Moa e Giwa Machon

‘En Gima Nomiyo Ji ne Ng’iya Ahinya’

Kane Charlotte White ma ne lendo kuom thuolone duto, ochopo e gweng’ mar Louisville, Kentucky, e piny Amerka, kodhiro sanduk moro moket e wi gimidhiro ma nigi tiendene, ji mang’eny ne ng’iye.

NE EN higa 1908, kendo Nyaminwa White nomiyo jo taondno ong’iye ka wuoro nikech sanduk molos manyienno—Dawn-Mobile. Owacho kama: “Ji ne wuoyo kuom sandugno, kendo nomiyo ji ng’iya ahinya.”

Jopuonjre mag Muma, masani ong’ere kaka Joneno mag Jehova, ne dwaro lando ne jomoko adiera mabeyo mag Ndiko ma ne gisepuonjore gi kinda. Ng’enygi ne ong’eyo Muma kokalo kuom somo gocho mag buge miluongo ni Millennial Dawn (ma bang’e bende ne oluong ni Studies in the Scriptures). Jokristo ma ne oikore kendo ma ne nyalo, ne wuotho nyaka kuonde maboyo—e taonde madongo gi matindo nyaka e gwenge—ka gichiwo ne ji bugego ma bende ne iluongo ni “Gik Machiwo Kony ne Jopuonjre mag Muma.”

E higa 1908, Nyaminwa White koda jolendo mamoko mag Pinyruoth ne chiwo gocho auchiel mag bugno ma tokgi ne olos gi nanga, e nengo mar dola 1.65 mar Amerka. Kar chiwo ne ji buge mag Dawn kanyo gi kanyo, ne gindiko piny nying jogo ma ne dwaro bugno kae to giduogo e odiechieng’ ma jotich ne chamoe osara kendo chiwo bugego e nengo matinno mar siro tij goyo bugego. Jal moro ma ja akwede ne ong’ur nimar chiwo ma ne igolo ne bugego ne tin ahinya!

Jalendo miluongo ni Malinda Keefer paro kaka ne ojayudo kwayo mar buge mia ariyo nyaka mia adek e juma ka juma. Kata kamano, nimar ji mang’eny ne ohero buge mag Dawn, mano ne okelo chandruok  moro. Parie ni gocho mar auchiel kende mar bugno ne nigi it 740! Gaset mar The Watch Tower, nondiko kama, ‘Buge piero abich pekgi ne kilo 18,’ omiyo, tero ne ji bugego ne en “tich mapek,” to moloyo ne nyiminewa.

Mondo ologo chandruok mar ting’o bug Dawn kitero ne ji, Owadwa James Cole ne oloso frem moro ma nigi tiendene ariyo minyalo ketie sanduk e wiye kendo tweyo sandugno kuome gi skru moko mirido. Nikech koro ne oyudo yor ting’o sanduge mapek mopong’ gi buge, owadwa ma ema nokwongo loso gimakamano nowacho kama: “Koro gokena ok bi tur.” E chokruok maduong’ mar Jopuonjre Muma e higa 1908, e gweng’ mar Cincinnati, Ohio, ema ne onyisoe ji sanduk manyienno. E giko fremno koni gi koni ne nitie gik midiyo mondikie nying’ ni Dawn-Mobile, nimar gimaduong’ ma ne oting’o ne gin gocho mag bug Millennial Dawn. Ting’o buge e sandugno ne bedo mayot ahinya bang’ puonjo ng’ato mana matin. Ne inyalo tim lokruok ne borne, kendo tiendene ne nyalo ringo e nderini maok oketie lam. Bang’ lendo kode mi odong’ nono, ne nitie kaka ne inyalo bane mondo ting’e obed mayot ka koro ng’ato dok pacho.

Nyimine ma ne lendo kuom thuologi duto ne nyalo yudo sandugno maonge chudo. Kata kamano, nengone ne en dola 2.50 mar Amerka. Nyaminwa Keefer, ma oket pichane kae, ne olony e tiyo gi sandugno, ne onyalo dhiro sanduk mopong’ gi buge kotiyo gi lwete konchiel to kon machielo oting’oe buge moko. Nikech ne ojaromo gi ji marwako wach e taon moro mikunyoe mirni e gweng’ mar Pennsylvania, piny Amerka, ne ojatero bugego didek kata ding’wen e odiechieng’ ma ne oyango ne tijno.

E higa 1980, jariemb ndege moro ne okwongo loso bag ma nigi tiende midhiro ma ji mang’eny sani tiyogo e pewe mag ndeke koda stesen mag bas. Kata kamano, chiegni higini mia achiel motelo, Jopuonjre Muma ma jokinda ne mor ka ji mang’eny ne ng’iyogi ka gidhiro sanduge mag Dawn-Mobile, sama ne gichuoyo kodhi mag adiera mar Muma.

[Weche manie ite mar 32]

Nyaminwa Keefer ne wuotho dhi gi duogo nyadidek kata ding’wen e chieng’ tero buge

[Weche manie ite mar 32]

Ne okonyo e tieko pek mar ting’o buge mag Dawn