Ne Gilando Wach Nyasaye gi Chir!

Jokristo madier osebedo kanyiso kido mar chir kata mana e bwo akwede, mana kaka inyiso e bugewa kaka, “Kutoa Ushahidi Kamili” Kuhusu Ufalme wa Mungu kod Mashahidi wa Yehova—Wapiga-Mbiu wa Ufalme wa Mungu. Mana kaka Jokristo wetewa e kinde joote, wan bende wakwayo Jehova mondo wayud roho mare koda kony mamiyo walando wachne gi chir.—Tich 4:23-31.

Kowuoyo kuom tijwa mar lendo e kinde lweny mokwongo mar piny, owadwa moro nondiko niya: “Jotich Nyasaye ne tiyo gi kinda e pogo gocho mar abiriyo mar buk miluongo ni Studies in the Scriptures, ma wiye wacho ni The Finished Mystery. Bugno ne chopo ne ji mang’eny ahinya. E higa 1918 ne oland gocho mar trakt mar Wach Pinyruoth Na. 1. Bang’ mano ne oland trakt mar Wach Pinyruoth Na. 2, ma ne lero gimomiyo josirkal ne ok mor gi bug The Finished Mystery. Mano ne oluw gi goyo trakt mar Wach Pinyruoth Na. 3. Kweth mar jatichno mogen ne opogo buge gi traktgo ne ji mang’eny ahinya. Pogo trakt mag Wach Pinyruoth ne dwaro yie gi chir ahinya.”

E kindewagi, jolendo manyien mag Pinyruoth hinyo yudo tiegruok kuom tijno, to mano ok e kaka ne en chon. Koparo odiechieng’ mokwongo ma nochako lendoe e higa 1922, owadwa moro ma Ja-Poland modak e piny Amerka nondiko kama: “Ne ok ang’eyo kaka ne anyalo chiwo ne ng’ato bugewa kendo ne ok alony e wacho dho Ingresa, kata kamano, ne achung’ e dho ofis laktar moro kendo dwong’o dho ofisno. Dhako moro ma en nas ne oyawo dho ofisno. Wiya ok bi wil gi odiechieng’no, nikech ne an gi ilo to bende ne aluor. Sama ne ayawo bagna, bugena duto ne olwar piny e tiend nasno. Ok anyal paro gima ne awacho, kata kamano, ne oyie kawo buk moro. Ne awuok kanyo ka koro an gi chir kendo ne awinjo ka Jehova osegwedha. Ne achiwo buge mang’eny a kar ohala kanyo.”

Nyaminwa moro nowacho kama: “E kar higa 1933, owete mang’eny ne lando wach Pinyruoth ka gitiyo gi mtokni moketie thum mar kowo duol.” Kinde moro achiel, nyaminwano kachiel gi owadwa moro gi chiege, ne lendo e alwora mar gode ma California, e piny Amerka. Nyaminwano wacho kama: “Owadwano ne otero mtoka nyaka e wi got malo, to wan ne wadong’ piny e taon. Sama ne koro ochako goyo weche mag twak ma ne osemaki, dwol ne winjore mana ka gima owuok e polo. Ji ma ne nie taon ne otemo manyo kama duolno ne wuokie, to ne otamogi. Bang’ tieko goyo weche momakgo, ne wadhi lendo ne joma ne ni kanyo. Ne atiyo gi mtokni mamoko ariyo mag kowo dwol, to kuom adier, anyalo wacho ni ji mang’eny ne ok dwar winjo. Kata kamano, podi ne chunogi winjo twegego, nimar dwol ma ne wuok e mtokni ne winjore maler nyaka ei utegi. Kinde duto ne waneno kaka Jehova tiyo gi yo moro mowinjore mar lendo,  kendo e kinde mowinjore. Yorego ne dwaro ni wabed gi chir ahinya, kata kamano, ne gichopo tich ma ne dwarore, kendo nying Jehova ne yudo duong’.”

E higini mag 1930 kod mag 1940, owete ne lendo ka gitiyo gi kinanda momakie twege mag Muma. Dhako moro ma Jakristo wacho kama: “Nyaminwa moro ma rawera ne lendo e ot ka ot kotiyo gi kinanda. E sama nochako goyo kinanda e dhoot moro, dichwo ma wuon ot ne obedo gi mirima mi ogweyo kinanda mowuok e sandug ting’e. Kata kamano, gik ma ne omakie wechego ne ok okethore. Ji adek moko ma ne yudo gago e lori moro mochung’ ne oneno gima ne otimore, kendo ne ginyiso nyaminwano mondo ogonegi weche momak e kinanda, mi gikawo buge. Mano ne oduogo chunye nikech tim marach ma ne oyudo osetimne.” Chir ne dwarore ahinya e nano e bwo chandruoge kaka mago.

Nyaminwano wacho kama: “Anyalo paro kinde ma ne ochak tij chiwo gasede e nderini e higa 1940. Motelo, owete ne hinyo wuotho kanyachiel ka gilando wach. Owete gi nyimine ne wuotho kanyachiel ka giting’o sain mondiki ni ‘Din en Obadho Kendo Gimarach’ kod ‘Ti ne Nyasaye Koda Kristo Ruoth.’ Gie kindeno bende, ne imiyo ji trakt maonge chudo. Chir maduong’ ne dwarore mondo mi ji olend ka gitiyo gi yore kaka mago, kata kamano yorego ne otiyo maber, nimar ne gikonyo e lando ne ji nying Jehova koda miyo ji ong’e joge.”

Nyaminwa machielo nowacho kama: “Tiyo tij chiwo gasede e taonde matindo ne tek ahinya. Mago ne gin kinde ma Joneno ne yudo akwede mang’eny. . . . Chir maduong’ ne dwarore, mondo mi ng’ato ochung’ kamoro e ndara koting’o gaset kendo ywayo ji kotiyo gi weche moseik. To ema podi ne ok wahiny bare ne tijno Ngeso ka Ngeso. Seche moko ji ne mor kodwa. To kinde moko, grube maricho ne nyalo chokore kendo ne wajowuok kanyo mos mondo kik gitimnwa marach.”

Kata obedo ni Joneno mag Jehova ne oyudo sand e Lweny mar Ariyo mar Piny, podi ne gidhi nyime lendo gi chir. E kampen moro ma ne okawo odiechienge 43, chakore Desemba 1, 1940, nyaka Januar 12, 1941, jolendo madirom 50,000 e piny Amerka ne ochiwo buge matindo chiegni milion aboro e kinde ma ne iluongo ni Kinde mar Nyiso “Chir.”

Ng’eny jogo ma osebedo e riwruok mar oganda Nyasaye chakre chon, nyalo paro maber pek ma ne giromogo ma ne dwaro ni ginyis chir maduong’. Moko kuomgi nyalo paro kaka ne ginyiso chir kuom higini mang’eny, kendo chirno ne nenore e wach moro ma ne gihinyo nwoyo kama: Go lweny nyaka e rangach! Ok wang’eyo kabe yo mwatiyogo tij lendo ma Nyasaye omiyowa biro lokore kapok giko mar piny marachni ochopo. Kata kamano, kokalo kuom kony ma Nyasaye chiwo, wabiro dhi nyime lando wach Jehova gi yie koda chir.

[Weche manie ite mar 9]

Chir osebedo ka dwarore kinde duto mondo mi wati tijwa mar lando wach Pinyruoth