Moa e Giwa Machon

Kano Gik Mabeyo Moting’o Sigandwa

OGANDA Jehova nigi sigana maber ahinya motudore gi tijgi ne Nyasaye. Sigandgi ok yudre mana ei bugewa kende, to bende inyalo yudgi ei piche, barupe, weche ma jomoko ondiko e wi ngimagi giwegi, koda e gik mamoko molos motudore gi lamowa, koda tij lendo. Kata kamano, kano kendo dok e wechego konyo nade? Timo kamano ber nimar jogo ma ne gin wiye udi e Israel machon, ne onego onyis nyithindgi chike koda honni ma Jehova ne osetimo, mondo mi nyithindgi ‘oket chunygi kuom geno Nyasaye.’—Zab. 78:1-7.

Dok kendo nono weche mokan e kar keno osekonyo e chopo dwaro mar Jehova. Kuom ranyisi, kane jo akwede temo chungo tij gero hekalu e Jerusalem, dok kendo nono weche ma ne oyudo osendik chon mi okan Akmetha dala maduong’ mar Media, ne omiyo oyud weche manyiso ni Ruoth Kuro nochiko mondo oger hekaluno. (Ezra 6:1-4, 12) Kuom mano, ne oger hekalu kaluwore gi dwaro mar Nyasaye. Luka jandiko mar Injili bende ne odok e weche ma ne osendik chon kane ‘onono weche duto nyaka a chakruokgi.’—Luka 1:1-4.

Bura Maduong’ mar Joneno mag Jehova ohero nono sigandwa. Konyiso gimomiyo ber ahinya kano weche ma ne osego chon kendo miyo tieng’ ma  bang’e ong’e sigand tijwa ne Nyasaye, achiel kuom jokanyo mar Bura Maduong’ nowacho niya, “Mondo mi wang’e kama wachomoe, dwarore ni wang’e kama wasewuokie.” Nikech mano, nyocha ochak Migawo Marito Giwa Machon (Writing Archives) e ofis maduong’ mar Brooklyn, New York, kendo migawono tiyo e bwo Komiti mar Ndiko mar Bura Maduong’.

GIWA MOKAN MAPARONWA CHIEN

Bang’ higini, thothwa gombo ahinya ni dine wakano gik mang’eny kaka piche, barupe, koda gik mamoko manyiso ngima mosekalo mar joodwa. E Migawo Marito Giwa Machon, sani itimo kinda mar kano, kendo ndiko piny weche motudore gi sigandwa. Pichewa mokan maber e kar kano Giwa Machon chalonwa kaka piche ma joot okano e albam. Bugewa machon, sigand ngima jomoko, koda gik mamoko machon, gin moko kuom mwandu mabeyo man e kar kano Giwa Machon. Gik ma kamago chalo kaka girkeni ma ne tieng’ machon oweyonwa, kendo gikonyowa ng’eyo sigandwa, bende gikonyowa bedo gi geno maber kuom kinde mabiro.

Wagweli mondo ibed ka isomo sula manyien miluongo ni, “Moa e Giwa Machon,” ma oik gi Migawo Marito Giwa Machon. Sulano biroga yudore e gocho mar puonjruok mar Ohinga mar Jarito. Kuom ranyisi, e gocho moro mabiro, wachano bedo gi sula mabiro dwoko penjogi: Be ing’eyo gima ne ong’ere kaka Dawn Mobile? Gin jomage ma ne tiyo kode? Ne oti kode higini mage, to nikech ang’o?

Mana kaka albam mar piche joot paronegi chien, gik mokan e kar kano Giwa Machon konyowa ng’eyo mang’eny e wi sigandwa—giting’o sigand yie koda chir mar jogo ma ne otelonwa, ginyisowa mor koda pek moko ma ji kaloe ka gitiyo ne Wuonwa me polo, koda kaka Nyasaye osebedo ka konyo joge. (Rapar 33:27) Wageno ni Jehova biro gwedho kinda madhi nyime mar kano kendo rito weche motudore gi sigandwa, mondo mi wamed bedo e achiel kendo yudo jing’o mar timo dwarone.

[Sanduk/​Picha manie ite 31]

Gik Matimore e Migawono

E sama iiko DVD koda bugewa mag Jokristo malero Muma, owete makonyowa e ndiko weche, loso piche, timo nonro, koda mamoko, hinyo tiyo gi weche machon ma ne osekan. Omiyo, Migawo Marito Giwa Machon tiyo matek e choko kendo kano maber weche gi gik mopogore opogore machon, ma gigolo e bede ofise mag Joneno mag Jehova, e migepe mag ofise matiyo ei Bethel, e kanyakla mopogore opogore, koa kuom ji, koda e ofise mag jopiny. Non ane moko kuom gik ma migawono timo:

Choko kod Nono: Gik makende mopogore opogore imedo e Kar Keno. Thoth gigo wuok kuom jogo ma wedegi nosechung’ motegno e tiyo ne Jehova kuom higini pieche magwaro, kendo gimiyowagi kaka chiwo, kata kuom kinde moko. Nono gigo kendo porogi gi mamoko, konyowa medo bedo gi ng’eyo e wi sigandwa koda mar jogo ma ne odak kindego.

Chano: Migawo Marito Giwa Machon oting’o gik mang’eny ahinya, kendo moko kuomgi nigi higini mokalo mia achiel. Gin gi kido mopogore opogore, moko dongo moko tindo, kendo nyaka chan-gi maber mondo obi oti kodgi e kinde mabiro.

Loso kod Rito: Buge koda gik mamoko moti machiegni kethore, iloso kendo rito gi lony mamalo. Oboke mopogore opogore, piche, oboke mag gasede jopiny, sinembe, koda weche momak e tep, duto iketo e kompyuta. Timo kamano miyo koro inyalo yudgi e yor kompyuta maok ochuno ni omulgi ma digi kethre.

Kano kod Yudogi: Gik machon-go ikano maber kendo e yo mamiyo ok gikethore nikech ler kata ng’ich. Sani iloso program mabiro konyo e timo nonro kuom gi mabeyo mokan-go koda e yudogi mayot.

[Piche manie ite 32]

1. Sain mar “Photo-Drama of Creation.” 2. Kar ndiko kwayo. 3. Mtoka moketie thum mar kowo duol. 4. Ng’e gaset mar Watch Tower ma April 15, 1912. 5. Barua mar J. F. Rutherford e wi twech. 6. Maikrofon ma ne itiyogo e WBBR. 7. Kinanda. 8. Sandug ting’o buge. 9. Kalatas moting’o weche ng’ato owuon. 10. Telegram ma ne oor ne J. F. Rutherford.