Be Inyalo Paro?

Be isesomo e yo matut gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

Ere kaka wanyalo geng’o mach ma lep nyalo moko?

Onego wanon chunywa. Kar wuoyo marach e wi owadwa, donge diber ka wanono gimomiyo wawuoyo kuome kamano? Be dibed ni wawuoyo marach kuome ka watemo nyiso ni wan ema wabeyo moloye? E wi mano, wuoyo marach e wi jomoko nyalo mana medo ketho chal mantie.​​—⁠8/15, ite mar 21.

Ere kaka Nyasaye weyo ne ng’ato richone, mi wiye wil gi richono ka ng’atno oloko chunye gadier?

Jehova wacho kama kowuoyo e wi jogo mohero: “Richogi ok anapar kendo ngang’.” (Yer. 31:34) Oweyo richo kokalo kuom misango mar rawar. To kotimo mano, Nyasaye ok nochak opar richogo, tiende ni ok obi kawo okang’ mar kumo ng’atno nikech richo mosekalogo.​—10/1, ite mar 32.

Kaka odiechieng mar Jehova medo kayo machiegni, gin gik mage machiegni timore?

Ibiro chiw milome ni “Kuwe nitie, kendo weche ni kare.” Ogendini biro monjo kendo ketho Babulon Maduong’. Ibiro monj oganda Nyasaye. Lweny mar Har–Magedon biro chakore kae to bang’e ibiro wit Satan gi jochiendene e abiso.​​—⁠9/15, ite mar 4.

Bedo ni ok wang’eyo odiechieng’ ma giko nobie, konyowa nade?

Bedo ni ok wang’eyo odiechieng’ ma giko nobie, miyowa thuolo mar nyiso gima nie chunywa. Mano miyowa thuolo mar miyo chuny Nyasaye obed mamor. Ojiwowa mondo watine Jehova gi chuny mar chiwruok kendo keto genowa chuth kuom Nyasaye koda Wachne. To moloyo, omiyo tembe ma wakale sani omed tego yiewa.​​—⁠9/15, ite mag 24-​25.

Ere kaka Nyasaye biro loso gik moko obed manyien kendo?

Nyasaye chiegni kelo piny manyien makare ma joma oyiero hero Nyasaye kod dhano wetegi ema ibiro yienegi mondo odagi e pinyno. (2 Pet. 3:13) Ka en Ruoth ma Nyasaye oseyiero e polo, Yesu biro loso gik moko obed manyien. (Isa. 33:24; Fwe. 21:4)​—⁠10/1, ite mag 7-8.

“Sulue abiriyo” manie lwet Yesu korachwich e Fweny 1:⁠16, 20 ochung’ne jo mage?

Gichung’ne jodongo mowal gi roho, kendo weche mag ndikono pod inyalo tigo kuom jodongo mamoko duto manie kanyakla.​​—⁠10/15, ite mar 14.

Moko kuom puonj mag Muma makonyowa ng’eyo paro ma Nyasaye nigo kuom wach madho ndawa gin mage?

Nyasaye dwaro ni wami ngima luor. (Rapar 5:17) Odwaro ni wahere kendo waher jowetewa. (Mari. 12:⁠28-31) Odwaro mondo wakwed timbe maok ler. (2 Kor. 7:1)​—⁠10/1, ite mar 15.

Yesu nonyiso nade chuny mar bolruok kaka oler e ndiko mar Isaiah 50:​4, 5?

Ndikogo wacho ni jalo ma nigi ‘dho jo mopuonjore,’ ok bi ‘loko dieng’eye.’ Yesu nonyiso chuny mobolore kendo noketo pache ahinya kuom gigo ma Wuon mare nopuonje. Ne oyie kendo ikore chuth mar yudo puonj mowuok kuom Jehova, koneno ranyisi ma Jehova ne ketone mar nyiso bolruok sama okecho oganda dhano ma joricho.​​—⁠11/15, ite mar 11.

Gin ber mage mwayudo ka wanyiso jomoko ng’wono?

Ka wanyiso dhano wetewa ng’wono, wamedo ng’eyo Nyasaye e yo maber moloyo, to mano medo miyowa mor. (1 Joh. 4:7; Math. 5:⁠7, 8) E wi mano, Jehova kawo mapek timbe mag ng’wono ma wanyiso jomoko. (Nge. 19:17)​—10/1, ite mag 19-20