“Sani Ang’ol to Ok Nyaka Chieng’!”

Kaka iwachonwa gi Sara van der MOnde

Kinde mang’eny ji hinyo wachona kama, “Sara, wang’i opong’ gi mor maber. Ang’o momiyo kinde duto imor kamano?” Ajanyisogi ni an gi geno makende. Genono yudore e wechegi, “Sani ang’ol to ok nyaka chieng’!”

NE ONYUOLA higa 1974 e dala mar Paris, piny Faransa. Chandruok ne obedoe e nyuolna, kendo bang’e ne ofweny ni ne an gi tuwo mar obwongo miluongo ni cerebral palsy. Tiendena gi bedena ne otho matin, kendo ne ok awuo e yo mawinjore maber. Bende ne abedo gi tuwo mar ndulme kendo midekre mamoko ne maka mayot ahinya.

Kane an jahigini 2, joodwa ne odhi dak e dala mar Melbourne, piny Australia. Higini ariyo bang’e, Wuora noweyowa chuth an gi Minwa. Mano e kinde ma ne achakoe winjo ka an machiegni gi Nyasaye. Minwa ma ne en achiel kuom Joneno mag Jehova, ne jatera e chokruoge mag Jokristo pile, kama ne apuonjorae ni Nyasaye ne ohera kendo ne orita. Ng’eyo ma kamano kaachiel gi hera kod jip mar Minwa, ne okonya winjo ka chunya okuwe, kata obedo ni chalwa ne oselokore.

Minwa bende ne opuonja wuoyo gi Jehova e lamo. Kuom adier, aseyudo ka yotna ahinya lemo, moloyo goyo mbaka. Sama alemo, ok achandra gi wuoyo ka ahulo weche, kata kamano, ei chunya wechego winjorena e yo maler. To nikech wechena ok winjre maler, en gima jiwo chunya ahinya ng’eyo ni Jehova to winjo tiend gik moko duto, bed ni awachogi ei chunya, kata e yo maok winjre maler.—Zab. 65:2.

Nano e Bwo Chandruoge

Kane an jahigini abich, tuwona mar palsy ne omedore nyaka nochopo kama ne dwarore ni ati gi chumbe masirorago e wuoth. Kata obedo ni ne an gi chumbego, podi ne ok anyal wuotho maber! Kane achopo higini 11, koro ne ok anyal kata mana wuotho. Bang’e, ne ok anyal wuok e kitanda ka ok akonyora gi masin mar sitima ma ne ting’a ka keta e kom gari moro ma nigi injin, ma ne konya wuotho.

Anyalo wacho ni nitie kinde ma chunya janyosre ahinya nikech midekre ma an-go. Kata kamano, ajaparo wach ma ne waseng’ado kaka joot: “Kik chunyi chandre nikech gik maok inyal timo. Dhi nyime mana gi gigo ma inyalo timo.” Parono osekonya timo gik moko kaka riembo faras, kwang’o yie, kata mana riembo mtoka e pap moro! Ahero goro, kendo loso gik mitwang’o, gi mamoko.

Bedo ni an gi ng’ol marach, mano osemiyo jomoko wuoro kabe pacha long’o chuth ma anyalo lamo Nyasaye kaka ng’at maduong’ man gi riekone duto. Kane an gi higini 18,  japuonjwa mar skul ne onyisa mondo awera gi din mar minwa. Ne oikore kata mana konya yudo kar dak machielo. Kata kamano, ne anyise ni ne ok anyal jwang’o yiena kendo ne ok anyal wuok e pacho, to mak mana bang’ ka asetimo ikruok moromo mar dak kenda.

Kinde matin bang’ wuoyo gi japuonjno, ne obatisa mi abedo achiel kuom Joneno mag Jehova. Higini ariyo bang’e, ne adhi dak e ot moro matin. Kaendi, adakie mamor nikech ayudo kony ma adwaro, to bende an thuolo kaka ne adwaro.

Kwayo Moro Mane Obwoga

Kuom higini, aseromo gi gik mamoko mosetemo yiena. Chieng’ moro, ne abuok kane japuonjre wadwa e skul—ma bende ne ong’ol—nokwaya ni wakendre kode. Sama wachno ne odonjo e ita, chunya ne owinjo maber. Mana kaka nyiri mang’eny marowere, an bende agombo bedo gi jaot. Kata kamano, bedo ni ji ariyo chalre nikech giduto ging’ol, ok ema biro miyo kend margi obed gi mor. E wi mano, rawera ma dichwono ne ok en Janeno. Puonj mwaluwo, gik mwatimo, koda chenrowa mag kinde mabiro, ne opogore chuth. Omiyo, ere kaka ne wanyalo dak e ngima kanyachiel? Bende, ne aseng’ado mar luwo chik Nyasaye monyis ayanga mar donjo e kend mana gi ng’at ma wan-go e yie achiel. (1 Kor. 7:39) Kuom mano, ne anyiso rawerano ni ne ok ayie gi kwayono.

Kata mana nyaka sani, ang’eyo ni ne ang’ado gimakare. Kendo aonge kiawa moro amora e pacha ni abiro bedo mamor e piny manyien ma Nyasaye osingo. (Zab. 145:16; 2 Pet. 3:13) Gie sani, ang’ado mar dong’ ka achung’ motegno gi Jehova, kendo ayie gi chalna masani.

Arito ahinya odiechieng’no ma abiro chikora wuok e kom gari masani amokoeni, kendo ringo ka an thuolo. Eka anakog matek niya, “Ne ang’ol, to sani, an gi del mangima—nyaka chieng’!”