Sigand Ngima

Gima ne ‘Wapuonjore’ e Tijwa ne Nyasaye

Kaka Iwachonwa gi Oliver Randriamora

“Ang’eyo bet kachando, kendo ang’eyo bet ka an gi mathoth. E kinde duto, kendo e weche duto, asepuonjora bet moyieng’, kendo bet modenyo . . . Anyalo timo gik moko duto kuom en ma miya teko.”​​—⁠Fili. 4:⁠12, 13.

WECHE ma jaote Paulo nowacho chon-gi osejiwowa ahinya an kod jaoda, Oly. Mana kaka Paulo, ‘wasepuonjore’ geno chuth kuom Jehova sama watiyone e piny Madagascar ka.

Kane min Oly ochako puonjore Muma gi Joneno mag Jehova e higa mar 1982, noyudo wan gi Oly wasetimo singruok mar keny. An bende nachako puonjora Muma, Oly to nochako bang’e. Ne wakendore e higa mar 1983, ne obatiswa e higa mar 1985, kae to mapiyo bang’e ne wachako lendo kaka jopainia makonyo. E dwe mar Julai 1986, ne wabedo jopainia mapile.

E dwe mar Septemba 1987, ne wachako tiyo ne Nyasaye kaka jopainia makende. E migawowa mokwongo, noorwa e taon moro matin yo nyandwat e piny Madagascar kama ne onge kanyakla moro amora. Nitie dhoudi madongo 18 kod mamoko matindo tindo mang’eny maok nyal kwan e piny Madagascar, kendo kitgi gi timbegi opogore ahinya. Malagasy e dhok moyangi kata kamano dhok moko matindo tindo bende itiyogo. Omiyo ne wachako puonjore dhok ma ne itiyogo e taon ma ne wadakieno, to mano nomiyo jo taondno orwakowa mapiyo ahinya.

Ka eka ne wachako, ne ajagolo twak Jumapil ka Jumapil, to bang’e Oly ne pamo lwete matek. Ne wan mana ji ariyo kendwa. E wi mano, ne watimo Skul mar Tij Nyasaye ka Oly golo twege ka gima en gi wuon ot. Ne wamor ahinya kane jarit-alwora okwayowa mondo watim lokruok e yo ma ne watimogo chokruogewa.

To nikech posta ne ok en gima igeno ahinya e kindego, seche moko pesa ma ne ofis oronwa mondo wakonyorego ne jadeko. Omiyo ne wapuonjore dak ka wan gi gik matin. Kinde moro, ne waonge pesa moromowa chopo e chokruok mar alwora ma ne itimo kilomita madirom 130. Ne waparo puonj moro maber ma Janeno wadwa nonyisowa niya: “Nyisuru Jehova gik machandou. Donge tich mutiyoni en mare.” Omiyo ne walemo, kae to wang’ado ni wabiro wuotho gi tiendwa. To mana kapok wawuok, owadwa moro nolimowa apoya kae to omiyowa mich moro​​—⁠pesa moromowa dhi e chokruogno!

TIJ ALWORA

E dwe mar Februar higa 1991, ne oketa jarit-alwora. Kindeno, grubwa nosedongore mochopo  jolendo 9, ka 3 kuomgi ne gin mosebatisi, kendo ne wajachopo ji 50 e chokruogewa. Bang’ yudo tiegruok kaka jarit-alwora, noorwa e alwora moro e dala maduong’ mar Antananarivo. E higa mar 1993, nochak oorwa kendo e alwora machielo yo ugwe e pinyno. Chal mar ngima ne opogore ahinya gi ma ne wadakie ka wan Antananarivo.

Mondo wachop e kanyakla koda e grube ma ne ni kuonde maboyo, ne chuno ni nyaka wawuoth gi tiendwa seche moko kilomita madirom 145 ka wang’ado gode motimo bunge motwere ahinya. Ne wajating’o osigo matin kaka nyalore. Kata kamano, kane twak mar jarit-alwora dwaro ni onyis piche mineno gi masin, kaka ne jatimore ndalogo, osikewa ne medore. Oly ne ting’o masindno, to an nating’o betri mar mtoka.

Odiechieng’ achiel, ne wajowuotho kilomita 40 mondo wachop e kanyakla machielo. E wuodhewago, ne chunowa ni nyaka watweny gode, wang’ad aoche kendo yoro chuodho. Seche moko ne wanindo e bath ndara kata kamano ne wajatemo ahinya mondo wanwang’ kar nindo e gweng’ man machiegni. Kinde ka kinde ne chunowa kwayo joma wakiya omiwa kar nindo. Bang’ yudo kar jot, ne wachako tedo. Oly ne kwayo sufuria mondo odhi oomgo pi e aora kata nam ma ne ni machiegni. Sama Oly timo mago, an to ne akwayo le mondo abargo yiend tedo. Mago duto ne kawo thuolo malach. Kinde ka kinde, ne wajonyiewo, kendo tedo gweno.

Bang’ chiemo ne waomo pi luok. Seche moko ne wanindo e jokon. Kane koth chwe, ne chuno ni wanind ka wayiengore e kor ot nikech jokondno ne chwer.

Kinde duto ne wajolendo ne jogo mokonyowa gi kar nindo. Kane wachopo kama wadhie, owetewa gi nyiminewa ma Jokristo ne rwakowa e yo mang’won ahinya. Mor ma ne gibedogo ka walimogi ne miyo wiwa wil gi pek ma ne wayudo e wuoth.

Kane wadak gi Joneno wetewa, ne wahero konyogi timo tije mag pacho. Mano ne miyo ginwang’o thuolo mar dhi kodwa e tij lendo. Ok nwagen ni mondo otimnwa gik moko e yo makende, kata yudo chiemo maber moloyo nyalo mar owetewa gi nyiminewa.

LIMO GRUBE MAN MABOYO

Ne walimo grube man kuonde maboyo ma owete ne rwakowa ka gichano gik mang’eny monego otim e jumano. Thuolo mar ‘yueyo ne tin’ ahinya. (Mari. 6:​31) Kinde moro, ne walimo owadwa moro gi jaode ma nogwelo jopuonjregi 40 mag Muma e dalagi mondo wakonygi e tayo puonjruogego. Oly gi nyaminwano ne opuonjore gi ji 20, ka an kod owadwano ne wapuonjore gi 20 modong’. Kane watieko gi japuonjore achiel, to machielo ne donjo mapiyo. Bang’e godiechieng’ nochunowa ng’ado puonjruok mondo watim chokruoge mag kanyakla, kae to bang’e ne wadhi nyime gi jopuonjre mag Muma. Tije mag odiechieng’ modichno, ne nyalo dhi nyaka bang’ sa ariyo motieno!

Kane walimo grup machielo, waduto ne wawuok sa ariyo okinyi ka wadhi lendo e gweng’  moro machiegni. Waduto ne warwako lewni moti. Bang’ wuoth maborno kwaluwo bunge, ne wachopo e alwora mar lendo chiegni sa auchiel odiechieng’. Ne warwako lewni maler kae to mapiyo wachako lendo ot ka ot. Udi ne nok to jolendo thoth. Omiyo ne walendo e alworano duto kuom dakika madirom 30. Kae to ne wachomo gweng’ machielo. Kane watieko lendo kanyo, ne wachako wuoth mabor mar dok pacho. Mokwongo, lendo e yo machalo kamano ne nyoso chunywa ahinya an gi jaoda. Ne watiyo gi seche gi teko mang’eny e wuoth to wakawo mana thuolo madirom sa achiel kende e lendo ot ka ot. Kata kamano owete gi nyimine e grubno ok ne ng’ur. Ne gimor amora.

Grup moro achiel miluongo ni Taviranambo ne yudore e wi got. Kuno, ne wanwang’o joot moro ma gin Joneno modak e ot achiel maok ong’adi. Ne nitie ot moro matin machiegni gi kanyo ma ne itiyogo kaka kar timo chokruok. Apoya nono, owadwa ma ne orwakowano nochako luongo gi dwol maduong’ niya: “Owete! ” Dwol nodwoko kowuok e wi got machielo ni: “Ero, iwacho ni? ” Owadwano nodwoke ni: “Jarit-alwora osechopo! ” Dwol machielono nodwoko ni: “Awinjo! ” Nenore ni wachno ne omed kowo ne joma ne odak kuonde maboyo ahinya. Mapiyo nono, ji nochako biro ma ka chokruok ne chakore, noyudo ji mokalo 100 osechopo.

PEK MAG WUOTH

E higa mar 1996 ne ochak oorwa e alwora moro machiegni gi Antananarivo, ma en piny motimo gode. Alworani bende ne nigi pek ma mage. Mtokni mag ting’o jowuoth ne nok ahinya. Ne ochannwa mondo walim grup moro ma ne ni Beankàna (Besakay), chiegni kilomita 240 kiwuok Antananarivo. Bang’ winjruok gi dereba, ne waidho lori moro matin ma ne dhi kuno. Ne nitie jowuoth mamoko 30 ei lori, e wiye kendo moko ne oliero e toke.

Mana kaka ne jatimore, mapiyo nono mtokano nokethore kendo nochunowa ni wawuoth gi tiendwa. Bang’ wuoth kuom seche mogwaro, lori moro maduong’ ne ojukowa. Noyudo osepong’ gi ji kod osike, kata kamano derebano ne oyie ting’owa. Ne waidho kata obedo ni ne wadhi chung’. Kane wachopo e aora moro, ne wayudo kiloso olalo. Kanyo bende ne walor ma wachako wuotho gi tiendwa mi wachopo e gweng’ moro matin kama jopainia moko makende nodakie. Kata obedo ni limbewano ne ok ochan, ne  walendo kodgi kuom ndalo moko kapod warito mondo olos olalono, kendo rito ka mtoka mating’o ji nyalo biro.

Mtoka moro nochopo bang’ juma achiel kendo ne wadhi nyime gi wuodhwa. Ndarano notimo bugni mang’eny. Ng’enyne, ne chuno ni walor mondo wadhir mtokano e pi machopo e chongwa kendo ne wasiko wakier mi wapodhi e pigno. Kinyne kogwen, ne wachopo e gweng’ moro matin kae to walor. Bang’ weyo ndara maduong’no, ne waluwo puothe michele kama pi motimo chuodho ne chopo e nungowa, ka wachomo kama wadhiye.

Nikech mano ema ne en limbewa mokwongo e alworano, ne wayiero mar lendo ne jogo ma ne tiyo e puothe mag michele ka bende wapenjogi ka ging’eyo kama Joneno odakie. To mano kaka ne wamor fwenyo ni joma ne walendonegigo, kare ni gin mana owetewa!

JIWO JOMOKO MONDO OTI NE NYASAYE KUOM THUOLOGI DUTO

Kuom higini mang’eny mosekalo, wasenwang’o mor kuom jiwo jomoko mondo bende oti ne Nyasaye kuom thuologi duto. Kane walimo kanyakla moro ma ne nigi jopainia mapile ochiko, ne wajiwo moro ka moro kuomgi mondo okony jalendo achiel odonj e tij painia. Kane wadok limogi bang’ dweche auchiel, kwan mar jopainia mapile nomedore mochopo 22. Nyiminewa ariyo ma gin jopainia nojiwo wuonegi, ma ne gin jodong-kanyakla mondo bende odonj e tij painia mapile. Jodong-kanyaklago bende nojiwo jaduong’ machielo mar adek mondo bende obed painia mapile. Bang’ kinde matin, jaduong’ mar adekno ne oket painia makende. Bang’e en kaachiel gi jaode ne gichako tij alwora. To nade jodongo ariyo mamokoka? Achiel en jarit-alwora, to machielo ochiwore e tij gero Ute Romo.

Pile wadwoko ne Jehova erokamano kuom konyowa nimar wang’eyo ni ok wanyal chopo gimoro amora gi tekowa wawegi. En adier ni kinde moko wabedo mool kendo matuwo, kata kamano, wamor ka waparo gik mabeyo mwasechopo e tijwa ne Nyasaye. Jehova ema osebedo kamiyo tichne dongore. Wamor nikech waseriwo tijni lwedo, ka sani watiyone kaka jopainia makende. Ee, ‘wasepuonjore’ geno kuom Jehova, ma e Jal ‘mamiyowa teko.’

[Weche manie ite mar 6]

‘Wasepuonjore’ geno kuom Jehova

[Map/​Piche manie ite mar 4]

Madagascar, ma bende iluongo ni Big Red Island, en mar ang’wen kuom chula duto madongo me piny. Lope rakwar, kendo kit gik mopogore opogore yudore e pinyno

[Picha manie ite mar 5]

Puonjo ji Muma en gima morowa ahinya

[Piche manie ite mar 5]

Wuoth en achiel kuom pek madongo ma ne waromogo