Chiwo Margi Mabup Nopong’o Rem ma ne Nitie

NE EN higa mar 49 E Ndalowa. Petro, Jakobo, kod Johana​​—⁠ma kanyakla ne “oyiego ni gin sirini”​​—⁠nomiyo jaote Paulo gi Barnaba migawo. Kinde duto kane gilendo ne ogendini, ne onego giket e paro chal mar Jokristo modhier. (Gal. 2:⁠9, 10) Ne gichopo migawono e yo mane?

Barupe ma Paulo nondiko lero kaka nokawo wachno mapek. Kuom ranyisi, ne ondiko ne Jokristo ma ne ni Korintho kama: “To kuom wach chiwo michoko ni jo maler, un bende timuru kaka nachiko kanise mag Galatia. Chieng’ mokwongo bang’ Sabato, juma ka juma, ng’ato ka ng’ato kuomu opog dir gi ma Nyasaye osekonyego, okane yore, mondo choko kik tim kabiro. To ka achopo, naor jogo muyiego kod barupe, mondo giter chiwou Jerusalem.”​​—⁠1 Kor. 16:​1-3.

E barua mar ariyo ma Paulo nondikone kanyakla mar Korintho, nonwoyo kendo gimomiyo ne ichoko chiwo. Nowachonegi niya, ‘mondo giu mathoth okony rem margi mondo romruok obedie.’​​—⁠2 Kor. 8:​12-​15.

Kane Paulo ondiko ne Jokristo ma ne ni Rumi chiegni e higa 56 E.N., tij choko chiwo ne chiegni rumo. Nowacho kama: “To koroni adhi Jerusalem, kakopo ni jo maler. Nikech jo Makedonia gi jo Akaya noneno ni bernigi chiwo gimoro ni jo maler ma jochan man Jerusalem.” (Rumi 15:⁠25, 26) Bang’ kinde matin, Paulo nochopo migawo ma ne omiyeno, nimar kane odok Jerusalem kama nomakee, nonyiso Jatend Jo-Rumi miluongo ni Feliks niya: “Nabiro mondo ater mich ni ogandawa, kendo akel chiwo.”​​—⁠Tich 24:17.

Chuny maber ma Jokristo mokwongogo nonyiso, nenore maler kuom gima Paulo nowacho ne Jo-Makedonia. Nowacho ni ne “gihombowa ahinya kuom wach ng’wononi mondo ginywak kodwa tich mar konyo jo maler.” Jaote Paulo nojiwo Jokristo ma ne ni Korintho mondo oluw ranyisi maberno. Nowacho kama: “Ng’ato ka ng’ato mondo ochiw kaka oseparo e chunye; ok mar ng’ura, kata mar achuna: nikech Nyasaye ohero jachiwo mamor.” Ang’o ma nojiwo kanyaklano mondo onyis chuny mar chiwo? Gimaduong’ ma ne ojiwogi ne ok en mana “romo chan mar jo maler” kende, to bende ne en “goyo erokamano mathoth ni Nyasaye.” (2 Kor. 8:4; 9:⁠7, 12) Wan bende onego wabed gi paro machalo kamano sama wagolo chiwo magwa. Jehova Nyasaye biro gwedho gadier chuny maonge guondo kendo mang’won machalo kamano​​—⁠kendo gweth mage miyo ng’ato mwandu madier.​​—⁠Nge. 10:22.

 [Sanduk e ite mar 9]

Kaka Jomoko Yiero Golo Chiwo Ne Tij Piny Mangima

Mana kaka e kinde jaote Paulo, ji mathoth ‘kano’ tenge, kata keto e bajet pesa moko mondo gichiw e sanduge mondik ni “Tij Piny Mangima,” mayudore e kanyaklagi. (1 Kor. 16:2) Dwe ka dwe, kanyaklago oro pesago ne ofis mar Joneno mag Jehova matayo tij lendo e pinygi. Chiwo mag pesa bende inyalo oro achiel kachiel kitiyo gi nying riwruok mopwodhi ma Joneno mag Jehova tiyogo e pinyu. Mondo ing’e nying riwruok mopwodhi ma Joneno mag Jehova tiyogo e pinyu, yie itudri gi ofis mar Joneno mag Jehova matayo tijgi e pinyu. Adres mar ofisno inyalo yud e intanet e www.pr418.com. Yore ma ng’ato nyalo gologo chiwo gin magi:

CHIWO MIORO ACHIEL KACHIEL

• Chiwo mag pesa kata mwandu mamoko ma nengogi tek.

• Ndik barua bende manyiso ni pesa kata gik miorogo gin chiwo.

CHIWO MIBIRO DWOK KENDO

• Ng’ato nyalo chiwo pesa mondo otigo e tij piny mangima, to ibiro dwokne bang’e kodwarogi.

• Ndik barua manyiso ni chiwono en mibiro dwokoni bang’e.

CHIWO MOCHAN

Mopogore gi golo pesa kaka mich kod mwandu mamoko ma nengogi tek, nitie yore mamoko minyalo gologo chiwo mondo okony tij Pinyruoth mitimo e piny mangima. Yorego ondik piny kae. Ka diher tiyo gi achiel kuom yoregi, yie ikwong itudri gi ofis matayo tije lendo e pinyu mondo ing’e yore moket piny kae monego itigo. To nikech chike matayo wach golo osuru opogore opogore, en gima owinjore mondo inon kuom joma olony e weche mag osuru kapok iyiero yo maberni mondo igolgo chiwo.

Insuarans: Inyalo tiyo gi achiel kuom nyinge riwruoge mopwodhi ma Joneno mag Jehova tiyogo, kaka riwruok mabiro yudo chudo moa kuom chenro mar Insuarans mar ngima kata penson mari bang’ kiseritaya.

Akaunt mag Bengi: Akaunt mag bengi, kalatese manyiso pesa mokan, kata akaunt ma ng’ato oyawo mokanoe pesa mobiro tiyogo bang’ ka oseritaya, kata michulo ka ng’ato otho, inyalo ndikie nying riwruok mopwodhi ma Joneno mag Jehova tiyogo, kaluwore gi chenro mar bengi manie pinyu.

Stok kod Bond: Stok kod bond inyalo chiw kaka mich ne nying riwruok ma Joneno mag Jehova tiyogo, mondo riwruok mar Joneno mag Jehova ema oyud chudo kapo ni wuon-go otho.

Ute gi Puothe: Ute koda puothe minyalo ng’iew, inyalo chiw ne nying riwruok ma Joneno mag Jehova tiyogo, to kapo ni en ot kata puodho ma wuon-go pod odakie, onyalo dhi nyime dakie nyaka chieng’ otho.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata jal moyiero, ema ibiro mi chudo moro higa ka higa e ngimane duto. Kae to osuru ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi achiel kuom riwruoge ma Joneno mag Jehova tiyogo kokalo kuom wil mondiki kaluwore gi chik sirkal, kata ndiko nying riwruokno ni ema biro yudo chudo kuom chenrono. Chenrono nyalo miyo odwok chien osuru ming’ado jal mogolo chiwono.

Kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. Mondo okony jogo magombo chiwo kony ne tij piny mangima ma Joneno mag Jehova timo kokalo kuom chiwo mochan, osego brosua e dho-Ingresa kod dho-Spain miluongo ni Charitable Planning to Benefit Kingdom Service Worldwide. Ne ogo brosuano mondo okony e lero yore mopogore opogore ma mich migolo kaka chiwo, inyalo chiw gie sani kata bang’e ka ng’ato osetho. Weche moket e brosuano, sa moro ok nyal luwore gi chenro magi kaluwore gi weche mag osuru kata chike manie pinyu. Bang’ somo brosuano kendo tudore gi joma olony gi chik sirkal korka weche osuru, ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osuru mang’eny nikech timo kamano. Ka brosuano yudore e piny midakie, inyalo kwayo jagoro mar kanyaklau omiyi kopi.

Mondo iyud weche momedore inyalo tudori gi ofis miluongo ni Charitable Planning Office. Bende inyalo ndiko barua kata goyo simo ne ofis mar Joneno mag Jehova matayo tij lendo e pinyu.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707