“Inyalo Gowae Picha?”

Bang’ odiechieng’ mar ariyo mar chokruog-distrikt moro, Josué, ma en Jabethel e piny Mexico, ne bayo e taon mar Querétaro. Javier kod Maru chiege ma gin Jo-Kolombia, ma ne limo pinyno, nokwayo Josué mondo ogogi ane picha. Nikech Josué kod osiepene ma Joneno ne orwakore maber kendo ne gin gi baj mag chokruog-distrikt, jalo kod chiege nopenjogi ka dibed ni giwuok e nyasi moro makende. Josué noleronegi ni ne gin e taondno nikech chokruog-distrikt mar Joneno mag Jehova, kendo ne gigwelo jalo gi chiege mondo obi e program ma Jumapil.

Jalo gi chiege nonyisogi ni wigi ne dhi kuot nikech ne gionge gi lewni mowinjore ma ginyalo rwako mondo gidhi kama kamano. Kata kamano, Josué nomiyogi nyinge koda namba simo mar Bethel kama ne otiyoe.

Dweche ang’wen bang’e, Josué ne obwok kane Javier otudore kode. Kare jalo gi chiege ne gidhi e chokruog-distrikt cha, kendo koro ne gidwaro ni Joneno mag Jehova olimgi e Mexico City, kama ne gidakie e kindeno. Ne ochak puonjruok mar Muma kaachiel gi Javier kod Maru, kendo mapiyo ne gichako dhi e chokruoge. Dweche apar bang’e, ne gibedo jolendo. Kata obedo ni jalo gi chiege ne odar ma gidhi e taon mar Toronto, e piny Canada, ne gimedo timo dongruok mi gikone ne obatisgi.

Bang’e, Josué noyudo barua moa kuom Javier konyiso gima ne oywaye morwako adiera. “Kapok ne wadhi e chokruog-distrikt, noyudo an kod chiega wasegoyo mbaka e wi gimomiyo ne dwarore ni wakwa Nyasaye kony e tayo ngimawa. Kane waneno kaka in koda joweteni ne urwakore maber, ne waparo ni nyaka bed ni ne ua chokruok moro makende ahinya. Kane wadhi e chokruog-distrikt, ne wamor ahinya kuom kaka ne otawa nyaka e kombewa e yo manyiso hera. Joma ne nie chokruogno ne nyiso dimbruok kendo ne gikonyowa nyaka elo Muma. Ne ok obadhogi ahinya ni ne warwakore mana kaka joma nie bayo.”

Mano kaka weche Ruoth Suleman nobedo adier kuom Josué! Suleman nondiko kama: “Chuo kodhi ma ingo gokiny, kendo kik igeng’ lueti godhiambo: ni mar ikiya gi mabiro bedo maber, kata mano kata macha, kata giduto gibiro bet maber kaachiel.” (Ekl. 11:6) Be inyalo chwoyo kodhi kitiyo gi thuolo moyudore mondo inyis jomoko wach chokruog-distrikt mabiro, kata twak mar ji duto? Jehova nyalo tiyo kodi e ywayo jogo manigi kech koda riyo mar ng’eyo dwaro mar Nyasaye, mana kaka ne otimore ne Javier kod Maru.—Isa. 55:1.

[Picha manie ite mar 32]

Koracham kadhi korachwich: Alejandro Voeguelin, Maru Pineda, Alejandro Pineda, Javier Pineda, kod Josué Ramírez e Bethel ma Mexico