulo. Mopogore gi mano, ne dwarore ni giluw ranyisine. (Fili. 1:14; 3:17) E wi mano, Jo-Filipi ne nyalo dhi nyime lamo ne Paulo, kendo konye e yo moro amora ma ne ginyalo.—Fili. 1:19; 4:14-16.

Be wabende wan gi chuny moil kaka Paulo? Be watemo neno ber kuom chal matek  ma wantiere e ngima, koda e tijwa mar Jokristo? Seche ma wan kaachiel gi owetewa, ber ka wanyiso ni wamor gi tijwa mar lendo. Ok onego warit nyaka sama gimoro mamiyo wahum otimore, eka mondo watim kamano. Nyalo bedo ni ne wamiyo ng’ato owinjo wach Pinyruoth nikech yo molony ma ne watiyogo e chako wuoyo kode. Nyalo bedo ni ne wabedo gi mbaka maber gi wuon ot e wi ndiko moro mar Muma. Kata nyalo bedo ni jomoko ne ofwenyowa kaka Joneno mag Jehova, kendo mano ne ochiwo neno maber e alworano. Wuoyo gi jomoko kuom weche kaka mago en yo mwanyalo morgo kaachiel kodgi.

Thoth oganda Jehova osechiwore kendo pod gimedo timo kamano mondo gitim tij lendo. Jopainia, jorit malworo, jo Bethel, jomisonari, kod jokony tije gedo e pinje mopogore opogore, tiyo matek kuom thuologi duto kendo giyil timo kamano. Donge wabende wamor kendo wail kaachiel kodgi? Omiyo, weuru wanyis chuny mar erokamano ne jowetewago “ma watiyogo ni pinyruodh Nyasaye.” (Kol. 4:11) Sama wan kanyachiel kodgi e chokruoge mag kanyakla, kata e chokruoge mag alwora mag Jokristo, wanyalo jiwogi gi mor. Bende, wanyalo bedo gi kinda kaka margi. Kendo wanyalo loso “kinde” mar gwelogi mondo wawinj sigandgi majiwo, kendo bedo gi gago moro matin.—Fili. 4:10.

Moruru Kaachiel gi Jogo Mayudo Tembe Mayoreyore

Nano e bwo sand koda loyo tembe ne okonyo Paulo siko kochung’ motegno e nyim Jehova. (Kol. 1:24; Jak. 1:2, 3) Ng’eyo ni owete ma ne ni Filipi ne nyalo romo gi tembe kaka ma ne oromogo, kendo ni ne ginyalo yudo jip kuom chuny mar nano ma ne en-go, ne omiyo obedo moil kendo mor kaachiel kodgi. Omiyo, nondiko kama: “Ok omiu yie kuom Kristo kende, to neno masira bende nikech en. Lweny moyudou en mana lwenyno ma nunena kakedoe, kendo ma koro uwinjo ni pod akedoe.”—Fili. 1:29, 30.

E ndalogi bende, ikwedo Jokristo nikech tijgi mar lendo. Seche moko akwedego nyalo ting’o gero, kata kamano kinde mang’eny gibiro e yo maok yot fwenyo. Ginyalo bedo weche ma miriambo ma jogo mong’anjo moweyo adiera donjonwago, akwede moa kuom joodwa, jaro moa kuom jotich kata joskul wetewa. Yesu ne owacho ni tembego ok onego omi wawuor, kata nyoso chunywa. Kar mano, gin gik monego omi wabed mamor. Nowacho kama: “Mano mor manadi ka ji yanyou, kendo sandou, ka giwacho weche maricho duto mag miriambo kuomu nikech an. Moruru, kendo iluru, nikech pok maru duong’ e polo.”—Math. 5:11, 12.

Ok onego wabed maluor kata buok sama wawinjo ni owetewa yudo sand mager e pinje moko. Kar mano, onego wabed mamor nikech ginano. Wanyalo lemonegi ka wakwayo Jehova mondo omigi teko mar nano kendo chung’ motegno e yie. (Fili. 1:3, 4) Kata obedo ni nitie gik maok wanyal timo ne owetewago, podi wanyalo konyo jogo manie kanyaklawa mayudo tembe. Wanyalo nyiso ni wadewogi kendo konyogi. Wanyalo manyo thuolo mar bedo mamor kaachiel kodgi kuom gwelogi e Lamo mar Joot kinde ka kinde, dhi e tij lendo kaachiel kodgi, koda bedo gi kinde mag yueyo kaachiel kodgi.

Wan gi gik mang’eny monego omi wamor kaachiel! Wakweduru chuny monya e piny mar bedo joma ohero bedo kendgi, kendo wadhi nyime bedo mamor kaachiel gi owetewa. Kuom timo kamano, ok wabi mana jiwo hera kod winjruok ei kanyakla kende, to bende wabiro mor chuth kuom bedo e riwruok mar owete ma Jokristo duto. (Fili. 2:1, 2) Ee, Paulo jiwowa niya: “Moruru pile kuom Ruoth; kendo amedo wacho ni, moruru.”—Fili. 4:4.

[Picha mar En mar e ite mar 6]

Globe: Courtesy of Replogle Globes