“Ritreuru Kuom Thop Jo Farisai”

Yesu nosiemo jopuonjrene kama: “Ritreuru kuom thop jo Farisai, en gango wach.” (Luka 12:1) Siem mar Yesuno bende nondik gi Mathayo, manyiso maler ni Yesu ne kwedo “puonj” mar jo Farisai.—Math. 16:12.

Kinde moko Muma wuoyo kuom ‘thowi,’ kaka ranyisi mar kethruok. Puonj koda paro mag jo Farisai ne ketho pach jowinjo maggi. Ang’o momiyo puonj mag jo Farisai ne kelo hinyruok?

1 Jo Farisai ne kawore kendgi kaka jomakare, kendo ne gichayo ji ajia mapile.

Tim mar kawruokno iwuoyoe e achiel kuom ngero mag Yesu. Ne owacho kama: “Ja Farisai nochung’, molemo kende kama: ‘Nyasaye, agoyoni erokamano ni an ok achal gi jo moko duto, ma jomecho, jo ma gango wach, jo ma terore, kata gi jasol osuruni. Ariyo kech ndalo ariyo juma ka juma, kendo kuom gik moko duto manwang’o achiwo achiel kuom apar.’ To jasol osuru nochung’ gi ku mabor, ne ok odwar kata chomo wang’e e polo, to nogoyo kore kowacho niya, ‘Nyasaye, ikecha, an jaricho.’”—Luka 18:11-13.

Yesu nopwoyo jasol osuru nikech chunye mobolore, kowacho kama: “Akonu ni, ng’atni nolor odhi e ode kokete kare, moloyo ng’at machielo cha; nikech ng’ato ka ng’ato ma pakore, chieng’ nochaye; to ng’ato ma chare, chieng’ nopake.” (Luka 18:14) Kata obedo ni josol osuru ne ong’ere kaka jo mibadhi, Yesu ne dwaro konyo moko kuomgi ma ne winje. Josol osuri ariyo nobiro mobedo jolupne—Mathayo gi Zakayo.

Nade kapo ni ng’ato paro ni olong’o moloyo jomoko nikech migepe koda nyalo moko ma Nyasaye omiye, kata oneno ni jomoko nigi rem kata nyawo moko? Onego wawe mapiyo paro kaka mago nimar Ndiko wacho kama: “Hera otimo kinda, kendo ong’won; hera ok tim nyiego, kata ok osungre, ok opakre, ok otim gi ma kuodo wich, ok odwar mare kende; iye ok wang’; ok odew gi marach motimne; ok omor gi tim ma ok kare, to omor gi adiera.”—1 Kor. 13:4-6.

Onego wabed gi chuny machal gi mar jaote Paulo. Bang’ nyiso ni “Kristo nobiro e piny mondo owar joricho,” Paulo nomedo kama: “An e jaricho marach moloyogi duto.”—1 Tim. 1:15.

Penjo monego wapar matut:

Be ang’eyo ni an jaricho kendo ni Jehova resa kokalo kuom ng’wonone maok awinjora yudo? Koso aparo ni aloyo jomoko nikech asetiyo ne Jehova kuom higini mang’eny, kata an gi migepe moko e riwruok mar oganda Nyasaye, kata nikech nyalo minyuologo ng’ato?

  2 Jo Farisai ne dwaro mana moro jomoko kokalo kuom timgi mar nyisruok e lela kaka jomakare. ne gigombo huma koda nyinge midendogigo.

Kata kamano, Yesu nochiwo siem kama: “Timbegi duto gitimo ni mondo ginere nyim ji; nikech gitueyo migelni malach, kendo gimedo usi momin e riak lepgi, kendo gihero kuonde bet moyiedhi e chiemo, kod kombe manyime e sunagoke, gi mos e chirini, kendo mondo ji oluonggi ni Rabbi.” (Math. 23:5-7) Yesu to nonyiso chuny mopogore gi mar jo Farisai chuth. Kata obedo ni ne en Wuowi makare mar Nyasaye, ne onyiso bolruok. Kane ng’at moro oluonge ni japuonj “maber,” Yesu nodwoke niya: “Ang’o momiyo iluonga ni maber? Onge ng’a maber, mak mana Nyasaye.” (Mari. 10:18) Kinde moro Yesu noluoko tiend jopuonjrene koketo ranyis ma jolupne onego oluw kuom wach bolruok.—Joh. 13:1-15.

Jakristo madier onego oti ne Jokristo wetene. (Gal. 5:13) Jogo madwaro chopo e migawo mar tayo e kanyakla onego otim kamano moloyo. En gima ber “ka ng’ato dwaro mondo obed jakwadh kanisa,” kata kamano, gima duong’ momiyo ng’ato onego onyis dwarono en nikech gombo mar konyo jomoko. Bedo ‘jakwath’ kata jarit, ok en kar huma kata telo. Jogo matiyo kaka jorit onego obed joma ‘odembore e chuny,’ mana kaka Yesu.—1 Tim. 3:1, 6; Math. 11:29.

Penjo monego wapar matut:

Be ahero timo gik mabeyo ne jogo ma nigi ting’ e kanyakla moloyo kaka atimo ne jomoko, seche moko ka ageno yudo huma kata migepe momedore? Be ajayiero mana tije moko mag Nyasaye manenore ni miyo ayudo pak moa kuom ji? Be atemo mana timo maber e wang’ jomoko?

  3 Chike ma jo Farisai ne omedo kuom Chik Musa, ne omiyo luwo Chik Musa obedo ting’ mapek ne ji mapile.

Chik Musa ne oting’o gik moko duto ma ne dwarore e konyo Jo-Israel lamo Jehova. Kata kamano, Chikno ne ok olero weche mamoko matindotindo ma ne onego otim. Kuom ranyisi, Chik ne okwero tich e odiechieng’ Sabato, kata kamano Chikno ne ok ochano gik ma ng’ato ne onego otim koda gik ma ne ok onego otim e odiechieng’no. (Wuok 20:10) Jo Farisai ne omedo chikegi giwegi koda weche mamoko mondo gilergo weche momedore e wi Sabato. Yesu ne otamore luwo chike moridi mag jo Farisai, to ne oluwo Chik Musa. (Math. 5:17, 18; 23:23) Ne ong’eyo gimomiyo ne oket Chik. Yesu nong’eyo gik ma ne dwarore kaluwore gi Chik, kaka kecho jomoko kendo bedo gi ng’wono. Yesu ne ok rid chik, kata sama jolupne ne oboth. Kuom ranyisi, e otieno ma ne omake, ne oyudo osejiwo adek kuom jootene mondo kik nind kendo gisiki ka girito, kata kamano jootego podi ne nindo otero kinde monwoyore. To ema podi Yesu ne okechogi kuom wacho kama: “Adier chuny oyie, to ringruok ema nyap.”—Mari. 14:34-42.

Penjo monego wapar matut:

Be ajarido ne jomoko chik, kata temo keto pacha awuon mondo obed chik ma ji onego oluw? Be aweyo mondo ji otim gik moko kaluwore gi nyalo maggi?

Tem ane paro pogruok kuom puonj mag Yesu koda mago mag jo Farisai. Be ineno kuonde monego itimie lokruok? Ka en kamano, donge inyalo ng’ado mar loso wachno?

[Piche manie ite mar 28]

Jo Farisai ne rwakore gi migelni moting’o ndiko.—Math. 23:2, 5

[Picha manie ite mar 29]

Mopogore gi jo Farisai ma ne ng’awore, jodong-kanyakla nyiso bolruok kuom tiyo ne jomoko

[Picha manie ite mar 30]

Be iweyo mondo ji otim gik ma ginyalo, kaka Yesu ne otimo?