Be Inyalo Paro?

Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

• Ng’ano mowinjore opuonj nyithindo e wi Nyasaye?

Kata obedo ni jomoko nyalo konyo wuoro kata miyo, jonyuol ema nigi ting’ maduong’ mar puonjo nyithindgi e wi Nyasaye koda kaka Nyasaye dwaro ni ngima joot obedi.—10/1, ite mar 7.

• Nyasaye ne dwaro nyiso ang’o kane owachone Jo-Lawi: “An e migapi”?

Dhoot ka dhoot mar Israel noyudo pok mar lowo, kata kamano, Jehova ema nobedo ‘migap’ Jo-Lawi. (Kwan 18:20) Ne ok gidhi yudo girkeni mar lowo, nimar ne omigi migawo makende mar tiyo ne Jehova. Kuom mano, Jehova ne dhi chiwonegi gik ringruok mapile. Ndalogi, jogo ma nigi migawo mar lando wach Pinyruoth nyalo bedo gadier ni dwaro mochuno mag ngima ibiro chiwnegi.—9/15, ite mag 7-8, 13.

• Ang’o momiyo dwarore ahinya ni itim ne jaodi gik moko e yo manyiso luor?

Nyiso luor en achiel kuom gik mamiyo kend siko kendo bedo gi mor. Nyiso luor kelo chuny mokuwe e ngima mar kend. En kido madwarore ahinya ni joma nie kend onyag.—10/1, ite mar 12.

• Ang’o manyalo konyo Jakristo ng’eyo kabe yo moro moyiero mar manyo mor kod yueyo en makonyo kata ok kony?

E yango kabe yo moro en makonyo kendo maber e wang’ Nyasaye, ber ka wapenjore kama: Yorego oriwo gik mage? Gin kinde mage mwaluwogi? Gin jomage mwaluwogo yorego?—10/15, ite mag 9-12.

• Be en gima dwarore ni ochul osuru?

Kane openje kabe en gima kare e wang’ Nyasaye mondo ji ochul osuru ne sirkal mar Rumi, Yesu nodwoko niya: “Miuru Kaisar gi Kaisar, kendo gi Nyasaye miuru Nyasaye.” (Mari. 12:13-17) Sirkande—ma ema iluongo ni “Kaisar”—ema goyo pesa kendo gin ema gichiko nengo ma pesa nigo. Bende, nitie tije mang’eny ma gitimo ne jopinygi. Omiyo, e wang’ Nyasaye gin gi ratiro mar kwayo ni oduoknegi pesago e yor osuru.—10/1, ite mar 14, 15.

• Ere kaka weche manie Ngeche 7:6-23 nyalo konyowa kwedo tim mar ng’iyo ponografi?

Siganano wuoyo kuom rawera moro mawuotho kama ong’ere ni dhako moro ma jachode odakie. Osero wuowino. Ndalogi, ber kik wadhi e kuonde moyang e Intanet moting’o piche mochido, kendo dwarore ahinya ni wamany kony kuom Nyasaye kapok waromo gi piche ma kamago e Intanet.—11/15, ite mag 9-10.

• Ere kaka inyalo fwenyo din madier?

Joma lamo Nyasaye madier kawo Muma kaka Wach Nyasaye. Gimiyo nying Nyasaye, ma en Jehova luor, kendo gilando Pinyruodh Nyasaye. Ok gin mag piny marachni, kendo giherore e yo makende.—10/1, ite mar 16, 17.

• Be Nyasaye ohero oganda moro moloyo machielo?

Ooyo, ok en kamano. Muma wacho maler niya: “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.”—Tich 10:34, 35. 10/1, ite mar 26.