Be Imiyo Duong’ mar Jehova Onenre?
Be Imiyo Duong’ mar Jehova Onenre?
“Wamiyo duong’ mar [Jehova] nenore.”—2 KOR. 3:18.
INYALO DWOKO NADE?
Kata obedo ni warem nikech richo, ere kaka wanyalo miyo Jehova duong’?
Ere kaka lamo magwa koda bedowa e chokruoge mag Jokristo konyowa miyo duong’ mar Nyasaye onenre?
En ang’o manyalo konyowa dhi nyime miyo Jehova duong’?
1, 2. Ang’o momiyo nyiso kido kaka mag Jehova en gima nyalorenwa?
WADUTO, nitie kaka wachal gi jonyuolwa e yo moro. Mano emomiyo wanyalo winjo ka ng’ato wacho ne wuowi moro ni, ‘In mana kaka wuoru.’ Ng’ato nyalo nyiso nyako moro ni, ‘Iparona mana minu.’ Kendo kinde mang’eny, nyithindo luwo ranyisi ma gineno kuom jonyuolgi. To nade wan? Be wanyalo luwo ranyisi mar Wuonwa me polo, Jehova? Kata obedo ni pok wanene, wanyalo ng’eyo kidone mabeyo kuom puonjruok Wachne, nono chwechne, kendo paro matut kuom Ndiko, to moloyo, kuom weche Yesu Kristo Wuod Nyasaye, koda gigo manotimo. (Joh. 1:18; Rumi 1:20) Miyo duong’ mar Jehova onenre en gima nyalorenwa.
2 Kane pok ochwe Adam kod Hawa, Nyasaye ne nigi adier ni dhano ne dhi bedo gi nyalo mar chopo dwarone, nyiso kido kaka mage, kendo miye duong’. (Som Chakruok 1:26, 27.) E tichwa ne Nyasaye, onego wanyis kido mag Jalo ma nochweyowa. Kwatimo kamano, wabedo gi thuolo makende mar miyo duong’ mar Nyasaye onenre, kata bed ni wawuok e oganda mane, anyuola mane, kata sombwa ochopo kanye. Nikech ang’o? En nikech “Nyasaye ok odewo wang’ ji; to kuom ogendini duto ng’at moluore, kendo ma timo tim makare, e moyiego.”—Tich 10:34, 35.
3. Tiyo ne Jehova miyo Jokristo winjo nade?
3 Jokristo mowal miyo duong’ mar Jehova onenre. Mano emomiyo jaote Paulo jal ma nowal kuom roho nondiko kama: “Waduto ka wang’wa oel, wamiyo duong’ mar Ruoth nenore, ka wachal ka rang’i; bende ilokowa e kite man gi duong’ ma medore.” (2 Kor. 3:18) Kane janabi Musa olor oa e Got Sinai koting’o kite mondikie Chike Apar, wang’e ne rieny nikech Jehova noa wuoyo kode. (Wuok 34:29, 30) Kata obedo ni gimakamano pok otimore ne Jokristo, kendo wengegi ok rieny e yo makamano, gibedo gi mor sama giwuoyo gi jomoko e wi Jehova, kidone, koda dwarone majaber ne dhano. Mana kaka rieny mar rang’i, Jokristo mowal koda jowetegi ma nigi geno mar chamo ngima e piny, miyo duong’ mar Jehova onenre e kit ngimagi koda e tijgi ne Nyasaye. (2 Kor. 4:1) Be imiyo duong’ mar Jehova onenre kokalo kuom timbeni koda e tichni kaka jaland wach Pinyruoth pile?
WADWARO MIYO DUONG’ MAR JEHOVA ONENRE
4, 5. (a) Kaka Paulo, en lweny mane ma wan-go? (b) Richo osetimowa nade?
4 Kaka jotich Jehova, kuom adier wadwaro ni Jachwechwa oyud pak gi duong’ e gik moko duto mwatimo. Kata kamano, kinde mang’eny gik mwagombo timo ok ema watim. Paulo bende nokedo gi chal makamano. (Som Jo Rumi 7:21-25.) Kolero gimomiyo wan gi lweny makamano, Paulo nondiko kama: “Ji duto oseketho, kendo girem kuom duong’ mar Nyasaye.” (Rumi 3:23) Ee, kokalo kuom richo Adam ma ne onyuolwago, dhano osebedo e bwo ‘Jaloch ma en Richo.’—Rumi 5:12; 6:12.
5 Richo en ang’o? En gimoro amora maok luwre gi kit Jehova, yorege, chikene, koda dwarone. Richo en gima ketho winjruok mar ng’ato gi Nyasaye. Richo miyo wabayo yo, mana kaka ja asere nyalo chielo asere kama ok dwarre. Wanyalo timo richo goyiem kata kopoyorenwa. (Kwan 15:27-31) Richo en gima ogurore ahinya kuom dhano, kendo oketo rageng’ e kindgi gi Jachwechgi. (Zab. 51:5; Isa. 59:2; Kol. 1:21) Omiyo, thoth dhano ok tim dwaro mar Nyasaye, kendo mano miyo ok gibed gi gweth makende mar miyo duong’ mar Jehova onenre e ngimagi. Kuom adier, richo e gimaduong’ moloyo gimoro amora kuom gik mahinyo dhano.
6. Kata obedo ni wan joricho, ere kaka wanyalo miyo Nyasaye duong’?
6 Kata obedo ni warem nikech richo, Jehova osenyisore kaka “Nyasaye ma wuon geno.” (Rumi 15:13) Osechiwo rawar mar misango Yesu Kristo, ma e yo mar tieko richo chuth. Kuom nyiso yie e misangono, koro ok wabed “wasumb richo,” to wabedo gi nyalo mar miyo duong’ mar Jehova onenre. (Rumi 5:19; 6:6; Joh. 3:16) Siko ka wan gi winjruok maber gi Nyasaye miyo wayudo gweth mag Jehova sani, kae to e kinde mabiro, gweth mar bedo dhano maonge richo koda ngima mochwere. Mano kaka wamor ahinya ni Nyasaye nenowa kaka jogo manyalo miyo duong’ mare onenre, kata obedo ni podi wan dhano ma joricho!
MIYO DUONG’ MAR NYASAYE ONENRE
7. En ang’o manyaka wang’e kuomwa wawegi kwadwaro miyo duong’ mar Nyasaye onenre?
7 Mondo wabed gi nyalo mar miyo duong’ mar Nyasaye onenre, nyaka wayie ni wan gi kido mar richo. (2 Weche 6:36) Dwarore ni wafweny kido ma wan-go mag richo kae to wane kaka wanyalo ritore kuomgi, mondo eka watim dongruok mi wachop e okang’ mar miyo Nyasaye duong’ gadier. Kuom ranyisi, kapo ni wasedonjo e richo mar ng’iyo ponografi, nyaka wang’e ni dwarore ni jodongo omiwa kony marieyowa—kendo wakaw okang’ mar dhi irgi. (Jak. 5:14, 15) Mano en okang’ mokwongo madwarore ni wakaw mondo mi wadag e kit ngima mamiyo Nyasaye duong’. Kaka jogo malamo Jehova, nyaka wadhi nyime nonore wawegi mondo wane kabe adier wamakore gi chikene makare. (Nge. 28:18; 1 Kor. 10:12) Kata bed ni wan gi kido mag richo, onego wadhi nyime kedo kodgi mondo wami duong’ mar Nyasaye onenre.
8. Kata obedo ni warem, en ang’o monego watim?
8 Yesu e dhano kende ma ne odak mi otho maok orem korka timo dwaro mar Nyasaye kendo miyo duong’ mar Nyasaye onenre. Kata obedo ni ok wan joma kare chuth kaka Yesu, luwo ranyisine en gima nyalorenwa kendo onego watem timo kamano. (1 Pet. 2:21) Jehova nono kinda mwaketo kaachiel gi dongruok mwatimo, kendo ogwedho kinda mwaketo mondo wamiye duong’.
9. Muma konyo nade e ngima Jokristo madwaro chopo chike Nyasaye?
9 Wach Jehova mosendiknwa nyalo konyowa timo dongruok. Puonjruok Ndiko e yo matut koda somo Muma kwaparo wechege matut, gin gik madwarore. (Zab. 1:1-3) Somo Ndiko pile kapile biro konyowa timo dongruok. (Som Jakobo 1:22-25.) Ng’eyo Muma ema miyo wabedo gi yie, kendo mano ema tegowa mondo kik wadonj e richo maduong’ ma dimi wachwany Jehova.—Zab. 119:11, 47, 48.
10. Ere kaka lamo nyalo konyowa tiyo ne Jehova e okang’ maber chuth?
10 Mondo wami duong’ mar Nyasaye onenre, dwarore bende ni ‘waketre kuom lamo.’ (Rumi 12:12) Wuoyo gi Jehova e lamo en gima nyalorenwa kendo onego watim kamano mondo okonywa tiyone e yo moyiego. Kuom mano, wanyalo kwaye omiwa roho maler, yie momedore, teko mar kwedo tem, koda nyalo mar ‘puonjo kare wachno mar adiera.’ (2 Tim. 2:15; Math. 6:13; Luka 11:13; 17:5) Mana kaka nyathi ketore e lwet wuon mare mondo okonye, e kaka wabende waketore e lwet Wuonwa me polo, Jehova. Ka wakwaye mondo okonywa tiyone e okang’ maber chuth, wanyalo bedo gadier ni obiro timo kamano. Mad kik wapar ngang’ ni wachande! Kar mano, wati gi lamo e pake, goyone erokamano, kwaye mondo otawa, to moloyo, ka wan e bwo tem kata chandruok, kendo wakwaye mondo okonywa tiyone e yo mabiro miyo wakel duong’ ne nyinge maler.—Zab. 86:12; Jak. 1:5-7.
11. Chokruoge mag kanyakla konyowa nade e miyo duong’ mar Nyasaye onenre?
11 Nyasaye osemiyo kweth mar “jatichno mogen, kendo mariek” migawo mar rito rombene mogeno. (Math. 24:45-47; Zab. 100:3) Kweth mar jatichno dwaro ahinya konyo Jokristo wetegi e miyo duong’ mar Jehova onenre. Sama wan e chokruogewa, nitie lokruok moko mihinyo timnwa kaka jotich ma Jokristo, mana kaka jatweng’o nyalo timo lokruok ne lepwa mondo mi wanenre maber moloyo. (Hib. 10:24, 25) Kuom mano, watemuru ahinya chopo kuno e sa, nimar ka wan gi kido mar lewo, to nitie kit ‘tweng’o’ madwarore manyalo bayowa e yor chuny mondo eka wamed bero chalwa kaka jotich Jehova.
WEURU WALUW TIM NYASAYE
12. Ere kaka wanyalo luwo tim Nyasaye?
12 Ka wadwaro miyo duong’ mar Jehova onenre, nyaka ‘wabed joma luwo tim Nyasaye.’ (Efe. 5:1) Yo achiel mar luwo tim Jehova en bedo gi paro kaka mare e wi gik moko. Temo dak e yo moro amora mopogore gi dwarone en gima ok miye duong’, kendo mano nyalo hinyowa. Nikech Satan Jachien ema chiko piny molworowa, nyaka wati matek mondo mi wasin gi gik ma Jehova osin-go, kendo hero e okang’ matut gigo mohero. (Zab. 97:10; 1 Joh. 5:19) Dwarore ni wabed gadier chuth ei chunywa ni, yo kende mowinjore mar tiyo ne Nyasaye, en kuom timo gik moko duto ne duong’ mare.—Som 1 Jo Korintho 10:31.
13. Ang’o momiyo nyaka wasin gi richo, to mano biro miyo wakaw okang’ mane?
13 Jehova osin gi richo, kendo wabende onego watim kamano. Kuom adier, dwarore ni watim kar nyalowa mondo wabed mabor chuth gi richo, maok watem sudo machiegni gi richo ka warito neno ni wanyalo timo kamano e okang’ maromo nade kapok walwar. Kuom ranyisi, dwarore ni watang’ ne tim ng’anjo kata weyo yie, ma en richo manyalo monowa miyo Nyasaye duong’. (Rapar 13:6-9) Omiyo, kik watudre chuth gi jogo moseng’anjo moweyo yie, kata ng’ato ang’ata maluongore ni owadwa to koni ochayo Nyasaye. Mano e gima onego watim kata kapo ni jalo en achiel kuom joodwa. (1 Kor. 5:11) Onge ber mwanyalo yudo kwatemo bedo gi mbaka mag ywaruok gi jogo moseng’anjo moweyo yie, kata jogo maketho nying’ riwruok mar oganda Jehova. Kuom adier, wanyalo hinyore e yor chuny ka watemo nono wechegigo, gibed ei buge kata e Intanet.—Som Isaiah 5:20; Mathayo 7:6.
14. Sama watemo miyo duong’ mar Nyasaye onenre, en kido mane maduong’ monego wanyis, to nikech ang’o?
14 Nyiso hera en yo maduong’ ahinya mar luwo tim Wuonwa me polo. Ee, onego wanyis hera mana kaka en. (1 Joh. 4:16-19) Kuom adier, hera mwanyisore e kindwa fwenyowa kaka jopuonjre Yesu kendo jotich Jehova. (Joh. 13:34, 35) Kata obedo ni seche moko kido mag richo monyuolwago jachandowa, nyaka to wakwedgi mi wanyis ni wan johera kinde duto. Nyago kido mar hera kaachiel gi kido mamoko mag Nyasaye, biro geng’owa kuom gik maricho kendo konyowa kik watim timbe maok ng’won.—2 Pet. 1:5-7.
15. Ere kaka hera mulo winjruokwa gi jomoko?
15 Hera miyo wadwaro timo gik mabeyo ne jomoko. (Rumi 13:8-10) Kuom ranyisi, hera mwaherogo jaodwa biro miyo kik wadwany kata chido otanda mar kend. Hera mwaherogo jodongo kaachiel gi luor mwamiyo tijgi, biro konyowa winjo kendo luwo kaka gichiko. Nyithindo mohero jonyuolgi winjo kendo miyogi luor, maok giwuo kuomgi e yor achaya. Ka wahero dhano wetewa, ok wabi nenogi kaka jomanono mwaloyo gi duong’, kata wuoyo kodgi e yor achaya. (Jak. 3:9) Kendo jodongo mohero rombe Nyasaye biro ritogi e yor muolo.—Tich 20:28, 29.
16. Ere kaka nyiso hera biro konyowa e tijwa mar lendo?
16 Kido mar hera bende onego onenre e tijwa mar lendo. Nikech hera matut mwaherogo Jehova, ok wabi weyo mondo chuny ma jomoko nyiso mar chayo wach mwalando olowa. Kar mano, wabiro dhi nyime lando wach maber. Hera biro miyo waikre maber kendo temo matek mondo walendi e yo mabiro miyo wayud nyak moloyo. Ka kuom adier wahero Nyasaye koda dhano wadwa, ok wabi neno tijwa mar lando Pinyruoth kaka tich mochuno achuna. Kar mano, wabiro nene kaka gweth maduong’ ahinya, kendo time gi ilo.—Math. 10:7.
DHI NYIME MIYO JEHOVA DUONG’
17. Ere kaka ng’eyo ni warem kuom duong’ mar Nyasaye nyalo konyowa?
17 Thoth ji e piny ok kaw wach richo gi pek, wan to wapogore. Mano miyo wakedo gi kido maricho ma wan-go. Ng’eyo ni wan joricho miyo watiego chunywa ma iye, mondo mi chunywano ochwalwa watim gik makare sama gombo mar richo chako dongo e pachwa koda e iwa. (Rumi 7:22, 23) En adier ni nyalo bedo ni wanyap, kata kamano Nyasaye nyalo tegowa mondo watim gima kare e bwo chal moro amora.—2 Kor. 12:10.
18, 19. (a) En ang’o makonyowa locho e lweny me kindwa gi lang chuny maricho? (b) Onego wang’ad mar timo ang’o?
18 Mondo mi wami Jehova duong’, nyaka waked gi lang chuny maricho, ma gin jochiende. Gi lweny mag chuny ma Nyasaye miyowa konyowa locho. (Efe. 6:11-13) Satan siko katemo mayo Jehova duong’ ma Jehova kende ema owinjore oyudi. Jachien bende dhi nyime timo kinda mar ketho winjruokwa gi Jehova. Mano kaka Satan yudo wichkuot sama wan kaachiel gi chwo, mon, koda nyithindo tara gi tara mabende onyuol e richo, siko kochung’ motegno kendo miyo Nyasaye duong’! Kuom mano, weuru wadhi nyime pako Jehova, mana kaka chwech mag polo malando ni: “Yaye Ruodhwa kendo Nyasachwa, iwinjori nwang’o duong’ gi pak gi teko; nikech in e ma nichueyo gik moko duto, kendo dwaroni omiyo gintie, kendo nochuegi.”—Fwe. 4:11.
19 Mad wang’ad mar dhi nyime miyo Jehova duong’, kata ang’o timre. Kuom adier, owinjo mamor sama oneno ka ji mang’eny timo kar nyalogi e luwo timne, kendo e miyo duong’ mare onenre. (Nge. 27:11) Mad wabed gi chuny kaka mar Daudi ma nowero niya: “Napaki, A Jehova Nyasacha, gi chunya duto; kendo nami nyingi duong’ nyaka chieng’.” (Zab. 86:12) Mano kaka warito ahinya kindeno ma wanami duong’ mar Jehova onenre e yo malong’o chuth kendo pake nyaka chieng’! Mano biro kelo mor mogundho ne dhano maluwo chik Nyasaye. Be imiyo duong’ mar Jehova Nyasaye onenre gie sani, ka in gi geno mar timo kamano kuom ndalo duto nyaka chieng’?
[Penjo mag Puonjruok]
[Piche manie ite mar 27]
Be imiyo Jehova duong’ kitiyo gi yore monyis kae?
