Roho mar Nyasaye ne Tayo Joge e Kinde Yesu, Koda e Ndalogi

‘Magi duto gin tich mar roho achielno.’—1 KOR. 12:11.

1. Gin weche mage mwabiro nono e sulani?

PENTEKOST en nying’ maparonwa weche moko mabeyo. (Tich 2:1-4) E odiechieng’no, ne ool roho maler kuom jopuonjre, kendo mano nokelo lokruok maduong’ kuom kaka Nyasaye koro ne tiyo gi jotichne. E sula motelo, ne wanono yore moko ma roho mar Nyasaye nokonyogo jotichne machon ma ne ochung’ motegno, e chopo migepe madongo. Kata kamano, pogruok en mane e kind yo ma roho mar Nyasaye ne tiyogo ka kinde Jokristo podi, koda kaka notiyo e kinde Jokristo mokwongo? To ere kaka roho maler mar Nyasaye konyo Jokristo e ndalogi? Weuru wanon ane.

“An Jatich Ruoth”

2. Ere kaka Mariam noseneno kaka roho maler tiyo?

² Mariam bende ne ni e ot mamalo e Jerusalem kane ool kuom jopuonjre roho maler  ma ne osingi. (Tich 1:13, 14) Kata kamano, kuom higini mokalo 30 kane mano pok otimore, noseneno kaka roho mar Jehova tiyo e yore madongo. Noyudo Jehova osedaro ngima Wuode a e polo nyaka e piny, komiyo Mariam mako ich, to ne pok onindo gi dichwo. Ich ma ne omakono ne en ‘kuom roho maler.’—Math. 1:20.

3, 4. Mariam nonyiso chuny mane, to ere kaka wanyalo luwo ranyisine?

³ Ang’o momiyo ne omi Mariam gweth makende kamano? Bang’ kane malaika oselerone dwaro mar Jehova kuome, Mariam nokok niya: “An jatich Ruoth; ber mondo otimrena kaka iwacho.” (Luka 1:38) Kuom wacho wechego, Mariam nonyiso ayanga chuny maber ma ne en-go, ma Nyasaye noseneno. Dwokone ma kanyo gi kanyo, nyiso ni ne oikore timo dwaro mar Nyasaye kuom wachno. Ne ok openjo ni to jogweng’gi ne dhi neno nade ich ma ne odhi bedogo, kata ni osiep mar kisera ma ne nie kinde gi Josef ne dhi bedo nade. Kuom luongore owuon ni jatich, Mariam nonyiso ni ne ogeno chutho kuom Jehova kaka Ruodhe.

⁴ Be seche moko iseyudo ka chopo ting’ moko e tij Nyasaye loyi? Ber ka ng’ato ka ng’ato kuomwa openjre niya: ‘Be aketo genona chutho kuom Jehova ni obiro konya kaluwore gi dwaro mare? Be kuom adier anyiso chuny moikore chopo ting’ madwarore?’ Bed gadier ni Nyasaye chiwo rohone ne jogo mageno kuome gi chunygi duto, kendo mariwo lwedo dwarone.—Tich 5:32.

Roho Maler Nokonyo Petro

5. Petro noyudo oseneno kaka roho maler tiyo e yore mage ka Pentekost mar 33 E.N. ne podi?

⁵ Mana kaka Mariam, jaote Petro bende noseneno kaka roho maler mar Nyasaye tiyo kane odiechieng Pentekost 33 E Ndalowa (E.N.) pok ochopo. Noyudo Yesu osemiye teko mar golo jochiende, en kaachiel gi joote mamoko. (Mari. 3:14-16) Omiyo, kata obedo ni Ndiko ok chiw weche duto, nenore ni jaote Petro notiyo gi tekono. Teko mar Nyasaye bende nonenore kane Yesu ogwelo Petro mondo owuoth kochomo ire e wi Nam Galili, mi Petro notimo kamano. (Som Mathayo 14:25-29.) Kuom adier, Petro nogeno kuom roho maler mondo okonye timo tich madongo. Kata kamano, kinde ne dhi luwo ma roho ne dhi tiyo kuom Petro koda jopuonjre wetene e yore moko manyien.

6. Kokalo kuom roho mar Nyasaye, Petro nobedo gi teko mar timo ang’o kane Pentekost 33 E.N. podi, koda bang’e?

⁶ E Sawo mar Pentekost 33 E.N., ne omi Petro kod jomamoko nyalo mar wuoyo e dhok mopogore opogore mag welo ma ne obiro Jerusalem. Bang’ mano, Petro nogolo twak ne oganda ma ne ochokore. (Tich 2:14-36) Ee, jal ma kinde moko ne luor, nobedo gi chir mar lendo e bwo akwede kod sand. (Tich 4:18-20, 31) Nobedo gi ng’eyo kokalo kuom teko mar Nyasaye. (Tich 5:8, 9) Bende, ne omiye teko mar chiero jomotho.—Tich 9:40.

7. Gin puonj mage mag Yesu ma Petro nowinjo tiendgi maber mana bang’ kane osewale kuom roho?

⁷ En adier ni kane Pentekost podi, Petro nong’eyo tiend adiera mang’eny ma Yesu ne puonjo. (Math. 16:16, 17; Joh. 6:68) Kata kamano, nitie weche moko motudore gi puonj Yesu ma ne pok oyangorene malong’o, kane Pentekost podi. Kuom ranyisi, Petro ne pok ong’eyo ni ne idhi chier Kristo e ringruok mar roho e odiechieng’ mar adek; kata ni Pinyruodh Kristo ne dhi bedo e polo. (Joh. 20:6-10; Tich 1:6) Paro mar ni dhano ne inyalo mi ringruok mar roho kendo locho e Pinyruodh polo, ne en paro mawendo ne Petro. Bang’ ka en owuon ne osebatise kuom roho maler, mi omiye geno mar dhi e polo, koro nonyalo winjo tiend puonj Yesu e wi wechego.

8. Jogo mowal koda ‘rombe mamoko’ oseyudo ng’eyo mane?

 ⁸ Bang’ yudo roho maler, jopuonjre Yesu koro ne nyalo winjo tiend gik ma ne teknegi chon. Kokalo kuom roho mar Nyasaye, jondiko mag Ndiko mag Dho-Grik mag Jokristo, nondiko weche mabeyo miwuoro malero dwaro mar Jehova mondo mi wapuonjrego. (Efe. 3:8-11, 18) E ndalowagi, jogo mowal kuom roho koda ‘rombe mamoko’ yudo chiemb chuny koa e tawo achiel, kendo giduto gipuonjore adierago. (Joh. 10:16) Be imor gi ng’eyo kod lony mar Wach Nyasaye ma roho maler osemiyo ibedogo?

Paulo ‘Nopong’ gi Roho Maler’

9. Paulo nochopo ang’o kokalo kuom roho maler?

⁹ Higa achiel kama bang’ Pentekost 33 E.N., nitie ng’at machielo ma noyudo mich mar roho maler koa kuom Nyasaye. Jalo ne en Saulo, ma bang’e nobiro mong’ere kaka Paulo. Roho notiyo kuome e yore makonyowa wabende e ndalogi. Roho mar Nyasaye notelo ne jaote Paulo e ndiko buge 14 mag Muma. To mana kaka notimore ne Petro, roho mar Nyasaye nokonyo Paulo ng’eyo kendo ndiko e yo mong’ith, wach geno mar ngima maok nyal kethi e polo. Kokalo kuom roho maler, Paulo nochango ji, nogolo jochiende, kendo nochiero jomotho bende! Kata kamano, teko ma roho maler ne chiwo ne chopo dwaro moro maduong’ moloyo, kendo dwarono ema jotich Nyasaye duto masani chopo, kata obedo ni ok e yor hono.

10. Ere kaka roho maler nomiyo Paulo nyalo mar wuoyo?

¹⁰ ‘Kopong’ gi roho maler,’ Paulo nowuoyo gi chir kokwero ajuoga moro. Mano nomulo ahinya jaduong’ mar piny Kupro, ma ne oyudo winjo mbaka ma ne dhi nyime! Jaduong’no norwako adiera nikech “nohum kuom puonj Ruoth.” (Tich 13:8-12) Kuom adier, Paulo nong’eyo maber kaka roho maler mar Nyasaye konyo e lando adiera. (Math. 10:20) Bang’e nosayo kanyakla mar Efeso mondo olamne ka gikwayo mondo Nyasaye ‘omiye weche’ ma dowach.—Efe. 6:18-20.

11. Ere kaka roho mar Nyasaye ne tayo Paulo?

¹¹ Roho maler ok nomiyo Paulo mana nyalo mar wuoyo kende, to bende seche moko ne okwere lendo e alwora moko. E wuodhene kaka jamisonari, roho mar Nyasaye ne taye. (Tich 13:2; som Tich Joote 16:6-10.) Jehova pod tayo tij lendo kokalo kuom rohone. Mana kaka Paulo, jotich Jehova duto maluwo kaka ochiko, temo matek mondo giland adiera gi chir kendo gi kinda. Kata obedo ni yo ma Nyasaye chiko godo joge ok nenore ayanga ahinya kaka e ndalo Paulo, wanyalo bedo gadier ni Jehova tiyo gi rohone maler e neno ni jogo ma chunygi nikare, winjo adiera.—Joh. 6:44.

‘Kit Tich Opogore’

12-14. Be roho mar Nyasaye tiyo kuom jotichne duto e yo machalre? Ler ane.

¹² Be nitie jip ma jotich Nyasaye mochiworene e ndalogi yudo kuom somo weche  manyiso kaka Jehova nogwedho kanyakla mar jogo mowal e kinde Jokristo mokwongo? En kamano maonge kiawa! Ket ane e paro weche ma roho nomiyo Paulo ondiko ne kanyakla mar Korintho e ndalone kowuoyo kuom hono mar mich mag roho niya: ‘Mich mag chuny gipogore to roho en achiel; kit tich bende opogore to Ruoth en achiel; teko Nyasaye en achiel ma tiyo e yore duto ei ji duto.’ (1 Kor. 12:4-6, 11) Ee, roho maler nyalo tiyo e yore mopogore opogore kuom jotich mopogore opogore mag Nyasaye, kendo nitie gimomiyo mano timore. Kuom adier, roho maler konyo “kueth matin” mar Kristo koda ‘rombene mamoko.’ (Luka 12:32; Joh. 10:16) Kata kamano, roho ok ti e yo machalre kinde duto kuom ng’ato ka ng’ato ei kanyakla.

¹³ Kuom ranyisi, roho maler ema keto jodong-kanyakla. (Tich 20:28) Kata kamano, en adier ni nitie jogo mowal kuom roho maok ti kaka jorit ei kanyakla. Kare onego wang’ad nang’o kuom wachni? Ni roho mar Nyasaye tiyo e yore mopogore opogore kuom jokanyo mag kanyakla.

¹⁴ Roho mamiyo jogo mowal bedo gi “chuny mar bet yawuot wuon dala,” e roho achiel ma Jehova notiyogo e chiero Wuode kendo miye ngima maok tho e polo. (Som Jo Rumi 8:11, 15.) Roho achielno ema Jehova notiyogo e chweyo piny gi polo gi gik moko duto manie igi. (Chak. 1:1-3) Rohono bende ema Jehova notiyogo e miyo Bezalel nyalo mar chopo tich makende mar tabernakel, nomiyogo Samson teko mar timo gik ma ne dwaro teko maduong’ gilala, kendo nomiyogo Petro owuotho e wi pi. Kuom mano, bedo gi roho mar Nyasaye ok nyis ni ng’ato owal kuom roho mar Nyasaye, nikech walo ng’ato en mana achiel kuom tich makende mag rohono. Nyasaye ema yiero jogo mowalo kuom roho mare.

15. Be batiso kuom roho maler biro dhi nyime mochwere? Ler ane.

¹⁵ Roho maler mar Nyasaye osebedo katiyo kuom jotichne mochung’ motegno, ee, kuom higini gana mang’eny kane pok ndalo walo ji kuom roho ochakore. Chieng’ Pentekost 33 E.N., tich manyienno mar walo ji nochakore, kata kamano ok obi dhi nyime mochwere. Batiso kuom roho biro chopo e gikone, kata kamano roho maler biro dhi nyime tiyo kuom oganda Nyasaye mondo mi gitim dwarone nyaka chieng’.

16. Gin ang’o ma jotich Nyasaye timo sani kokalo kuom rohone?

¹⁶ En ang’o sie masani timre e piny kokalo kuom roho maler mar Jehova? Fweny 22:17 dwoko kama: “Roho gi Miaha wacho ni, “Bi!” Kendo ng’a mowinjo, mondo owach ni, “Bi!” Kendo ng’a ma riyo omako, obi, mondo oyud pi mar ngima nono.” Roho maler chwalo Jokristo sani mondo giland wach pi ngima ma Jehova dwaro miyo ‘ng’ato’ ang’ata madwaro. Jokristo mowal ema tayo e timo tijni. Kata kamano, jogo manie kweth mar rombe mamoko riwogi lwedo e lando wachno. Kweth ariyogo luwo kaka roho malerno chikogi e chopo tijni. Jo kweth ariyogo osenyiso chiwruokgi ne Jehova kuom batiso ‘e nying’ Wuoro gi Wuowi gi roho maler.’ (Math. 28:19) Kendo giduto gimiyo roho mar Nyasaye thuolo mar tiyo e ngimagi kuom bedo gi kido mag nyak mar roho. (Gal. 5:22, 23) Mana kaka jogo mowal, rombe mamoko bende miyo roho mar Nyasaye thuolo mar konyogi. Kokalo kuom konyno, gitemo kar nyalogi mondo gibed maler kaka Jehova dwaro.—2 Kor. 7:1; Fwe. 7:9, 14.

Dhi Nyime Kwayo Nyasaye Roho Maler

17. Ere kaka wanyalo nyiso ni roho mar Nyasaye ni kuomwa?

¹⁷ Kuom mano, kata bed ni Nyasaye omiyi geno mar yudo ngima mochwere e  polo kata e piny, Jehova nyalo miyi “tekono maduong’ ahinya” mondo mi ichung’ motegno kendo iyud mich. (2 Kor. 4:7) Ji nyalo jari nikech idhi nyime gi tij lando wach maber mar Pinyruoth. Kata kamano, ng’e ni ‘ka gichayou nikech nying’ Kristo, un gi gweth; nikech roho mar duong’ gi teko, ee, roho mar Nyasaye, obedo kuomu.’—1 Pet. 4:14.

18, 19. Ere kaka Jehova biro konyi kokalo kuom rohone maler, to in ing’ado mar timo ang’o kuom wachno?

¹⁸ Roho maler mar Nyasaye en mich ma Nyasaye chiwo nono, ne jogo makwaye gi chuny matir. Roho nyalo medi lony kod gombo mar timo kar nyaloni duto e tij Jehova. ‘Nyasaye ema tiyo e chunyu komiyou dwaro kendo timo gima long’one.’ Mich majaber mar roho maler kaachiel gi kinda maduong’ mwaketo mondo wamak matek “wach mar ngima,” biro konyowa e ‘loso warruok marwa gi luoro kod kibaji.’—Fili. 2:12, 13, 16.

¹⁹ Kuom mano, ka igeno chuth kuom roho mar Nyasaye, ket chunyi kuom migawo moro amora, med lony kuom tich momiyi mondo itim, kendo kwa Jehova mondo okonyi. (Jak. 1:5) Obiro miyi gino madwarore mondo mi iwinj tiend Wachne, inyagri gi chandruoge mag ngima, kendo iland wach maber. “Kwauru, eka nomiu; dwaruru, eka ununwang’ dwong’uru eka noyawnu,” kendo mano oriwo koda nwang’o roho maler. (Luka 11:9, 13) Kuom adier, dhi nyime kwayo Jehova mondo ibed kaka jotichne machon koda masani mosechung’ motegno, ma roho maler mar Nyasaye ema ne tayo.

Be Inyalo Lero?

• Mana kaka Mariam, wanyalo nyiso chuny mane mabiro miyo wayud gweth?

• Roho mar Nyasaye notayo Paulo e yo mane?

• Ere kaka roho mar Nyasaye tayo jotichne e ndalogi?

[Penjo mag puonjruok]

[Picha manie ite mar 24]

Roho mar Nyasaye nomiyo Paulo teko mar loyo jochiende

[Picha manie ite mar 26]

Ndalogi, roho maler konyo Jokristo, kata bed ni gin gi geno mar yudo ngima e polo kata e piny