Bed Molony Many “Rieko Makare”

Ngima chalo gi wuotho e nam. Kata kamano, rieko morem mar dhano ok osekonye e yo maber chuth e wuodh ngima. Ji mathoth ngimagi osekethore e wuodhni mana kaka yie makethore e pi motimo apaka madongo. (Zab. 107:23, 27) Ang’o momiyo ranyisini owinjore?

E kinde machon, wuodh nam ne nigi pek mang’eny ma ne dwaro ni ng’ato obed mariek. Riekono ng’enyne ne ipuonjo mana gi jokwang’ yie kata jotend yie molony. (Tich 27:9-11) Piche mang’eny machon nyiso jatend yie ka ogor maduong’ moloyo jomamoko mondo onyis ni migawo mare ne duong’. Mondo gidonj e nam, jokwang’ yie ne puonjore fwenyo sulwe, chal mar yamo, kod weche mamoko ma ne nyalo konyogi. Muma lero chal mar jomoko ni ne gin gi “rieko,” kotiyo gi wach manyiso ni ne gin jo molony.—Eze. 27:8.

Nyagruok gi pek mag ngima ndalogi, nyalo bedo matek mana kaka wuodh nam e kinde machon. Ang’o manyalo konyowa?

ERE KAKA WANYALO YUDO “RIEKO MAKARE”?

Sama iparo kaka ngima chalo gi wuodh nam, par ane bende adiera ma Muma wachonwa niya: ‘Ng’a mariek mondo owinji, omed ameda kuom puonjruok; mondo ng’ato ma weche duto donjone, ong’e ng’ado ni ji rieko makare.’ (Nge. 1:5, 6) Wach moti godo e dho-Hibrania ni “rieko makare” nyalo nyiso gima jatend yie ne jatimo chon ka en e yie. Wachno nyiso nyalo ma jatend yie nigo mar chiko yie gi rieko.

Kata obedo ni kinda dwarore, wanyalo yudo “rieko” kendo puonjore “kwang’o” ngimawa e pige mag ngima. Mana kaka bug Ngeche nyiso, nyaka wabed joma tiyo gi “rieko,” joma ‘weche donjonigi,’ kendo “bedo molony.” (Nge. 1:2-6; 2:1-9) Bende, wiwa ok onego owil gi manyo kony mowuok kuom Nyasaye nikech kata mana joma richo bende nyalo ‘ng’ado’ rieko mag wuond.​—Nge. 12:5.

Omiyo dwarore ahinya ni wabed joma puonjore Wach Nyasaye gi kinda. Kuom timo puonjruok kamano, wanyalo yudo weche mabeyo e wi Jehova koda jal manyisowa kite e yo makare, Yesu Kristo. (Joh. 14:9) Wayudo puonj mang’eny mag rieko e chokruogewa mag Jokristo. E wi mano, wanyalo yudo riekono kuom jomoko bende moriwo koda jonyuolwa.​—Nge. 23:22.

PAR MOTELO KENDO ITIM CHENRO

“Rieko makare” dwarore ahinya sama waromo gi chandruoge mag ngima machalo gi apaka. Keto kiawa kuom okang’ monego wakaw ka wan e chal matek, nyalo kelonwa chandruok marach ahinya.​—Jak. 1:5, 6.

 Wach mitiyogo ni “rieko makare,” bende inyalo ti go kiwuoyo kuom lweny. Wasomo e Muma kama: “Ni mar initim lueny mikedo [“chenro mariek,” The Revised English Bible] ka ng’a mariek oteloni; kendo kuom jong’ad rieko mang’eny piny odak mang’won.”​—Nge. 20:18; 24:6.

Mana kaka ng’at mariek mong’eyo chano lweny timo, wan bende onego wang’e chon gigo manyalo ketho winjruokwa gi Nyasaye. (Nge. 22:3) Kuom ranyisi, nyalo chuno mondo ing’ad chon kabe ibiro yie gi tich moro manyien mar andika kata mondo omedi telo e tich. Owinjore ipar chon kuom wach chudo, seche mibiro tiyogo e dhi koda wuok e tich, kaachiel gi weche mamoko. E wi mano, pod nitie weche mamoko manyaka ipenjri: Be tich madwaro timoni owinjore gi puonj mag Muma? Be seche mag donjo kendo wuok e tich biro tuomore gi gigo monego atim kaka Jakristo?​—Luka 14:28-30.

Loretta, ma en achiel kuom Joneno mag Jehova, ne nigi tich maber e kambi moro maloso chiemo. Kane ochuno ni kambino odar odhi kamachielo, Loretta ne omed telo e tich. Jotelo mag kambino nowachone niya: “Mani en thuolo makende maok iniyud kendo. Waseyudo kata ni nitie Od Romo kama wadhieno.” Kata kamano Loretta to ne dwaro keto ngimane obed mayot mondo oti ne Jachwech e okang’ momedore. Noneno ni telo ma imiyeno ne dhi mone yudo thuolo moromo mag chopo tijene kaka Jakristo. Omiyo, nondiko barua mar weyo tich kata obedo ni jatelo nonyise ni en kende e jatich ma ne ok digiher mondo owegi. Loretta, makoro osebedo painia mapile chiegni higini 20, wacho ni ber moseneno e tije kaka painia en nikech nochano ngimane kotiyo gi “rieko makare,” kaluwore gi puonj mayudore e Wach Nyasaye. Nomedo jiwo winjruokne gi Jehova kendo osekonyo ji mang’eny mondo oyie gi adiera mag Muma.

“Rieko makare” bende dwarore ahinya e ngima mar joot. Pidho nyithindo en tich makawo higini mang’eny, kendo yiero ma ng’ato timo e weche mag Nyasaye kata e luwo gige ringruok nyalo chiko ahinya kaka ngima mar joode biro bedo. (Nge. 22:6) Kuom ranyisi, jonyuol ma Jokristo nyalo penjore niya: ‘Be mbaka mwagoyo koda ranyisi mwaketo ne nyithindwa puonjogi hero chike Nyasaye mabiro konyogi nyagruok gi ngima e yo mariek ka koro gisebedo jomadongo? Be kit ngima mwadakie konyogi ng’eyo kaka ginyalo dak e ngima mayot ka giketo pachgi duto e tij Nyasaye?’​—1 Tim. 6:6-10, 18, 19.

Ngima maber ok en bedo gi mwandu mang’eny kata manyo gik mathoth ma jopiny luwo. Ruoth Suleman nong’eyo wachni. Notelne gi much Nyasaye e ndiko niya: ‘Piny biro bet maber ne jogo moluoro Nyasaye, maluor e nyime.’ (Ekl. 8:12) Mano nyiso maonge kiawa kaka manyo “rieko makare” motenore kuom Wach Nyasaye, en gima ber chuth.​—2 Tim. 3:16, 17.

[Picha manie ite mar 30]

E nyiso kaka jotend yie ne nigi migawo maduong’, ne igoro pichegi madongo moloyo jokwang’ yie mamoko

[En mar]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.