Be Inyalo Paro?

Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

Be yie wi Samson ema ne miye teko?

Yie wi Samson ok ema ne miye teko. Yie wiyego nochung’ne winjruok makende ma ne en-go gi Jehova kaka Ja-Nazir. Winjruokno nodok chien kane Delila omiyo oliel yie wi Samson.​—4/15, ite mar 9.

Mana kaka irito adundo, gin gik mage adek manyalo konyowa rito chal mar chunywa?

(1)Chiemo. Mana kaka dwarore ni wachiem mondo adundowa ogoch maber, kamano bende, dwarore ni wayud chiemb chuny. (2) Timo gik matego del. Bedo gi kinda e tij lendo konyo e miyo chunywa ochikwa e yo maber. (3) Alwora ma wantie. Wanyalo geng’o gik manyoso chunywa kuom bedo machiegni gi Jokristo wetewa madewowa gadier.​​—⁠4/15, ite mar 16.

Kapo ni dichwo kata dhako manie kend odonjo e tim terruok, ang’o manyalo konyogi mondo gichak gigenre kendo?

Onego (1) giwach adier e kindgi giwegi; (2) gitim gik moko kanyachiel; (3) gilokre giwe timbegi machon; kendo (4) ging’e kaka ginyalo weyore richo, maok gimako sadha.​​—⁠5/1, ite mag 12-​15.

Ang’o momiyo jagol-twak ok onego oti gi Zaburi 116:15 kuom jal motho?

Ndikono wacho niya: “Tho jo maler mage ni gi nengo maduong’ e nyim Jehova.” Tiend wechego en ni Nyasaye kwano tho mar ogandane duto momakore kode kaka gima nigi nengo matek ahinya. Ok obi weyo ngang’ mondo oganda mare otiek dichiel e piny.​​—⁠5/15, ite mar 22.

Jokolpota ne gin jomage?

Kane pok ochopo higa 1931, “jokolpota” ne en nying miluongogo jogo masani iluongo ni jopainia.​​—⁠5/15, ite mar 31.

Moko kuom gik manyiso ni Muma ok en mana buk moro mondik gi dhano gin mage?

Muma oting’o weche mathoth mokor ma nochopo kare. Oting’o weche ma notimore adier, to ok sigendini mochwogi. Owinjore chuth gi sayans madier, kendo weche manie buge manie iye otudore adimba. Puonj mage pod nyalo tiyo maber e kindegi.​​—⁠6/1, ite mag 4-8.

‘Pinjeruodhigi duto’ miwuoyo kuomgi e Daniel 2:​44 ochung’ne sirkande mage?

Mago gin pinjeruodhi, kata sirkande, monyis gi fuon mopogore opogore e kido mar chuma ma Daniel nolero tiende.​​—⁠6/15, ite mar 17.

Kaluwore gi weche ma Muma nokoro, Loch Ingresa gi Amerka nobedo loch mar abiriyo mar piny karang’o?

Loch Ingeresa gi Amerka nochako tiyo kane giriwore kanyachiel e yo makende e kinde Lweny Mokwongo mar Piny Ngima.​​—⁠6/15, ite mar 19.

Ere kaka Nyasaye weyo richo ne jogo moloko chunygi, mi ok opargi kendo?

Jehova wacho kama kuom jogo ma oyiego: “Richogi ok anapar kendo ngang’.” (Yer. 31:34) Onyalo weyonegi richogi kokalo kuom misango mar rawar. Sama otimo kamano, Nyasaye ok ket richo mag ng’ato e pache mondo omi okume kendo.​​—⁠7/1, ite mar 18.

Ang’o momiyo wanyalo yie ni honni mondiki e Muma ne otimore adier?

Kinde mang’eny ne itimogi e lela to ok kamaro mopondo. Ne itimogi e yo mayot, ka onge gik mang’eny ma ne ochan chon. Ne itimogi mondo gikel duong’ ne Nyasaye, to ok ne dhano. Ne itimo honni mopogore opogore, kendo jo akwede ok ne nyal tamore ni honnigo ok notimore. Magi gin gik mamiyo wabedo gadiera chuth ni honni ma Muma wuoyoe ne otimore adier.​​—⁠8/1, ite mag 7-8.