Jip Mowuok “e Dho Nyithindo”

E dwe mar Desemba higa 2009, Kot Mamalo e Piny Russia nong’ado bura ma nomiyo tij Joneno mag Jehova e gweng’ Taganrog e piny Russia ochungi, kendo ne omagi Od Romo, ma gilando ni bugewa moko 34 ondik e yo ma jiwo sigu. Wach malichni ne oket e Websait moyangi mar Joneno mag Jehova kaachiel gi pichni moko mag Joneno moriwo koda nyithindo ma wachni ne omako nikech yie margi.

Dweche matin bang’ mano, Ofis Joneno mag Jehova man Russia noyudo katon moro mabende ne nigi barua e iye kowuok kuom joot moko man e gweng’ miluongo ni Queensland e piny Australia, ma noyudo osesomo wach bura ma nong’adno. Ne gindiko kama: “Ne owetewa mwageno, nyithindwa ma Larissa gi Cody ne owuoro ahinya yie motegno ma osiepegi man Russia nonyiso, koda tembe mane gikale. Ero Larissa gi Cody ondikonu kadi koda barupe moko, kendo waoronu mich matin-gi ma dwaher ni oter ne nyithindo man Taganrog, mondo ging’e ni e tung’ piny komachielo, nitie nyithindo moko ma bende omakore gi Jehova kendo parogi. Gioronegi mos koda hera mogundho.”

Bang’ yudo michgo, nyithindo ma ne ni Taganrog bende nondiko barua ma gigoyogo erokamano ne joot man Australia. Weche mag jipgo ma nowuok “e dho nyithindo mayom,” nomulo chuny Janeno moro ma ne tiyo e ofis mar Joneno ma Russia ma ondiko ne Larissa gi Cody kowacho kama: “Par ane lit ma nyithindo kaachiel gi jomadongo yudo sama okumgi e gimoro maok gitimo. Owete gi nyiminewa man Taganrog pok otimo gimoro marach to kata kamano ne omagi Od Romo margi. Mani osemiyogi kuyo ahinya. Gibiro yudo jip ahinya ka ging’eyo ni nitie ng’ato mawuok e tung’ piny komachielo ma parogi. Erouru kamano kuom nyiso hera kendo bedo gi chuny mar chiwo! ”​​—⁠Zab. 8:2.

Kuom adier wanie riwruok mar owete manie piny mangima, kendo hera ma wan-go e kindwa konyowa waduto mondo wanyagre gi tembe kod chandruoge mag ngima. Seche ma jong’ad bura mag kot pod ywarre kabe en adier ni buge Joneno mag Jehova jiwo sigu, nyithindwa to nyiso ling’ ling’ ni gidewo gik matimore ne jowetegi maok ging’iyo ni ng’ato wuok e piny kata e anyuola mane, kendo mano jiwo adiera mag weche ma Yesu nowacho ni: “Ma eri e ma nomi ji duto ong’e ni un jopuonjrena, ka un uheroru ng’ato gi ng’ato.”​​—⁠Joh. 13:35.

[Piche e ite mar 32]

Nyithindo man Russia (koracham) ma noyudo mich kowuok kuom nyithindo man Australia (korachwich)