“Aseyudo Gima ne Agombo”

Kuom higini apar gabich, Emilia ne tiyo ne Nyasaye ka en painia mapile. Bang’e ne ochuno mondo owe bedo painia. Kata kamano kuom higini matin mosekalo, nosebedo koparo mor ma ne en-go e ngimane e kinde ma ne en painia, kendo mano nomiyo ochako gombo lendo e okang’ momedore.

Kata obedo kamano, tij andika ma Emilia ne tiyo, ne kawo thuolo mang’eny kendo mano ne maye mor ahinya. Chieng’ moro ka en gi jotich wetene, ne ohum kowacho kama: “Mad ne bed ni atiyo kuom seche matin! ” Jatende nowinjo gima nowachono kendo nopenje kabe en adier ni kamano e kaka ne odwaro. Emilia nonyise ni mano e gima nodwaro gi chunye duto. Kata kamano, mondo mano onyalre, ne nyaka oyud rusa kuom jatelo maduong’ nikech chike mag tich ne dwaro ni jotich duto ochiwre chuth ne tijegi. Nyaminwano noikore mar romo gi jatelo maduong’ kendo nolemo mondo obed gi chuny mokuwe koda chir.

Ka gin e romono, Emilia nowuoyo gi chir kendo e yor luor kokwayo mondo oti kuom seche matin. Nowacho ni, sama ok en e tich, otiyo gi thuolone mondo okony jomoko. Nowacho kama: “An achiel kuom Joneno mag Jehova, kendo akonyoga ji mondo obed gi winjruok maber gi Nyasaye. E ndalogi, timbe ji medo bedo maricho. Dwarore ni giyud puonj kod chike matayogi, to mano emomiyo rieko ma anyisogi kowuok e Muma konyogi ahinya. Ok daher ni gik matimo bang’ tich omona tiyo maber kaka dwarore, kata kamano pod daher mondo ayud thuolo momedore mar konyo ji mang’eny. Mano emomiyo daher tiyo kuom seche matin.”

Jatelo maduong’no nochiko ite maber kae to onyise ni en bende kinde moko nosebedo gi paro mar tiyo tij konyo ji. Kae to jatelono nowacho kama: “Kaluwore gi gik miwachogo, aparo ni ber ka amiyi thuolo mikwayono. Kata kamano donge ing’eyo ni mano biro miyo iyud chudo mapiny? ” Emilia nowacho ni ne ong’eyo mano kendo ni ne odhi keto ngimane obed mayot. Emilia nomedo wacho niya: “Gimaduong’ e ngimana en timo gimoro manyalo miyo ngima ji obed maber.” Jatelono nonyise kama: “Amor ahinya gi jogo machiwore e konyo jomoko.”

Onge ng’ato ang’ata e kambino ma noseyudo thuolo machalo kamano. Emilia sani koro tiyo mana kuom ndalo ang’wen e juma. To gima nowuoro, en ni chudo mare ne ok odwok chien kendo sani pod ichule mana kaka ne ichule chon kata obedo ni koro otiyo kuom seche matin! Owacho kama: “Aseyudo gima nagombo, omiyo koro sani anyalo bedo painia mapile kendo! ”

Be isegaparo mar timo lokruok e chenro magi mondo iyud thuolo mar bedo painia mapile, kata dok e migawo mar bedo painia mapile?

[Weche manie ite mar 32]

Jatelono nonyise kama: “Amor ahinya gi jogo machiwore e konyo jomoko”