Miyo Sechewa mag Puonjruok Omed Bedo Mamorowa Kendo Makonyo

Ere kaka wanyalo miyo puonjruokwa mar Muma omed bedo mamorowa? Ere kaka wanyalo miyo sechewa mag puonjruok omed bedo makonyowa? Weuru mondo wanon e yo machuok, okenge adek madwarore mabiro konyowa medo yudo ber e puonjruok marwa wawegi mar Muma.

1 LAMO: Okang’ mokwongo monego wakaw en wuoyo gi Nyasaye e lamo. (Zab. 42:8) Nikech ang’o? Onego wakaw puonjruokwa mar Wach Nyasaye kaka yo ma walamogo Nyasaye. Kuom mano, dwarore ni wakwa Jehova mondo okonywa iko pachwa, kendo mondo omiwa rohone maler. (Luka 11:13) Barbara, mosetiyo kaka misonari kuom higini mogwaro wacho kama: “Kinde duto ajalamo kapok asomo kata puonjruok Muma. Bang’ mano, ajawinjo ka Jehova ni koda kendo ni omor gi gima atimo.” Lamo kapok wachako puonjruok konyo e yawo pachwa koda chunywa, mondo mi wati chuth gi chiemb chuny mogundho ma oseket e nyimwa.

2 PAR MATUT: Nikech thuolo jabedo matin, mano miyo jomoko somo Wach Nyasaye mana wiyewiye. Kata kamano, timo mano monogi yudo ber ma puonjruok Muma kelo. Carlos, mosebedo katiyo ne Jehova kuom higini 50, osefwenyo gweth mabedoe ka ng’ato oloso thuolo mar paro matut, mondo mi puonjruokne okelne ber. Owacho kama: “Sani ajasomo mana kalatese manok mag Muma—chiegni ni ariyo kama pile ka pile. Bang’ mano koro anyalo tiyo gi thuolo momedore e paro matut kuom weche ma asesomo, mondo mi ayud puonj manyalo konya.” (Zab. 77:12) Sama wakawo thuolo mar paro matut, mano konyowa medo ng’eyo ma wan-go, kendo winjo tiend dwaro mar Nyasaye.—Kol. 1:9-11.

3 TIYO GI PUONJ: Kapo ni waneno wach moro mwanyalo tiyogo, mano nyalo konyowa. Mano e kaka timore e puonjruok mar Muma. Gabriel, owadwa ma rawera mohero puonjruok Muma maok obare, wacho kama: “Puonjruok konya e loyo chandruoge mag ngima mapile, kendo omiya abedo moikore konyo jomoko.” Omedo wacho kama: “Atemo tiyo gi gigo ma asepuonjora e ngimana awuon.” (Rapar 11:18; Josh. 1:8) Ee, nitie weche mang’eny manyalo medowa ng’eyo e wi Nyasaye, mwanyalo puonjore kendo tiyogo e ngima.—Nge. 2:1-5.

NWOYO: Mano kaka wan gi thuolo majaber ahinya mar bedo gi ng’eyo ma Jehova chiwo, jal ma e Soko mar rieko duto! (Rumi 11:33) Omiyo, e sama ibiro timo puonjruok mari maluwo, ne ni ikwongo lamo Jehova kendo kwaye mondo okonyi iko pachi kendo miyi rohone maler. Kae to inyalo chung’ matin mondo ipar matut kuom weche misesomo. Bende, makri gi weche mipuonjri kendo tiyo kodgi e ngimani. Ka ikawo okenge madwarorego, ibiro yudo ni puonjruok mari mar Muma biro medo bedo mamori kendo makonyi.