Jehova Miyowa Rit Mondo Wabed gi Warruok
Jehova Miyowa Rit Mondo Wabed gi Warruok
“Un ma teko mar Nyasaye oritou kuom yie, mondo ubed gi warruok moikore el e ndalo mogik.”—1 PET. 1:5.
INYALO DWOKO NADE?
Ere kaka Jehova noywayowa mi wabiro e lamo madier?
Ere kaka wanyalo weyo Jehova otawa kokalo kuom puonjge marieyowa?
Ere kaka Jehova chiwonwa jip?
1, 2. (a) Ere kaka wanyalo bedo gadier ni Nyasaye biro konyowa siko kwachung’ motegno? (b) Jehova ong’eyowa maber e okang’ maromo nade?
“NG’A ma notim kinda nyaka giko ema nokwo.” (Math. 24:13) Kotiyo gi wechego, Yesu nonyiso maler ni mondo mi watony e kinde ma Jehova biro kumoe piny Satan, nyaka wasiki kwachung’ motegno nyaka giko. Kata kamano, mano ok nyis ni Jehova dwaro ni wanan kwatiyo gi rieko kata gi tekowa wawegi. Muma singonwa kama: “Nyasaye en Jadier, kendo ok noyie mondo otemu moloyo tekreu; to e temruokno nomiugo bende yo mar wuok, mondo unyal dhilie.” (1 Kor. 10:13) Wechego nyiso ang’o?
2 Mondo Jehova kik we mondo temwa moloyo tekrewa, nyaka ong’e weche duto kuomwa, moriwo nyaka pek mwaromogo, chalwa ng’ato ka ng’ato, koda okang’ mwanyalo nanogo. Be kuom adier Nyasaye ong’eyowa maber kamano? Ee. Ndiko nyiso ni Jehova ong’eyo ng’ato ka ng’ato e okang’ matut. Ong’eyo yorewa mapile koda timbewa. Onyalo kata mana ng’eyo pachwa koda dwaro mag chunywa.—Som Zaburi 139:1-6.
3, 4. (a) Ere kaka gima notimore ne Daudi nyiso kaka Jehova ong’eyo ng’ato ka ng’ato? (b) En tich mane makende ma Jehova chopo e ndalogi?
3 Be en adier ni Nyasaye ong’eyowa wan dhano adhana e okang’ makamano? Daudi jandik-zaburi noparo kuom penjono, kowacho ne Jehova kama: “Kaketo chunya kuom paro polo mari miseloso gi lith lweteni, kata kuom dwe gi sulwe miseketo; dhano en ang’o, mipare?” (Zab. 8:3, 4) Nyalo bedo ni gik ma Daudi owuon nosekaloe ema nomiyo openjo kamano. Daudi ma ne en wuowi ma chogo e od Jesse, ne en ng’ato ma Jehova ne “chunye mor godo” kendo Jehova nosegole ‘kuma noritoe rombe, ni mondo obedi jatelo’ e wi Israel. (1 Sam. 13:14; 2 Sam. 7:8) Par ane kaka nyaka bed ni Daudi nowinjo bang’ fwenyo ni Jachwech polo gi piny ne ong’eyo weche ma noparo ka en kar kende, kata obedo ni ne en mana wuowi ma jakwath!
4 Omiyo, okang’ ma Jehova ong’eyowago ng’ato ka ng’ato ndalogi bende en gimiwuoro. Ochoko kokelo e lamo madier “gik malombo wang’ mag ogendini duto,” kendo okonyo joge siko kochung’ motegno. (Hag. 2:7, New World Translation) Mondo wang’e maler kaka Jehova konyowa chung’ motegno, we wakwong wanon ane kaka oywayo ji e lamo madier.
NYASAYE YWAYOWA
5. Ere kaka Jehova ywayo ji ir Wuode? Chiw ane ranyisi.
5 Yesu nowacho kama: “Onge ng’a ma nyalo biro ira, ma ok Wuoro ma noora e moywaye.” (Joh. 6:44) Wechego nyiso ni mondo ng’ato obed japuonjre Kristo, nyaka oyud kony mar Nyasaye. Ere kaka Jehova ywayo joma kitgi chalo gi rombe ir Wuode? En kokalo kuom tij lando wach maber kod roho maler. Kuom ranyisi, ka Paulo kod jomisonari wetene ne ni Filipi, ne giromo gi dhako moro ma nyinge Ludia, mi gichako landone wach maber. Weche mokudh gi much Nyasaye wachonwa kama: “Ruoth noyawo chunye mondo orwak weche ma Paulo nowacho.” Ee, Nyasaye nochiwo rohone mondo okonygo Ludia winjo tiend wach ma ne ilandone, kendo mano nomiyo en koda joode obatisgi.—Tich 16:13-15.
6. Ere kaka waduto Nyasaye noywayowa mi wabiro e lamo madier?
6 Be gima ne otimoreno ne en mana ne Ludia kende? Ooyo ok kamano. Ka in Jakristo mosechiwore mobatisi, in bende Nyasaye ne oywayi mondo ibi e lamo madier. Mana kaka Wuonwa me polo noneno gimoro malong’o e chuny Ludia, in bende noneno gimoro maber kuomi. Kane ichako chiko iti ne wach maber, Jehova ne okonyi winjo tiende kuom miyi roho maler. (1 Kor. 2:11, 12) Kaka ne itimo matek mondo iti gi weche ma ne ipuonjori, ne ogwedho kindani mar timo dwaro mare. Sama ne ichiwone ngimani, chunye nobedo mamor. Kuom adier, nyaka a kinde ma ne ichako luwo yo materi e ngima, Jehova osebedo kodi e okang’ duto.
7. Ere kaka wanyalo ng’eyo ni Nyasaye biro konyowa siko kwachung’ motegno?
7 Nikech nosemiyowa kony mar chako wuotho kode, Jehova koro ok diwewa kendwa maok okonyowa siko kwachung’ motegno. Ong’eyo ni mana kaka ne ok wadonjo e adiera kendwa wawegi, ok wabi siko e adiera gi tekowa wawegi. Kondiko ne Jokristo mowal, jaote Petro nowacho kama: “Un ma teko mar Nyasaye oritou kuom yie, mondo ubed gi warruok moikore el e ndalo mogik.” (1 Pet. 1:5) Puonj ma wechego oting’o tiyo kuom Jokristo duto, kendo gin weche monego wanon ng’ato ka ng’ato ndalogi. Nikech ang’o? En nikech waduto, dwarore ni wayud kony ma Nyasaye chiwo mondo mi wasiki kwachung’ kode motegno.
IGENG’OWA KUOM GIK MANYALO MIYO WACHWANYRE
8. Ang’o momiyo dwarore ni watang’ gi gik manyalo miyo wachwanyre?
8 Parruok mag ngima koda nyawo monyuolwago nyalo miyo wanindi e yor chuny, kendo miyo watim gik manyalo miyo wachwanyre kata ka ok wang’eyo. (Som Jo Galatia 6:1.) Wanyalo yudo puonj e wi wachni kuom nono gimoro ma ne otimore e ngima Daudi.
9, 10. Ere kaka Jehova nogeng’o Daudi kik tim gima ne nyalo kelone chwanyruok, to en ang’o motimonwa ndalogi?
9 E kinde ma Ruoth Saulo ne lawre kode, Daudi nosenyiso kido mar horruok mos kuom weyo maok ochulo kuor ne ruoth ma ne janyiegono. (1 Sam. 24:2-7) Kata kamano, mapiyo bang’ mano, kido mag nyawo minyuologo dhano noloyo Daudi. Ne ochando gik ma joge ne nyalo konyorego, omiyo nokwayo kony e yor luor kuom Ja-Israel wadgi ma nyinge Nabal. Kane Nabal otamore kendo yenyo, Daudi nobedo gi mirima mi owuok mondo odhi ochul kuor kuom jood Nabal duto, kendo ne ok oketo e paro ni nego joma onge ketho ne dhi miyo obed gi buch remo e wang’ Nyasaye. Okang’ ma Abigail chi Nabal nokawo, ema noreso Daudi kuom timo ketho maduong’. Bang’ fwenyo lwet Jehova kuom wachno, Daudi nowachone niya: “Odend Jehova Nyasach Israel, moseoroi tinendeni ni mondo iromna: ogwedh riekoni, kendo ogwedhi in bende, nikech isegeng’a kawuono ni kik aketh remo, kendo kik achul kuor gi lueta awuon.”—1 Sam. 25:9-13, 21, 22, 32, 33.
10 En puonj mane mwanyalo yudo kuom siganano? Jehova notiyo gi Abigail e geng’o Daudi kuom timo gima ne nyalo kelone chwanyruok. Otimonwa e yo machalo kamano ndalogi. En adier ni ok onego wagen ni Nyasaye biro oronwa ng’ato mondo ogeng’wa sa asaya mwachiegni timo ketho moro. Bende ok wanyal wacho ni wang’eyo sie gima Nyasaye biro timo e bwo chal moro amora, kata gima obiro weyo mondo otimre eka ochop dwarone. (Ekl. 11:5) Kata kamano, wanyalo bedo gadier ni kinde duto Jehova ong’eyo chal marwa, kendo obiro konyowa siko kwachung’ kode motegno. Osingonwa niya: “Anapuonji kendo nyisi yo ma nidhiye: nang’adni rieko ka wang’a oneni.” (Zab. 32:8) Ere kaka Jehova ng’adonwa rieko? Ere kaka riekono nyalo konyowa? To ang’o momiyo wanyalo bedo gadier ni Jehova ema tayo joge e ndalogi? Ne ane kaka bug Fweny dwoko penjogo.
IRITOWA KOKALO KUOM PUONJ MARIEYOWA
11. Jehova ong’eyo gik matimore e kanyakla mag joge e okang’ maromo nade?
11 E fweny ma ne ondik wechege e bug Fweny sula 2 kod 3, inyisowa ni bang’ yudo duong’ e polo, Yesu Kristo ne nono chal mar kanyakla abiriyo ma ne ni e Asia Matin. Fwenyno nyiso ni Kristo ok ng’i chal mar gik moko mana e wiyewiye, to onono chalgi e yo matut. Nitie kinde mohulo nyaka nyinge jomoko, kendo e moro ka moro kuom kindego, ochiwo puoch kata siem. Mano nyisowa ang’o? Kaluwore gi fwenyno, kanyakla abiriyo ochung’ ne Jokristo mowal bang’ higa 1914, kendo puonj moting’o siem ma ne omi kanyakla abiriyogo nyalo tiyo bende kuom kanyakla duto mag oganda Nyasaye mandalogi, e piny mangima. Kuom mano, wanyalo ng’ado ni Jehova tayo joge kokalo kuom Wuode. Ere kaka yo ma otayowago nyalo konyowa?
12. Ere kaka wanyalo weyo Jehova mondo ota yorewa?
12 Yo achiel mwanyalo yudogo ber kuom yor hera ma Jehova tayowago, en kokalo kuom puonjruok ma ng’ato timo owuon. Kokalo kuom buge mag kweth mar jatichno mogen kendo mariek, Jehova chiwonwa puonj mogundho marieyowa koa e Ndiko. (Math. 24:45) Kata kamano, mondo gikonywa nyaka wakaw okang’ mar puonjruokgi kendo tiyo kodgi e ngimawa. Puonjruok ma ng’ato timo owuon en yo achiel ma Jehova ‘ritowago mondo kik wachwanyre.’ (Juda 24) Be nitie kinde misepuonjrie wach moro e bugewa ma ne ochaloni mana ka gima ne ondikgi nikech in? Rwak yo ma Jehova rieyi godo. Mana kaka osiepni moro nyalo pamo goki mondo onyisi wach moro, Jehova nyalo tiyo gi rohone mondo onyisi ni in gi kido moro monego itimie lokruok, mana kaka bende nitie jomoko mang’eny mabende dwarore ni otim kamano. Ka watang’ mondo mi waluw kaka roho tayowa, wamiyo Jehova thuolo mar tayo yorewa. (Som Zaburi 139:23, 24.) E wi wachni, dwarore ni wanon ahinya chenrowa mar puonjruok.
13. Ang’o momiyo nono chenrowa mar timo puonjruok en okang’ manyiso rieko?
13 Tiyo gi thuolo mokalo tong’ e yore mag manyo mor kod yueyo nyalo mayowa kinde mar timo puonjruok ma mar ng’ato owuon. Owadwa moro wacho kama: “Yot ahinya weyo timo puonjruok ma mar ng’ato owuon. Yore mag manyo mor kod yueyo ogundho tinde moloyo kaka chon, kendo giyudre mayot. Yorego yudore e TV, e kompyuta, koda e simo. Gigo olworowa.” Kaok watang’ to thuolo madwarore ni watigo e timo puonjruok mwatimo ng’ato ka ng’ato owuon, nyalo lal mosmos mi chop kama koro oonge chuth. (Efe. 5:15-17) Ber ka ng’ato ka ng’ato kuomwa openjore niya: ‘Akawo thuolo mar puonjruok Wach Nyasaye e okang’ matut maromo nade? Be en mana e kindego ma an gi twak, kata migawo moro mar chokruok monego aiki?’ Ka en kamano, nyalo dwarore ni wati maber gi odiechieng’ mwaseketo tenge ne lamo mar joot, kata ne puonjruokwa mar ng’ato ka ng’ato owuon, mondo wayud mwandu mag rieko ma Jehova chiwo mondo oritwago eka wayud warruok.—Nge. 2:1-5.
ITEGOWA KOKALO KUOM JIP
14. Ere kaka Ndiko nyiso ni Jehova nono ahinya kuyo ma wan-go?
14 Nitie gik mang’eny ma ne kelo ne Daudi kuyo. (1 Sam. 30:3-6) Wechene mokudhi gi much Nyasaye nyiso ni Jehova nong’eyo chalne koda kaka nowinjo. (Som Zaburi 34:18; 56:8.) Wan bende Jehova ong’eyo maber chalwa koda kaka wawinjo. Sama wan gi ‘chuny monyosore’ kendo ‘ma chunywa lokore’ kata otur, osudo machiegni kodwa. Ng’eyo mano kende en gima nyalo miyowa hoch kaka notimore ne Daudi ma nowero niya: “Anamor kendo yil ahinya kuom kechni: nimar iseneno sand mara: iseng’eyo chunya ka an gi chandrwok.” (Zab. 31:7) Kata kamano, Jehova timo mokalo mana ng’eyo ni wachandore. Otegowa kuom miyowa hoch kod jip. Yo achiel motimogo mano en kokalo kuom chokruoge mag Jokristo.
15. En puonj mane mwanyalo yudo kuom gima ne otimore e ngima Asaf?
15 Ranyisi mar Asaf jandik-zaburi konyowa ng’eyo achiel kuom ber mwayudo kwadhi e chokruoge. Parruok kuom gik maok kare nomiyo Asaf obedo gi kiawa kabe nitie ber mar tiyo ne Nyasaye. Chuny Asaf nonyosore. Nowacho kama kuom kaka ne owinjo: “Chunya ne lit, wach nochwowa e iya.” Nikech mano, ne both koweyo tiyo ne Jehova. En ang’o ma nokonyo Asaf momiyo obedo gi paro mowinjore kendo? Nowacho kama: “Ne adonjo e sang’tuari mar Nyasaye.” Kanyo, e kind jogo ma ne gilamogo Jehova, nochako obedo gi paro mowinjore. Ne oneno ni mor mag jomaricho en mana mar kinde machuok, kendo ni onge kiawa ni Jehova ne dhi kawo okang’ mar rieyo weche. (Zab. 73:2, 13-22) Mano e kaka wabende wachalo. Chandruok mwayudo nikech gik maok kare manie piny Satan nyalo nyoso chunywa ahinya. Kata kamano, bedo kanyachiel gi owetewa en gima duogo chunywa kendo konyowa siko gi mor kod ilo mar tiyo ne Jehova.
16. Ere kaka ranyisi mar Hanna nyalo konyowa?
16 To nade kapo ni nitie chal moro e kanyakla ma moni dhi e chokruoge? Nyalo bedo ni wiyi kuot nikech ne ochuno ni iwe migawo moro ma ne in-go chon, kata nyalo bedo ni nitie ywaruok moro e kindi gi owadwa kata nyaminwa moro. Ka en kamano, nono ranyisi mar Hanna nyalo konyo. (Som 1 Samuel 1:4-8.) Inyalo paro kaka chunye nopong’ gi lit ahinya nikech wach moro e kinde gi Penina nyieke. Wachno ne kelo lit moloyo e kinde mar higa ka higa ma joodno ne jodhi chiwo misengini ne Jehova e Shilo. Wachno ne chando chuny Hanna ahinya, mi “noyuak, mokuno chiemo.” To ema podi ne ok oweyo mano mondo omone dhi e chokruoge mag lamo Jehova. Jehova ne oneno kaka nochung’ motegno, mi ne ogwedhe.—1 Sam. 1:11, 20.
17, 18. (a) Gin yore mage mwayudogo jip e chokruoge mag kanyakla? (b) In ineno nade kuom yo mang’won ma Jehova ritowago mondo okonywa chopo e warruok?
17 Ndalogi, Jokristo onego oluw ranyisi mar Hanna. Onego wadhi e chokruoge maok wabare. Mana kaka waduto waseneno, chokruoge chiwonwa jip madwarore. (Hib. 10:24, 25) Mor kod ilo mar bedo gi Jokristo wetewa miyowa hoch. Wach moro matin mowachi e twak kata e paro moro mochiw, nyalo mulo chunywa. E mbaka mwabedogo ka chokruok podi kata bang’e, Jakristo wadwa nyalo chikonwa ite, kata miyowa weche mahoyowa. (Nge. 15:23; 17:17) Sama wating’o dwondwa malo mondo wawer ne Jehova, mano duogo chunywa kendo wabedo mamor. To moloyo, sama ‘weche parruok’ opong’o chunywa, ema dwarore ni wayud jip michiwo e chokruogewa, kama Jehova tegowae kokalo kuom ‘hochne,’ kendo osirowae mondo wasiki kwachung’ motegno.—Zab. 94:18, 19.
18 Nikech wayudo rit mang’won mar Nyasachwa, wawinjo mana kaka Asaf jandik-zaburi, ma nowero ne Jehova niya: “Isemako lweta marachwich. Inichika gi riekoni.” (Zab. 73:23, 24) Mano kaka wamor nikech Jehova ritowa kokonyowa mondo wabi wabed gi warruok!
[Penjo mag Puonjruok]
[Picha manie ite mar 28]
In bende Jehova oseywayi
[Piche manie ite mar 30]
Tiyo gi siem koda puonj mag Nyasaye miyowa rit
[Picha manie ite mar 31]
Jip mwayudo konyowa nano
