Bed gi Paro Mowinjore Kata Ka Kend Maru Ok Dhi Maber

“To kuom jo mosekendo, gi jo mosekendi, ok an, to Ruoth e mochiko.”—1 KOR. 7:10.

BE INYALO LERO?

Ang’o momiyo inyalo wach ni Nyasaye ema riwo ji e kend?

Ere kaka jodongo nyalo konyo Jokristo ma nigi chandruoge mag kend?

Onego wakaw kend nade?

1. Jokristo neno kend nade, to nikech ang’o?

SAMA Jokristo donjo e kend, gitimo singo e nyim Nyasaye—ma en gima ok onego okaw mayot. (Ekl. 5:4-6) Nimar Jehova e Jachak chenro mar kend, en ema ‘oriwo’ joma nie kend. (Mari. 10:9) E wang’ Nyasaye, riwruogno betie kata bed ni nitie chike mopogore opogore mag arus. Kuom mano, jotich Jehova onego kaw kend kaka chenro masiko, kata bed ni ne gitimo arus ka gin jotich Jehova kata ok kamano.

2. Gin penjo mage mibiro non e sulani?

² Kend madhi maber nyalo kelo mor mogundho. To nade kapo ni nitie chandruok e kend? Be kend maok dhi maber inyalo tegi? Jogo ma kend margi onge gi kuwe nyalo yudo kony kanye?

BE OBIRO KELO MOR KOSO LIT E CHUNY?

3, 4. Ang’o manyalo timore kapo ni ng’ato ong’ado paro maok nyis rieko sama oyiero jal modwaro kendorego?

³ Sama kend mar Jakristo dhi maber, mor betie kendo Jehova yudo duong’. To ka ok odhi maber, chuny lit ema nyalo betie. Jakristo maparo donjo e kend nyalo miyo kend mare ochakre maber kuom luwo kaka Nyasaye chiko. Kata kamano, ka ng’ato oyiero dichwo kata dhako e yo maok nyis rieko, mano nyalo kelone parruok mang’eny koda kuyo. Kuom ranyisi, nitie rowere moko madonjo e osiep mag kisera to koni pok giikore ne ting’ mag ngima mar kend. Jomoko to yudo jaot e Intanet kae to kend margi bedo maonge gi mor. Moko timo richo maduong’ e kinde kisera, kae to ging’ado mar kendore akenda, kendo mano nyalo miyo gichak dak maok gimire luor e kindgi.

⁴ Nitie Jokristo moko maok donj e kend “mana kuom Ruoth,” kendo kinde mang’eny giyudo chandruok  nikech bedo e ot ma ji ok ni e yie achiel. (1 Kor. 7:39) Kapo ni mano e gima osetimoreni, kwa Nyasaye mondo ong’wonni kendo okonyi. Jehova ok geng’ chandruoge mayudo ng’ato nikech kethone machon, kata kamano okonyo jogo moloko chunygi mondo oked maber gi chandruogego. (Zab. 130:1-4) Ket chunyi kuom timo gik mamoro Jehova sani koda nyakachieng’, kendo ‘mor mar Jehova nobed tekoni.’—Neh. 8:10.

SAMA NITIE GIK MADWARO KETHO KEND

5. Gin paro mage ma ng’ato ok onego obedgo ka kend mare onge mor?

⁵ Jogo ma kend margi kelonegi chuny lit nyalo parore kama: ‘Be nitie tiende temo reso kend marwa maonge morni? Yaye dabed ni anyalo loko chien, to dakendora gi ng’at machielo!’ Ginyalo gombo ketho kend margi, ka giwacho kama, ‘Ee, koro abedie thuolo kendo! Donge anyalo manyo kaka daketh kendni chuth? Kata kapo ni ok anyal timo kamano e yo ma Ndiko oriwo lwedo, donge anyalo mana pogo dak mi adhi nyime dak mamor kendo?’ Kar bedo gi paro kaka mago kata leko aleka kaka ngima dine obedo, Jokristo onego tim duto maginyalo e chal margi gie sani, kuom manyo kendo luwo puonj mag Nyasaye.

6. Ler ane gima Yesu nowacho, kaluwore gi Mathayo 19:9.

⁶ Kapo ni dichwo kata dhako ma Jakristo oketho kend mare chuth, to onyalo kata ok onyal bedo thuolo mar donjo e kend manyien. Nimar Yesu nowacho kama: “Ng’ato ma oriembo chiege, mak mana kuom terruok, mi okendo machielo, oterore.” (Math. 19:9) E ndikono, “terruok” oriwo nindruok oko mar kend, chode, koda timbe mamoko maricho mag nindruok. Sama onge richo mar terruok ma achiel kuomgi odonjoe, jomokendore onego opar matut ahinya kapo ni paro moro amora mar ketho kend obironegi.

7. Ang’o ma ji nyalo wacho kapo ni kend mar Jakristo ok dhi maber?

⁷ Kapo ni ng’ato kendne okethore, mano nyalo nyiso ni nitie gima ok ber e winjruokne gi Nyasaye. Jaote Paulo nopenjo maber kama: “Nimar ka ng’ato kiya loyo pare owuon, dolo nadi kanisa mar Nyasaye?” (1 Tim. 3:5) Kuom adier, sama jomokendore wacho ni gin Jokristo koni to kend margi ok dhi maber, ji manenogi nyalo wacho ni adier ok gidak kaluwore gi puonj ma gilando.—Rumi 2:21-24.

8. Ang’o manyalo bedo ni rach sama Jokristo mokendore oyiero mar werruok?

⁸ Sama jogo mosebatisi chano mar  pogo dak, kata ketho kend margi chuth ka Muma ok oriwo lwedo, onge kiawa ni nitie gimarach e winjruokgi gi Nyasaye. Nyalo bedo ni ng’ato achiel kuomgi kata giduto ok giluw puonj mag Ndiko. Kapo ni ‘gigeno Jehova gi chunygi duto,’ onge gima nyalo monogi reso kend margi.—Som Ngeche 3:5, 6.

9. Ere kaka Jokristo moko oseyudo ber nikech ne ok giol piyo e temo loso kend margi?

⁹ Nitie kend mang’eny ma ne nenore ni ochomo e kethruok, to bang’e ne gilokore mi gikone gibedo maber ahinya. Pile, Jokristo maok ol mapiyo sama chandruok nie kend, yudo nyak mabeyo. Non ane ber manyalo betie kata e ot ma ji ok ni e yie achiel. Jaote Petro nondiko kama: “Un mon, winjuru chwou uwegi, mondo ka jo moko kuomgi ok oyie winjo Wach, to oresgi gi tim mag mondgi, ma ok wachnigi wach, ka girango ngimau maler kuluoro Nyasaye.” (1 Pet. 3:1, 2) Ee, ng’ama ok ni e yie nyalo rwako yie madier nikech tim maber mar jaode! Kend moseres kamano miyo Nyasaye duong’ kendo nyalo kelo gweth mogundho ne dichwo, chiege, koda nyithindo manyalo bet ni gin-go.

10, 11. Gin chandruoge mage manyalo biro e kend kata ka ng’ato ok gen, to Jakristo nyalo bedo gadier kuom wach mane?

¹⁰ Gombo mar moro Jehova miyo thoth Jokristo yiero joma gikendorego e kind Jokristo wetegi mosechiwore ne Nyasaye. Kata mana e kind Jokristo madier, weche nyalo lokore e yo ma ng’ato ne ok ogeno. Kuom ranyisi, kata obedo ni en gima ok jatimre ahinya, nitie kinde moko ma jaot nyalo bedo gi chandruoge madongo mag parruok. Kinde moko bang’ arus, achiel kuomgi nyalo dok chien kendo weyo tich lendo. Kuom ranyisi: Linda, * Jakristo ma jakinda mabende en miyo mong’eyo rito ode, ne oneno kaka chwore manosebatisi osiko e yor richo, mi ne ogole oko mar kanyakla. Ang’o ma Jakristo onego otim kapo ni kend mare nenore ni kethore e yo makamano?

¹¹ Dibed ni inyalo penjori kama: ‘Be ochuno ni nyaka adhi nyime temo reso kend mara e bwo chal duto te?’ Onge ng’ama nyalo kata monego otimni yiero kuom wachno. Kata kamano, nitie gik momiyo ber ka ng’ato odhi nyime nano e bwo kend ma nigi chandruok. Dichwo kata dhako molworo Nyasaye ma nano e kend ma nigi chandruok nikech odwaro bedo gi chuny maonge bura, obedo malong’o e wang’ Nyasaye. (Som 1 Petro 2:19, 20.) Kokalo kuom Wachne koda rohone, Jehova biro konyo Jakristo maketo kinda ahinya e temo reso kend margi maok dhi maber.

GIIKORE MAR KONYO

12. Jodongo biro nenowa nade sama wadhi manyo kony kuomgi?

¹² Kapo ni in gi chandruok e kend, kik iluor dhi manyo kony kuom Jokristo motegno e yie. Jodongo tiyo kaka jokwath mag kweth, kendo gibiro bedo mamor chiwoni paro mawuok e Ndiko mokudhi gi much Nyasaye. (Tich 20:28; Jak. 5:14, 15) Kik ing’ad ni in kaachiel gi jaodi ubiro lalo luor ma un-go e nyim jodongo, kapo ni udhi manyo kony kuomgi,  kendo wuoyo kodgi e wi chandruok moro maduong’ ma un-go e kend. Luor margi kuomu biro medore ka gineno kaka un gi kinda kod gombo mar moro Nyasaye.

13. En puonj mane mayudore e 1 Jo Korintho 7:10-16?

¹³ Sama Jakristo manie kend ma ng’at achiel ok nie yie okwayo jodongo mondo okonye, jodongo nyalo tiyo gi puonj kaka ma Paulo nondiko niya: “To kuom jo mosekendo, gi jo mosekendi, ok an, to Ruoth e mochiko ni, dhako kik owe chwore; to koweye onego osik ma ok okende, kata mondo odog owinjre gi chwore; kendo dichwo kik owe chiege. . . . In dhako, ing’eyo nadi, kata nires chwori? Koso in dichwo, ing’eyo nadi, kata nires chiegi?” (1 Kor. 7:10-16) Mano kaka en gweth maduong’ ndi sama ng’ato omiyo jaode obiro e lamo madier!

14, 15. Gin ang’o manyalo miyo Jakristo manie kend opar mar weyo jaode, to ang’o momiyo dwarore paro matut kapok otimo yiero?

¹⁴ Gin chal mage manyalo miyo dhako ma Jakristo ‘owe’ chwore? Moko oseyiero mar pogo dak nikech jaode otamore goyiem chiwo gik mochuno e ngima. To jomoko osetimo kamano nikech timbe gero mokalo tong’ kata nikech otamgi chuth luwo yie margi kaka Jokristo.

¹⁵ Dong’ e kend makamano kata pogo dak, en yiero mar ng’ato owuon. Kata kamano, ng’at mosebatisi manie kendno, onego opar matut e yor lamo kendo gi chuny maratiro. Kuom ranyisi, be en adier chuth ni ng’at maok ni e yieno ema osebedo kamono Jakristo luwo weche mag lamo, koso Jakristono ema osejwang’o puonjruok mar Muma, obare ne chokruoge, kendo ok ochomre tir gi tij lendo?

16. Ang’o momiyo Jakristo ok bi rikni timo yiero mar ketho kend chuth?

¹⁶ Nimar wakawo winjruokwa gi Nyasaye kaka gimaduong’ ahinya kendo wamor gi michne mar kend, ok wabi rikini timo yiero kaka mar ketho kend chuth. Kaka jotich Jehova, wadewo ahinya wach puodho nyinge maler. Kuom adier, ok wabi tiyo gi riekni maling’ling’ mag ketho kend marwa ka koni waketo chunywa kuom donjo e kend machielo.—Yer. 17:9; Mal. 2:13-16.

17. Gin chal kaka mage ma inyalo wach ni Nyasaye luongo Jokristo manie kend mondo odag e kuwe?

¹⁷ Jakristo mokendore gi ng’ama ok ni e yie onego otem matek mondo omi kend mare osiki kotegno. Kata kamano, kapo ni Jakristo osetimo duto monyalo mondo ores kend margi, to jaode maok ni e yie podi otamore chuth dong’ kode, to Jakristono ok onego opar ni en gi ketho e nyim Nyasaye. Paulo  nondiko kama: “Jalo ma ok oyie, koa, we oa. Owadwa kata nyaminwa ok otue kuom weche ma kamagi. Nyasaye noluongowa mondo wadag e kuwe.”—1 Kor. 7:15. *

GEN KUOM JEHOVA

18. Kata kapo ni ng’ato ok oreso kend mare, gin ber mage manyalo betie nikech kinda mar temo resogo?

¹⁸ Sama ikedo gi chandruok moro amora manie kend, dhi ir Jehova mondo iyud chir kendo gen kuome kinde duto. (Som Zaburi 27:14.) Par ne wach Linda, ma osewuo kuom motelo. Gikone kend mare ne okethore chuth, kata obedo ni nosetemo kuom higini mang’eny reso kendno. Be oparo ni ne oketho sechene kuom timo kamano? Owacho kama: “Ooyo ngang’. Kinda mara ne ochiwo neno ne jomoko. An gi chuny maonge bura. To moloyo duto, higinigo ne okonyo nyarwa dong’ kochung’ motegno e adiera. Ne odongo mobedo jakinda kendo Janeno mar Jehova mochiwore.”

19. Ang’o manyalo timore ka ng’ato oketo kinda mar reso kend mare?

¹⁹ Dhako ma Jakristo miluongo ni Marilyn mor nikech ne ogeno kuom Nyasaye, kendo ne oketo kinda ahinya mondo ores kend mare. Owacho kama: “Ne ayudo tem mar pogo dak gi chwora nikech ne ok opidha e yor ringruok koda e yor chuny. Kata kamano, chon chwora ne en jaduong’-kanyakla kane pok otimo yiero marach korka chenro mag ohala. Ne ochako bare e chokruoge, kendo ne waweyo wuoyo e kindwa. Tim mahundu ma ne otimore e taon marwa ne omiyo adhi dak kar kenda. Bang’e ne abiro mafwenyo ni an bende ne an gi ketho. Ne wachako wuoyo kendo, timo puonjruok kaka joot, kendo dhi e chokruoge maok wabare. Jodongo ne ng’won kodwa kendo ne gikonyowa ahinya. Kend marwa ne ochako dhi maber kendo. Bang’ kinde, chwora ne otimo dongruok mi obedo gi migepe e kanyakla kendo. Ne wachandore to kata kamano, ne wayudo puonj, mi bang’e weche ne olokore mobedo maber.”

20, 21. Kuom wach kend, en ang’o monego wang’ad mar timo?

²⁰ Kata bed ni wan e kend kata ok wan e kend, weuru mondo kinde duto watim gik moko gi chir kendo geno Jehova. Kapo ni waromo gi chandruoge mag kend, onego watim matek mondo walosgi, kendo keto e paro ni jogo ma kend oriwo “ok pod gin ji ariyo, to gin ringruok achiel.” (Math. 19:6) Kendo, weuru waket e paro ni ka wanano maok waol e bwo chandruoge e kend ma nitie ng’ama ok ni e yie, wanyalo bedo gi mor mogundho mar konyo jaodwa rwako lamo madier.

²¹ Kata bed ni wan e chal manade, weuru mondo wang’ad mar keto ranyisi mowinjore mondo mi jogo manenowa oko mar kanyakla ochiw neno maber. Kapo ni nitie gik madwaro ketho kend marwa, we mondo wakwa Jehova e lamo gi chunywa duto, wanonre gi chuny maratiro, wang’i Ndiko e yo matut, kendo manyo kony kuom jodongo. To moloyo chuth, weuru mondo wang’ad mar moro Jehova Nyasaye e weche duto, kendo nyiso ni wakawo kend kaka mich majaber moa kuome.

[Weche moler piny]

[Penjo mag Puonjruok]

[Weche manie ite mar 10]

Kinde mang’eny, Jokristo maok ol mapiyo e kend maok dhi maber, yudo ber

[Weche manie ite mar 12]

Gen kuom Jehova kinde duto kendo dhi ire mondo iyud chir

[Picha manie ite mar 9]

Jehova gwedho Jokristo mokendore maketo kinda ahinya e temo reso kend margi maok dhi maber

[Picha manie ite mar 11]

Kanyakla mar Jokristo nyalo bedo kama ng’ato yudoe hoch koda kony mar Nyasaye