Dolo mar Jokaruoth Biro Gwedho Ogendini Duto
Dolo mar Jokaruoth Biro Gwedho Ogendini Duto
‘Un e dhoot moyier, un dolo mar jokaruoth, oganda maler, jo mokawo ka joge.’—1 PET. 2:9.
BE INYALO LERO?
En kinde mane ma ne okwong chiwoe singo mar dolo mar jokaruoth?
Ere kaka singruok manyien miyo ruodhi mabende gin jodolo betie?
Gin gweth mage ma dolo mar jokaruoth biro kelo ne dhano?
1. Ang’o momiyo “chiemb odhiambo mar Ruoth,” iluongo bende ni Rapar, to entie nikech ang’o?
ODHIAMBO mar Nisan 14 e higa 33 E Ndalowa (E.N.), Yesu Kristo kaachiel gi jootene 12 notimo nyasi margi mogik mar Pasaka. Bang’ chiko Juda Iskariot ma ne en jaandhoga mondo odhi, Yesu nochako nyasi manyien mopogore, ma bang’e ne oluong ni “chiemb odhiambo mar Ruoth.” (1 Kor. 11:20, New World Translation) Yesu ne onwoyo nyadiriyo kowacho ni: “Timuru ma, uparago.” Nyasino iluongo bende ni Rapar, tiende ni rapar mar Kristo ma iparogo thone. (1 Kor. 11:24, 25) Joneno mag Jehova e piny mangima timo Raparno higa ka higa ka giluwo kaka Kristo nochiko. E higa 2012, kaluwore gi kalenda mar Muma, Nisan 14 biro chakore bang’ podho chien, Tich Ang’wen, April 5.
2. Ang’o ma Yesu nowacho e wi makate gi divai ma notiyogo?
2 Japuonjre Luka wuoyo kuom gima Yesu notimo kendo wacho e nyasino, kondiko kama: “Nokawo makati, kendo kosegoyo erokamano, nong’ingo, momiyogi kowacho niya, ‘Ma e ringra mochiw nikech un; timuru ma, uparago.’ Kamano bende nokawo kikombe bang’ chiemo, kowacho niya, ‘Kikombeni e muma manyien kuom remba, mochuernu.’” (Luka 22:19, 20) Ere kaka joote ne dhi winjo tiend wechego?
3. Joote ne dhi winjo nade tiend gima Yesu nowacho e wi makate gi divai?
3 Nikech ne gin Jo-Yahudi, joote nong’eyo maber wach misengini mag le ma ne jodolo chiwo ne Nyasaye e hekalu ma ne ni Jerusalem. Misangogo ne ichiwo mondo ji omorgo Jehova, kendo ng’enygi ne umo richo e okang’ moro. (Lawi 1:4; 22:17-29) Omiyo, kane Yesu owacho ni ringrene koda rembe ne ‘idhi chiw kendo chwer nikech gin,’ joote nong’eyo ni ne odhi chiwo ngimane makare kaka misango. Misangono ne dhi kelo ber maduong’ moloyo misango mag le.
4. Ang’o ma ne Yesu onyiso kane owacho ni: “Kikombeni e muma manyien kuom remba”?
4 To nade weche ma Yesu nowacho ni, “kikombeni e muma manyien kuom remba”? Joote nong’eyo bende weche ma ne osekor e wi muma manyien, tiende ni singruok manyien, mondiki e Jeremia 31:31-33. (Som.) Weche ma Yesu nowacho nonyiso ni koro singruok manyienno ema ne dhi tiyo, kendo ne odhi kawo kar singruok mar Chik ma ne Jehova ochako gi Israel kokalo kuom Musa. Be ne nitie tudruok moro e singruoge ariyogo?
5. Singruok mar Chik ne dhi miyo Jo-Israel thuolo mane?
5 Ee, ne nitie tudruok machiegni kuom gima ne gidhi chopo. E sama ne Jehova chako singruok mar Chik, nowacho ne ogandano kama: “Ka nuwinj dwonda adieri, kendo mako muma mara, eka unubedna libamba moyier e kind libembini duto: niwira piny duto ni mara: kendo unubedna ka pinyruoth ma jodolo, oganda maler.” (Wuok 19:5, 6) Ere kaka Jo-Israel ne dhi winjo tiend wechego?
SINGO MAR BEDO DOLO MAR JOKARUOTH
6. Singruok mar Chik ne omedo lero weche moko kuom singo mane?
6 Jo-Israel nong’eyo gima “singruok” en, nimar Jehova nosetimo singruoge moko gi kweregi machon kaka Noa gi Ibrahim. (Chak. 6:18; 9:8-17; 15:18; 17:1-9) E singruok ma ne otimo gi Ibrahim, Jehova nosingo kama: “Kuom kothi dhoudi duto mag piny noyud hawi.” (Chak. 22:18) Singruok mar Chik nomedo weche moko kuom singo ma ne omi Ibrahimno. Kokalo kuom singruogno, Israel ne nyalo bedo libamba ‘moyier mar Jehova e kind libembini duto.’ Ne oyiergi ne tich mane? Mondo ‘gibed ne Jehova pinyruoth ma jodolo.’
7. Wach motigo ni “pinyruoth ma jodolo,” tiende ne en ang’o?
7 Jo-Israel ne olony gi migepe mag ruodhi koda mag jodolo, to Melkizedek e ng’at achiel kende machon ma ne onywako migepe ariyogo e kinde achiel, kendo Jehova ne oyie kode. (Chak. 14:18) Jehova koro nomiyo ogandano thuolo mar golo joma ne dhi bedo “pinyruoth ma jodolo.” Mana kaka ndiko mamoko mag Muma nonyiso bang’e, thuolono ne en mar bedo gi dolo mar jokaruoth, tiende ni ruodhi mabende gin jodolo.—1 Pet. 2:9.
8. Gin migepe mage ma jodolo ma Nyasaye oketo timo?
8 Ruoth en jal malocho. To tij jadolo en mane? Jo Hibrania 5:1 lero niya: “Jodolo madongo duto iyierogi e kind ji, kendo oketgi mondo giti ni ji e nyim Nyasaye, ka gichiwo mich gi misengini nikech richo.” Omiyo, jadolo ma Jehova oketo, dhi e nyim Nyasaye e lo joricho kochiwo misango ma chik dwaro, kendo sayo Nyasaye e logi. Bende, jadolo tiyo e lo Jehova kopuonjo oganda chike Nyasaye. (Lawi 10:8-11; Mal. 2:7) E yore kaka mago, jadolo ma Nyasaye oketo, tiyo tich mar kelo winjruok e kind ji gi Nyasaye.
9. (a) Ang’o ma ne nyaka Jo-Israel tim eka gibed “pinyruoth ma jodolo”? (b) Ang’o momiyo Jehova nochako tij dolo ei Israel? (c) Ang’o ma ne omono Israel tiyo kaka “pinyruoth ma jodolo” e bwo singruok mar Chik?
9 Kuom mano, singruok mar Chik nomiyo Israel thuolo mar golo ruodhi mabende gin jodolo ma ne dhi kelo gweth ne “libembini duto” mag piny. Kata kamano, singo ma jaberno ne dhi chopo mana ka giluwo weche ma ne onyisgi niya: “Ka nuwinj dwonda adieri, kendo mako muma mara.” Be Jo-Israel ne dhi ‘winjo dwond Jehova adieri’? Ee, e okang’ moro. Be ne ginyalo timo kamano e okang’ makare chuth? Ooyo. (Rumi 3:19, 20) Nikech mano, Jehova ne oketo tij dolo ei Israel, to migawono ne opogore gi migawo mar ruodhi, jodolo ne dhi chiwo misengini mag le nimar onge kiawa ni Jo-Israel ne dhi timo richo. (Lawi 4:1–6:7) Mago ne oriwo nyaka richo mag jodologo. (Hib. 5:1-3; 8:3) Jehova ne yie gi misangogo, kata kamano, ne ok ginyal umo richo mar jal machiwogi e okang’ mogik chuth. Tij dolo e bwo singruok mar Chik ne ok nyal kelo winjruok maber chuth gi Nyasaye, kata mana gi Jo-Israel ma chunygi ne kare. Jaote Paulo nondiko e wi wachno kama: “Remb ruedhi gi diek ok nyal golo richo ngang’.” (Hib. 10:1-4) Nimar Jo-Israel ne ketho Chik, mano nomiyo gibedo e bwo kuong’. (Gal. 3:10) Omiyo, ne ok ginyal tiyo ne ogendini duto e migawo mar dolo mar jokaruoth.
10. Singruok mar Chik ne ochopo ang’o?
10 Be singo mar Jehova ni Israel ne dhi bedo “pinyruoth ma jodolo” nobedo kayiem nono? Ooyo ngang’. Ka dine gitemo kar nyalogi mondo giwinje, podi ne digibedo gi thuolono, to ok e bwo Chik. Nikech ang’o? (Som Jo Galatia 3:19-25.) Kuom jogo ma ne temo ahinya makore gi Chik, Chik ne konyo e rito lamo maler. Chik nomiyo Jo-Yahudi ong’eyo ni ne gin joricho, kendo ni ne dwarore giyud misango maber ahinya moloyo misango ma ne ichiwo gi jadologi maduong’. Chik ne en jarit ma ne dhi kowogi ir Kristo, tiende ni Mesia, kendo nyinge ariyogi tiendgi en “Jal Mowir.” Kata kamano, ka Mesia ne dhi chopo, ne odhi miyo singruok manyien ma ne Jeremia okoro ochak tiyo. Ne ogwel jogo ma ne oyie gi Kristo mondo gibi gibed e singruok manyien, kendo ne gidhi bedo “pinyruoth ma jodolo” madier. Weuru wane kaka mano ne nyalore.
SINGRUOK MANYIEN MIYO RUODHI MABENDE GIN JODOLO BETIE
11. Ere kaka Yesu nobedo mise mar dolo mar jokaruoth?
11 E higa 29 E.N., Yesu ma Ja-Nazareth nobedo Mesia. Kane en gi higini 30 kama, nochiwore mondo otim dwaro makende mar Jehova, mi onyiso mano kokalo kuom batiso mar pi. Jehova ne oluonge ayanga ni, “Wuoda mahero,” mi owire, ok gi mo, to kuom roho maler. (Math. 3:13-17; Tich 10:38) Kuom wire kamano, ne owale mobedo Jadolo Maduong’ ne oganda dhano duto maketo yie kuome, kendo ne obedo Ruodhgi mar kinde mabiro. (Hib. 1:8, 9; 5:5, 6) En ema ne koro odhi keto mise madier mar dolo mar jokaruoth.
12. Misango mar Yesu nochopo ang’o?
12 Kaka Jadolo Maduong’, en misango mane ma Yesu ne nyalo chiwo mi umogo richo mar Adam chuth kuom jogo moyie? Mana kaka nosenyiso e sama nochako Rapar thone, ngimane makare chuth kaka dhano, ema nobedo misango. (Som Jo Hibrania 9:11, 12.) Chakre e batisone e higa 29 E.N., ka koro Yesu en Jadolo Maduong’, ne okalo e chandruok koda tiegruok nyaka e thone. (Hib. 4:15; 5:7-10) Bang’ kane osechiere, ne oidho e polo kendo chiwo ne Jehova nengo mar misangone. (Hib. 9:24) Bang’ mano, Yesu koro ne nyalo sayo Jehova e lo jogo moketo yie e misangone, kendo konyogi tiyo ne Nyasaye gi geno mar yudo ngima manyaka chieng’. (Hib. 7:25) Misangone bende nomiyo singruok manyien ochako tiyo.—Hib. 8:6; 9:15.
13. Jogo ma ne ogwel mobedo e singruok manyien nigi geno mane?
13 Jogo ma ne ogwel mondo obed e singruok manyienno bende ne idhi wal kuom roho maler. (2 Kor. 1:21) Mokwongo Jo-Yahudi, kae to bang’e joma oa e Ogendini. (Efe. 3:5, 6) Jokanyo mag singruok manyien ne dhi bedo gi geno mane? Ne idhi wenegi richogi chuth. Jehova nosesingo kama: “Anawenigi timbegi mamono, kendo richogi ok anapar kendo ngang’.” (Yer. 31:34) Bang’ weyonegi richogi, koro ne gidhi bedo “pinyruoth ma jodolo.” Kowuoyo gi Jokristo mowal, Petro nondiko kama: ‘Un e dhoot moyier, un dolo mag Ruoth, oganda maler, jo mokawo ka joge, mondo uland tije madongo mar Jal ma noluongou ae mudho dhiyo e ler mare miwuoro.’ (1 Pet. 2:9) E ndikono, Petro luwo weche ma Jehova nowacho ne Jo-Israel chon kane omiyogi Chik, kendo Petro nyiso ni wechego koro tiyo kuom Jokristo manie singruok manyien.—Wuok 19:5, 6.
DOLO MAR JOKARUOTH KELO GWETH NE OGANDA DHANO DUTO
14. Dolo mar jokaruoth ne dhi tiyo ka gin kanye?
14 Jogo manie singruok manyien ne dhi tiyo ka gin kanye? E piny kama gitiyoe e tij dolo e lo Jehova, ka ‘gilando tijene madongo,’ kendo pidho jomoko gi chiemb chuny. (Math. 24:45; 1 Pet. 2:4, 5) Bang’ thogi kendo chier, gibiro tiyo kanyachiel gi Kristo e polo ka gin ruodhi kendo jodolo, ka ginywako tije mag migepe ariyogo. (Luka 22:29; 1 Pet. 1:3-5; Fwe. 1:6) Fweny ma jaote Johana noneno jiwo wachno, nimar noneno chwech mang’eny mag polo kobedo machiegni gi kom-ruoth Jehova e polo. E “wer manyien” ne “Nyarombo,” giwero kama: “Rembi e ma ning’iewogo ni Nyasaye ji moa e ogendini duto, gi dhok duto, gi dhoudi duto gi pinje duto; mi nitimogi bedo jopinyruoth mar jodolo ma tiyo ni Nyasachwa, kendo ginibed gi loch e [wi] piny.” (Fwe. 5:8-10) E fweny moro ma noneno bang’e, Johana wuoyo kuom jolochgo kama: “Ginibed jodolo mag Nyasaye kod mag Kristo, kendo giniloch kode kuom higini gana achielgo.” (Fwe. 20:6) Gin kaachiel gi Kristo, ema giloso dolo mar jokaruoth ma biro gwedho oganda dhano duto.
15, 16. Gin gweth mage ma dolo mar jokaruoth biro kelo ne dhano?
15 Gin gweth mage ma ji 144,000 biro kelo ne jogo manie piny? Fweny sula 21 wuoyo kuomgi kaka dala moro me polo, ma en Jerusalem Manyien, mabende iluongo ni “chi Nyarombo.” (Fwe. 21:9) Kwan matindo 2 nyaka 4 wacho kama: “Naneno dala malerno, Jerusalem manyien, koa e polo ka Nyasaye, koikore kaka miaha ikore ni chwore. Nawinjo dwol maduong’ moa e kom duong’, kowacho niya, ‘Koro kar dak mar Nyasaye ji ni go; Nyasaye nodag kodgi, kendo ginibed joge, mi Nyasaye owuon nobed kodgi. Kendo Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie, nikech gik machon osekadho.’” Mano kaka mago gin gweth mabeyo ndi! Golo tho biro tieko chandruok maduong’ mosebedo ka kelo pi wang’, nduru, kod rem. Mano biro golo dhano ma nigi yie ae richo thuth, kendo ginibed gi winjruok maber chuth gi Nyasaye.
16 E medo lero gweth ma tij dolo mar jokaruothno biro kelo, Fweny 22:1, 2 wacho kama: “Nonyisa aora mar pi mar ngima, pi maler ka krustal, ka mol a e kom duong’ mar Nyasaye gi mar Nyarombo; pigno luwo e dier yo mar dalano [Jerusalem Manyien]. Kendo e teng aora koni gi koni nitie yath mar ngima ma nyago olembe kido apar gariyo; to olembego chiek due ka due; kendo pot yadhno en mar thiedho ogendini.” Fwenyno nyiso ni ibiro thiedh “ogendini” chuth kuom richo mar Adam ma ne onyuolgigo. Kuom adier, kindeno biro yudo ka ‘gik machon osekadho.’
DOLO MAR JOKARUOTH TIEKO TICHNE
17. En tich mane ma dolo mar jokaruoth biro chopo e gikone?
17 Giko mar higini 1,000 mar kelo gweth ne dhano, biro yudo ka koro dolo mar jokaruoth osemiyo dhano me piny obedo makare chuth maonge richo. Kaka Jadolo Maduong’ kendo Ruoth, Kristo biro chiwo dhano ma koro osebedo makare chuth, kendo ketogi e lwet Jehova. (Som 1 Jo Korintho 15:22-26.) Dolo mar jokaruoth biro tieko tichne gi kanyo.
18. Bang’ ka dolo mar jokaruoth osetieko tichne, ere kaka Jehova biro tiyo gi jowete Kristogo?
18 Bang’ mano, ere kaka Jehova biro tiyo gi jowete Kristo moyiedhigo? Kaluwore gi Fweny 22:5, “ginilochi nyaka chieng’.” E wi jomage? Muma ok nyiswa. Kata kamano, nikech kit ngima ma ginibedgo koda lony e konyo dhano ma ne joricho chon, mano biro miyo Jehova oti kodgi e migawo mar loch ka gitimo dwarone nyaka chieng’.
19. Rapar biro paro ne jogo duto mobiro wach mane?
19 E sama wabiro chokore mondo watim Rapar mar tho Yesu, chieng’ Tich Ang’wen, April 5, 2012, puonj mabeyo mag Mumago biro bedo e pachwa. Kweth manok mar Jokristo mowal mapodi nie piny biro chamo makate maok oketie thowi kendo madho divai makwar, ma en gimanyiso ni gin jokanyo mag singruok manyien. Mano biro paronegi thuolo moyiedhi koda ting’ ma gin-go motudore gi dwaro manyaka chieng’ mar Nyasaye. Weuru mondo waduto wachan bedo e Rapar ka wadwokogo erokamano ahinya ne Jehova Nyasaye, nikech mich mar tij dolo mar jokaruoth moketo mondo ogwedhgo oganda dhano duto.
[Penjo mag Puonjruok]
[Picha manie ite 29]
Dolo mar jokaruoth biro kelo gweth manyaka chieng’ ne dhano
