Penjo Moa Kuom Josombwa

Be weche Yesu mayudore e Mathayo 19:⁠10-​12 nyiso ni jogo mayiero dong’ maok gidonjo e kend noyudo mich mar dong’ kamano e yor hono?

▪ Ne ane chal ma ne nitie ma nomiyo Yesu owacho wechego e wi joma pok odonjo e kend. Kane Jo-Farisai obiro ire mochako wuoyo kode e wi wach ketho kend chuth, Yesu nowacho maler chik ma Jehova oketo e wi wach kend. Kata obedo ni Chik noyie mondo dichwo omi chiege barup ketho kend chuth kapo ni ofwenyo ni chiege otimo “tim moro makuodo wich”, mano ok e kaka ne onego obed chakre chon. (Rapar 24:​1, 2) Kae to Yesu nowacho kama: “Ng’ato ma oriembo chiege, mak mana kuom terruok, mi okendo machielo, oterore.”​​—⁠Math. 19:​3-9.

Kane giwinjo gima Yesu nowachono, jopuonjrene nowacho kama: “Ka wach dichwo kod chiege en kama, kara ok owinjore kendo.” Kochiwonegi dwoko, Yesu nokonegi niya: “Ji duto ok nyal rwako wachni, to mana jogo momi. Nikech nitie ji mabuoch ma nonywol kamano nyaka a e i minegi; kendo nitie buoch moko ma ji ema oseroyo; kendo nitie jo moko mabuoch ma oseroyore kendgi giwegi nikech pinyruodh polo. Ng’at ma nyalo rwako wachni, mondo orwake.”​​—⁠Math. 19:⁠10-​12.

Buoch masie ne gin joma onyuol ka gin kamano, kata ma noyudo masira moro mi gibedo buoch, kata ne gibedo kamano nikech ne orogi. Kata kamano, ne nitie joma noyiero dak ka gima gin buoch kata obedo ni ne ok gin kamano. Kata obedo ni ne ginyalo donjo e kend, ne gibedo gi ritruok ma giweyo maok gidonjo e kend “nikech pinyruodh polo.” Mana kaka Yesu, ne giyiero dong’ maok gikendo mondo giyud thuolo momedore ne tije Pinyruoth. Ok ne onyuolgi gi mich mar dak maok gidonjo e kend, kata ne ok omigi mich machalo kamano. Gin giwegi ema giyiero mar dong’ maok gidonjo e kend.

Komedo jiwo gima Yesu nowacho, jaote Paulo nolero ni kata obedo ni Jokristo duto nyalo tiyo ne Nyasaye e yo moyiego, joma pok odonjo e kend to ‘ochung’ motegno e chunygi’ mar dong’ kamano, nyalo ‘timo maber moloyo.’ E yo mane? Joma nie kend nyaka ti gi thuolo koda tekogi moko e moro kendo rito joma gikendorego. To komachielo, Jokristo mapok odonjo e kend nyalo tiyo gi thuologi malach e tij ruoth ka ok gin gi ting’ mag kend. Gineno chal margino kaka ‘mich’ moa kuom Nyasaye.​​—⁠1 Kor. 7:⁠7, 32-​38.

Kuom mano, Ndiko nyiso maler ni Jakristo ok yud mich mar dong’ maok odonjo e kend nikech hono moro motimne. Kar mano, en owuon ema onyago kido mar dong’ kamano, mondo ochop tije Pinyruoth maonge gima chocho pache. Ji mang’eny oseng’ado e chunygi mar dong’ maok gidonjo e kend nikech wach Pinyruoth, kendo nyalo bedo maber ka jomoko bende ojiwogi sama gitimo kamano.